Guna, Oi be Iehova ena Orea Lalonai Oi Noho A?

TAUHAU ta ia hemarai bada bona ia lalohisihisi bada. Ena dabua idia hedare, to guna idia be dabua namodia. Idia hahedinaraia hari ia ogogami. Ia ese ena hanua korikorina ia laloa neganai ia lalohisihisi bada, badina ia diba ia lebulebu bona ena tamana amo ia abia ahuna, ia ura ia abia haraga ahuna unai, ia halusia kava. Ia hitolo danu, unai dainai ena lalohisihisi ia bada bona ena tamana ia laloa momo. Ia diba, hanua lalonai ena tamana ena hesiai taudia edia noho ese sibona ena noho ia hereaia! Ia ura dikadika edia gabu ai ia noho!

To, bema ena tamana dekenai do ia lou lao, do ia abia dae lou, a? Ena tamana ena hebogahisi karana be hemarai dalana ai ia hadikaia dainai, ia laloa ena tamana be mai ena ura bada ida ia do ia hanamoa lasi bona ena ruma lalonai do ia abia dae lasi. To, ia ura dikadika do ia lou lao ena tamana dekenai.

Hari tauhau be ena tamana ena lalona ena mamina ia diba lasi! Tamana ena ruma dekenai ia lao henia neganai ia hoa maragi lasi! “Daudau dekenai ena tamana ese ia itaia, vadaeni ia bogahisihisi henia, ia heau lao, ena aiona dekenai ia rosia, ia kisi henia.”​—Luka 15:20.

Ia raka boio tauhauna bamona, oi ese oiemu Tamana, Iehova, bona ena orea oi rakatanidia a? Hari, oi danu oi ura emu Tamana do oi lou henia a?

Iehova ena orea idia rakatania taudia momo be unai raka boio tauhauna hegeregerena lasi. Idia momo be sisina sisina idia hure oho, vanagi be kone amo sisina sisina ia hure oho bamona. Gau idauidau ese haida idia hametaudia dainai lauma gaudia idia laloa momo lasi; gaudia be inai: moni dekenai idia dabu, ruma bese lalonai idia vara hekwakwanai, gorere, o noho namona idia tahua. Ma haida be Keristen kongregesen lalonai idia noho taudia haida edia hereva o kara dainai idia hekwakwanai, eiava Iehova ena orea idia rakatania badina orea ena lalohadai Bible ena hereva ta dekenai idia abia dae diba lasi. Ma haida danu idia lalo-hesiku badina idia laloa negana lalonai hari tanobada oromana dikana be ia doko lasi, unai dainai idia raka oho.

Bema guna oi be Iehova ena orea lalonai oi noho, to hari oi noho lasi, reana unai badina ta dainai oi noho lasi. Herevana badina be dahaka, to hari be nega namona dala oi tahua oi lou mai totona, ani?​—Mataio 18:​12-14.

Ta ese Oi Ia Hahekwakwanaia A?

Ita taunimanima ita goevadae lasi momokani dainai, ita diba ita ta ta eda kara be idauidau dainai nega ta ta ai do ita badu heheni. Unai ese haida ia hahekwakwanaia diba. Ma haida idia hekwakwanai badina idia matauraia bada tauna ta ia kara kava eiava Keristen lasi karana ta ia karaia dainai.

Unai bamona ia vara oi dekenai a? Bema oi hekwakwanai, Iehova ese oi ia hahekwakwanaia lasi. (Galatia 5:​7, 8 itaia.) Ma ta ena kara dainai Iehova ita rakatania be mai anina a? Lasi; namona be mai eda abidadama ida Iehova ena hesiai gaukara ita karaia, badina ita diba Iehova ia diba dahaka ia vara noho bona mai ena hebogahisi ida ita do ia kara henia.​—Kolose 3:​23-25.

Nega taina daudau ia hanai vadaeni murinai, haida idia davaria, guna ia hahekwakwanaidia gauna be hari idia laloa momo lasi, o idia laloaboio vadaeni. Eiava ia vara gauna be mai edia lalo-manau ida idia laloa lou neganai, reana idia lalo-parara kerere be idia sibodia edia. Nega momo ia be unai bamona bema idia henia sisibana o matahakani dekenai ia lalo-tamona lasi eiava ia dainai ia hekwakwanai. Ia laloa lou neganai, reana ia diba idia lalokau henia dainai bona ena namo idia tahua dainai unai sisiba idia henia. (Heberu 12:​5-11) Unai dainai namona be aposetolo Paulo ena sisiba ita badinaia! Ia gwau: “Umui emui imana idia manoka neganai do umui abia isi, do umui ha-aukaia. Bema emui tuina idia heudeheude neganai do umui hagoadaia. Bona emui aena edia raka dala do umui hamaoromaoroa. Unai dekena amo aena dika taudia edia bero do idia habadaia lasi, to do idia namo lou momokani.”​—Heberu 12:​12, 13.

Hahediba Herevana ta Oi Abia Dae Lasi A?

Reana Iehova ena orea oi rakatania badina ena lalohadai Bible ena hereva ta ena anina dekenai oi lalo-tamona lasi. Dirava ese Aigupito amo ia hamauridia Israel taudia ese Dirava “ena kara idia lalodiaboio haraga, ena sisiba idia naria lasi.” Idia hegeregeredia, reana oi laloa Dirava ena orea ese hereva ta ena anina ia gwauraia kerere dainai, emu lalona oi hadaia haraga do oi rakatania. (Salamo 106:13) Reana unai hereva ena anina idia hamaoromaoroa vadaeni​—ena anina idia haidaua eiava Dirava ena lauma ena hahekau amo Bible ena siri ma haida idia tahua bona ena anina idia hamomokania. Dala namona be Iehova ena orea lalonai ita noho, Iehova ita naria gau ibounai hamaoromaoroa totona, ani?

Namona be ita laloatao, nega ibounai Iehova be orea tamona amo ia gaukara. Hari inai nega lalonai, “hesiai tauna mai ena kamonai bona mai ena kara maoromaoro” ese lauma aniani na “aniani neganai” ia henia. Hari hesiai tauna ‘ena biaguna ia mai neganai ia davaria unai bamona ia karaia noho.’ (Mataio 24:​45-47) To, hari inai nega lalonai daidia idia diba Biaguna ia ginidae vadaeni? Bona daidia ese unai gaukara idia karaia? Iehova ena Keristen witness taudia edia orea lalonai idia vareai taudia mo.

Hutuma ese Iesu idia rakatania neganai, aposetolo Petro ia gwau: “Lohiabada e, ai be daika dekenai do ai lao? Mauri hanaihanai herevadia be oi dekenai idia noho.” Petro ia diba goevagoeva Iesu be Mesia. Unai dainai hahediba taudia hutuma idia gwau Iesu ena hereva be metau neganai, Petro ia diba “mauri hanaihanai herevadia” edia badina ia rakatania be aonega karana lasi, badina be gabeai Iesu ese edia daradara do ia kokia o edia lalohadai kererena do ia hamaoromaoroa. (Ioane 6:​51-68; ma Luka 24:​27, 32 itaia danu.) Hari inai nega lalonai unai bamona ia vara danu, Iehova ese ena hesiai taudia be hereva momokani ena dala dekenai ia hakaudia lao bona ena anina be sisina sisina ia hahedinaraia neganai.​—Hereva Lada-isidia 4:18.

Mani Oi Giroa Lou Hari

Peroveta Ieremia ia noinoi, ia gwau: “Iseda dala do ita tohoa bona do ita tahua, bena Iehova do ita lou henia.” (Rohe-ahu Bukana 3:40) Reana haida idia ura lasi, badina idia laloa kongregesen taudia do idia abidia dae lasi reana. To ia raka boio natuna be ena tamana dekenai ia lou lao neganai, dahaka ia vara? Ena tamana ia gwau: “Ita moale bada herea. Badina be inai emu tadina ia mase, to ia mauri lou vadaeni, ia boio, to ita davaria vadaeni.” (Luka 15:32) Idia ura momokani Iehova ena ura do idia karaia taudia be ‘Iehova idia lou henia’ neganai, kongregesen taudia do idia moale bada herea.​—Luka 15:7 itaia.

Keristen kongregesen ese unai bamona taudia edia lou mai idia naria kava lasi. Iesu ena parabole lalonai, tauhau be ia lou lao neganai, “daudau dekenai ena tamana ese ia itaia” neganai, ena tamana ia heau lao ia hedavari henia totona. Unai hegeregerena, Iehova ena Witness taudia idia laloa, idia ta ta edia maduna be Iehova ena orea lalonai guna idia noho taudia idia tahudia bona idia durudia orea lalonai do idia vareai lou totona.

Bema ta be Iehova ena orea murimurinai ia noho neganai kara dika badana ta ia karaia, ia be edena bamona? Eiava bema ta be orea lalonai ia noho neganai Keristen lasi karana ta ia karaia bena orea murimurinai idia atoa, to hari unai kara ia rakatania vadaeni, ia be edena bamona? Kongregesen ena elda taudia idia diba edena bamona hebogahisi dalana ai do idia durua diba, ena dala be Iehova vairanai do ia hamaoromaoroa totona. Unai dainai bema ta ia ura ia lou mai bona Dirava ena ura hegeregerena do ia noho, namona be ena ura ia gwauraia hedinarai kongregesen ena elda taudia dekenai. “Iehova ia gwau: ‘Umui mai bona gau iboudiai ita hamaoromaoroa. Ena be emui kara dika be kakakaka bamona, to kurokuro ai do lau halaoa sinou bamona; ena be idia be dabua kakakaka bamona, to mamoe huina bamona ai do lau halaoa.’ ”​—Isaia 1:18.

Iseda Tamana, guba ai ia noho, be mai ena hariharibada bona mai ena hebogahisi bada! Danu ia be mai ena haheauka bona ita ta ta ia laloa! Momokani, ia ura lasi do ita mase inai nega dikana do ia ore neganai. (2 Petro 3:9) Iehova ese ena orea taudia, idau negai idia noho taudia, ia noidia, ia gwau: “Lau dekenai umui giroa, bena umui dekenai do lau giroa.” Iehova be unai bamona ia do noinoi.​—Malaki 3:7.

Nega ia ore gwauraia, unai dainai namona be oi kara haraga. Iehova ena orea taudia ida, ‘Dirava ena taravatu idia ura henia taudia ese idia abia mainona’ oi moalelaia. Salamo tauna ia gwau: “Gau ta ese do ia hahekwakwanaidia diba lasi.” (Salamo 119:165) Emu kudouna lalonai, Iehova ena taravatu oi ura henidia a? Bema oi be Dirava ena gwauhamata hesiai tauna ta, oi be unai gwauhamata oi karaia badina iena taravatu oi ura henia dainai. Gau bada hereana be inai: Iehova oi tura henia lou. Oi dadaraia lasi. Inai oi laloa namonamo bona oi gurigurilaia. Bema Iehova ena orea taudia edia lalo-tamona bona edia hebogahisi oi reaia dainai oi lalohisihisi noho, nega ia do noho Iehova ena orea dekenai do oi giroa lou totona. To, namona be oi kara haraga.