Hari Ita Hegaegae Gabeai Ia Mai Lagani Daha Totona
“Lagani 1,000 lalonai Keriso danu do idia lohia.”—APOKALUPO 20:6.
1. Gabeai, lagani 1,000 murinai, tanobada ena toana be edena bamona do ia noho?
EDENA bamona? Taunimanima be momokani lagani daha ta murinai tanobada dekenai idia do noho, a? Aiemai hereva ena anina be unai bamona! Unai sibona lasi, to unai neganai taunimanima iboudiai be tauanina dekenai, kudou dekenai, bona darana dekenai do idia goevadae—tau bona hahine goevadaena ginigunadia hegeregeredia. Oibe, lagani 1,000 murinai, taunimanima be edia Dirava bona idia Ia Hanamoa Tauna edia laulau ai do idia noho. (Genese 1:26-30) Idia be “Eden ena uma” gabuna, moale paradaisona, do idia moalelaia. Unai neganai, tanobada do ia goeva bona taunimanima ta ta iboudiai edia gabu be do ia hegeregere. (Genese 2:15) Unai ibounai be Havaraia Tauna ena ura ginigunana tanobada dekenai bona idia noholaia taudia dekenai hegeregerena do ia vara. Unai dala dekenai, ena hereva do ia hagugurua dainai, ena be haida ese ia koua toho to lalokau dekenai ia peroveta taunimanima iboudiai do ia hanamodia herevana do ia hamomokania.
2. Lagani 1900 gunanai, taunimanima be edena dala amo idia diba taunimanima goevadae edia toana be edena bamona?
2 Dirava ena Lagani 1,000 Lohia Negana, iena hairai Natuna henunai ia ore neganai, Dirava ena hereva do ia guguru. Iena Natuna be tau goevadaena bona lagani 1900 gunanai, tanobada dekenai lagani 33 mai kahana ia noho. Unai neganai, iena toana be inai bamona: “Hereva be taunimanima ena tauanina dekenai ia halaoa, iseda huanai ia noho. Iena hairai danu ita itaia. Inai hairai be Dirava ese ia henia, badina ia be Dirava ena Natuna tamona sibona. Bogahisihisi kara bona hereva momokani dekenai ia honu momokani.” (Ioane 1:14) Vadaeni, Israel taudia be Iesu Keriso idia itaia neganai taunimanima goevadaena ena toana be edena bamona idia diba. (Luka 3:23, 38) Oibe, lagani 1900 gunanai taunimanima haida idia itaia vadaeni gabeai do ia mai tanobada Paradaisona dekenai taunimanima goevadaedia edia toana be edena bamona.
3, 4. (a) Iehova ena lohia Iesu Keriso bona 144,000 taudia edia lohia negana ena daudau be lagani hida? (b) Unai nega ena ladana be dahaka, bona Watch Tower ena orea ia halasia bukadia edia sinado dekenai edena dala ai unai hereva idia torea?
3 Peroveta hereva ia gwau Iesu Keriso bona idia ia hahairaia 144,000 hahediba taudia be Iehova ena Basileia ena lohia negana ena daudau be lagani 1,000. Unai Lagani 1,000 Lohia Negana ia herevalaia neganai, aposetolo tauna burukana, Ioane ia torea: “Inai murinai helai gabudia haida lau itaia, bona idia latanai helai taudia danu lau itaia. Unai taudia dekenai Dirava ese kota biaguna ena siahu ia henia. Bona taunimanima momo edia laumadia lau itaia. Inai taudia be edia kwaradia idia utua oho, badina be Iesu ena hereva momokani, bona Dirava ena hereva idia gwauraia dainai. Idia ese dagedage gauna o iena laulauna idia tomadiho henia lasi. Bona dagedage gauna ena maka edia baguna dekenai o edia imana dekenai, idia abia lasi. Idia be mase dekena amo idia mauri lou, vadaeni Keriso danu lohia siahu idia abia, ela bona lagani 1,000 idia ore. To mase taudia oredia do idia mauri lou lasi ela bona lagani 1,000 idia ore. Mase dekena amo toreisi lou ginigunana be inai. Inai toreisi lou ginigunana dekenai idia toreisi taudia be moale bona helaga momokani. Idia be Dirava ena taudia korikori. Mase iharuana be mai ena siahu lasi unai taudia dekenai. Idia be Dirava bona Keriso edia boubou helaga karaia taudia. Bona lagani 1,000 lalonai Keriso danu do idia lohia.”—Apokalupo 20:4-6.
4 Unai negana idia gwauraia Keriso ena Lagani 1,000 Lohia Negana. Unai bamona Bible hahediba herevana idia abiadae bona idia hadibaia taudia be nega haida idia gwauraidia (millenarians), anina be lagani 1,000 taudia; unai be Greek gado ena hereva “1,000” ena amo idia abia. Danu ia laloa Studies in the Scriptures buka, (Guna Watch Tower Bible and Tract Society ese idia printaia) edia ladana ginigunana be Millenial Dawn. Bona International Bible Students ese idia gaukaralaia ane bukana ena ladana be Hymns of the Millenial Dawn (Lagani 1,000 Lohia Negana ena Ane).
5. Keriso ena Lagani 1,000 Lohia Negana lalonai, Satana bona iena demoni edia noho be edena bamona?
5 Apokalupo 20:4 dekenai “lagani 1,000” ia herevalaia neganai, unai be laulau hereva ta lasi, to ena anina be lagani 1,000 korikoridia, dina be tanobada dekenai ia heau giroa negana ia makaia hegeregerena. Unai Lagani 1,000 lalonai, Satana Diabolo bona iena demoni be guri dobu dekenai do idia noho, badina Keriso ena Lagani 1,000 Lohia Negana ia do herevalaia lasi neganai, aposetolo Ioane ia gwau: “Aneru ta lau itaia, guba dekena amo ia diho. Iena imana dekenai guri dobu masemase ena ki ia dogoatao, bona auri seini badana ta danu. Inai aneru ese unai huala, unai idaunegai gaigaina, ma iena ladana be “Diabolo” bona “Satani”, ia dogoatao, seini dekenai ia guia. Vadaeni do ia guia noho ela bona lagani 1,000 idia ore. Aneru ese huala unai guri dobu masemase lalonai ia negea diho. Vadaeni unai guri ia lokaia, bona koua toana ia karaia. Satani be unai bamona ia koua, tanobada bese do ia koia diba lasi totona, lagani 1,000 lalonai. Unai lagani 1,000 idia ore neganai idia ese Satani ma do idia ruhaia lou nega sisina sibona.”—Apokalupo 20:1-3.
6. (a) Roman Katolik dubu taudia haida idia gwau Keriso ena Lagani 1,000 Lohia Negana ena dokona be edena negai? (b) Bema Katolik taudia edia hereva be momokani, unai anina be ema bona hari Satana be guri dobu amo ia ruhaia negana ena lagani be hida?
6 Roman Katolik Dubu taudia haida idia gwau Iesu Keriso ena Lagani 1,000 Lohia Negana be lagani 1799 ai ia ore, France ena tuari taudia ese Roma idia dogoatao neganai, bona pope be terono amo idia kokia bona dibura tauna ai ia lao bona France dekenai idia abia lao bona unuseniai ia mase. Katolik dubu gunalaia taudia idia gwau unai neganai Satana bona iena demoni be “guri dobu masemase” amo idia ruhaia “nega sisina sibona” lalonai edia koikoi karadia idia karaia totona. (Apokalupo 20:1-3) Bema unai be momokani, anina be unai “nega sisina sibona” be lagani 190 dekenai ia heau lao vadaeni bona ena dokona ia do vara lasi.
7. Bible be edena dala ai ia hahedinaraia Iesu Keriso ena Lagani 1,000 Lohia Negana be edena negai bona ia lalonai dahaka do ia vara?
7 To Bible ena hereva hegeregerena, Iesu Keriso ena Lagani 1,000 Lohia Negana be do gabeai. Hari inai negai Bible ena peroveta herevadia idia guguru dainai ia hahedinaraia unai negana be ia kahirakahira momokani. Lagani 1,000 Negana korikori neganai, Satana bona ena demoni be guri dobuna dekenai do idia negea; unai neganai Iesu Keriso bona ia danu do idia lohia 144,000 taudia be taunimanima dekenai do idia lohia bona Diabolo ena orea ese do idia koua diba lasi. Iehova ena gwauhamata iena “turana” Abraham dekenai hegeregerena, taunimanima iboudiai do ia ruhadia bona idia be hahenamo do idia abia ela bona hanaihanai; unai nega be “hutuma bada herea” dekenai do ia hamatamaia; unai taudia be hari tanobada dikana do ia hadokoa “hisihisi badana” amo do idia roho mauri. Unai hanamoa karana be mase taudia bilion momo dekenai do ia hanai; idia be Iesu Keriso, “Mamoe ena Natuna ena rarana” dainai dika amo idia ruhaia nege. (Iakobo 2:21-23; Apokalupo 7:1-17; Genese 12:3; 22:15-18; Mataio 24:21, 22) Unai bamona ia vara totona, unai taudia be edia mahuta gabudia, guri dekena amo do idia toreisi lou bona tanobada dekenai mauri do idia abia lou.—Ioane 5:28, 29.
Keristen Oreana Ta
8 Lagani sinahu momo unai hahenamo idia do vara lasi neganai, Dirava ia gaukara noho iena ura ia hagugurua totona bona orea matamatana ta ia havaraia. Unai orea ena sivarai be inai bamona ita duahia diba: “Bema tau ta Keriso danu ia hakaupua tamona neganai, unai tau be tau matamatana.” “Kopina utua kara bona kopina utua lasi kara ruaosi be anina lasi. To gau ta be mai anina bada herea: vara matamata, Dirava ese ita dekenai ia karaia gauna.” (2 Korinto 5:17; Galatia 6:15) Lagani 1904 neganai, buka matamata The New Creation ese unai orea matamatana, Iesu ena nega amo lagani 100 lalonai ia vara oreana unai, ia herevalaia. (Studies in the Scriptures, Series VI, Study V, ena sinado be “Ia Vara Matamata Gauna ena Oreana”) Unai buka idia torea taudia be idia laloa Idau Bese Taudia Edia Nega be lagani 1914 ai do ia ore, to unai buka lalonai tanobada ibounai tuarina ginigunana dikana murinai unai orea ena gaukara badana do ia vara sivaraina ia herevalaia lasi.—Luka 21:24.
9. Vara matamata gauna ena orena taudia idia hegaegae dahaka do idia karaia totona?
9 Idia hoa mai moale bada danu badina ema bona Tanobada Ibounai Tuarina Ginigunana ia ore lagani 1918 amo ia lao bona 1919 neganai, ia vara matamata lauma gauna, orena taudia unai, idia mase lasi. To unai neganai lagani 1,000 ena nega ia do hamatamaia lasi. Unai anina be, tanobada dekenai orena taudia edia gaukara bada ia do noho, bena gabeai guba ena helarona do idia abia diba, Iesu Keriso danu lagani 1,000 gaukarana idia karaia hebou totona. Unai dainai, orena taudia idia goada bona gaukara dalana idia karaia namonamo lou be gau badana. Mai abidadama goadana bona mai edia ura bada danu gaukara idia karaia totona idia hegaegae.
10. Taunimanima milion momo be tanobada matamata dekenai do idia roho mauri ena hereva dekenai dahaka henanadai idia noho?
10 Horoa orena taudia idia laloa tanobada dekenai taunimanima haida be hari tanobada dikana ena dokona dikana amo do idia roho mauri, bona Iesu Keriso ena Lagani 1,000 Lohia Negana dekenai do idia vareai diba. Unai lalohadai idia abia dae momokani Los Angeles, California dekenai, lagani 1918 ena tuari lalonai, pablik tok ladana “Hari Idia Mauri Noho Milion Taudia Momo Do Idia Mase Lasi” ena hereva idia kamonai dainai. Aramagedono amo do idia roho mauri taudia milion momo edia gaukara dalana do ia heau namonamo, a? (Apokalupo 16:14-16) Idia be Lagani 1,000 Lohia Negana lalonai idia do vareai lasi bona “tanobada matamata” taudia ai do idia lao lasi neganai, idia be orena taudia ida Basileia harorolaia gaukarana do idia karaia, a? (2 Petero 3:13) Tuari murinai idia vara karadia amo unai henanadai ena haere do idia diba .
11. (a) Orena taudia ida mamoe orea tamona ai do idia lao mamoe idaudia haida edia orea dekenai dahaka idia karaia be namo? (b) Badina be dahaka, ena be edia helaro be idau, to unai ese orena taudia bona mamoe idaudia haida ia hapararadia lasi?
11 Iesu Keriso, Mamoe Naria Tauna namona ena hereva idia laloa bada, ia gwau: “Lau be mai egu mamoe idaudia haida danu idia noho. Idia be inai magu lalonai idia noho lasi. Idia danu do lau hakaudia mai, vadaeni egu gadona do idia kamonai, vadaeni orea do ia tamona, naria tauna danu do ia tamona.” (Ioane 10:16) Bema horoa orena taudia be lagani 1919 ena tuari murina dekena amo, gaukara do idia karaia namonamo, bona bema gabeai mamoe idaudia taudia be orena taudia ida mamoe orea tamona ai do idia lao, dahaka do idia karaia be namo? Namona be unai mamoe idaudia danu be orea dalana dekenai orena taudia ida idia gaukara hebou! Ena be mamoe idaudia edia helaro be idau—tanobada paradaiso moalena dekenai mauri do idia abia—to idia be orena taudia amo idia parara be anina lasi. Idia iboudiai be Mamoe Naria Tamona idia badinaia, bona unai orea rua do idia parara lasi ela bona horoa orena taudia be Basileia ena hairai idia abia.
12. (a) Taunimanima hamauridia be anina bada gauna to dahaka gau be unai ia hereaia? (b) Edena negai bona badina be dahaka Basileia harorolaia gaukara idia karaia be namo?
12 Iehova ena lalokau dainai ia ese kara badadia haida do ia karaia: taunimanima be kara dika bona mase amo do ia hamauridia, Satana ena biagua karana tanobada dekenai do ia hadokoa, bona tanobada Paradaisona be iena hereva idia badinaia taudia dekenai do ia henia lou. To, ma gau ta ia karaia be namo bona guba bona tanobada ibounai dekenai unai gau be anina bada herea. Unai be dahaka? Unai be Iehova Dirava ena lohia siahuna ena maoro ia hamomokania bona iena ladana helagana ia hahelagaia. Lagani 1922 ai, International Bible Students edia hebouhebou iharuana Cedar Point, Ohio dekenai, Pavapava Iesu Keriso henunai Iehova ena Basileia idia harorolaia gaukarana ena nega be namo. Lagani 1914 ai, Idau Bese Taudia edia Nega ia ore dainai, nega ia ginidae vadaeni Iesu ena peroveta hereva idia hagugurua totona: “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.” (Mataio 24:14) Iehova ena lohia siahuna ena maoro bona iena ladana helagana ia hahelagaia Basileiana be guba dekenai lagani 1914 ai ia haginia vadaeni, bona Iesu Keriso be iena inai taudia bogaragidiai ia lohia noho. Unai sivarai namo hereana be dala iboudiai dekenai do idia harorolaia Pavapava bona iena Basileia idia gwauraia hedinarai totona!
13. Dirava ese dahaka ia karaia Basileia harorolaia gaukara durua totona, bona badina be dahaka?
13 Iehova be gau iboudiai guba bona tanobada dekenai ia hegaegaelaia bona ia naria namonamo diba badina ia be Atai Herea Diravana bona Herea Momokani Diravana dainai. Tanobada dekenai, dokona ia do mai lasi neganai, iena Basileia be tanobada ibounai dekenai do idia harorolaia gaukarana ia hegaegaelaia namonamo. Idia do mauri noho horoa orena taudia be orea tamona dekenai ia haboudia iena ura idia karaia totona. Satana ese Iehova ena lohia siahuna ia gwau-edeede henia dainai, namona be idia ese unai lohia siahuna ena noho momokani bona ena maoro ena hamomokania dalana tanobada taudia dekenai do idia harorolaia, unai amo mauri gaudia iboudiai do idia diba Iehova ena lohia siahuna be maoro, ela bona hanaihanai.
Lagani 1,000 Ia Do Hamatamaia Lasi Neganai Orea Ia Noho
14 Lagani 1500 Keriso ia do mai lasi neganai, tanobada dekenai Iehova Dirava be mai ena orea ta. Ia ese peroveta tauna Mose dekenai gaukara ia henia bona ia be Herohemaino Tauna bamona Israel dekenai, ia hakaudia oho Aigupito tanona amo, Bible ese ia hahedinaraia Aigupito be tanobada gavamani badana ginigunana. Dirava ese ia abia hidi taudia amo gaukara ia naria diba momo tauna be guna mamoe naria tauna, pavapava David. Iena sivarai be inai: “David ese orea ta ta dekenai ia haboudia, Levi natudia [Iehova ena dubu dekenai idia gaukara taudia], Geresen bona Kohat bona Merari, Levi ena natudia.” “Ia be mari amo [kohena taudia] ia abiahidi, badina be haida be gabu helagana naria taudia bona haida be Dirava ena gaukara idia naria taudia, Eleasara ena garana amo bona Itamara ena garana amo danu.”—1 Sisiga 23:3, 6; 24:1, 5.
15. (a) Israel taudia be edena dala ai Aigupito idia rakatania? (b) Edena taudia danu idia ura Aigupito idia rakatania, bona idia be Israel taudia ida ma idia noho, a?
15 Lagani sinahu momo David ena nega ia do mai lasi neganai, Israel taudia be Aigupito idia rakatania neganai, idia be heiriheiri bada herea dekenai idia lao lasi, to dala maorona dekenai idia raka lasi namonamo. Anina be Mose ese orea naria gaukarana ia karaia namonamo. Israel bese lasi orea idauidau taudia hutuma bada danu idia lao, idia ura hoa karadia ia karaia Diravana, Iehova, ena bese ida idia lao. Ia be Aigupito ena dirava iboudiai edia siahu ia hereaia Diravana. Ena be idia hekwarahi momo, to nega sisina murinai unai “orea idauidau taudia hutuma bada” be Iehova ena abia hidi taudia idia lalo-namo henidia dainai, idia do bamodia noho Sinai ena tano gagaena dekenai idia ginidae neganai. (Esodo 12:37-51; Numera 11:4) Israel taudia ida, unai orea idauidau amo taunimanima hutuma bada be Gwauhamata Tanona dekenai idia vareai. Mose ena gabu ia abia tauna, Iosua ese ia gunalaidia. Dirava ese dala ia gwauraia idau bese taudia be unai gabu dekenai idia noho totona.
16. (a) Unai orea idauidau amo taunimanima hutuma bada ese edena taudia idia laulaulaidia? (b) Unai taudia be dahaka do idia karaia be namo hari tanobada dokona amo do idia roho mauri totona?
16 Farao ena Aigupito tanona amo idia raka siri orea idauidau amo taunimanima hutuma bada be hari inai negai ena hutuma bada taudia idia laulaulaia. Idia be lauma Israel taudia lasi to idia be Mamoe Naria Tauna namona, Iesu Keriso ena mamoe idaudia haida. Horoa orena taudia ida, idia ura Aigupito ia laulaulaia tanobada oreana amo hahemauri idia abia. Hari tanobada ena dirava be Farao Badana, Satana Diabolo. (Ioane 10:16; 2 Korinto 4:4; Apokalupo 7:9) To dahaka do idia karaia Satana ena tanobada gunana ena hadikaia ore negana amo idia roho mauri totona bona gwauhamata tanobada matamatana Iosua Badana, Iesu Keriso henunai do idia vareai totona? (2 Petero 3:13) Namona be Iehova ena orea idia biagua taudia, horoa orena taudia unai, orea idia hakaua totona ese idia gwauraidia herevadia idia badinaia noho.
17. Inai heiriheiri tanobada lalonai, hutuma bada taudia edia kara be edena bamona, bona dahaka idia naria noho?
17 Lagani 1940 ena nega amo, mamoe idaudia haida edia hutuma bada taudia be hairai ia abia Mamoe Naria Tauna, ia lohia vadaeni Pavapavana, Iesu Keriso, ena orea tamona lalonai idia haboua. Ena be United Nations oreana ia noho, to tanobada edia bese be gaukara karaia namonamo dalana idia hadikaia noho; to hutuma bada taudia be mai edia ura bada danu horoa orena taudia idia durudia bona unai ese ia hamomokania Iehova ena lauma helaga ese idia ia hatamonaia. Mai edia ura goadana danu idia be orena taudia ida idia gaukara hebou, orea tamona lalonai, bona edia helaro be tanobada dekenai, Iesu Keriso ena Lagani 1,000 Lohia Negana lalonai hesiai gaukara namona do idia karaia.
Oiemu Lalohadai be Dahaka?
◻ Bible be edena bamona ia hahedinaraia Iesu Keriso ena Lagani 1,000 Lohia Negana be edena negai bona ia lalonai dahaka do ia vara?
◻ Taunimanima hamauridia be mai anina bada to dahaka gau be unai ia hereaia?
◻ Keriso ena nega ia do mai lasi neganai, tanobada dekenai Iehova ena orea be edena bese?
◻ Orea idauidau amo taunimanima hutuma bada ese ia laulaulaidia taudia be edena dala ai Lagani 1,000 Lohia Negana dekenai do idia roho mauri diba?
8. The New Creation bukana ese dahaka sivarai ia herevalaia, to dahaka gaukara ia herevalaia lasi?
14. (a) Keriso ena nega ia do mai lasi neganai, tanobada dekenai Iehova ena orea be edena bese? (b) David be edena dala ai ia hamomokania ia be orea ena gaukara ia naria mai ena diba momo tauna?