‘Iehova be Hebogahisi Bona Hariharibada Diravana’
“Lau be Lohiabada. Lau Lohiabada be bogahisihisi bona hariharibada Diravana. Lau be badu dekenai lau haraga lasi, to bogahisihisi bona lalokau dekenai lau be haraga.”—ESODO 34:6.
1. (a) Baibel ese edena lalona durua herevana ia henia tomadiho goevana idia rakatania taudia edia lalokau taudia dekenai? (b) Iehova ese kerere taudia be edena bamona ia lalodia?
KERISTANI tama ta ia gwau: “Lauegu natuna kekeni ese lau ia hamaoroa, ia ura lasi Keristani kongregesen lalonai ia noho. Dina momo, pura momo, bona hua momo idia hanaia lalonai, egu tauanina lalonai hisihisi bada herea lau mamia. Ena dika ese mase ia hereaia momokani.” Momokani, ita lalokau henia tauna ta be tomadiho goevana ena dala amo ia raka siri neganai, iseda lalona ia hisihisi bada. Unai bamona hemami oi abia vadaeni, a? Bema oibe, Iehova be oi ia hebogahisi henia do oi lalo-pararalaia karana ese oiemu lalona do ia durua. (Esodo 3:7; Isaia 63:9) To, unai bamona idia kerere taudia be edena bamona ia lalodia? Baibel ese ia hahedinaraia Iehova be mai ena hebogahisi ida idia ia boiria, edia dala idia hanamoa bena iena lalo-namo do idia abia lou totona. Ia ese Malaki ena nega ai idia noho gwau-edeede Iuda besena ia noia goadagoada, ia gwau: “Emui dika umui rakatania bona lau dekenai umui giroa mai neganai, . . . umui dekenai do lau giroa lou.”—Malaki 3:7.
2 Mose be Sinai Ororona dekenai ia daekau neganai, Dirava ese ena hebogahisi ia hahedinaraia. Unuseniai, Iehova be sibona ia gwauraia ‘hebogahisi bona hariharibada Diravana, badu dekenai ia haraga lasi, to hebogahisi bona lalokau dekenai ia be haraga.’ (Esodo 34:6) Unai hereva ese ia hahedinaraia hebogahisi be Iehova ena kara korikorina ta. Keristani aposetolo Petero ia gwau: “[Dirava] ia ura taunimanima ibounai ese dika dekena amo edia lalona do idia giroa.” (2 Petero 3:9) Momokani, Dirava ena hebogahisi be mai hetoana. Mose ia hamaoroa, ia gwau: “To kerere momokani taudia do lau panisia.” (Esodo 34:7; 2 Petero 2:9) To, “Iehova be lalokau,” bona hebogahisi be unai kara ena kahana badana ta. (1 Ioane 4:8; Iamesi 3:17) Iehova ena “badu ia noho hanaihanai lasi,” bona ‘ia ura bada iena noho hanaihanai lalokauna’ ia hahedinaraia.—Mika 7:18, 19.
3. Edena dala ai Iesu ena lalohadai hebogahisi dekenai be Farisea taudia bona taravatu hadibaia taudia edia lalohadai amo ia idau?
3 Iesu be iena tamana ena toana ia hahedinaraia goevagoeva. (Ioane 5:19) Kerere taudia ia hebogahisi henidia karana ena anina be edia kara dika ia laloa maragi karana lasi, to unai kara amo ia ese gorere taudia ia hebogahisi henidia hegeregerena, hemami tamona ia hahedinaraia. (Mareko 1:40, 41 itaia.) Oibe, Iesu ia gwau hebogahisi be Dirava ena Taravatu ena “hereva badadia” ta. (Mataio 23:23) To Farisea taudia bona taravatu hadibaia taudia be idau, edia hahemaoro taravatudia lalonai hebogahisi idia hahedinaraia lasi. Iesu idia itaia, kara dika taudia ia hereva henidia neganai, idia maumau, idia gwau: “Unai tau ese dika taudia ia abia dae, bona idia danu ia aniani hebou.” (Luka 15:1, 2) Haheitalai toi amo Iesu ese ia idia maumauraia taudia ia haere henidia, bona unai haheitalai toiosi be Dirava ena hebogahisi idia hahedinaraia namonamo.
4 Haheitalai ginigunana ai, Iesu ese ia hamaorodia tau ta be ena mamoe 99 ia rakatania bona ia lao, ia boio gauna tamona ia tahua totona. Iena sivarai ena anina be dahaka? “Dika tauna ta ena lalona ia giroa dainai, guba dekenai moale do ia bada. To kara maoromaoro taudia 99, edia lalona idia giroa lasi dainai, guba dekenai moale do ia maragi.” Haheitalai iharuana ai, Iesu ese ia hamaorodia hahine ta be ena siliva moni ta ia boio bona ia tahua, bena ia davaria neganai ia moale bada herea. Unai sivarai ena anina be dahaka? “Dika tauna ta ena lalona ia giroa dainai, Dirava ena aneru be unai bamona do idia moale.” Iesu ena haheitalai ihatoina ai, parabole ta ia gwauraia.a Ema bona hari, taunimanima momo ese unai parabole idia gwauraia sivarai kwadogina hereadaena. Unai parabole ita laloa neganai, ita do ia durua Dirava ena hebogahisi ita laloa bada bona tohotohoa totona.—Luka 15:3-10.
Gwau-edeede Merona ese Ruma Ia Rakatania
5, 6. Iesu ena haheitalai ihatoina lalonai, gabeai ia vara merona be edena dala ai ia hahedinaraia tanikiu karana ia laloa lasi?
5 “Tau ta be mai ena natuna tau rua. Murinai ia vara tauna ese iena tamana dekenai ia hereva henia, ia gwau, ‘Lauegu tamana e, iseda kohu mani oi haria, lauegu kahana lau dekenai oi henia.’ Vadaeni tamana ese iena kohu ibounai iena natuna ruaosi dekenai ia haria karaia. Dina momo lasi idia ore, murinai ia vara tauna ese iena kohu ibounai ia haboua, vadaeni ia lao ena laolao dekenai, tano daudau dekenai ia lao, unuseni kara idauidau dekenai iena kohu ia halusia kava.”—Luka 15:11-13.b
6 Gabeai ia vara merona ia hahedinaraia, tanikiu karana ia laloa lasi vaitani. Ena kara ginigunana be ena ahuna ia gwauraia, bena “kara idauidau dekenai” unai kohu ia halusia kava. Unai hereva “kara idauidau,” be Greek herevana ta amo idia hahanaia, bona ena anina be “lebulebu maurina.” Diba momo tauna ta ia gwau unai hereva be “ta ese ena kara korikori ia rakatania momokani ia herevalaia.” Badina namona dainai, momo ese Iesu ena parabole lalonai ia gwauraia merona idia gwauraia prodigal, anina be ena kohu ia lebulebulaia bona ia haorea kava.
7. Hari inai negai daidia be raka boio merona bamona, bona dahaka dainai unai bamona taudia momo idia ura “tano daudau” dekenai sibodia idia naria?
7 Hari inai negai, unai bamona prodigal taudia haida idia noho, a? Oibe. Madi, taunimanima haida be iseda guba Tamana, Iehova, ena “ruma” namona idia rakatania. (1 Timoteo 3:15) Idia haida idia laloa Dirava ena ruma bese lalonai taravatu be momo, bona idia laloa Iehova ese idia ia itaia karana be idia ia gimaia lasi, to edia dala ia koua. (Salamo 32:8 itaia.) Mani Keristani hahinena ta oi laloa, ia maragi negana amo Baibel ena hakaua herevadia ia badinaia to gabeai kekero muramura ia inua momo bona drag dikadia ia ania. Unai nega dikana iena mauri lalonai ia laloa lou neganai, ia gwau: “Lau ura lau hamomokania toho lau sibona ese egu mauri lau hanamoa diba. Lau ura lau sibona egu ura do lau karaia, bona lau ura lasi ta ese lau ia hamaoroa dahaka do lau karaia.” Raka boio merona hegeregerena, unai hahine matamata ia ura ia sibona ia naria. Baibel ena taravatu utua karadia ia karaia dainai Keristani kongregesen murimurinai idia atoa.—1 Korinto 5:11-13.
8. (a) Idia ura Dirava ena taravatu hegeregerena do idia noho lasi taudia be dahaka heduru idia abia diba? (b) Dahaka dainai ta ta ese tomadiho abia hidi karana ia laloa maoromaoro be namo?
8 Iseda tadikaka ta ia hahedinaraia ia ura Dirava ena taravatu hegeregerena do ia noho lasi neganai, ita lalohisihisi momokani. (Filipi 3:18) Unai bamona ia vara neganai, elda taudia bona lauma dalanai idia hegeregere taudia ma haida be idia hekwarahi kerere tauna idia hamaoromaoroa totona. (Galatia 6:1) To, ta idia doria lasi Keristani hahediba tauna ena maduna do idia abia dae totona. (Mataio 11:28-30; 16:24) Memero kekeni danu be edia mauri laganidia idia hegeregere neganai, idia sibona ese tomadiho karana do idia abia hidi. Momokani, ita ibounai be mai eda ura kwalimu bona Dirava ena vairanai iseda kara ena badina do ita hahedinaraia. (Roma 14:12) Oibe, ita hadoa gauna ena anina sibona do ita abia—Iesu ena parabole lalonai raka boio merona ese gabeai ia dibaia sisibana unai.—Galatia 6:7, 8.
Tano Daudau Dekenai Ia Ogogami
9 “Iena kohu idia ore neganai, unai tano dekenai hitolo bada ia vara. Ia be ia ogogami vadaeni. Vadaeni ia lao, unai tano tauna ta dekenai ia gaukara. Unai tau ese ia siaia, iena tano dekenai boroma do ia naria karaia. Vadaeni boroma edia aniani ia ura ania, ia boga kunu totona, badina be tau ta ese aniani sisina ia henia lasi.”—Luka 15:14-16.
10 Ena be unai raka boio merona ia ogogami, to ena gabu dekenai do ia giroa lao be ia laloa lasi. To, unai tano tauna ta ida ia hedavari bona unai tau ese boroma naria gaukarana ia henia. Mose ena Taravatu ia gwau boroma be animal mai edia miro dainai, reana Iuda tauna be unai bamona gaukara do ia abia dae lasi. (Levitiko 11:7, 8) To bema unai raka boio merona be ena lalona ena hemami ese ia hahisia, toana be do ia haheaukalaia sibona. Badina be ena gaukara biaguna, unai tano tauna, be ogogami momokani tano idauna tauna ta ena hemami do ia laloa bada lasi. Unai raka boio merona ena noho be hari inai negai tomadiho goevana ena dala maorona idia rakatania taudia momo edia noho hegeregerena. Nega momo, unai taudia be kara haida lalonai idia vareai, to guna unai kara idia gwauraidia dika. Hegeregere, tau matamata ta, ena mauri laganidia be 17 neganai, ia maragi negana amo ia badinaia Keristani dalana ia dadaraia. Ia sibona ia gwau: “Sihari kava bona drag ania kava karadia ese lagani momo lalonai lau dibaia Baibel ena hahediba herevadia idia kokia.” Daudau lasi murinai, unai tau matamata be ipidi ia gaukaralaia bena ia henaohenao bona ala-ala dainai dibura ruma dekenai idia atoa. Ena be gabeai lauma dalanai ia goada lou, to “kara dika ena moale, nega daudau lasi idia noho gaudia,” dainai hisihisi bada herea ia davaria!—Heberu 11:24-26 itaia.
11 Unai raka boio merona ena lalohisihisi ia habadaia gauna be “tau ta ese aniani sisina ia henia lasi.” Iena turana matamatadia be edeseniai? Hari ia be moni lasi dainai, “taunimanima ibounai [ese] idia ura henia lasi.” (Aonega Herevadia 14:20) Unai hegeregerena, hari inai negai abidadama dalana amo idia siri taudia idia davaria inai tanobada ena lalona veria gaudia bona ena lalohadai ibounai be idia ‘idia koia’ sibona. (Kolose 2:8) Dirava ena orea ia rakatania bena gabeai ia giroa lou hahinena ta ia gwau: “Iehova ena hahekau lau abia lasi dainai hisihisi bona lalo-metau bada herea lau davaria. Inai tanobada lau badinaia toho, to lau be ma haida hegeregerena momokani lasi dainai, lau idia dadaraia. Egu hemami be raka boio natuna ta bamona bona tamana ta ena hahekau lau abia be namo. Unai neganai, lau lalo-parara Iehova ena heduru lau abia be namo. Unai murinai lau ura lasi momokani ia amo lau siri bona lau sibona lau naria.” Iesu ena haheitalai lalonai, unai raka boio merona be gabeai unai bamona ia lalo-parara danu.
Raka Boio Merona Ena Lalona Ia Kehoa
12, 13. Dahaka ese hari inai negai haida idia durua edia lalona idia kehoa totona? (Maua itaia.)
12 “Vadaeni iena lalona ia kehoa, ia gwau, ‘Egu tamana be mai ena hesiai taudia momo herea, mai edia davana, bona edia aniani momo idia noho. To lau be lau hitolo mase vadaeni. Lau toreisi, egu tamana dekenai do lau lao, do lau gwau: “Egu tamana e, lau be guba biaguna ena vairana dekenai, bona oiemu vairana dekenai, kerere lau karaia vadaeni. Lau be hegeregere lasi oiemu natuna do oi gwauraia, lau be emu hesiai tauna do oi halaoa, mai egu davana.” ’ Vadaeni ia toreisi, iena tamana dekenai ia lao.”—Luka 15:17-20.
13 Gabeai unai raka boio merona ena “lalona ia kehoa.” Nega sisina ia hanaia lalonai, ia be moale karadia ia goadalaia, ia nihilaia gabuna dekenai bamona. To hari iena noho lauma dalanai ia lalo-pararalaia. Oibe, ena be ia kerere, unai tau matamata dekenai dala ia do noho. Ia lalonai kara namodia haida idia noho. (Aonega Herevadia 24:16; 2 Sivarai 19:2, 3 itaia.) Hari inai negai Dirava ena orea idia rakatania taudia be edena bamona? Do ita gwau idia ibounai be dala lasi, bona ta ta ibounai edia gwau-edeede karana amo idia hamomokania Dirava ena lauma helaga dekenai idia kara dika, a? (Mataio 12:31, 32) Unai be momokani lasi. Idia haida be idia badinaia kara kererena ese ia hahisidia, bona gabeai edia lalona idia kehoa. Taihu ta be Dirava ena orea amo ia siri negana ia herevalaia ia gwau: “Iehova lau laloaboio lasi vaitani, dina ta lau laloaboio lasi. Hanaihanai lau guriguri, ia ese dala ta amo, bona dina ta ai, hereva momokani lalonai lau do ia abia dae lou totona.”—Salamo 119:176.
14 To murimuri dekenai idia raka lao taudia be dahaka idia karaia diba edia noho dalana dekenai? Iesu ena parabole lalonai, raka boio merona be ena lalona ia hadaia, ruma dekenai do ia giroa lao bena ena tamana do ia noia ena kerere ia gwauatao totona. Unai mero ia laloa do ia gwau: “Lau be emu hesiai tauna do oi halaoa, mai egu davana.” Hesiai tauna mai ena davana be dina ai ia gaukara tauna, bona dina tamona sibona vairai, hadokoa herevana idia hamaoroa diba. Biaguna ena hesiai taudia ese unai taudia idia hereaia badina idia be ruma bese taudia bamona. Unai dainai raka boio merona ia laloa lasi tamana ese natuna ai do ia halaoa lou, guna ia noho hegeregerena. Mai ena ura ida dagi maragina momokani ta do ia abia dae, dina ta ta iboudiai ena tamana badinaia lou karana do ia hamomokania totona. To unai raka boio merona dekenai hoa gauna ta do ia vara.
Mai Hebogahisi ida Idia Hedavari
15-17. (a) Tamana ese natuna ia itaia neganai dahaka ia karaia? (b) Tamana ese natuna dekenai ia henia dabua, rini, bona tamaka edia anina be dahaka? (c) Tamana ese aria ia hegaegaelaia karana be dahaka ia hahedinaraia?
15 “Ia be dala dekenai ia lao noho, ruma dekenai ia raka lao neganai, daudau dekenai iena tamana ese ia itaia, vadaeni ia bogahisihisi henia, ia heau lao, iena natuna ena aiona dekenai ia rosia, ia kisi henia. To iena natuna ese ia hamaoroa, ia gwau, ‘Egu tamana e, lau be guba biaguna ena vairana dekenai, bona oiemu vairana dekenai, kerere lau karaia vadaeni, lau be hegeregere lasi oiemu natuna do oi gwauraia.’ To iena tamana ese iena hesiai taudia dekenai ia hamaoroa, ia gwau, ‘Dabua namo herea ta umui mailaia, iena tauanina dekenai umui atoa. Iena imana kwakikwaki gauna bona tamaka danu umui mailaia. Boromakau ena natuna, ubua gauna, umui mailaia, do umui alaia. Do ita aniani, do ita moale hebou. Badina be inai egu natuna ia mase, to ia mauri lou vadaeni, ia boio, to lau davaria vadaeni.’ Vadaeni idia be idia moale hebou.”—Luka 15:20-24.
16 Mai edia lalokau tama sina idia ura dikadika edia natudia be lauma dalanai do idia namo lou. Unai dainai raka boio merona ena tamana ita laloa diba, dina ta ta ia be iena ruma vairanai ia noho dalana ia itaia, ena ura badana be ena natuna do ia giroa mai. Bena iena natuna ia itaia, dala amo ia raka mai noho! Momokani mero ena toana ia idau. To, tamana ese “daudau dekenai” ena toana ia itaia. Tamana ese ena natuna ena dabua mirodia bona ena lalohisihisi ia itaia lasi; ia ese iena natuna ia itaia, bena ia heau lao idia hedavari totona!
17 Tamana be natuna dekenai ia ginidae neganai, ena aiona dekenai ia rosia bena ia kisi henia. Bena ena hesiai taudia ia haganidia iena natuna ena dabua ta, rini ta, bona tamaka, do idia henia. Unai dabua be vaia dabua ta sibona lasi, to ia be “dabua namo herea”—reana idia hahairaia dabua namona bona vadivadi tauna badana dekenai idia henia gauna bamona. Hesiai taudia be nega momo rini ta bona tamaka idia karaia lasi dainai, tamana ia ura hahedinaraia, iena natuna be ruma bese tauna korikorina hegeregerena ia abia dae lou. To tamana be kara ma haida ia karaia. Hahegani ia henia aria ta do idia karaia iena natuna ena lou mai idia moalelaia totona. Ia hedinarai goevagoeva, unai tau ese natuna ena kerere ia gwauatao neganai, mai ena badu ida ia karaia lasi eiava ia karaia ena badina be natuna ia giroa bona ena maduna be unai bamona do ia karaia dainai lasi, to ia ura ena dika ia gwauatao. Unai ese ia ia hamoalea.
18 Vadaeni, raka boio merona ena parabole ese ita ia hadibaia ita tomadiho henia Diravana be edena bamona Diravana? Gau ginigunana be, Iehova be ‘hebogahisi bona hariharibada Diravana, badu dekenai ia haraga lasi to hebogahisi bona lalokau dekenai ia haraga.’ (Esodo 34:6) Momokani, hebogahisi be Dirava ena kara badana ta. Unai be heduru idia ura abia taudia dekenai vaia ia hahedinaraia karana. Bena, Iesu ena parabole ese ita ia hadibaia, Iehova ia hegaegae “kara dika ia gwauatao” totona. (Salamo 86:5) Ia be ena matana ia negea lao bamona, bona ia itaia noho bema kara dika taudia be edia lalona do idia haidaua, bena unai amo idia dekenai hebogahisi do ia hahedinaraia.—2 Sivarai 12:12; 16:9.
18, 19. (a) Raka boio merona ena parabole ese oi ia hadibaia Iehova be edena bamona Diravana? (b) Iehova ese Iuda besena bona Ierusalema ia kara henia dalana hegeregerena, kara dika tauna ia giroa mai karana be edena bamona “ia naria noho”?
19 Mani Dirava ena kara Israela taudia dekenai ita laloa. Iehova ese ena lauma amo peroveta tauna Isaia ia hasiahua bena ia ese Iuda besena bona Ierusalema ia gwauraia ‘edia kwarana amo ela bona edia aena’ dekenai gorere idia abia. To, ma ia gwau: “Lohiabada ese umui ia rakatania lasi, umui totona ia naria noho, umui dekenai do ia bogahisihisi totona.” (Isaia 1:5, 6; 30:18; 55:7; Esekiela 33:11) Iesu ena parabole lalonai ia gwauraia tamana bamona, Iehova be “dala” ia itaia noho bamona. Iena ruma idia rakatania taudia amo do idia giroa mai taudia ia naria noho mai ena ura ida. Ita laloa diba unai be vaia mai ena lalokau tamana ta ena kara, ani?—Salamo 103:13.
20, 21. (a) Edena dala ai Dirava ena hebogahisi ese hari inai negai momo ia veridia? (b) Hereva gabena ai dahaka do ita herevalaia?
20 Lagani ta ta, Iehova ena hebogahisi karana amo momo ia veridia dainai edia lalona idia kehoa bena tomadiho karana momokanina dekenai idia giroa mai. Unai kara ese edia lalokau taudia idia hamoalea bada! Hegeregere, inai hereva ena matamanai ai herevalaia Keristani tama mani oi laloa. Iena natuna kekeni be lauma dalanai ia namo lou bona hari ful-taim hesiai gaukara ia karaia. Unai tama ia gwau: “Inai nega ena oromana gunana dekenai lau moale bada herea. Egu lalohisihisi ena taitai be moale ena taitai ai ia lao.” Momokani, Iehova ia moale danu!—Aonega Herevadia 27:11.
21 To unai raka boio merona ena parabole ena anina be unai sibona lasi. Iesu be ena sivarai ia gwauraia noho, unai amo Iehova ena hebogahisi bona vaia Farisea bona taravatu hadibaia taudia edia hahemaoro auka karana edia idau ia hahedinaraia diba. Edena bamona ia karaia—bona unai ena anina ita dekenai be dahaka—be hereva gabena ai do ita herevalaia.
[Footnotes]
a Baibel lalonai idia gwauraia parabole bona haheitalai idia vara momokani be ita gwauraia diba lasi. Danu, unai sivarai edia badina korikori be kamonai taudia dekenai kara maorona ta ia hadibaia dainai, edia kahana maragimaragi ibounai ese idia laulaulaia gaudia edia anina ita tahua be gau badana lasi.
b Unai parabole ena anina peroveta dalana ai be Watchtower Bible and Tract Society of New York, Inc. ese ia halasia bukana ladana Tau Hereadaena, karoa 86 lalonai, ia herevalaia.
Riviu
◻ Edena dala ai Iesu ena lalohadai hebogahisi dekenai be Farisea taudia edia lalohadai amo ia idau?
◻ Hari inai negai daidia be unai raka boio merona bamona, bona edena dala ai?
◻ Dahaka ia vara dainai raka boio merona ena lalona ia kehoa?
◻ Tamana be ena helalo-kerehai natuna dekenai edena bamona hebogahisi ia hahedinaraia?
2. Baibel ese edena bamona ia hahedinaraia hebogahisi be Iehova ena kara korikorina ta?
4. Iesu ese edena haheitalai rua ia gwauraia, bona ta ta edia anina be dahaka?
9, 10. (a) Raka boio merona be edena bamona ena noho ia idau, bona unai dainai dahaka ia karaia? (b) Hari inai negai haida ese tomadiho momokanina idia rakatania bena raka boio merona ia abia lalo-hekwarahi bamona idia abia dalana oi herevalaia.
11. Dahaka ese raka boio merona ena lalohisihisi ia habadaia, bona haida be hari inai negai edena bamona idia davaria tanobada ena lalona veria gaudia be idia ‘idia koia’?
14. Raka boio merona be ena lalona ia hadaia dahaka do ia karaia, bona ia karaia neganai edena dala ai manau ia hahedinaraia?
[Box on page 11]
EDIA LALONA IDIA KEHOA
Dahaka ese guna Keristani kongregesen murimurina ai idia atoa taudia haida idia durua bena edia lalona idia kehoa? Henuna herevadia ese unai idia hahedinaraia.
“Egu kudouna dekenai lau diba hereva momokani be edeseniai. Lagani momo lalonai Baibel stadilaia bona hebou lao henia karadia be mai anina lau dekenai. Lau be edena bamona Iehova lau dadaraia noho? Ia ese lau ia rakatania lasi; lau ese ia lau rakatania. Gabeai, lau abia dae lau kerere bona lau be lalo-auka tauna, bona Iehova ena Hereva be nega ibounai lalonai ia maoro—‘oi hadoa gauna sibona be do oi abia.’ ”—C.W.
“Egu beibi kekenina ia hereva matamaia, bona unai ese egu kudouna ia hamarerea, badina lauegu ura be gau haida, hegeregere Iehova be daika bona ita guriguri henia dalana, do lau hadibaia. Lau mahuta diba lasi, bona hanuaboi ta ai motuka lau taria lao uma gabuna ta dekenai bena lau tai sibona. Lau tai, bona Iehova lau guriguri henia, unai be nega ginigunana nega daudau ia hanaia vadaeni lalonai. Lau diba momokani egu mauri lalonai Iehova ia noho be namo, bona lau ura bada egu dika do ia gwauatao.”—G.H.
“Tomadiho idia herevalaia neganai, taunimanima lau hamaorodia bema hereva momokani idia hadibaia tomadihona do lau abia hidi, lau be Iehova ena Witness tauna ta ai do lau lao be namo. Bena do lau hamaorodia guna lau be idia ta, to unai mauri lau badinaia diba lasi, unai dainai idia lau rakatania. Unai lau lalo-pararalaia dainai, nega momo egu lalona ia hisihisi bona lau moale lasi. Gabeai lau sibona lau gwau, ‘Lauegu mauri be dika momokani. Gau haida lau haidaua haraga be gau badana.’ ”—C.N.
“Lagani 35 gunanai, lau bona egu tau be murimuri ai idia atoa. Bena, lagani 1991 ai, ai hoa elda taudia rua ese ai idia vadivadi henia neganai, bona ai idia hadibaia dala ia noho Iehova dekenai do ai giroa totona. Hua 6 murinai, ai idia abia vareai lou dainai ai moale bada. Lauegu tau ena mauri lagani be 79 bona lauegu be 63.”—C.A.