Duahia Taudia edia Henanadai

◼ Iesu ena hereva Mataio 11:24 dekenai, anina be Iehova ese Sodoma bona Gomora dekenai lahi amo ia hamasedia taudia be do idia toreisi lou, a?

Guna, inai henanadai haerelaia totona, Iesu ena hereva Mataio 10:​14, 15; 11:​20-24; bona Luka 10:​13-15 dekenai ai gwauraia. To hari ai laloa unai siri ese Sodoma bona Gomora taudia dekenai do ia vara gauna idia gwauraia lasi. Mani Iesu ena hereva ita laloa guna, bena Bible ena siri ma haida do ita laloa.

“Hanua momo dekenai Iesu ese hoa kara momo ia karaia, to inai hanua taudia edia lalona idia giroa lasi. Unai dainai . . . ia gwau henidia. Ia gwau, ‘Korasina e, oi dika vadaeni! Betesaida e, oi dika vadaeni! Badina be hoa kara emui lalona dekenai lau karaia be, Turo bona Sidono edia lalonai bema lau karaia, idia be idaunegai edia lalona do idia giroa momokani . . . Kota karaia dinana neganai Turo bona Sidono edia dika be maragi, to oi be do oi dika bada. Oi danu, Kaperanauma e! . . . mase gabuna, hel dekenai do idia doria diho oi. Badina be, hoa kara oiemu lalona dekenai lau karaia gauna be bema Sodoma ena lalona dekenai lau karaia, ia be do ia noho namo ia mai bona hari. . . . Lau hamaoroa oi, Kota karaia dinana neganai Sodoma be do ia dika maragi, to oi be do oi dika bada.”​—Mataio 11:​20-24.

Lagani 1964 be do lasi neganai, ai laloa unai siri edia anina be, Korasina, Betesaida, bona Kaperanauma taudia edia davana be mase hanaihanai. To lagani 1964 bona 1965 lalodiai Gima Kohorona ese idia hahedinaraia, Hade, o Sheol, (taunimanima edia gara gabuna unai) lalonai idia noho taudia iboudiai be mase amo do idia toreisi lou, bena ‘edia kara hegeregerena idia do ia kota henia.’​—Apokalupo 20:13.

Unai Gima Kohorona edia hereva be inai: Mataio 11:23 bona Luka 10:15 idia gwau Kaperanauma be “hel dekenai do idia doria diho,” anina be unai hanua taudia do idia hadihodia. Unai karoa lalonai Iesu ese danu Turo bona Sidono ia gwauraia. Esekiel 32:​21, 30 ia gwau, Sidon taudia, Dirava ese ia gwauraidia dika taudia unai, be Sheol dekenai idia lao. (Isaia 23:​1-9, 14-18; Esekiel 27:​2-8) Iesu ese Turo bona Sidono be Sodoma bona Gomora ida ia hahegeregeredia, anina be Sodoma taudia danu be Sheol lalonai.

To Mataio 11:​20-24 ai tahua namonamo lou dainai, ai laloa reana unai siri lalodiai Iesu ese hahemaoro hanaihanai bona toreisi lou ia gwauraia lasi. Ena hereva ena anina be, Korasina, Betesaida, bona Kaperanauma taudia be idia kamonai lasi momokani dainai, Kota Dinana Badana ai do idia helalo-kerehai diba lasi. Ena hereva ena anina ita abia maoromaoro totona, ena hereva unai bamodia ma haida ita tahua be namo; unai hereva be inai:

“Guba bona tanobada do idia boio be mai ena dala, to Taravatu ena koma ta do ia boio be dala lasi.” (Luka 16:17; 21:33; Mataio 5:18; ma Heberu 1:​10-12 danu itaia.) Ita diba guba korikorina bona tanobada korikorina do idia boio lasi. (Salamo 78:69; 104:5; Kohelete 1:4) Iesu be ma ia gwau: “Kamelo nila matuna ia vareai be haraga, to kohu momo tauna Dirava ena Basileia ia vareai dala be auka.” (Mareko 10:25) To Iesu ia gwau lasi kohu momo taudia be iena hahediba taudia ai idia lao diba lasi; aposetolo edia negai, idia haida be Keristen taudia ai idia lao. (1 Timoteo 6:​17-19) Iesu ena hereva ena anina be inai: Kohu momo tauna ese Dirava ia laloa bada bona kohu ia laloa maragi be auka herea.​—Luka 12:​15-21.

Unai hegeregerena, ena be Iesu ia gwau, “Kota karaia dinana neganai Turo bona Sidono be do idia dika maragi,” to reana unai taunimanima be Kota Badana dinana ai do idia hedinarai lasi. Reana ena hereva ena anina tamona be: Korasina, Betesaida, bona Kaperanauma taudia momo be idia kamonai lasi dainai, idia be mai edia kerere bada. Kaperanauma taudia ta ta ese Keriso idia abidadama henia, to unai hanua toiosi ese idia dadaraia. (Mareko 1:​29-31; Luka 4:​38, 39) Reana unai hanua taudia haida, torea taudia bona Farisea taudia hegeregeredia, ese lauma helaga idia kara dika henia vadaeni, unai kerere be Dirava ese ia gwauatao diba lasi, “hari inai mauri ai bona mauri gabena ai danu.” Unai bamona taudia be Gehena dekenai idia lao.​—Mataio 12:​31, 32; 23:​33, NW.

Esekiel 32:​21, 30 ia gwau Turo bona Sidono taudia be Sheol dekenai idia noho; unai dainai do idia toreisi lou. Vadaeni, Kota Badana dinana ai, Sodoma taudia be edena bamona? Ena be Iesu ese Sidono be Sodoma ida ia hahegeregerea, to ita be unai dainai ita gwau lasi unai kara dika taudia, Dirava ese salifa bona lahi amo ia hamasedia ore taudia, do idia toreisi lou. Bible ena hereva ma ta Iuda 7 dekenai mani ita itaia.

Iuda ese ia gwauraidia guna taudia be inai: (1) Israel taudia, edia abidadama be lasi dainai Dirava ese ia hamasedia ore, bona (2) aneru, idia kara dika dainai Dirava ese “idia ia guia . . . ela bona Kota Bada Dinanai.” Bena ia gwau: “Sodoma bona Gomora . . . danu be unai bamona . . . Dirava ese edia kerere davana ia henidia, noho hanaihanai lahina ena hisihisi.” Iuda 5 bona 6 edia hereva hegeregeredia, siri 7 ese unai hanua taudia panisidia karana ia gwauraia, unai hanua hadikadia ore karana ia gwauraia lasi. Anina be, Sodoma bona Gomora noholaia taudia dikadia ia kota henidia bena ia hamasedia ore ela bona hanaihanai.

Mai anina bada gauna be inai: Bible ena siri ma haida lalodiai Abata Badana be Sodoma bona Gomora ida idia hahegeregerea.

“Tanobada dokona” idia nanadailaia neganai, Iesu ese ia perovetalaia, ia gwau: “Hisihisi bada herea do idia vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari.” (Mataio 24:​3, 14, 21) Ma “Noa ena nega“ bona “Lota ena nega“ lalodiai idia vara gaudia ia herevalaia, ia gwau unai negai idia noho taudia ese Dirava do ia panisidia herevana idia laloa lasi. Iesu be ma ia gwau: “Taunimanima ena Natuna do ia hedinarai dinanai danu unai bamona kara do ia vara.” (Luka 17:​26-30; ma Mataio 24:​36-39 itaia danu.) Iesu ese edia lalohadai sibona ia gwauraia a, eiava hahemaoro hanaihanai danu ia gwauraia, a?

Gabeai, Petro ese Dirava be kerere taudia ia kota henidia bona ia panisidia sivaraidia ia gwauraia. Idia kara dika anerudia, tanobada besena gunana Noa ena negai idia noho, bona Sodoma bona Gomora dekenai ia hamasedia ore taudia danu be ia ese ia herevalaidia. Petro ia gwau, unai hanua ruaosi dekenai ia karaia karana amo, Dirava ese ia garina idia gari lasi taudia na do idia vara gaudia ia hadibalaidia. (2 Petro 2:​4-9) Unai murinai, ia gwau Dirava ese taunimanima na Abata Badana lalonai ia hamasedia ore hegeregerena, “Kota Badana Dinanai . . . Dirava idia negea taudia be do idia boio.”​—2 Petro 3:​5-13.

Unai hegeregerena, Dirava ese hari inai nega dikana ena dokona ai do ia hamasedia taudia be gabeai do ia kota henidia lou lasi, a? Tesalonika Iharuana 1:​6-9 ena anina be unai, ia gwau: “Dirava ese . . . hisihisi umui dekenai idia henia taudia dekenai be ia ese hisihisi do ia henidia. . . . Inai be do ia vara Lohiabada Iesu bona iena aneru mai siahu bada danu guba dekena amo do idia mai neganai. Mai lahi siahu bada danu, Dirava ura lasi taudia bona Lohiabada Iesu ena Sivarai Namona idia abia dae lasi taudia dekenai davana metau do ia henidia. Edia davana be inai: idia be Lohiabada ena vairana bona iena hairai siahuna dekena amo daudau do idia noho. Inai anina be, idia do ia haorea momokani, bona inai bamona do idia noho hanaihanai.”

Inai hereva bona Iuda be Sodoma ia gwauraia herevana be idia hegeregere. Danu, Mataio 25:​31-46 bona Apokalupo 19:​11-21 idia hahedinaraia, Dirava ena tuari lalonai do idia hamasedia ‘nanigosidia’ be “davana ia dika hanaihanai gabuna dekenai do idia lao,” “lahi gohuna“ lalonai; unai lahi gohuna anina be mase hanaihanai.​—Apokalupo 20:​10, 14.

Unai dainai, Iuda 7 lalonai bona ma siri haida lalodiai, Bible ese ia hahedinaraia, Sodoma bona Gomora dekenai ia vara gauna bona Abata Badana dekenai ia vara gauna danu ese hari inai nega dikana ena dokona ai do ia vara gauna idia hahedinaraia. Unai dainai ita diba momokani, Dirava ese unai kota negadia gunadia lalodiai ia hamasedia taudia be idia mase ore ela bona hanaihanai. Ma ita diba iena hahemaoro karadia be idia goevadae. “Momokani, Dirava ia kara dika lasi; Siahu Ibounai Diravana ese kota karana ia hagagevaia lasi.”​—Iobu 34:​10, 12.