Haheitalai—Kudou Veria Dalana Ta

DAVID be ena mauri haboioa garina dainai ia heau noho. Ena inai tauna be Israel ena horoa pavapavana, Saulo. Saulo ese David be ia mama henia ela bona ena inai ai ia halaoa. Unai dainai ia ese David alaia mase totona tuari taudia 3,000 ia haboudia. David ena tuari taudia be sisina sibona dainai idia heau lao tano gagaena ena koura ta lalonai idia komu.

Unuseniai, David bona ena tatau be dibura ai idia komu noho lalonai, kara idauna ta ia vara. Pavapava Saulo be unai koura tamona lalonai ia vareai murimuri totona. David be mai kaia danu metairametaira ena inai ia lao henia. To David ena kara ese iena tuari taudia ia hahoadia badina ia ese unai pavapava ia hamasea lasi. To ia ese Saulo ena dabua dokona sisina ia utua oho. Unai kara dainai David ia lalohisihisi, ia gwau: “Iehova ena vairanai edena bamona lau ese egu lohia, Iehova ena horoa tauna dekenai inai bamona kara do lau karaia bena egu imana lau negea ia lau hamasea totona, badina ia be Iehova ese ia horoa tauna.”​—1 Samuel 24:​1-6.

Inai Buka Helaga ena sivarai ese haheitalai ta ia hahedinaraia Dirava ese ia henia siahuna matauraia karana dekenai. Sedira bema sisiba be ita idia henia neganai dohore ita lalo-parara haraga lasi to unai bamona haheitalai ese iseda kudouna maoromaoro ia veria. Oibe, Dirava ena Hereva lalonai idia noho sisiba herevadia edia siahu be unai bamona.​—Roma 15:4.

Unai dainai, Iehova ena Witness taudia be idia haroro, stadi, Bible ena anina idia herevalaia eiava ma dala idauidau ai idia haroro neganai, unai sivarai ena anina sibona idia gwauraia lasi. To idia ura taunimanima edia kudouna idia veria totona haheitalai idauidau idia gaukaralaia. Witness taudia edia buka ta, ladana, Haroro School ena Buka ia hahedinaraia: “Hereva hegeregeredia maorodia, emu hereva ena anina hegeregerena herevadia, oi gwauraia neganai, idia ese hereva badadia edia anina idia hahedinaraia goevagoeva, bona oi hereva henidia taudia idia durudia, idia be mai edia ura ida do idia kamonai totona. Hereva hegeregeredia namodia amo taunimanima edia lalohadai kereredia oi hamaoromaoroa haraga diba.”a​—Rau 53.

Ena buka, Essentials of Public Speaking lalonai, Warren DuBois ia gwau: “Namona be ia toretore o hereva ia henia tauna ena lalohadai be taunimanima ese idia karaia karadia eiava gwauraia herevadia amo ia hahedinaraia bena unai amo ia herevalaia gauna ena anina do ia hedinarai goevagoeva.” Unai dainai, ena be Keristen taudia idia harorolaia sivaraina be mauri henia gauna bona sivarai hereadaena, namona be idia ese haheitalai idauidau idia gaukaralaia unai sivarai hanamoa totona, bena unai amo taunimanima edia kudouna do idia veria momokani.

Lalo-Parara Ia Havaraia Haheitalaidia

Edena bamona haheitalaidia ese ita idia durua namonamo? Namona be ita gaukaralaia haheitalaina be taunimanima ibounai ese idia dibaia gauna ta, Iesu Keriso ese ia gaukaralaia haheitalaidia bamona. Ia ese hutuma ororo ai ia haroro henidia neganai, Iesu ese taunimanima idia gaukaralaia kohudia momo ia gaukaralaia iena haheitalai lalodiai, hegeregere, damena, lamepa bona manu. (Mataio 5:1–7:29) Oibe, taunimanima ibounai idia diba lamepa be olive oil amo idia gabua bona nega haida lamepa be au dekenai idia haginia. Unai amo, Iesu ena hahediba taudia idia lalo-parara idia be lauma ena diari hakaua taudia, badina Iesu ese ia hamaorodia, ia gwau: “Lamepa idia gabua neganai, maua ena henunai do idia atoa lasi to lamepa gabuna dekenai do idia atoa, vadaeni ena diari be ruma taudia ibounai do idia itaia. Umui emui diari taunimanima edia vairana dekenai unai bamona do umui hedinaraia, vadaeni umui emui kara namodia do idia itaia neganai umui emui Tamana guba dekenai do idia hanamoa.” (Mataio 5:​15, 16) Keristen haroro taudia ese edia Bible hahedibalaia gaukarana durua totona, namona be daradara ia havaraia haheitalaidia idia gaukaralaia lasi.

Sedira Iesu ena haheitalai, mai anina bada gaudia, be taunimanima edia kara idia hahedinaraia. Luka karoa 15 bona 16 ai idia noho haheitalaidia mani ita laloa. Toretore taudia bona Farisea taudia ese Iesu idia maumauraia badina ia ese kara dika taudia bona takisi gogoa taudia ia abidia dae dainai. Edia maumau herevadia haloua totona, Iesu ese taunimanima edia kara ia herevalaia. Ia herevalaia haheitalaidia haida be: mamoe naria tauna ese ia boio mamoena ia davaria, hahine ta ese ia haboioa monina ia davaria, tamana ena natuna ta ia boio bona mai ena koikoi danu kohu naria tauna.

Idia vara momokani haheitalaidia bona mauri lalonai idia vara hanaihanai karadia edia haheitalai ese Keristen haroro taudia do ia durua bada. Hegeregere, Alexander H. Macmillan, be lagani 60 lalonai gabu idauidau dekenai ia loaloa bona taunimanima hutuma Bible ena hereva mase dekenai ia harorolai henidia. Iena tamana be tauanina lalonai mase diba lasi laumana ia noho ena hahediba ia abia dae tauna ta, bona tamana ena mase ia kahirakahira neganai, Macmillan bona ena tamana ruaosi be inai bamona idia herevahereva hebou:

“Egu tamana be maoromaoro lau ia nanadaia, ia gwau: ‘Natugu, mase gurinai do lau hekure bona basileia be tanobada ia hagoevaia neganai, do lau helalo momo, eiava?’

“Mero matamata ese unai henanadai ia haerelaia haraga be ia auka sisina badina unai tau buruka be guna unai bamona lalohadai ia abia lasi.

“To lau ese ia lau nanadaia, lau gwau: ‘Tamagu, boi hanuaboi oi mahuta namonamo, a?’

“Ia haere, ‘Oibe, natugu, doketa ese mahuta muramura lau ia henia murinai.’

“ ‘Oi mahuta lalonai oi helalo momo, a?’

“ ‘Lasi, lau helalo lasi. Lau ura do lau mahuta hanaihanai, badina lau mahuta neganai hisihisi ena mamina lau abia lasi.’ ”

Unai neganai, A. H. Macmillan ese Iobu 14:​13-15 bona 3:​17-19 ia duahia tamana dekenai bona ia gwau: “Oi itaia, tamagu, mase taudia be mase ai idia mahuta bona gau ta idia diba lasi, unai dainai, edena bamona do idia helalo?”

Unai be hadibaia dalana hereadaena ta! Bema oi be Iehova ena Witness tauna ta, oi danu ese siri bona haheitalai oi gaukaralaia diba lalona bona kudouna veria totona.

Haheitalai Abia Hidi Dalana

To haheitalai namodia bona mauri ai idia vara haheitalaidia be edeseniai do oi davaria? Oi sibona emu mauri lalonai idia vara kara idauidau amo. Hegeregere, abidadama, guriguri ena siahu, eiava haroro gaukara ena hahenamo oi dekenai idia hedinarai vadaeni, ani? Bema oi be oi bapatiso vadaeni Keristen taunimanimana ta, sedira emu mauri lalonai idia vara gaudia idauidau oi herevalaia diba. Reana kongregesen hebou amo bona Keristen tadikaka bona taihu idauidau edia amo sivarai namodia oi kamonai. Eiava Yearbook of Jehovah’s Witnesses bukana lalonai tadikaka edia sivarai idauidau ese oi idia hagoadaia. Watch Tower Publications Index ese oi ia durua bada diba, badina unuseniai tadikaka edia hahegoada sivaraidia momo do oi duahia diba.

Oi ese oi sibona o ta dekenai ia vara gauna be edena bamona do oi gaukaralaia emu hahediba lalonai? Gau badana ta be inai, namona be oiemu hereva dalana dainai taunimanima be idia ura hereva ma haida idia kamonaia. Sedira emu hereva be haheitalai ta amo oi hamatamaia, inai bamona: “Pioneer ta be Iehova ese ia idia abidadama henia taudia ia hanamodia ena mamina ia abia momokani.” Unai neganai, oi idia kamonai henia taudia do idia ura idia diba pioneer gaukara ena hahenamo idauidau be dahaka. Namona be oi ese idia oi hamaorodia.

Namona be haheitalai totona sivarai ta oi gaukaralaia neganai, oi gwauraia herevadia amo oi hahedinaraia oi be unai sivarai oi lalo-pararalaia vadaeni. Namona be hereva ena anina idauidau oi halasidia bena sivarai ena mamina do ia namo momokani. Sivarai oi siriua namonamo bena unai amo hereva ena anina do ia hedinarai goevagoeva vadaeni oi idia kamonai henia taudia edia lalona do oi hagania idia kamonai totona. To oi naria namonamo, dika sivarai be gori ta bamona oi gwauraia bena idia kamonai taudia be do idia daradara dahaka dainai oi be sivarai idauidau nega tamona oi haboua bona idia lalohavara lasi. Ma gau ta be, sedira oi laloa sivarai hanamoa totona hereva tamona latanai ma hamomokania diba lasi herevadia haida oi atoa be namo to unai neganai taunimanima idia laloa oi be koikoi tauna. Danu, namona be taunimanima edia amo oi kamonaia anina lasi bona oi hamomokania diba lasi sivaraidia oi gaukaralaidia lasi.

Bible Lalonai Sivaraidia Oi Gaukaralaidia

Haheitalai hereadaedia be Bible lalonai idia noho gaudia. Hegeregere, bema oi ura emu stadi tauna oi hadibaia natudia be Iehova Dirava ena hereva momokani ai idia gini goada diba. Haheitalai namona ta be hesiai kekeni ta, ena ladana ita diba lasi to ia ese Namana adavana dekenai Iehova ena peroveta tauna, Eliasa ena sivarai ia gwauraia. Mani unai sivarai oi duahia, 2 Hanua Pavapavadia 5:​1-5 dekenai. Sedira oi henandai: “Oi laloa, unai kekeni maragi be Dirava koikoi tomadiho henia tanona dekenai abidadama ai ia gini goada be ia manoka, a? Iehova bona ena peroveta tauna ia herevalaia dalana amo ia hahedinaraia ia gari lasi to lalo-auka, ani?”

Bema oi be unai sivarai oi stadilaia vadaeni, unai ese oi do ia durua unai sivarai ena anina oi halasia namonamo totona. Sedira oi ese Watch Tower Society edia buka haida edia indeks ai, NAMANA, SYRIA bona ELIASA edia sivarai oi duahia. Danu, Bible haida oi stadilaia neganai, sedira 2 Hanua Pavapavadia amo oi duahia sivaraina amo oi hanai bona inai hereva Salamo 148:​12, 13 dekenai ita duahia, inai bamona ia gwau: “Umui uhau bona ulato, umui tatau burukadia bona umui memero e, Iehova ena ladana idia hanamoa be namo, badina iena ladana be atai momokani ai ia noho. Iena hairai be tanobada bona guba atai ai.” Unai hereva ese hahegoada bada ia havaraia bona matamata taudia ese Dirava ena hereva be gari lasi danu idia herevalaia.​—Kara 4:​29-31.

Bema oi be Keristen hesiai tauna ta, namona be, “Oi sibona oiemu kara do oi naria namonamo, oiemu hadibaia hereva danu!” (1 Timoteo 4:16) Hereva momokani sibona oi gwauraia be hegeregere lasi to namona be haheitalai amo oi hahedinaraia danu. Bible ena sivarai idauidau oi gwauraia mai lalo-parara danu bona ena anina oi hahedinaraia goevagoeva. Haheitalai maoromaorodia oi gaukaralaidia. Unai be kudou veria daladia idauidau.

[Footnotes]

[Picture on page 29]

Iesu hegeregerena, hari inai nega ai, Keristen hahediba taudia danu ese sivarai namona harorolaia gaukarana ai mai anina bada haheitalaidia idia gaukaralaia diba bena unai amo taunimanima momo edia kudou do idia veria diba