Daidia ese Bible Idia Torea?
BIBLE idia abia dae lasi taudia idia gwau: “Bible ena hereva momo idia hakoikoia heheni bona taunimanima edia lalohadai be ia lalonai idia torea. Unai dainai ta ese Bible ena sisiba ia abia dae diba lasi, ani?”
Oi be unai bamona taudia hegeregeredia oi laloa Bible lalonai be taunimanima edia lalohadai kereredia sibodia idia torea a? Haroro taudia haida be unai bamona idia laloa. Switzerland ena Protestant haroro tauna ta ladana Karl Barth ia gwau: “Peroveta taudia bona aposetolo be edia hereva dekenai bona edia toretore dekenai idia kerere.” Momokani, gau ta be Bible lalonai idia torelaia taudia edia hereva be idauidau. Bona ta ese Bible ena hereva haida ia duahia neganai, reana ia laloa ena hereva ma haida amo idia idau vaitani. To unai hereva be momokani idia hakoikoia heheni a? Bible be taunimanima mo sibodia ese idia havaraia gauna a? Daidia ese Bible idia torea?
Aposetolo Simona Petro ena haere be inai: “Lauma helaga ese helaga taudia ia hasiahua momokani dainai, idia ese Dirava ena hereva idia gwauraia.”—2 Petro 1:21.
Momokani, Bible be ia gwau loulou ia be “Dirava ena hereva.” Salamo 119 ena siri 176 iboudiai lalodiai unai ia hahedinaraia! Buka torea taudia momo idia ura taunimanima do idia hadibadia idia ese unai buka idia torea. To Bible idia torea taudia be unai bamona lasi. Idia ura taunimanima ese Dirava do idia hanamoa badina be unai buka be iena, idia edia lasi.—1 Tesalonika 2:13; 2 Samuel 23:2.
‘Lauma Helaga ese Ia Hasiahudia’—Edena Bamona?
Unai tatau be ‘Lauma Helaga ese edena bamona ia hasiahudia’? Aposetolo Paulo ena haere be inai: “Buka Helaga ena hereva ibounai be Dirava ena lauma ese ia havaraia.” Inai hereva be Greek gado ena hereva ta the·oʹpneu·stos amo idia hahanaia, ena anina be “Dirava ia hahoho.” Dirava ese iena gaukara siahuna—iena lauma helaga unai—ia gaukaralaia, iena lalohadai be torea taudia edia daradia lalodiai ia hahoho vareai totona. Unai dainai, Bible Havaraia Tauna be Iehova Dirava. Iena lalohadai ese Bible torea gaukarana idia hakaua, bisinesi tauna ese seketere ta be ena revareva torea totona ia hagaukaraia hegeregerena.—2 Timoteo 3:16.
Unai hegeregerena, ‘Lauma Helaga ese ia hasiahudia’ dalana be Bible lalonai idia torelaia neganai, unai hereva Greek gado ai ena anina ma ta be lai ese lagatoi ia hahohoa dalana. (Kara 27:15, 17 itaia.) Lai ia toa bona lagatoi ia hohoa hegeregerena, Dirava ese Bible torea taudia latadiai ia hahoho diho neganai, ena lauma helaga ese ia hohodia; bena Dirava ena siahu amo idia laloa, idia hereva, bona idia toretore.
Dirava ese Ia Hagaukaradia Taudia
Bible torea taudia ta ta mo be sibodia edia sivarai idia torea. Idia be sibodia idia laloa bada lasi, to nega ibounai Dirava idia hanamoa toho; unai dainai sibodia edia ladana idia abia isi lasi. To ita diba idia haida be gavamani taudia, kota biagudia, peroveta taudia, pavapava, mamoe naria taudia, biru taudia, bona haoda taudia—idia iboudiai be tatau 40 bamona. Unai dainai, ena be Bible ena hereva be Dirava ena amo ia mai, to unai tatau edia toadia idauidau be ia lalonai ia hedinarai.
Bible torea taudia momo be idia diba heheni lasi. Idia be nega idauidau ai idia mauri noho, bona edia mauri daladia be idauidau. To, herevana idia matamata eiava idia buruka, edia toretore ese ia hahedinaraia idia torea mai edia lalo-tamona ida. Unai buka be lagani 1,600 lalodiai idia torea ela bona idia haorea. Bible ena hereva do oi tahua namonamo neganai, do oi davaria idia be hoa dalanai idia hamomokania heheni. Ena be Bible havaraia Diravana ese torea taudia momo ia hagaukaradia, to iena darana be Bible lalonai ia hedinarai.
Unai dainai hari buka hereadaena, Bible “do ita dogoatao bona badinaia be namo,” ani? Namona be iseda lalohadai be Petro ena hegeregerena, ia gwau: “Unai dainai ai daradara lasi momokani, to ai diba peroveta taudia edia hereva be momokani. Umui danu peroveta taudia edia hereva do umui badinaia be namo. Edia hereva be lamepa dibura gabuna ia hadiaria bamona.”—Heberu 2:1; 2 Petro 1:19.
To Bible ena hereva idia abia dae lasi taudia edia samani herevana be edena bamona? Bible ese sibona ia hakoikoia a? Oiemu haere be dahaka?
[Picture on page 4]
Lai ia toa bona lagatoi ia hohoa hegeregerena, Dirava ena lauma helaga ese Bible torea taudia ia hohodia