Bible ese Ia Gwauraidia Basileia Badadia be Edia Dokona Idia Raka Henia!

REANA oi laloa ta ese idia do vara lasi gaudia edia sivarai ia torea guna diba lasi. To lagani handred haida o tausen haida idia do noho ela bona gau haida idia vara negadiai, buka ta ese edia sivarai ia gwauraia guna! Unai buka ena ladana be Bible.

Hoa dalanai Bible ese Dirava ena bese taudia dekenai do idia vara gaudia ia gwauraia guna, idau negai hanuana Babulono ena nega amo ema bona harihari, bona harihari ela do idia vara gaudia danu.

Lagani 600 bamona idia do noho ema bona Iesu ia vara neganai, Dirava ese matahanai 4 na peroveta tauna Daniel ia henia, tanobada dekenai do idia vara gaudia idia hahedinaraia. Daniel ia gwau: “Gau hehunidia ia hahedinaraia Diravana be guba dekenai ia noho.” (Daniel 2:28) Idau negai hanuadia edia gabu idia geia taudia ese Bible ena sivarai bona peroveta herevadia hamomokania gaudia momo idia davaria vadaeni.

Nega daudau herea ia do noho ema bona Daniel ia vara neganai, Bible ese ia gwauraia basileia badadia rua idia noho, Aigupito bona Asuria unai. Daniel ena nega lalonai Babulono ia lohia noho, bona ena nega murinai do idia hedinarai basileiadia badadia rua edia ladana be Dirava ese ia hadibalaia. (Daniel 2:​47, 48; 8:​20, 21) Ma rua be idia murinai idia hedinarai, idia ta be ia noho ema bona hari.

Hida?

Bible ese ia hahedinaraia unai bamona basileia badadia hida do idia hedinarai? Aneru ta ese aposetolo Ioane ia hamaoroa, ia gwau: “Idia be pavapava 7 danu: 5 idia moru vadaeni, ta be ia noho, to ta be ia do mai lasi.”​—Apokalupo 17:​10, NW.

Ioane ena nega lalonai, edena basileia badadia 5 be idia moru vadaeni? Gaudia be Aigupito, Asuria, Babulono, Medo-Parasa, bona Greece. Edena be ia noho? Roma unai. Bona edena be unai negai “ia do mai lasi”? England bona America edia basileia unai. Idau negai bona hari inai negai Dirava ena taunimanima ese idia lalodia momo basileiadia be unai.

Gau badana be inai: Bible ia hahedinaraia unai bamona basileia 7 mo sibodia ta ta ena nega ena nega ai do idia hedinarai! Ma ia hahedinaraia, basileia namba 8, ia lalonai unai 7-osi do idia noho gauna, be namba 7 ena nega lalonai do ia noho nega sisina sibona. (Apokalupo 17:​10, 11) Anina be, ita be taunimanima edia basileia ginigabedia edia nega lalonai ita noho hari. Ta ma do ia hedinarai lasi!

Tanobada basileiadia edia nega be kahirakahira do ia ore. Daniel ia gwau: “Unai pavapava edia negai guba Diravana ese basileia ta do ia haginia, nega ta ai do idia hadikaia ore diba lasi gauna. . . . Unai basileia iboudiai do ia hamakohidia maragimaragi bona do ia haoredia, bena ia sibona do ia gini ela bona hanaihanai.” (Daniel 2:44) Ma ia gwau, unai murinai unai basileia iboudiai be ‘lai ese do ia hodadia oho.’ (Daniel 2:35) Dirava ena Basileia ena lohia dalana ese idia edia do ia hereaia momokani!

Hari basileia badadia edia kastom, edia tomadiho, Dirava ena taunimanima dekenai idia karaia karadia bona Bible ese ia perovetalaidia herevadia, bema oi diba goevagoeva, tanobada besedia edia sivarai be Bible ena diari amo do oi lalo-pararalaia bada, ani?

Unai dainai ai ese sivarai 8 do ai torea, tanobada basileiadia badadia edia sivarai unai. Ginigunana be inai magasin lalonai. Inai sivarai dainai do oi diba momokani, Bible lalonai idia torea sivaraidia bona peroveta herevadia be momokani!