Duahia Taudia Edia Henanadai

◼ Iuda kekeni matamatana, Eseta, be Persia ena king ida idia sihari kava, King ia hamoalea bona heduru ia abia totona, a?

Reana tanobada taudia edia hereva dainai, haida be unai bamona idia laloa, to Bible ena hereva momokani ese unai hereva ia hakoikoia.

Iuda histori torea tauna, Flavius Josephus, ia gwau Persia kwini Vasati ia gwau do ia mai lasi iena tau Ahasuero dekenai. Unai dainai, king, ita laloa unai be Xerxes Ginigunana, lagani 500 bamona Keriso ena nega vairanai, be mai badu danu Vasati ia dadaraia bona gwaumaoro ia henia ia lohiaia tanodia dekenai kwini matamatana idia tahua. Mai hairai rami hebou kekeni idia haboudia bona nega daudau lalonai, muramura idia henia idia hahairaidia totona.

“Bena, [king ena eunoko] ia laloa rami hebou kekeni idia naria negana be hegeregere vadaeni neganai . . . bona idia hegeregere king ena mahuta gedana dekenai idia mai, ia be dina ta ta ibounai tamona tamona ia siaia king danu idia mahuta hebou totona; king be ia danu idia mahuta hebou murinai be maoromaoro eunoko dekenai ia siaia giroa. To, Eseta be ia dekenai ia mai neganai, ia dekenai ia moale bena, ia laloa ia lalokau henia murinai, taravatu dekenai iena hahine korikori ai ia halaoa bona edia headava idia karaia.”​—Jewish Antiquities, Book XI, 184-202, Ralph Marcus ese ia hahanaia gauna, (Book 11, karoa 6, paragraf 1, 2, William Whiston ese ia hahanaia gauna).

Unai tanobada sivaraina amo, reana ta ia laloa rami hebou kekeni be king ida idia sihari hebou bona Eseta dekenai ia vara gauna be sisina sibona ia idau badina be iena sihari karana murinai, idia headava bona ia be kwini ai ia lao. To, Bible ese iseda laloa ia hamaoromaoroa bona diba maoromaoro ita ia henia.

Tauanina hahairaia karadia ia herevalaia murinai, Bible ia gwau: “Bena kekeni [ta ta iboudiai] be unai bamona king dekenai idia vareai. . . . Adorahi ai ia sibona ia mai, bona dabai ia giroa hahine edia ruma iharuana dekenai, Saasagasa, hanua pavapavana ena adavana ibounai ia biagua tauna dekenai. Bema king ia ura lasi neganai, ia be king dekenai do ia raka vareai lou lasi, to ena ladana idia hatoa neganai, do ia lao.”​—Eseta 2:​13, 14.

Bible siridia idia gwau Eseta be “hahine edia ruma” dekenai “idia abia lao,” nega daudau tauanina hahairaia karana idia karaia totona: “Bena Eseta be King Ahasuero dekenai idia hakaua vareai . . . Bena king ese Eseta ia ura henia bada, hahine oredia iboudiai ia ura henidia maragi; bona rami hebou kekeni iboudiai bogaragidia amo ia sibona ese king ena harihari bona ena hahenamo ia abia bada. Bena ia ese lohia ena kwarana gauna iena kwarana dekenai ia atoa, bona kwini ai ia halaoa, to Vasati ese unai dagi ia haboioa.”​—Eseta 2:​8, 9, 16, 17.

Bible ena sivarai amo ita itaia, hahine be edeseniai idia lao king danu idia mahuta hebou murinai, a? ‘Hahine edia ruma iharuana, king adavana hahine ia biagua tauna ena ruma dekenai.’ Unai dainai, idia be adavana hahine ai idia lao. Morodekai, Bible buka Eseta ia torea tauna, be Heberu tauna, bona unai neganai, iena bese taudia dekenai, adavana hahine be hahine iharuana ena dagi ia abia. Dirava ena taravatu ia gwau Israel tataudia be tuari lalonai, idau bese kekeni bema ia abia neganai, be iena hahine, eiava adavana iharuana ai ia halaoa diba, bona unai hahine be, taravatu henunai, mai ena dagi bona mai ena maoro. (Deuteronomi 21:​10-17; Esodo 21:​7-11 danu hahegeregerea.) Unai bamona taravatu henunai ia noho adavana ese ia havaraia natudia be natudia momokani bona idia be ahuna idia abia diba. Iakobo ena natudia mero 12, Israel iduhu 12 edia tamadia, be iena adavana korikori bona iena adavana hahine ma haida iboudiai edia natudia.​—Genese 30:​3-13.

Karaia dalana be rami hebou kekeni be Persia ena king dekenai idia hakaua vareai murinai, idia be adavana hahine edia ruma dekenai idia lao. Unai ia hahedinaraia idia be iena adavana hahine ma haida ai idia lao.

To Eseta be edena bamona? Bible ia gwau lasi ia be king danu idia mahuta hebou bena unai dala amo King be ia dekenai ia moale. Ia gwau lasi idia abia lao adavana hahine ena ruma dekenai, to ia gwau: “Bena Eseta be King Ahasuero dekenai idia hakaua vareai . . . Bena king ese Eseta ia ura henia bada, hahine oredia iboudiai ia ura henidia maragi.” Oi laloa, vanegai, ia be iena rami hebou dagina ia hadikaia lasi, to ia ese “Hegai, hahine ia naria tauna” ia “hamoalea.” Ma danu: “Idia itaia taudia iboudiai be Eseta idia laloa namo henia.” (Eseta 2:​8, 9, 15-17) Unai dainai, Eseta ese king ia hamoalea bada bona King ese ia matauraia, ma haida ese idia matauraia hegeregerena.

Ita moale bada badina Bible ese ita ia hadibaia maoromaoro bona ita dekenai lalo-parara ia henia! Ena be unai gaudia be idau negai lagani daha daha neganai idia vara, to ita be mai badina ita laloa diba Eseta be kara maoromaoro danu ia karaia bona Dirava badinaia karadia hegeregerena ia karaia.