Duahia Taudia Edia Henanadai

◼ Aposetolo Paulo be Roma 7:19 dekenai ia gwau ia karaia diba lasi “kara namodia” be dahaka?

Paulo ese ia herevalaia gauna be Mose ena Taravatu dekenai idia haheganilaidia kara namodia iboudiai ia karaia diba lasi. Paulo bona taunimanima iboudiai, ita danu, be mai iseda kara dika bona kerere dainai ita karaia diba lasi. To namo lasi ita lalo-hisihisi bona ita hesiku. Keriso ena boubou dainai, Dirava be ita ia gwauatao dalana ia kehoa bona Ia vairanai ita gini namo diba.

Roma 7:19 ia gwau: “Kara namodia lau ura karaia neganai be lau karaia diba lasi. Bona kara dikadia lau ura lasi karaia neganai be lau karaia inai.” Unai karoa ena siri ma haida idia hahedinaraia Paulo be Taravatu lalonai ia gwauraia “kara namodia” ia herevalaia. Roma 7 Siri 7 dekenai ia gwau: “Taravatu be ia dika, a? Lasi momokani! Bema Taravatu ese lau ia hadibaia lasi, be edena bamona kara dika ena toana do lau diba? Bona Taravatu ese bema ia hereva lasi lau dekenai inai bamona, ‘Oi ura dika lasi,’ lau be ura dika ena anina edena bamona do lau diba?” Oibe, Taravatu ia hahedinaraia goevagoeva idia be unai gau ibounai idia karaia diba lasi dainai taunimanima iboudiai be kara dika taudia.

Paulo be ma ia hereva, ia gwau “guna neganai Taravatu be lau diba lasi. Unai neganai lau mauri noho.” Unai be edena neganai? Iehova ese Taravatu ia do henia lasi neganai, Abraham ena koekoena lalonai ia do noho neganai. (Roma 7:9; Heberu 7:​9, 10 itaia.) Ena be Abraham ia goevadae lasi, to Dirava be Taravatu ia do henia lasi, unai dainai ia be unai hahegani momo ia badinaia diba lasi neganai iena kara dika ia laloa momo lasi. Unai anina be Dirava be Taravatu ia henia neganai bona taunimanima edia kara dika ia hahedinaraia neganai, Taravatu ese dika ia havaraia, a? Lasi. Paulo be ma ia hereva: “Momokani, Taravatu be ia helaga. Bona Taravatu ena hereva ibounai danu be helaga, maoro bona namo.”​—Roma 7:12.

Paulo be Taravatu ia gwauraia “helaga” bona “namo.” Unai siri murinai, ia gwau Taravatu be “gau namona” badina ia hahedinaraia momokani ia be kara dika tauna bona unai kara dika dainai ia mase be maoro. Paulo ia torea, ia gwau: “ Kara namodia lau ura karaia neganai be lau karaia diba lasi. Bona kara dikadia lau ura lasi karaia neganai be lau karaia inai. Bema lau ura lasi gauna lau karaia noho, karaia tauna be lau lasi, to lauegu lalona dekenai ia noho kara dika ese ia karaia noho.”​—Roma 7:​13-20.

Unai karoa dekenai, Paulo be kara namodia iboudiai eiava hebogahisi kara namodia ia herevalaia lasi. (Kara 9:36; Roma 13:3 itaia danu.) Ia be Dirava ese ia henia Taravatu namona hegeregerena karadia (eiava ia karaia lasi karadia) ia herevalaia. Gunaguna ia be Iuda tomadiho ia karaia goadagoada bona ma haida danu sibona ia hahegeregerea neganai ia be “kerere ta lasi” bamona. To, ena be ia laloa unai Taravatu namona ia badinaia namonamo, to gau ibounai dekenai ia badinaia lasi. (Filipi 3:​4-6) Taravatu ese Dirava ena mauri taravatu goevadaedia ia hahedinaraia, bona aposetolo dekenai ia hahedinaraia tauanina dekenai ia be do kara dika ena hesiai tauna bona ia mase be maoro. To, Paulo ia moale diba badina Keriso ena boubou dainai ia be kara maoromaoro tauna idia gwauraia diba​—kara dika ena taravatu bona ena davana korikori, mase, amo idia hamauria.​—Roma 7:25.

Hari inai negai, Keristen taudia be Mose ena Taravatu henunai idia noho lasi, badina hisihisi auna dekenai idia kokoa bona ena siahu ia ore. (Roma 7:​4-6; Kolose 2:14) To namo lasi ita laloa unai be metau momo ia havaraia taravatuna dainai ita negea. Lasi, Taravatu be ia namo. Unai dainai Taravatu idia herevalaia Bible bukadia ita duahia be namo bona ita tahua Israel be dahaka idia karaia be namo. Nega sisina murinai, Iehova ena Witness taudia, tanobada hegegemadai, be wiki ta ta iboudiai edia Bible duahiduahi idia karaia neganai, unai bamona do idia karaia.

Ita be Taravatu ita laloa neganai, namona be ena hahegani idauidau edia badina ita tahua bona Dirava ena taunimanima be unai hahegani idia badinaia neganai dahaka namo idia davaria ita laloa. Namona be ita laloa, ita danu be goevadae lasi bona Dirava ena Hereva amo ita diba gau namodia iboudiai ita badinaia momokani diba lasi. To kara dika ena taravatu ita tuari henia noho lalonai, ita moale diba badina Keriso ena boubou ena anina be ita dekenai ia guguru neganai ita be mauri ita davaria diba.