Hebogahisi Bona “Tanobada Ibounai Edia Hahemaoro Tauna” Abidadama Henia!

1. Iehova ese Aberahamo dekenai dahaka ia hadibaia?

LAGANI momo gunanai, Dirava ese aneru ta amo Aberahamo ia hadibaia, Sodoma bona Gomora ena siti ibounai do ia hadikaia momokani. To, Aberahamo ese unai ia lalopararalaia lasi, ena be Dirava ia abidadama henia. Unai dainai ia henanadai: “Momokani kara maoromaoro taudia be kara dika taudia ida do oi hadikaia ore, a? . . . Tanobada ibounai edia Hahemaoro Tauna be kara maorona do ia karaia lasi, a?” Iehova be mai haheauka ida ena turana namona dekenai mai anina bada gauna ta ia hadibaia, unai be, Dirava ese kara maoromaoro taudia do ia hadikaia lasi. Unai ese hari inai negai, ita ibounai ia durua bona hagoadaia.—Gen. 18:23-33.

2. Edena bamona ita diba Iehova be taunimanima ia hahemaoro henia neganai, hebogahisi bona kara maoromaoro ia hahedinaraia?

² Edena bamona ita diba Iehova be taunimanima ia hahemaoro henia neganai, hebogahisi bona kara maoromaoro ia hahedinaraia? Badina ita diba ‘Iehova ese taunimanima edia kudouna ia itaia.’ (1 Sam. 16:7) Momokani, ia be “taunimanima edia kudouna” ia diba. (1 Ki. 8:39; 1 Siv. 28:9) Unai be hoa gauna. Bona Iehova ena aonega be bada herea dainai, nega haida ia karaia abia hidi do ita lalopararalaia lasi. Unai dainai, aposetolo Paulo ese Iehova Dirava be inai bamona ia gwauraia: “Iena hahemaoro karadia be ta ese ia tahua diba lasi!”—Roma 11:33.

3-4. Reana nega haida dahaka henanadai ita laloa, bona inai atikol ai dahaka do ita herevalaia? (Ioane 5:28, 29)

³ Ena be ita diba, hanaihanai Iehova ese ia karaia gaudia be maoro, to reana Aberahamo bamona do ita henanadai: ‘Iehova ese Sodoma bona Gomora ai ia hamasea taudia be do idia toreisi lou, a? Idia haida be “kara maoromaoro lasi taudia” ida do idia toreisi lou, a?’—Kara 24:15.

⁴ Mani toreisi lou ita lalopararalaia dalana ita herevalaia. Vanegai, ita ese “toreisi lou mauri abia totona” bona “toreisi lou hahemaoro abia totona” edia diba matamata ita abia.a (Ioane 5:28, 29 duahia.) Unai diba matamata dainai, senisi ma haida idia karaia, unai dainai inai atikol bona atikol 19 ai unai gaudia do ita herevalaia. Iehova ena hahemaoro maoromaoro dekenai ita diba lasi gauna do ita herevalaia guna, bena ita diba gauna do ita herevalaia.

ITA DIBA LASI GAUNA

5. Guna, iseda pablikeisen ese edena bamona Sodoma bona Gomora ai Iehova ese ia hamasea taudia ia herevalaia?

⁵ Guna, iseda pablikeisen ese inai henanadai ia herevalaia, Iehova be kara maoromaoro lasi taudia ia hahemaoro henia neganai, idia dekenai dahaka do ia vara? Ita gwau Iehova ese ia hamasea taudia hegeregere, Sodoma bona Gomora taudia, be do idia toreisi lou lasi. To stadi namonamo bona guriguri karana murinai, ia hedinarai goevagoeva unai bamona do ita hereva lasi. Dahaka dainai?

6. Iehova ese kara maoromaoro lasi taudia ia hahemaoro henia karana ena haheitalai haida be dahaka, bona dahaka ita diba lasi?

⁶ Mani unai bamona sivarai haida ita herevalaia. Baibel lalonai Iehova be kara maoromaoro lasi taudia ia hahemaoro henia karana edia sivarai ia noho, hegeregere Iehova ese Abata amo taunimanima ibounai ia hamasea, to Noa bona ena ruma bese sibona ia hamauria. Danu, Israela taudia ia gaukaralaia Gwauhamata Tanona ai idia noho bese ibounai 7 idia hamasea. Bona Aneru ta ia gaukaralaia hanuaboi tamona lalonai, Asuria ena tuari taudia 185,000 ia hamasea totona. (Gen. 7:23; Deu. 7:1-3; Isa. 37:36, 37) Unai sivarai amo, Baibel be ita ia hadibaia Iehova ese unai taudia ia haorea momokani bona do idia toreisi lou lasi, a? Lasi. Dahaka dainai unai bamona ita gwau?

7. Abata lalonai bona Kanana tanona ai idia mase taudia dekenai dahaka ita diba lasi? (Laulau itaia.)

⁷ Ita herevalaia sivaraidia amo Iehova ese unai taunimanima ta ta ia hahemaoro henia dalana ita diba lasi. Danu ita diba lasi bema idia mase taudia dekenai dala ia noho, Iehova idia dibaia bona idia helalo-kerehai totona. Baibel ese Abata ia vara negana ia herevalaia neganai, ia gwau Noa be “kara maoromaoro ia harorolaia tauna.” (2 Pet. 2:5) To ia gwau lasi Noa be lagatoi ia karaia lalonai, ia ura taunimanima ta ta ia haroro henia. Unai hegeregerena, ita diba lasi bema Kanana ai idia noho kara dika taudia dekenai dala ia noho Iehova idia dibaia bona idia helalo-kerehai totona.

8. Sodoma bona Gomora taudia totona, dahaka ita diba lasi?

⁸ Iehova ese Sodoma bona Gomora taudia ia hadikaia neganai, idia mase taudia be edena bamona? Kara maoromaoro tauna ladana Lota, be idia huanai ia noho. To Lota be idia ibounai ia haroro henia, a? Unai ita diba lasi. Idia be kara dika taudia to haida be maoro bona kerere edia idau idia diba, a? Laloatao, unai siti ai tatau momo idia ura Lota ena vadivadi taudia idia reipia. Baibel ia gwau: “Tatau ibounai, matamata bona buruka, be orea ta bamona idia mai.” (Gen. 19:4; 2 Pet. 2:7) Hebogahisi Diravana, Iehova, be ena lalona ia hadaia unai taudia do ia hatorea isi lou lasi, a? Lasi, unai bamona do ita hereva lasi. Iehova ese Aberahamo ia hamaoroa unai siti ai kara maoromaoro taudia 10 idia noho lasi. (Gen. 18:32) Unai ese ia hahedinaraia, idia be kara maoromaoro lasi taudia bona Iehova be mai ena maoro idia ia hamasea totona. Ita gwau diba “kara maoromaoro lasi taudia . . . idia toreisi lou” neganai, Sodoma bona Gomora taudia ibounai do idia toreisi lou lasi, a? Unai ita diba lasi!

9. Solomona totona dahaka ita diba lasi?

⁹ To, Baibel ena sivarai haida ese idia hahedinaraia kara maoromaoro taudia be kara maoromaoro lasi taudia ai idia lao. Haheitalai ta be King Solomona. Ia be Iehova ia diba bona do ia tomadiho henia dalana ia diba. Danu, Iehova ese ia dekenai hahenamo momo ia henia, to gabeai Solomona be dirava koikoidia ia tomadiho henia. Unai dainai, Iehova be ia badu dikadika bona Solomona ena kara dika dainai, Israela besena be lagani handred momo lalonai hisihisi momo idia davaria. Momokani, Baibel ia gwau, Solomona ia mase neganai “ena sene taudia ida ia hekure,” idia ta be abidadama tauna King Davida. (1 Ki. 11:5-9, 43, ftn; 2 Ki. 23:13) To, Baibel ese unai hereva ia gaukaralaia dainai, unai ese ia hahedinaraia Iehova be Solomona do ia hatorea isi lou, a? Baibel ese unai ia gwauraia lasi. Reana haida do idia laloa, Solomona be do ia toreisi lou, badina Baibel ia gwau: “Ia mase vadaeni tauna be ena kara dika amo ia ruhaia.” (Roma 6:7) To, unai ese ia hahedinaraia lasi idia mase taudia ibounai be do idia toreisi lou. Bona ta ia mase neganai, unai ese ia hahedinaraia lasi ia be mai ena maoro gabeai do ia mauri lou totona. Toreisi lou be lalokau Diravana ena harihari gauna ta. Bona ia idia ura hesiai henia hanaihanai taudia dekenai, unai harihari gauna ia henia. (Iobu 14:13, 14; Ioa. 6:44) Solomona be unai harihari gauna do ia abia, a? Iehova sibona be unai henanadai ena haere ia diba. To ita diba Iehova be kara maorona do ia karaia.

ITA DIBA GAUNA

10. Taunimanima hamasea karana dekenai Iehova ena hemami be edena bamona? (Esekiela 33:11) (Laulau itaia danu.)

¹⁰ Esekiela 33:11 duahia. Iehova be taunimanima hahemaoro henia karana dekenai ena hemami ia gwauraia. Peroveta tauna Esekiela ia torea herevana hegeregerena, aposetolo Petero ia gwau: “Iehova . . . ia ura lasi tau ta ia mase.” (2 Pet. 3:9) Unai hagoadaia herevana amo ita diba, Iehova be ia haraga lasi ta ia hamasea momokani totona. Bona dala ia noho neganai, hebogahisi ia hahedinaraia.

11. Daidia be do idia toreisi lou lasi bona edena dala ai unai ita diba?

¹¹ Do idia toreisi lou lasi taudia totona, dahaka ita dibaia? Baibel be haheitalai haida sibona ia gwauraia.b Iesu ese ia hahedinaraia Iuda Iskariote be do ia toreisi lou lasi. (Mar. 14:21; Ioa. 17:12.c) Iuda ia diba ia karaia gauna be Iehova Dirava bona Ena Natuna edia ura hegeregerena lasi, to unai ia karaia. (Mar. 3:29.) Unai hegeregerena, Iesu ia gwau ia idia dadaraia dubu gunalaia taudia haida be idia mase neganai, idia dekenai helaro be lasi idia toreisi isi lou totona. (Mat. 23:33; Ioa. 19:11) Bona aposetolo Paulo ia gwau, idia helalo-kerehai lasi aposteit taudia be do idia toreisi isi lou lasi.—Heb. 6:4-8; 10:29.

12. Iehova ena hebogahisi karana dekenai dahaka ita dibaia? Haheitalai haida gwauraia.

¹² To Iehova ena hebogahisi karana dekenai dahaka ita diba? Edena dala ai ia hahedinaraia “ia ura lasi tau ta ia mase”? Mani kara dika badadia idia karaia taudia ia hebogahisi henia dalana ita herevalaia. King Davida be kara dika badadia ia karaia, hegeregere heudahanai bona ala-ala karana. To, Davida ia helalo-kerehai dainai, Iehova ese ia hebogahisi henia bona ena kara dika ia gwauatao. (2 Sam. 12:1-13) King Manase be ena mauri lalonai kara dika badadia momo ia karaia. Ena be unai ia vara, to ia helalo-kerehai dainai, Iehova ese ia hebogahisi henia bona ena kara dika ia gwauatao. (2 Siv. 33:9-16) Unai haheitalai ese ita ia hadibaia, Iehova be badina maorona ta ia itaia neganai hebogahisi do ia hahedinaraia. Ia ese unai bamona taudia do ia hatorea isi lou, badina idia laloparara idia be kara dika badadia idia karaia bona idia helalo-kerehai.

13. (a) Dahaka dainai, Iehova ese Nineva taudia ia hebogahisi henia? (b) Iesu ese Nineva taudia totona dahaka ia gwauraia?

¹³ Danu, Iehova ese Nineva taudia ia hebogahisi henia karana ita diba. Dirava ese Iona ia hamaoroa: “Edia kara dika lau itaia vadaeni.” To, idia helalo-kerehai neganai, Iehova be mai hebogahisi ida edia dika ia gwauatao. Iehova be hebogahisi karana ia hahedinaraia, to Iona be lasi. Iona ia badu, bona Dirava ese ia hadibaia Nineva taudia be “maoro bona kerere edia idau idia diba lasi.” (Iona 1:1, 2; 3:10; 4:9-11) Gabeai, Iesu ese unai haheitalai ia gaukaralaia Iehova ena hahemaoro goeva bona hebogahisi karana ia hadibaia totona. Bona ia gwau, idia helalo-kerehai Nineva taudia be “hahemaoro dinana ai, . . . do idia toreisi lou.”—Mat. 12:41.

14. Nineva taudia “do idia toreisi lou hahemaoro abia totona” ena anina be dahaka?

¹⁴ To “Hahemaoro dinana ai,” Nineva taudia “do idia toreisi lou” ena anina be dahaka? Iesu ia gwau vaira negai haida “do idia toreisi lou hahemaoro abia totona.” (Ioa. 5:29) Unai be iena Lohia Lagani 1,000 lalonai do ia vara gauna ia herevalaia, unai negai “kara maoromaoro taudia bona kara maoromaoro lasi taudia be do idia toreisi lou.” (Kara 24:15) Kara maoromaoro lasi taudia be “do idia toreisi lou hahemaoro abia totona.” Unai ena anina be, idia toreisi lou murinai, Iehova bona Iesu ese do idia itaia bema unai taudia be idia dibaia gaudia idia badinaia. Bema ia toreisi lou Nineva tauna ta be ia ura lasi Iehova ia tomadiho henia, ia be do ia mauri hanaihanai lasi. (Isa. 65:20) To, mai abidadama ida Iehova idia badinaia taudia be mauri hanaihanai do idia abia!—Dan. 12:2.

15. (a) Dahaka dainai, ita gwau lasi Iehova ese Sodoma bona Gomora ai ia hadikaia taudia be do idia toreisi lou lasi? (b) Edena dala ai Iuda 7 ena hereva do ita lalopararalaia? (Maua ladana “Iuda Ena Hereva Ena Anina be Dahaka?” itaia.)

¹⁵ Iesu ia gwau “Hahemaoro Dinana ai,” ia bona ena hahediba herevadia idia dadaraia taudia ‘edia dika davana ese Sodoma bona Gomora taudia edia dika davana do ia hereaia.’ (Mat. 10:14, 15; 11:23, 24; Luka 10:12) Ena hereva ena anina be dahaka? Reana do ita laloa Iesu be laulau dalanai idia ia herevalaia. To laloatao, Iesu ia gwau Nineva taudia be “Hahemaoro Dinana ai” do idia toreisi lou neganai, unai be do ia vara momokani gauna ia herevalaia. Bona ia herevalaia “Hahemaoro Dinana” be Nineva taudia totona danu. Nineva taudia bamona, Sodoma bona Gomora taudia be kara dikadia idia karaia. To, Nineva taudia dekenai dala ia noho idia helalo-kerehai totona. Danu laloatao, Iesu ia gwau haida be “do idia toreisi lou hahemaoro abia totona.” Unai be “kara dika idia karaia taudia” ia herevalaia danu. (Ioa. 5:29) Unai dainai, reana Sodoma bona Gomora taudia haida dekenai helaro ia noho. Momokani, idia haida be do idia toreisi lou bona dala ia noho idia dekenai Iehova bona Iesu Keriso do ita herevalaia.

16. Iehova be ta do ia hatorea isi lou karana dekenai dahaka ita diba? (Ieremia 17:10)

¹⁶ Ieremia 17:10 duahia. Unai siri ese ita diba gauna ia herevalaia: Iehova be hanaihanai ‘ta ena kudouna ia tahua bona ena lalona momokani ai idia noho gaudia ibounai ia tahua.’ Unai dainai, “ta ta edia kara hegeregerena” abia hidi do ia karaia daika ia hatorea isi lou totona. Iehova be gau haida dekenai ia kara auka, to dala ia noho neganai hebogahisi ia hahedinaraia. Unai dainai, namo lasi ita gwau ta be do ia toreisi lou lasi, bema Baibel amo ita hamomokania lasi!

“TANOBADA IBOUNAI EDIA HAHEMAORO TAUNA BE KARA MAORONA DO IA KARAIA”

17. Idia mase vadaeni taudia ibounai dekenai dahaka do ia vara?

¹⁷ Adamu bona Heva be Satani ida Iehova Dirava idia gwau-edeede henia negana amo, taunimanima bilioni momo idia mase. Ita “inai henia gauna” mase, ese dika bada ia havaraia! (1 Kor. 15:26) Idia mase vadaeni taudia ibounai dekenai dahaka do ia vara? Orea maragina, Keriso murinai idia raka taudia 144,000, be do idia mauri lou, bona guba dekenai mase diba lasi maurina do idia abia. (Apok. 14:1) Iehova idia lalokau henia abidadama tatau bona hahine hutuma, be ‘kara maoromaoro taudia ida do idia toreisi lou,’ bona mauri hanaihanai do idia abia, bema Keriso ena Lagani 1,000 Lohia Negana lalonai bona hahetoho ginigabena lalonai, kara maoromaoro idia badinaia. (Dan. 12:13; Heb. 12:1) Danu Lagani 1000 Lohia Negana lalonai, “kara maoromaoro lasi taudia” hegeregere Iehova idia hesiai henia lasi taudia, eiava “kara dika idia karaia taudia” dekenai dala ia noho edia kara do idia haidaua bona Iehova Dirava idia hesiai henia totona. (Luka 23:42, 43) To, taunimanima haida edia kara be dika momokani, bona edia lalona idia hadaia Iehova bona ena ura idia dadaraia totona, unai dainai Iehova be abia hidi ia karaia do idia toreisi lou lasi.—Luka 12:4, 5.

18-19. (a) Dahaka dainai idia mase vadaeni taudia totona, Iehova ena hahemaoro dalana ita abia dae? (Isaia 55:8, 9) (b) Atikol 19 ai dahaka do ita herevalaia?

¹⁸ Ita abia dae momokani, Iehova be taunimanima ia hahemaoro henia neganai, hanaihanai abia hidi maorona ia karaia, a? Oibe! Aberahamo ia laloparara, Iehova ena kara be goevadae, ia be aonega bada bona hebogahisi Diravana, bona “Tanobada ibounai edia Hahemaoro Tauna.” Iehova ese ena Natuna ia treinia bona taunimanima ibounai hahemaoro henia gaukarana ia henia. (Ioa. 5:22) Iehova bona Iesu be taunimanima edia kudouna ai idia noho gaudia idia diba. (Mat. 9:4) Unai dainai, taunimanima idia hahemaoro henia neganai “kara maorona” do idia karaia!

¹⁹ Namona be iseda lalona ita hadaia, Iehova ita abidadama henia bona ia karaia abia hidi ibounai ita abia dae. Ita laloparara ita be hegeregere lasi ma ta ita hahemaoro henia totona, to Iehova sibona be unai ia karaia diba! (Isaia 55:8, 9 duahia.) Unai dainai, ita abia dae Iehova bona ena Natuna ese hahemaoro gaukarana idia karaia be namo. Danu, ita diba iseda King, Iesu, be ena Tamana ena hahemaoro goeva bona ena hebogahisi karana do ia tohotohoa goevagoeva. (Isa. 11:3, 4) To, hisihisi badana lalonai, Iehova bona Iesu ese taunimanima do idia hahemaoro henia dalana be edena bamona do ita herevalaia? Dahaka ita diba lasi? Bona dahaka ita diba? Atikol 19 ese unai henanadai do ia haerelaia.