Duahia Taudia Edia Henanadai

◼ New World Translation of the Holy Scriptures ena Bible lalonai dahaka dainai Isaia 11:6 ia gwau, “Uda sisia be mamoe ena natuna maruane danu nega sisina do idia noho”? Anina be unai maino be do ia noho hanaihanai lasi, a?

Isaia 11:​6-9 ese ia gwauraia animal iboudiai ese do idia abia mainona be do ia noho ela bona hanaihanai. To Isaia 11:6 ita duahia namonamo neganai, ia hedinarai unai animal iboudiai be dina ta ta iboudiai do idia noho hebou ia gwauraia lasi.

New World Translation of the Holy Scriptures ena Bible bukana dekenai Isaia 11:6 ia gwau: “Uda sisia be mamoe ena natuna maruane danu nega sisina do idia noho, bona lepadi be nanigosi natuna danu do idia hekure, boromakau natuna bona leona bona idia ubua namonamo gauna do idia noho hebou; bona mero maragina ta ese do ia hakaudia.”

Bible bukadia momo lalonai unai hereva idia hahanaia inai bamona: “Uda sisia be mamoe ena natuna danu do idia noho [eiava “mauri”] hebou. Unai hereva idia hahanaia neganai ena anina be hegeregere uda sisia be mamoe ena natuna danu do idia noho ela bona hanaihanai, hegeregere ruma bese matamata ta bamona eiava noho gabuna matamata ta dekenai idia noho hebou bamona.

Heberu gado dekenai unai hereva “noho” be gur. Dictionary torea tauna ta ladana William Gesenius ia gwau ena anina be “nega sisina noho, ruma dekenai ta ia noho bamona lasi, to idau tano tauna ta bamona eiava vadivadi tauna ta bamona ia noho.” (A Hebrew and English Lexicon of the Old Testament, Edward Robinson ese unai hereva ia hahanaia) F. Brown, S. Driver, bona C. Briggs ese idia karaia Dictionary lalonai, idia torea “nega sisina noho, idia noho neganai (idia diba lasi unai nega ena daudau be dahaka), hegeregere tano idauna ta dekenai tau ta ia noho hamatamaia bamona . . . ia be gwaumaoro lasi unai tano dekenai ia noho totona.”

Dirava ese Abraham ia hamaoroa Kanana tano dekenai “[ia] noho” idau tauna ta bamona, unai neganai ia ese unai hereva gur ia gaukaralaia. Abraham ese unai tano ia abia lasi, to ia be unuseniai do ia noho sibona bona Iehova ese do ia naria. (Genese 26:3; Esodo 6:​2-4; Heberu 11:​9, 13) Unai hegeregerena, Iakobo ia gwau, ia be Harana dekenai “idau tano tauna ta bamona” ia noho, badina do ia “giroa lao Kanana dekenai.”​—Genese 29:​4, NW; Genese 32:4.

Kahirakahira Dirava ese Paradaiso do ia havaraia bona animal bona taunimanima be maino dekenai do idia noho. Uda sisia ese mamoe do ia hadikaia lasi, eiava lepadi be boromakau natuna do ia hadikaia lasi. Harihari unai hereva ita hahegeregeredia neganai, unai hereva ena anina be uda sisia be idau tano tauna ta bamona do ia noho bona mamoe ena natuna ese do ia naria.​—Isaia 35:9; 65:25.a

To, reana unai animal be idia manadalaia gabudia dekenai idia ura noho. Animal haida be uda dekenai idia noho, haida be taora dekenai, haida be kone gabudia dekenai bona haida be ororo dekenai idia noho. Paradaiso ginigunana dekenai, Dirava ese ‘taunimanima badinai idia noho animal bona uda animal’ ia gwauraidia. (Genese 1:​24, NW) Unai animal haida be hegeregere taunimanima edia badina dekenai idia ura noho. To uda animal, ena be idia dagedage lasi, to idia hegeregere lasi taunimanima edia badina dekenai idia noho totona. Unai dainai, Isaia ena peroveta herevana bamona uda sisia “be mamoe ena natuna maruane danu nega sisina do idia noho,” to taunimanima badina dekenai idia noho animal danu do idia noho hanaihanai lasi.

[Footnotes]

[Picture Credit Line on page 31]

Zoological Research Center, Tel-Aviv Hebrew University