Mai Anina Bada Lagani 1,000 Negana Totona Ita Hegaegae!

KERISO ena Lagani 1,000 Lohia Negana ese taunimanima besedia dekenai hahenamo momo do ia havaraia. Iesu ese lalokau dalanai ia hakaua dainai, taunimanima be edia kara dika amo do idia goeva idia lao. Unai ena anina oi dekenai mani oi laloa. Gorere be lasi! Mani oi laloa daba ta ta iboudiai oi toreisi neganai, lalona ena mamina ese dina gunana ena mamina be do ia hanaia momokani. Tatau, hahine, bona natudia milioni momo be idia naria unai moale negana lalonai idia mauri noho totona. Idia naria noho bona idia gurigurilaia. Edia Baibel stadilaia karana dainai idia lalo-parara unai hahenamo be do idia abia bona do idia moalelaia diba.

To, Iesu Keriso ena Lagani 1,000 Lohia Negana ia do hamatamaia lasi lalonai, namona be iena lohia siahuna idia dadaraia taudia ibounai be tanobada amo ia kokia guna. Unai be Baibel ese ia gwauraia Aramagedono tuarina amo do ia karaia. (Apokalupo 16:16) Keristani taudia korikoridia tanobada dekenai be unai tuari lalonai do idia tuari lasi. Unai be Dirava ena tuari. Bona ia be tanobada ena kahana tamona sibona dekenai do ia vara lasi. Baibel ia gwau, ia be tanobada ena dokona gabudia ibounai dekenai do ia vara. Keriso ena lohia siahuna idia dadaraia taudia be do idia mase ore. Idia ta do ia heau mauri diba lasi!​—Ieremia 25:⁠33.

Bena Iesu ese Satani Diabolo bona ena demoni dekenai kara ta do ia karaia. Mani Apokalupo bukana ia torea tauna ese ia itaia gauna be emu lalona ena matana amo oi itaia: “Aneru ta [Iesu Keriso] lau itaia, guba dekena amo ia diho. Iena imana dekenai guri dobu masemase ena ki ia dogoatao, bona auri seini badana ta danu. Inai aneru ese unai huala, unai idaunegai gaigaina, ma iena ladana be ‘Diabolo’ bona ‘Satani,’ ia dogoatao, seini dekenai ia guia. Vadaeni do ia guia noho, ela bona lagani 1,000 idia ore.” (Apokalupo 20:​1, 2) Gabeai, Satani bona ena demoni be do ia haoredia momokani.​—Mataio 25:⁠41.

“Hutuma bada herea, tau ta ese ia duahidia diba lasi,” be Aramagedono amo do idia roho mauri. (Apokalupo 7:⁠9, NW ) Keriso ese ia hakaudia bena “mauri ranuna, ia lohilohi gauna” amo heduru do idia abia totona, mamoe naria tauna ese ena mamoe be mauri ia havaraia ranuna dekenai ia hakaudia bamona. (Apokalupo 7:​17) Unai Aramagedono amo idia roho mauri taudia be lauma dalanai idia goada idia lao karana be Satani bona ena demoni ese do idia koua diba lasi dainai, edia kara dika amo do idia goevadae!

Keriso ena lalokau lohia dalana dainai, mauri be do ia namo momokani. Iehova Dirava, Iesu Keriso amo, ese hisihisi bona lalo-metau havaraia gaudia ibounai do ia haorea momokani. “Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani.” (Apokalupo 21:⁠4) Peroveta tauna Isaia ese unai hereva ia habadaia, ia gwau: “Matakepulu taudia ese do idia itaia diba, bona taia kudima taudia, be do idia kamonai diba. Edia aena idia dika taudia be do idia roho bona mavaru, bona hereva diba lasi taudia, be mai moale bada do idia boiboi.” (Isaia 35:​5, 6) “Bona mase taudia, ladana bada taudia bona ladana maragi taudia,” idia toreisi lou neganai, edia helaro be do idia mase lou lasi!​—Apokalupo 20:⁠12.

Hari inai negai danu, Aramagedono amo do idia roho mauri “hutuma bada herea” taudia be idia haboua noho. Idia be Keriso ena Lagani 1,000 Lohia Negana totona idia hegaegae. Herevana unai lohia negana do ia matamaia negana be idia do diba lasi, to idia diba momokani Dirava ena nega korikori ai do ia vara. Unai taunimanima edia huanai do oi noho diba, to namona be oi hegaegae​—emu kohu ibounai oi hoihoilaia bona idia makaia gabuna dekenai oi lao karana amo lasi, to Baibel stadilaia karana amo Iehova Dirava bona ena ura oi dibaia namonamo karana amo. Iehova ena Witness taudia be mai edia moale ida Baibel stadilaia karana amo oi bona emu ruma bese taudia ese namo bada do umui abia dalana idia hahedinaraia davana lasi. Inai magasin idia halasia taudia be mai edia moale ida diba ma haida do idia siaia diba oi dekenai.

[Box on page 7]

Lagani 1,000 Negana​—Nega Korikori Eiava Toa Ta?

Baibel bukana Apokalupo ena hereva momo be toa herevadia dainai, henanadai ta ia vara. Apokalupo dekenai Keriso ena Lagani 1,000 Lohia Negana be edena bamona? Unai nega be nega korikori eiava toa ta?

Ita laloa diba ia ese lagani 1,000 negana korikorina ia herevalaia. Mani oi laloa: Aposetolo Paulo ese Keriso ena Lagani 1,000 Lohia Negana, taunimanima do ia hahemaoro henia negana, be ia gwauraia dina ta. (Kara 17:31; Apokalupo 20:⁠4) Aposetolo Petero ena toretore ese ia hahedinaraia Iehova ena vairanai dina tamona (hora 24) be lagani 1,000 bamona. (2 Petero 3:⁠8) Unai ese ia hamomokania, unai hahemaoro ‘dinana’ ena lata be lagani 1,000. Danu, Greek Baibel ai Apokalupo 20:​3, 5-7 dekenai inai hereva, “lagani 1000” lasi to “unai lagani 1000” be nega hani ita duahia diba. Unai ese nega korikori ena lata ia hahedinaraia.