Bible ese Sibona Ia Hakoikoia A?

BIBLE ia gwau: “Dirava ia koikoi diba lasi.” (Heberu 6:18) Unai dainai, idia hakoikoia heheni herevadia amo ia honu bukana be Dirava ena Hereva idia gwauraia diba lasi, ani? To dahaka dainai ena hereva haida be ena hereva ma haida ida idia hegeregere momokani lasi?

Nega daudau herea lalonai hari buka ena hereva be edia imadia amo idia torea hanai loulou bona gado idauidau ai idia hahanaia negadiai, torea hanai taudia ese hereva haida idia haidaua. To edia kerere maragidia dainai Bible ita daradaralaia be maoro lasi. Unai bamona hereva ita tahua namonamo neganai, haere maorona do ita davaria. Bible be sibona ia hakoikoia herevana idia gwauraia taudia momo ese idia tahua namonamo lasi, to ma haida edia lalohadai idia abia dae kava, Bible idia ura henia lasi taudia unai. Bible ia gwau: “Tau ta do ia kamonai lasi neganai be ia haere, unai be ena kavakava bona ena hemarai.”​—Hereva Lada-isidia 18:13.

Haida idia maumau badina be Bible torea taudia idia torea numeradia be idauidau, ta ia gwau gau ta ese ma gau ta ia gunalaia, ma ta ia gwau ia gabelaia; buka gunadia amo idia torea herevadia idia haidaua, bona unai bamona kara ma haida idia karaia. To mani inai oi laloa: Gau ta ia vara neganai sibodia edia matana amo idia itaia taudia bema oi hamaorodia idia itaia gauna ena sivarai do idia torea, edia sivarai iboudiai do idia hegeregere momokani a? Bema unai bamona, do oi laloa idia herevahereva hebou edia sivarai hahegeregeredia totona, ani? Unai hegeregerena, Dirava ese Bible torea taudia na gwaumaoro ia henidia, idia ta ta edia dala bona edia hereva amo do idia toretore; gau tamona iena lalohadai bona mai anina bada gaudia do idia torelaia maoromaoro.

Hereva haida na revareva gunadia amo ia torea hanai tauna be reana unai hereva ia haidaua sisina, Dirava ese ia henia gaukarana do ia karaia goevagoeva totona, to ena anina korikorina ia badinaia noho. Idia gwauraia gaudia idia vara negadia danu be unai bamona. Reana torea tauna ta do ia hahedinaraia namonamo dahaka ia vara guna bona dahaka be gabeai, to ma ta be lalohadai ginigunana ia hahedinaraia gauna do ia gwauraia guna bona lalohadai gabena ia gwauraia gauna be gabeai do ia gwauraia. Bona torea taudia ta ta be dala idauidau amo edia sivarai idia hakwadogia. Unai hegeregerena, Mataio ia gwau Iesu ese matakepulu taudia rua ia hanamodia, to Mareko bona Luka ese tamona idia gwauraia. (Mataio 20:​29-34; Mareko 10:46; Luka 18:35) Mataio ena sivarai ese edia sivarai ia hakoikoia lasi. Ia hahedinaraia goevagoeva idia be hida, to Mareko bona Luka ese Iesu ese ia hereva henia tauna sibona idia gwauraia hedinarai.

Danu, gunaguna nega be dala idauidau amo idia duahia. Iuda besena ese kalenda rua idia gaukaralaia​—kalenda helagana bona biru kalendana​—idia matamaia huadia be idau. Reana torea tauna ta ia gwau gau ta be hua ta ai bona dina ta ai ia vara, to torea tauna ma ta ese unai gau ia herevalaia neganai ia be hua idauna ta bona dina idauna ta ia gwauraia; reana unai ena badina be idia ruaosi be kalenda idauidau idia gaukaralaia.

“Idia Idau Herevadia” Hahegeregeredia

To Bible ena siri haida ese ena siri ma haida idia hakoikoia vaitani a? Bible idia maumauraia taudia haida idia gwauraia siridia haida mani ita laloa.

Ioane 3:22 ai ia gwau Iesu ese “ia bapatiso henia,” to Ioane 4:2 ai ia gwau: “Iesu ese ia bapatiso karaia lasi.” To, unai sivarai orena ese ia hahedinaraia hegeregerena, Iesu ena hahediba taudia ese iena ladanai bona iena oda hegeregerena taunimanima idia bapatisodia. Unai be bisinesi ta bona ena seketere hegeregeredia; idia raruosi idia gwau diba revareva ta idia torea.

Genese 2:2 ia gwau Dirava “ia laga-ani sibona, ena gaukara ia rakatania.” To Iesu ena hereva Ioane 5:17 be ia idau; ia gwau Dirava be “ia gaukara noho ia mai bona hari.” To Genese ena hereva ma haida ese idia hahedinaraia Dirava ese guba bona tanobada ia havaradia karadia ia gwauraia, to Iesu ese Dirava ena gaukara idaudia ia herevalaia, taunimanima ia hakaudia bona ia naridia gaukaradia unai.

Haida idia laloa Esekiel 34:7 ese Esekiel 18:20 ia hakoikoia. Siri ginigunana ia gwau Dirava ese ‘tamadia edia kara dika edia davana be natudia do ia henidia bona tubudia do ia henidia,’ to siri iharuana ia gwau: “Natuna do ia hisihisi lasi ena tamana ena kara dika dainai.” Unai karoa ruaosi edia hereva ma haida bema oi duahia lasi, do oi laloa unai siri ta ese ma ta ia hakoikoia. To bema unai karoa edia hereva ma haida do oi tahua namonamo, do oi diba goevagoeva, Dirava ese tamadia sibodia lasi to edia natudia bona tubudia danu panisidia herevana ia gwauraia neganai, ia ese Israel besena dekenai do ia vara diba gauna ia gwauraia unai; bema ia do idia kara dika henia bena edia inai taudia ese do idia abidia mauri, unai dika do idia davaria. To natuna be ena tamana ena kerere dainai do ia hisihisi lasi herevana ia gwauraia neganai, ia ese taunimanima ta ta dekenai do ia karaia karadia ia herevalaia unai.

Iesu ena vara sivaraidia Mataio 1:​18-25 ai bona Luka 1:​26-38 ai idia torea, be idia idau. To unai ese ia hahedinaraia ta ese ta ia hakoikoia, eiava?

Torea taudia rua ese tau badana ena sivarai idia torea neganai, ena be unai sivarai ruaosi be idia idau, to reana ta ese ta ia hakoikoia lasi, ani? Reana idia idau, badina be unai torea taudia edia lalohadai unai tau dekenai be idia idau, eiava idia torea herevadia be taunimanima idauidau dekenai idia kamonai. Torea tauna ta ia laloa gau haida be ena buka lalonai do ia sivarailaia be mai anina bada, bona ena buka do idia duahia taudia danu ia lalodia. Unai hegeregerena, idau bese taudia ese do idia duahia totona idia torea sivaraidia be idau, bona Iuda taudia ese do idia duahia totona idia torea sivaraidia be ma idia idau. Badina be Iuda taudia ese hereva haida idia lalo-pararalaia bona idia abia dae vadaeni.

Unai bamona siri Bible lalonai bema edia anina ita tahua namonamo lasi, reana ita laloa ta ese ma ta ia hakoikoia. To edia anina ita tahua namonamo, bona torea tauna ena lalohadai bona unai karoa edia siri ma haida edia anina ita laloa neganai, ita davaria ta ese ma ta ia hakoikoia lasi. To taunimanima momo ese edia anina inai bamona idia tahua namonamo lasi; idia hereva kava, idia gwau: “Bible be sibona ia hakoikoia.”

Ita Abia Dae Diba

Dirava ena lauma helaga ese Bible torea taudia ia koudia lasi dainai, edia sivarai be dala idauidau amo idia torea. (Kara 3:21) Unai dainai, idia torea gaudia idia torelaia goevagoeva diba. Edia hereva haida idia hegeregere lasi, to unai ese ia hahedinaraia edia hereva be momokani bona ita abia dae diba, badina be ta ese ia samanidia diba lasi, ia gwau diba lasi edia hereva idia hatamonaia taunimanima koidia totona. (2 Petro 1:​16-21) Ena be torea taudia be dala idauidau amo idia torea, to idia iboudiai ese dala tamona idia duanaia bona idia iboudiai edia ura tamona be inai: Iehova Dirava ese taunimanima hamoaledia totona do ia karaia karadia bona taunimanima ese Dirava ena lalo-namo do idia abia dalana be taunimanima do idia hadibalaidia.​—Hereva Lada-isida 2:​3-6, 9.

Bible ita abia dae diba mai eda darana ida. Ena hereva iboudiai idia hamomokania heheni, ta ese ta ia hakoikoia lasi. Oibe, Bible oi abidadama henia diba!

[Pictures on page 7]

Mataio ia gwau Iesu ese matakepulu taudia rua ia hanamodia. Mareko bona Luka ese tamona idia gwauraia. Anina be edia hereva idia hakoikoia heheni a?