Mai Boga-Auka ida Ita Heau Helulu
“Iseda vairana dekenai ia noho heau helulu mai haheauka danu do ita heau.”—HEBERU 12:1.
1. (a) Iehova Dirava dekenai ita gwauhamata neganai, ita vairanai dahaka ia atoa? (b) Keristen taudia be edena bamona heau helulu totona idia hegaegae be namo?
IEHOVA dekenai ita sibona be Iesu bagunai ita gwauhamata henia neganai, Dirava be ita vairanai, laulau dalana dekenai, heau helulu dalana ia atoa bamona. Unai heau helulu ena dokona ai, idia kwalimu taudia iboudiai be davana do idia abia. Unai davana be dahaka? Mauri hanaihanai! Unai davana namo hereana abia totona, ia heau Keristen tauna ia hegaegae be namo, heau helulu karaia haraga bona nega sisina sibona totona lasi, to dala daudau dekenai ia heau helulu totona. Unai dainai ia boga-auka be namo. Ia be heau helulu ena hekwarahi bada dekenai do ia boga-auka be namo bona unai heau negana lalonai hekwakwanai hanaia karana dekenai do ia boga-auka be namo.
2, 3. (a) Dahaka ese ita ia durua Keristen heau helulu dekenai ita heau noho ela bona dokona totona? (b) Edena dala ai moale ese Iesu ia durua unai heau be boga-auka dekenai ia karaia totona?
2 Ita heau ela bona dokona totona dahaka ese ita ia durua? Iesu be tanobada dekenai ia noho neganai dahaka ese ia durua? Ia be moale amo goada ia abia. Heberu 12:1-3 ia gwau: “Ita idia itaia noho taudia hutuma bada ese ita idia hagegea noho. Abidadama dalana ita dekenai idia ese idia hedinaraia vadaeni. Unai dainai namona be ita idia hametaua gaudia ibounai, bona ita idia guia noho kara dikadia do ita negea momokani. Vadaeni iseda vairana dekenai ia noho heau helulu mai haheauka danu do ita heau. Iseda matana Iesu dekenai do ita negea lao. Ia ese iseda abidadama ia havaraia, bona ia ese iseda abidadama do ia durua ela bona dokona. Iesu be satauro dainai ia hesiku lasi. Lasi momokani. Ia diba guba ena moale be ia vairanai ia noho dainai ia ese satauro ena hemarai bona ena mase ia laloa lasi. Bona hari ia be Dirava ena helai gabuna badana ena idiba kahanai ia helai noho. Iesu ena hisihisi do umui laloa namonamo. Kara dika taudia ese mai badu danu ia idia dagedage henia. To ia goada noho. Unai dainai do umui hesiku lasi, bona do umui manoka lasi.”
3 Iena haroro hesiai gaukara ibounai lalonai, Iehova ia moalelaia dainai, Iesu be unai heau helulu dekenai ia heau noho diba. (Nehemia 8:10 itaia danu.) Iena moale dainai, hisihisi auna ena hemarai masena dekenai ia boga-auka diba, bona unai murinai moale bada ia abia badina mase amo ia toreisi lou bona iena Tamana ena imana idibana kahanai ia daekau; unuseniai Dirava ena gaukara do ia karaia noho ela bona dokona. Iesu be tanobada tauna neganai, Dirava ena kahanai ia boga-auka dainai, iena mauri hanaihanai gwaumaorona ia dogoatao noho. Oibe, Luka 21:19 (NW) ia hereva bamona: “Emui boga-auka dainai emui mauri do umui abia.”
4. Iesu be ia danu idia heau taudia dekenai dahaka haheitalai ia karaia, bona dahaka ita laloa noho?
4 Iesu Keriso be ia ida idia heau taudia dekenai haheitalai namo hereana ia karaia, bona iena haheitalai dainai ita diba momokani ita danu ita kwalimu diba. (1 Petero 2:21) Iesu be ita ia hamaoroa gau ta ita karaia neganai, do ita karaia diba. Ia boga-auka hegeregerena, ita danu ita boga-auka diba. Bona ita tohotohoa namonamo neganai, namona be gabeai ita abia gaudia edia moale ita laloa noho. (Ioane 15:11, 20, 21) Moale dainai do ita goada diba Iehova ena hesiai gaukara ena heau helulu dekenai ita boga-auka noho totona ela bona davana namo hereana, mauri hanaihanai, ita abia.—Kolose 1:10, 11.
5. Edena dala ai ita moale diba bona ita vairanai ia noho heau helulu totona ita goada noho diba?
5 Unai heau helulu ita karaia noho totona, Iehova be iseda goada ia hanaia siahuna ita ia henia diba. Dagedage ita abia neganai, unai siahu dainai bona dagedage ita abia ena badina ita diba dainai, goada ita abia. (2 Korinto 4:7-9) Dirava ena ladana hanamoa totona bona iena lohia dalana ita abia isi totona, hisihisi ita abia neganai, ita moale diba bona ta ese unai moale ia kokia diba lasi. (Ioane 16:22) Unai dainai ita lalo-parara diba badina be dahaka aposetolo taudia idia moale Iuda Taudia edia Kota Badana ese oda idia henia aposetolo taudia idia dadabaia totona murinai; idia be Iehova Dirava ena namo herea gaudia, Iesu dekenai ia karaia gaudia, idia harorolaia, bona idia moale “badina be Dirava ese idia ia abia hidi vadaeni Iesu ena ladana dainai hisihisi do idia abia.” (Kara 5:41, 42) Dagedage mamina idia abia karana idia moalelaia lasi to idia moale badina idia diba Iehova bona Iesu idia hamoaledia.
6, 7. Ena be hisihisi ia abia to badina be dahaka Keristen heau tauna ia moale diba, bona dahaka do ia vara?
6 Iseda mauri lalonai ita ia hagoadaia noho gauna ma ta be Dirava be ita vairanai ia atoa helarona. Paulo ia hereva bamona, ia gwau: “Unai dainai Dirava danu maino ita abia, Iesu Keriso iseda Lohiabada dainai. Keriso dekenai ita abidadama henia dainai ia ese iseda dala ia kehoa, vadaeni Dirava ena hariharibada lalonai ita vareai vadaeni. Inai hariharibada lalonai ita mauri noho hari. Unai dainai mai moale danu ita ese Dirava ena hairaina, ia danu nega tamona dohore ita abia gwauhamata gauna ita laloa noho. Unai sibona lasi, to nega dikadia neganai danu ita be moale, badina ita diba hisihisi ita abia neganai iseda haheauka ia hagoadaia diba. Bema hisihisi lalonai ita haheauka noho neganai, Dirava ese ita do ia hanamoa, bona iena hanamoa ita abia neganai ita daradara lasi, to ita laloa noho iena gwauhamata gauna do ita abia. Inai bamona Dirava ita laloa noho neganai lalohisihisi ita abia lasi, badina be Dirava ese iena Lauma Helaga ita dekenai ia henia vadaeni. Unai dekena amo Dirava ena bogahisihisi bona lalokau badana ita diba momokani iseda kudouna lalonai.”—Roma 5:1-5.
7 Hisihisi be moalelaia gauna lasi, to gabeai idia havaraia maino huahuadia be moalelaia gaudia. Unai huahua be boga-auka, kara maoromaoro ai ita gini diba, helaro, bona unai helaro ena guguru karana. Ita boga-auka neganai Dirava ese ita do ia hanamoa. Dirava ese ita ia hanamoa neganai, ita diba momokani ia gwauhamatalaia gaudia do idia vara. Unai helaro dainai ita raka namonamo diba bona unai hisihisi lalonai ita ia hagoadaia ela bona helaro ia guguru.—2 Korinto 4:16-18.
Idia Boga-Auka Taudia Do Idia Moale!
8. Badina be dahaka ita naria noho neganai ita gwau lasi nega ita negea kava?
8 Dirava ese ia makaia negana, heau taudia dekenai davana ia henia totona, ita naria noho neganai, iseda kara haida idia idau. Ita be metau haida dekenai ita kwalimu dainai lauma dalana dekenai ita goada ita lao, bona unai dainai Dirava be ita dekenai ia moale. Unai ese ia hahedinaraia ita be edena bamona taudia, bona dala ia kehoa idau negai abidadama taudia, iseda Haheitalai Tauna, Iesu Keriso danu, ese idia hahedinaraia kara namodia ita hahedinaraia totona. Hahediba tauna Iakobo ia gwau: “Lauegu varavara e, bema hedibagani idauidau ese umui dekenai ia ginidae neganai inai bamona do umui laloa be namo: inai be moale gauna sibona. Badina be umui diba hedibagani o hisihisi ese emui abidadama idia tohoa neganai, goada bona haheauka idia havaraia noho. Vadaeni nega ibounai metau bona hisihisi lalonai do umui haheauka noho ela bona inai haheauka emui lalona dekenai ia goada momokani. Unai neganai emui kara be namo, bona Dirava ena dala hegeregerena do umui raka, kerere ta lasi.” (Iakobo 1:2-4) Oibe, hisihisi idauidau do ita abia, to unai ese ita do idia durua kara namodia do ita karaia totona. Unai amo ita hahedinaraia ita be heau helulu dekenai do ita heau noho ela bona davana ita abia, herevana dahaka hekwakwanai do ita abia.
9, 10. (a) Badina be dahaka hisihisi dekenai idia boga-auka taudia idia moale, bona hisihisi be edena bamona ita laloa be namo? (b) Idau negai moale taudia be daidia, bona edena bamona idia bamona ita karaia diba?
9 Ita hoa lasi badina Iakobo be inai bamona ia hereva, ia gwau: “Hisihisi bona hedibagani ia abia neganai ia haheauka noho tauna be namo. Badina be unai dika dekena amo ia kwalimu neganai ia ese Dirava ia gwauhamatalaia maurina, iena kwalimu ahuna, do ia davaria. Dirava ia hereva vadaeni, ia idia lalokau henia taudia ibounai ese unai mauri namona do idia davaria”! (Iakobo 1:12) Nega ibounai hisihisi lalonai ita gini goada, Dirava badinaia karadia dekenai goada ita abia unai hisihisi ita hanaidia totona.—2 Petero 1:5-8.
10 Namona be oi laloatao Dirava ese ita ia kara henia dalana be dala matamatana lasi eiava dala idauna lasi. Idau negai “ita idia itaia noho taudia hutuma bada” ia kara henidia, Dirava dekenai idia tabekau noho goadana hegeregerena. (Heberu 12:1) Iena Hereva lalonai, Dirava ese idia ia moale henidia karana idia torea, bona idia iboudiai ita gwauraidia moale taudia badina idia be hahetoho lalonai idia gini auka. Iakobo ia gwau: “Lauegu varavara taudia e, peroveta taudia do umui laloa. Lohiabada ena ladanai idia hereva neganai hisihisi lalonai idia haheauka bona idia goada. Edia kara bamona do umui karaia be namo. Ita diba inai haheauka taudia ese moale idia davaria vadaeni, ani? Iobu ena haheauka sivaraina umui kamonai vadaeni, bona Lohiabada ese dokona neganai Iobu ia durua bada, ani? Badina be [Iehova] be mai ena bogahisihisi, bona iena hariharibada be bada herea.” (Iakobo 5:10, 11) Guna idia perovetalaia, hari inai nega dikadia ena dokona ai, tanobada taudia haida be dala maoromaoro dekenai Iehova do idia hesiai henia, idau negai unai peroveta taudia ese idia karaia hegeregerena. Ita moale badina ita be unai taudia dainai, ani?—Daniel 12:3; Apokalupo 7:9.
Iehova Ena Hereva ese Ita Ia Hagoadaia Dainai Heduru Ita Abia
11. Edena dala ai Dirava ena Hereva ese ita ia durua ita boga-auka totona, bona badina be dahaka Iesu ena parabole lalonai tano auka bamona taudia edia kara ita karaia lasi be namo?
11 Paulo be boga-auka ia durua gauna ma ta ia gwauraia, inai bamona ia hereva neganai, ia gwau: “Buka Helaga dekenai idia torea hereva be ita dekenai hadibaia totona idia torea, vadaeni do ita gini goada bona Dirava dekenai do ita naria mai haheauka danu.” (Roma 15:4) Hereva momokani, Dirava ena Hereva, be ita lalonai ia noho momokani be namo, nega ibounai ita be kara maorona ita karaia totona. Iesu be uhe ia hadoa tauna ena parabole ia henia, bona unai parabole dekenai ia gwauraia tano aukana bamona ita karaia neganai, heduru do ita abia lasi: “Hereva idia kamonai neganai idia abia dae haraga mai moale danu. To idia be ramu lasi dainai, nega sisina mo idia goada. Gabeai inai hereva dainai nega dika bona dagedage idia mai neganai idia moru haraga.” (Mareko 4:16, 17) Dirava ena Hereva lalonai ia noho hereva momokanina be unai taudia dekenai ia noho momokani lasi; unai dainai, hisihisi negadia lalonai, unai hagoadaia gauna ia noho lasi dainai, edia helaro be lasi.
12. Sivarai namona ita abia dae neganai, edena bamona ita sibona ita koia lasi be namo?
12 Namona be Basileia sivarai namona ia abia dae tauna be sibona ia koia lasi dahaka do ia vara. Ia abia hidi mauri dalana be hisihisi eiava dagedage do ia havaraia. (2 Timoteo 3:12) To namona be hisihisi ia abia neganai Dirava ena Hereva ia dogoatao bona ma haida dekenai unai hereva ia harorolaia dainai ia laloa unai be “moale gauna sibona.”—Iakobo 1:2, 3.
13. Edena dala ai bona badina be dahaka Paulo be Tesalonika Keristen taudia ia moalelaidia?
13 Keristen ginigunadia edia nega lalonai, Paulo ena haroro gaukara dainai Tesalonika dagedage taudia idia badu bona heiriheiri idia havaraia. Paulo ia lao Berea neganai, unai dagedage taudia ese idia lulua lao ma dika haida idia havaraia totona. Tesalonika dekenai idia gini goada noho taudia dekenai dagedage ia abia aposetolo tauna be inai bamona ia torea, ia gwau: “Aiemai varavara taudia e, nega ibounai umui totona Dirava ai hanamoa. Unai be ia maoro, badina be umui emui abidadama ia bada ia lao noho, bona emui lalokau umui ta ta dekenai danu ia bada lao noho. Unai dainai ai ese Dirava ena ekalesia oreadia edia vairanai umui ai herevalaia mai heagi danu. Ai moalelaia gauna be, dagedage bona hisihisi bada umui abia noho, to umui goada noho bona Dirava dekenai umui abidadama henia noho. Oibe, inai umui karaia noho kara namodia idia hedinaraia, Dirava ena kota be maoromaoro momokani. Bona iena Basileia totona inai hisihisi umui abia noho dainai, Dirava ese davana namona umui do ia henia iena Basileia lalonai.” (2 Tesalonika 1:3-5) Ena be inai taudia ese idia hahisidia, to Tesalonika Keristen taudia be Keriso ena kara dekenai idia goada bona edia namba ia bada ia lao. Edena bamona unai ia vara diba? Badina Dirava ese idia ia hagoadaia Herevana amo goada idia abia dainai. Idia be Lohiabada ena hereva idia badinaia bona boga-auka dekenai heau helulu idia karaia noho.—2 Tesalonika 2:13-17.
Ma Haida be Hahemauri Idia Abia Totona
14. (a) Ena be metau idia noho, to hesiai gaukara dekenai ita moale noho badina idauidau be dahaka? (b) Dahaka totona ita guriguri, bona badina be dahaka?
14 Gau badana be ita ura Dirava ena ladana ita hamomokania dainai, ita be abidadama dekenai bona maumau lasi dekenai, metau bona dagedage dekenai ita boga-auka. To unai gaudia dekenai ita boga-auka bona iseda ura sibona ita laloa lasi ena badina ma ta be inai: Basileia ena sivarai be ma haida dekenai ita henidia Dirava ena Basileia harorolaia taudia ma haida be ‘uduna dekenai idia gwauraia hedinarai mauri do idia davaria’ totona. (Roma 10:10) Dirava ena hesiai gaukara dekenai idia gaukara noho taudia idia guriguri be namo, uiti gogoa gaukarana ena Biaguna ese edia gaukara ia hanamoa totona, Basileia harorolaia taudia ma haida danu ia siaia unai. (Mataio 9:38) Paulo be Timoteo dekenai ia torea, ia gwau: “Lauegu hadibaia hereva, be oi ese oi kamonai vadaeni, bona taunimanima momo vairanai lau gwauraia. Inai hadibaia hereva be abidadama goada taudia dekenai ma do oi gwauraia. Vadaeni idia ese ma taunimanima haida dekenai unai hereva do idia gwauraia lou. Keriso Iesu ena tuari tauna namona ta do oi lao. Oiemu dagi ena hisihisi bona metau do oi abia, ai tuari taudia ai abia bamona.”—2 Timoteo 2:2, 3.
15. Badina be dahaka tuari taudia bona “gadara gabuna” dekenai idia gadara taudia bamona ita karaia be gau badana?
15 Tuari tauna be tuari dekenai idia noho lasi taudia ida ia noho lasi, badina edia mauri lalonai be taravatu momo lasi. Unai hegeregerena, namo lasi Lohiabada ena tuari orea lalonai idia noho lasi taudia edia kara ese ita idia hametaua; idia be Dirava inai henia taudia edia kahana dekenai idia noho. Unai dainai, Paulo be Timoteo dekenai ma ia torea, ia gwau: “Tuari tauna ese inai tanobada mauri ena gaukara idauidau bona tuari danu nega tamona ia karaia diba lasi. Lasi, to ia be tuari gaukara sibona do ia karaia, iena tuari biaguna do ia hamoalea totona. Tau ta danu gadara gabuna ia goada helulu neganai, bema gadara taravatu ia badinaia lasi neganai, ia ese kwalimu ahuna ia abia diba lasi.” (2 Timoteo 2:4, 5) Heau helulu lalonai idia hekwarahi neganai, “kwalimu ahuna” idia abia totona, namona be heau taudia be boga-auka kara idia goadalaia bona anina lasi metaudia eiava koua gaudia idia dadaraia. Unai dala dekenai idia ese hahemauri sivaraina be ma haida dekenai idia mailaia diba.—Iakobo 1:12; 1 Korinto 9:24, 25 itaia danu.
16. Dahaka idia kwatua diba lasi, bona ita boga-auka neganai edena taudia be namo idia davaria?
16 Dirava bona ia idia tahua mamoe bamona taudia ita lalokau henidia dainai, ita be mai moale danu gau momo dekenai ita boga-auka, ma haida dekenai hahemauri sivaraina ita mailaia totona. Reana badu taudia be ita idia koua Dirava ena Hereva ita harorolaia dainai. To Dirava ena Hereva idia koua diba lasi, bona ma haida hamauridia totona ita harorolaia neganai, unai hereva idia kwatua diba lasi. Paulo be Timoteo ia hadibaia badina be dahaka iena lalona ia hegeregere hahetoho dekenai ia boga-auka totona, ia gwau: “Iesu Keriso do oi laloatao noho, ia be [David] ena bese tauna, mase dekena amo ia toreisi lou. Inai bamona lau gwauraia, Sivarai Namona lau harorolaia neganai. Sivarai Namona lau harorolaia dainai, hisihisi lau abia noho, bona dibura tauna bamona auri dekena amo lau idia guia. To Dirava ena hereva idia guia diba lasi. Unai dainai hisihisi ibounai lalonai lau haheauka, Dirava ena abia hidi taudia do lau durua totona. Badina be lau ura idia danu ese Keriso Iesu ia mailaia hahemauri namona do idia davaria. Inai hahemauri ena hairaina be do ia noho ela bona hanaihanai.” (2 Timoteo 2:8-10) Hari inai negai ita be guba Basileia do idia abia orena taudia momo lasi, ita laloa sibona lasi, to danu Keriso ena Basileia henunai tanobada Paradaisona do idia abia taudia, Iesu Keriso, Mamoe Naria Tauna Namona, ena mamoe idaudia hutuma bada herea taudia ita laloa.—Apokalupo 7:9-17.
17. Badina be dahaka heau helulu dekenai ita manoka lasi be namo, bona bema ita heau noho ela bona dokona neganai, dahaka do ia vara?
17 Bema ita be heau ia doko lasi neganai ita hesiku taudia, ita be hahemauri ita davaria lasi bona ma haida ita durudia lasi hahemauri idia abia totona. Keristen ena heau helulu dekenai ita boga-auka neganai, herevana dahaka hekwakwanai idia noho, davana abia dalana dekenai ita lao noho bona ma haida ita durudia hahemauri dalana dekenai, bona ita be haheitalai namona, ma haida be goada idia abia totona. Herevana iseda helaro be dahaka, guba gauna eiava tanobada gauna, Paulo ena lalohadai, “heau helulu ena dokona gabuna dekenai maoromaoro lau heau henia,” hegeregerena ita laloa neganai, unai be haheitalai namona ita tohotohoa totona.—Filipi 3:14, 15.
Heau Helulu Dekenai Ita Boga-Auka Noho
18. Kwalimu davana ita abia totona dahaka ita karaia, to ela bona dokona ita boga-auka totona, dahaka ita dadaraia be namo?
18 Iseda Keristen heau helulu ena dokona dekenai ita heau lao noho bona ita kwalimu totona, Iehova ena ladana ita abia isi bona ia henia davana ita abia totona, unai heau helulu ena nega lalonai ita boga-auka noho be namo. Unai dainai, bema kara maoromaoro idia durua lasi gaudia dekenai ita sibona ita hametaua neganai, ita boga-auka diba lasi ela bona dokona. Ena be unai gaudia ita negea danu, namona be mai goada ibounai ita boga-auka karaia. Unai dainai, Paulo ena sisiba be inai: “Namona be ita idia hametaua gaudia ibounai, bona ita idia guia noho kara dikadia do ita negea momokani.” (Heberu 12:1) Iesu bamona hisihisi ena dika ita laloa bada lasi, to namona be ita laloa idia be gau maragidia sibona, moale davana ita abia totona.—Roma 8:18 itaia danu.
19. (a) Paulo ena mauri ena dokona ai, dahaka hereva goadana ia karaia? (b) Ita be boga-auka ena heau helulu ena dokona dekenai ita mai kahirakahira neganai, dahaka lalohadai goadana, gwauhamatalaia davana dekenai, ita abia?
19 Iena mauri ena dokona kahirakahira ai, Paulo ia hereva diba: “Tuari namona lau tuarilaia vadaeni, lauegu heau helulu be ia ore vadaeni, bona lauegu abidadama lau karaia haorea vadaeni. Harihari lauegu kwalimu ahuna, kara maoromaoro ena davana namona be lau dekenai ia noho hegaegae.” (2 Timoteo 4:7, 8) Heau helulu dekenai ita boga-auka badina mauri hanaihanai ita ura abia totona. Bema iseda boga-auka ia ore badina ita hesiku bona ita hamatamaia neganai ita laloa heau negana ena lata be bada lasi dainai, gwauhamatalaia davana be kahirakahira ita abia neganai do ita moru. Namona be oi diba momokani, davana be momokani do ita abia diba.
20. Ela bona heau helulu ena dokona ita davaria neganai dahaka ita laloa be namo?
20 Unai dainai namona be hisihisi bada herea negana ia hamatamaia totona ita naria neganai iseda matana idia hesiku lasi. Unai neganai, Babulono Badana do ia hadikaia ore guna bena gabeai Diabolo ena orea ibounai do ia hadikaia ore. (2 Petero 3:11, 12) Ita be toana ena kahana ibounai ita itaia diba dainai, namona be ita be abidadama dekenai gabeai negana ita naria noho. Namona be iseda boga-auka ita habadaia, bona mai goada danu ita vairanai Iehova Dirava ese ia atoa heau helulu lalonai ita heau noho, ela bona dokona ai moale davana ita abia, bona Iesu Keriso bagunai, Iehova ena ladana ita abia isi diba.
Edena Bamona Do Oi Haere?
◻ Keristen taudia be edena bamona heau helulu totona idia hegaegae be namo?
◻ Badina be dahaka heau neganai moale be gau badana?
◻ Ena be metau momo ita davaria to badina be dahaka hesiai gaukara dekenai ita noho?
◻ Badina be dahaka Dirava be ita vairanai ia atoa heau helulu dekenai ita manoka lasi be namo?
[Picture on page 15]
Heau helulu daudauna lalonai hegeregerena, Keristen taudia idia boga-auka be namo
[Picture on page 17]
‘Mauri ena kwalimu ahuna’ idia abia totona namona be heau taudia be boga-auka idia goadalaia