Mase Taudia ese Mauri Taudia Idia Durua Diba, A?

TAMBA, tau matamata ta West Africa dekenai, be kahirakahira sikuli ena eksam do ia karaia.a Iena sinana ia ura idia mase vadaeni varavara taudia edia heduru ia abia be namo, eksam dekenai ia kwalimu totona. Palermo, Sicily ai, nega momo turist taudia be gara gabuna idia vadivadi henia, mase taudia edia tauanina idia itaia totona​—⁠unuseniai idia atoa mase taudia edia tauanina be taunimanima ese muramura haida amo idia hagoevaia dainai, idia dika lasi o bodaga lasi. Haida idia laloa, Dirava be unai mase taudia amo mauri taudia ia gimaia. Lagani ta ta ai taunimanima be U.S.A., New York ena West kahanai ia noho taoni ta ladana, Lily Dale, idia vadivadi henia​—⁠unuseniai be babalau taudia momo idia noho. Vadivadi taudia idia laloa unai babalau taudia amo edia varavara bona turadia, idia mase vadaeni taudia unai, idia hereva henidia.

Tanobada hegegemadai, momo idia laloa mase taudia ese mauri taudia idia durua diba. Dahaka oi laloa? Reana haida ese unai bamona lalohadai be oi dekenai idia hadibaia o emu dekena taudia haida be unai lalohadai idia abia dae. Momokani, ita ura dikadika iseda ruma bese o turana, idia mase vadaeni taudia unai, ita itaia lou. Babalau taudia idia gwau ita do idia durua mase taudia ita itaia lou totona. Niusepapa ta (Time) ese babalau hahine ta ena hereva be inai bamona ia herevalaia, lauma taudia “idia hegaegae heduru idia noia taudia idia durua totona.” Unai be momokani, a? Mase taudia ese mauri taudia idia durua diba, a? Baibel ena haere dekenai do oi hoa.

Mase Taudia Idia Mauri Noho, A?

Baibel ese mase taudia dekenai ia vara karana ia herevalaia namonamo. Hadibaia Tauna 9:5 ena hereva mani oi laloa, ia gwau: “Mauri taudia idia diba do idia mase, to mase taudia be gau ta idia diba lasi. Idia be mai edia ahuna lasi, bona taunimanima ese mase taudia idia laloaboio momokani.” Mase taudia be mai edia hemami, a? Siri 6 ia haere: “Inai mase taudia edia lalokau, edia badu, bona edia mama be idia ore momokani, bona tanobada dekenai idia karaia noho karadia ibounai edia huanai, be kara ta do idia karaia lou lasi.” Danu, siri 10 ia gwau: “Mase taudia edia gabu, oi lao gabuna, dekenai be kara ta lasi, laloa ta lasi, diba bona aonega ta lasi.” Hoa gauna be, Kara 2:31 ese ia hahedinaraia Iesu Keriso ia mase neganai, ia be mase guria gabuna dekenai nega sisina ia noho.

Iesu ia mauri noho neganai taunimanima momo ia durua, to ia diba ia be do ia mase. Anina be unai guria gabunai ia noho neganai, taunimanima do ia durua noho, a? Lasi. Ia ese ena mase karana be inai bamona ia hahegeregerea, ia gwau: “Hanuaboi do ia mai neganai, tau ta do ia gaukara diba lasi.” (Ioane 9:⁠4) Iesu ia diba taunimanima idia mase neganai, idia be ma haida idia durua diba lasi.

Danu, Iesu be hereva haida ia gaukaralaia mase ena anina ia hahedinaraia totona. Ena turana Lasaro ia mase neganai, Iesu ia gwau: “Lasaro be ia mahuta noho.” (Ioane 11:​11-​13) Momokani, mahuta tauna ta be ita ia durua diba lasi. Ia be gau ta ia diba lasi bona kara ta ia karaia diba lasi.

Mase Taudia be mai Edia Lauma Bona Ia Mase Diba Lasi, A?

Baibel ia gwau Dirava ese taunimanima bona animal edia lalonai mauri siahuna, o lauma, ia atoa, unai amo idia hahodi bona idia mauri diba. Unai mauri siahuna ese tauanina ia durua ia mauri noho totona. To, taunimanima bona animal edia hahodi​—⁠Dirava ese ia henia mauri siahuna​—⁠ia doko neganai, idia mase. Idia be gau ta idia diba lasi.​—⁠Genese 3:19; Hadibaia Tauna 3:​19-21; 9:⁠5.

Reana haida idia henanadai, ‘To, sivarai momo ese idia hahedinaraia, taunimanima be mase taudia ida idia herevahereva, mase taudia edia gadona idia kamonai, o mase taudia idia itaia, unai be edena bamona?’ Tano momo dekenai, taunimanima be unai bamona sivarai idia abia dae. Unai sivarai ese momo idia hagoadaia babalau taudia edia heduru idia tahua totona​—⁠idia laloa babalau taudia ese mase taudia idia hereva henia diba.

Unai bamona sivarai be momokani, a? Bema oibe, vadaeni unai ese ataiai ita herevalaia Baibel siri edia hereva ia hakoikoia, ani? Keriso Iesu ia gwau, Dirava ena Hereva be hereva momokani. (Ioane 17:17) Hereva momokani be sibona ia hakoikoia diba lasi. Oibe, Baibel be lalohadai maorona ia gwauraia, ia hahedinaraia mase taudia be mauri taudia idia durua diba lasi. Guna mase taudia edia heduru ia tahua tauna ta ena sivarai be Baibel ese ia gwauraia. Unai sivarai ita duahia neganai, hereva momokani do ita dibaia.

King ta ese Mase Taudia Edia Heduru Ia Tahua

Nega ta ai, Israela ena not kahanai tuari ia vara. King Saulo bona ena tuari taudia be kahirakahira Pilistia taudia do idia tuari henia. “Saulo ese Pilistia tuari taudia ia itaia, vadaeni ia gari bada, iena kudouna ia manoka momokani.” King Saulo be tomadiho momokani ia rakatania vadaeni dainai, nega momo Iehova be iena noinoi ia haerelaia lasi. Vadaeni Saulo be daika ena heduru do ia noia? Dirava ena peroveta tauna Samuela be ia mase vadaeni.​​—⁠1 Samuela 28:​3, 5, 6.

Saulo be Ene Doro ai ia noho babalau hahine ta ena heduru ia noia. Ia ese unai hahine ia noia, Samuela be mase amo ia boiria totona. Vadaeni, unai hahine ese lauma ta ia boiria. Bena unai lauma tauna, Samuela, ese Saulo ia hamaoroa tuari lalonai Pilistia taudia ese Saulo bona ena natudia do ia hamasea. (1 Samuela 28:​7-​19) Oi laloa unai be Samuela ena lauma tauna ta, a?

Mani oi laloa. Baibel ia gwau taunimanima “idia mase neganai tano ena kahu dekenai idia giroa lou” bona “idia ura do idia karaia gaudia be do idia doko.” (Salamo 146:⁠4) Saulo bona Samuela idia diba Dirava be babalau taudia edia heduru tahua karana ia taravatua. Oibe, matamanai Saulo be unai tano amo babalau karadia kokia karana ia gunalaia!​​—⁠Levitiko 19:⁠31.

Mani oi laloa. Bema Dirava ia badinaia tauna Samuela be lauma tauna ta bamona ia mauri noho, oi laloa ia be Dirava ena taravatu do ia utua bena babalau hahine amo Saulo do ia hereva henia, a? Ita diba, Iehova ia ura lasi Saulo ia hereva henia. Anina be, unai babalau hahine ese Siahu Ibounai Diravana ia doria mase tauna Samuela amo Saulo ia hereva henia totona, a? Lasi. Ia hedinarai goevagoeva, unai be Samuela korikorina lasi o Dirava ia abidadama henia peroveta tauna lasi. Ia be demoni dikana ta bona mase tauna Samuela ai ia lao.

Demoni be aneru​—⁠matamanai Dirava ena siahu idia dadaraia anerudia. (Genese 6:​1-4; Iuda 6) Idia be mauri taudia edia kara, toana, bona hereva idia itaia diba. Idia ura dikadika Baibel ena hereva idia hakoikoia. Unai dainai, Baibel ese ita ia hadibaia lauma dikadia ita hereva henia lasi totona! (Deuteronomi 18:​10-​12) Unai lauma dikadia be hari inai negai idia do mauri noho.

Unai dainai, hari ita itaia dahaka dainai momo idia gwau idia be mase taudia idia itaia bona edia hereva idia kamonai diba. Ena be haida idia itaia lauma dikadia be taunimanima idia durua namonamo bamona, to lasi, lauma dikadia be taunimanima idia koia noho.b (Efeso 6:​12) Danu, mani oi laloa: Iehova be lalokau Diravana bona ita ia laloa bada. Bema mase taudia idia mauri noho bona turadia o ruma bese taudia idia durua diba, ita gwau diba lalokau Dirava ese mase taudia hereva henia karana ia taravatua bona ia gwauraia “bodaga” be maoro, a? Lasi! (1 Petero 5:⁠7) Vadaeni, haere maorona be edeseni ita davaria diba?

Mauri Taudia Bona Mase Taudia ​—⁠Heduru Maorona

Ita laloparara mase taudia be mauri taudia idia durua diba lasi. Mase taudia edia heduru tahua karana be kerere; unai kara be Dirava ena taravatu utua karana, bona dala ia kehoa demoni taudia ese ita idia biagua totona.

Baibel ia gwau eda Havaraia Tauna, Iehova, amo heduru ita tahua be gau badana. Ia ese mase amo ita ia hamauria diba. (Salamo 33:​19, 20) Hari inai negai, Iehova be ita ia durua diba. Unai dainai, heduru maorona ia henia diba, Ia be babalau taudia bamona lasi.

Matamanai ita herevalaia tauna, Tamba, be gabeai ia laloparara, babalau taudia edia hereva be koikoi to Iehova ena hereva be momokani. Babalau taudia idia gwau, bema Tamba ese idia mase vadaeni tubudia dekenai boubou karadia ia karaia lasi, ia be sikuli ena eksam dekenai do ia kwalimu lasi. Tamba be Iehova ena Witnes taudia ida Baibel ia stadilaia matamaia. Ia laloparara mase taudia be idia mahuta noho bamona, bona lauma dikadia be tubudia edia kara o hereva idia tohotohoa. Herevana Tamba ena sinana ese ia ia doria babalau taudia edia heduru ia tahua be namo, to Tamba ia ura lasi, bona ena sinana ia hamaoroa, “Bema eksam dekenai lau feil, vadaeni vaira lagani ai do lau hekwarahi lau kwalimu totona.”

Vadaeni dahaka ia vara? Ia be eksam dekenai ia kwalimu! Iena sinana ia hoa, babalau taudia abidadama henia karana ia hadokoa, bona mase taudia dekenai boubou gaudia henia karana ia herevalaia lou lasi. Tamba ia diba, Iehova ia ura lasi inai bamona ita karaia: “Taunimanima ese mase taudia edia lauma do idia nanadaia, idia ese mauri taudia do idia durua totona.” (Isaia 8:​19) Baibel stadilaia karana ese Tamba ia durua dainai, ia laloparara ta be Dirava ena taravatu ia laloa bada bona moalelaia neganai, ia be do ia kwalimu.​​—⁠Salamo 1:​1-3.

To, eda turadia bona ruma bese taudia idia mase neganai be edena bamona? Dahaka helaro ia noho? Iehova ia gwauhamata, ia be mauri taudia bona guria gabuna dekenai idia mahuta taudia do ia durua. Peroveta tauna ena hereva, Isaia 26:19 ai, mani ita laloa, ia gwau: “Mase taudia be do idia mauri lou, edia tauanidia be do idia toreisi lou. Guria gabudia dekenai idia mahuta noho taudia, be do idia noga, bona mai moale danu ane do idia abia.” Momokani, mase taudia do idia mauri lou.

Mani oi laloa! Guria gabunai idia mahuta taudia bilioni momo be do idia mauri lou! Momokani, Baibel ese ia hahedinaraia Iehova “ia ura dikadika” mase taudia ia hamauria lou. (Iobu 14:​14, 15, BHğ) To oi laloa unai gwauhamata ena anina do ia vara momokani, a? Iesu Keriso be unai helaro ia abia dae, badina ia gwau Iehova ena matanai mase taudia ibounai be idia mauri noho bamona.​​—⁠Luka 20:​37, 38, NW.

Oi danu be unai helaro oi abia dae, a?c Vadaeni Baibel amo diba maorona oi abia noho. Baibel ese oi do ia durua oi abia dae Iehova be mauri taudia bona mase taudia ia durua diba, bona Iena gwauhamata herevadia be “taunimanima ese idia abia dae diba bona idia be momokani.”​​—⁠Apokalupo 21:​4, 5.

[Footnotes]

[Blurb on page 11]

Momokani, ita ura dikadika iseda lalokau taudia, idia mase vadaeni taudia unai, ita itaia lou

[Picture on page 12]

Ia mase peroveta tauna Samuela be ia hedinarai lou bena King Saulo ia hereva henia, a?