Badina be Dahaka Taravatu Utua Karadia be Momo?
BRITAIN ena gavamani ena buklet ta ia gwau: “Taravatu utua kara momo be kohu hadikaia kara.” To, unai tano dekenai, taunimanima hadikaia dagedage karana be “haraga momokani idia dika idia lao karana,” ena be taravatu utua kara iboudiai amo 5 pesen sibona be unai bamona karadia.
Tanobada ibounai dekenai taravatu utua karadia be unai bamona idia dika idia lao. Tanobada edia niuspepa dekenai, idia torea gaudia momo be taravatu utua dagedage karadia edia sivarai momo, hegeregere: guba dekenai idia roho peleini idia henaoa, ipidi gaudia amo taunimanima idia hagaridia edia kohu henaoa totona, hahine hadikaia karana, bona ma dagedage karadia haida. Nega momo, bema taravatu utua karana be dagedage karana lasi unai sivarai idia torea lasi. Unai dainai, reana taravatu utua karana ese oi eiava oiemu kohu do ia hadikaia diba. Badina be dahaka? Badina be dahaka taunimanima be taravatu utua taudia ai idia lao?
Taravatu utua taudia momo be unai bamona idia karaia badina idia dekenai dala ia noho. Unai dainai, gavamani taudia ese taravatu utua karana idia koua toho dalana ta be taunimanima idia hadibaia edia noho gabu dekenai idia vara gaudia idia diba totona. Ena be unai bamona dala amo taravatu utua kara idia koua toho, to taunimanima be taravatu utua taudia ai idia lao dalana ia koua, a? Lasi.
Taunimanima momo be taravatu utua taudia edia kara idia tahua momo. Dirava ena Hereva, Bible, ese taravatu utua taudia edia kara ia herevalaia. Uhau ia sisiba henidia, idia be inai bamona idia hereva taudia edia lalo-ani herevana idia kamonaia garina: “Oi mai. Ita lao. Ta ena rara ita bubua! Kerere lasi taudia ita alaia kava, gadara bamona! Ita davaria neganai idia mauri, to ita rakatanidia neganai idia mase! Kohu namo herea momo ita abia bona iseda ruma ita hahonua! Ai danu oi mai bona ita henaoa gaudia ita moalelaia tamona.” (Hereva Lada-isidia 1:11-14) Oibe, kohu ura henia momo karana bona mataganigani dainai, taravatu utua karadia idia vara momo.
Hari inai negai, taunimanima momo be drag ania kara bona tauanina hamoalea karana idia laloa momo. Unai bamona idia karaia totona, moni idia tahua. Moni idia tahua neganai, idia laloa lasi bema ta idia hahisia eiava idia hamasea. Inai ‘nega dikadia’ ai, momokani, taunimanima momo “be kara dika dekenai idia heau henia haraga, rara bubua totona idia haraga haraga.”—2 Timoteo 3:1, 3, 4; Hereva Lada-isidia 1:16.
Webster’s Ninth New Collegiate Dictionary ia gwau taravatu utua karana be “kara maoro negea kara kerere badana.” Ita be kara maoro negea bada ena nega lalonai ita noho. Aposetolo Paulo ese Efeso Keristen taudia ia sisiba henidia idia be inai bamona taudia idia noho lasi totona: “Idia edia laloa be anina lasi. Edia laloa be dibura. Dirava ena mauri be idia davaria diba lasi, badina be ia dekena amo edia laloa idia koua, bona iena dala idia diba lasi. Idia be hemarai lasi momokani. Lebulebu daladia idia ura dikadika, bona matabodaga karadia idia tahua doko lasi.” Hari inai negai, ita danu unai sisiba ita kamonai henia be namo.—Efeso 4:17-19.
Vidio momo dekenai, dagedage momokani karadia idia hahedinaraia momo, tuari idia abia isi momo, bona taravatu utua tauanina hamoalea karadia idia hahedinaraia momo. Inai kara ibounai ese taunimanima momo ia hakaudia taravatu utua kara taudia ai idia lao totona bona ma kerere lasi taudia be unai kara amo hisihisi idia davaria totona, ani? To taravatu utua hehuni karana dekenai ma tau ta ena kara ia hedinarai. Ia be daika?
Ia be Satana Diabolo. Iena badu dainai, dagedage kava bona taravatu utua karana ia havaraia. Unai be hari inai negai tanobada ena toana. (1 Ioane 5:19; Apokalupo 12:12) Ia ura taunimanima ia hakaudia Dirava momokani, Iehova idia rakatania totona. Ena be taunimanima momo ia hakaudia oho, to Bible ena peroveta hereva be, ia ese Dirava ena hesiai taudia korikoridia edia abidadama do ia hadikaia diba lasi. Gabeai, Satana do ia mase. To, Satana ia noho lasi neganai, unai ese taravatu utua kara do ia hadokoa, a? Bona taravatu utua kara dokona ena nega ia kahirakahira, a?