Oi Haheauka Diba ela Bona Dokona

“Iseda vairana dekenai ia noho heau helulu, be mai haheauka danu do ita heau goada.”​—⁠HEBERU 12:⁠1.

1, 2. Haheauka ena anina be dahaka?

APOSETOLO Paulo be Heberu Keristani taudia ginigunadia dekenai ia gwau: “Do umui haheauka.” (Heberu 10:36) Unai kara be mai anina bada ia hahedinaraia totona, aposetolo Petero danu be Keristani taudia unai bamona ia hagoadaia, ia gwau: “Abidadama sibona lasi, . . . to haheauka danu do umui abia.” (2 Petero 1:​5, 6) To haheauka ena anina korikori be dahaka?

² Greek-English diksenari ta ese Greek herevana idia hahanaia “haheauka” ena anina be inai bamona ia gwauraia, “ia heau oho lasi to ia noho . . . ena gabu ai ia gini, ia gaukara noho.” Buka ta ese “haheauka” ia hahedinaraia Greek herevana ia gwauraia neganai, ia gwau: “Ia be hesiku dalana ai ia haheauka karana lasi, to mai ena helaro goadana karana . . . Unai kara dainai tau ta be lai ia vaira henia to ia gini noho diba. Hekwakwanai dika hereadia amo ia kwalimu diba badina unai hisihisi murinai do ia vara gau namona ia itaia diba.” Vadaeni, haheauka ese ta ia durua hekwakwanai bona hekwarahi lalodiai do ia gini goada bona ena helaro ia haboioa lasi. Daidia ese unai kara idia abia be namo?

3, 4. (a) Daidia idia haheauka be namo? (b) Dahaka dainai ita haheauka ela bona dokona be gau badana?

³ Keristani taudia ibounai be laulau dalanai do idia haheaukalaia be namo heau heluluna ta lalonai idia vareai. Lagani 65 C.E. bamona ai, aposetolo Paulo ese iena gaukara hebou tauna bona mai ena abidadama ida ia danu ia loaloa turana Timoteo dekenai inai hagoadaia herevadia ia gwauraia: “Tuari namona lau tuarilaia vadaeni, lauegu heau helulu be ia ore vadaeni, bona lauegu abidadama lau karaia haorea vadaeni.” (2 Timoteo 4:⁠7) Paulo ese unai hereva “heau helulu be ia ore” ia gwauraia neganai, ia ese ena Keristani mauri be heau helulu ta ida ia hahegeregerea, unai be mai ena dala maorona bona mai ena ore gabuna. Unai nega ai, Paulo be mai kwalimu danu ena heau helulu ena dokona dekenai ia ginidae gwauraia, bona ia diba momokani ena davana do ia abia. Ma ia gwau: “Harihari lauegu kwalimu ahuna, kara maoromaoro ena davana namona, be lau dekenai ia noho hegaegae. Unai Dina Badana neganai, Lohiabada, kota biaguna maoromaorona, ese unai davana namona lau dekenai do ia henia.” (2 Timoteo 4:⁠8) Paulo ia diba momokani ena ahuna do ia abia, badina ia haheauka ela bona dokona. To ita be edena bamona?

⁴ Unai heau helulu lalonai idia vareai vadaeni taudia ia hagoadaia totona, Paulo ia gwau: “Iseda vairana dekenai ia noho heau helulu, be mai haheauka danu do ita heau goada.” (Heberu 12:⁠1) Ita Keristani taudia be Iesu Keriso ena amo Iehova dekenai iseda mauri ita gwauhamatalaia neganai, unai haheauka heau heluluna lalonai ita vareai. Hahediba dalana dekenai ita raka matamaia namonamo be namo, to gau badana be unai dala ita hagugurua. Iesu ia gwau: “Iena lalona do ia goada noho ela bona dokona, unai tauna be do ia mauri.” (Mataio 24:13) Mai kwalimu danu heau helulu idia haorea taudia edia davana ia naria noho gauna be mauri hanaihanai! Unai dainai, tahua gauna ita laloa noho lalonai, namona be ita haheauka ela bona dokona. Dahaka ese ita do ia durua unai tahua gauna ita abia totona?

Aniani Namona​—⁠Gau Badana

5, 6. (a) Mauri ena heau helulu lalonai ita haheauka totona, dahaka ita laloa bada be namo? (b) Dahaka lauma gaudia ita abia be gau badana, bona dahaka dainai?

⁵ Greece dekenai Korinto ena siti badinai, be idaunegai momo ese idia ura henia Isthmian Gadara gabuna ia noho. Paulo ia diba Korinto tadikaka be unuseniai idia karaia gadara helulu bona ma gadara haida idia diba. Idia ia durua idia rakalaia noho mauri ena heau helulu idia laloa lou totona idia diba gauna ia herevalaia, ia gwau: “Umui diba, ani, heau helulu dekenai idia heau taudia ibounai idia heau noho, to tau tamona sibona ese kwalimu ahuna ia abia. Unai bamona do umui heau goadagoada, kwalimu ahuna do umui abia totona.” Paulo ese ia hahedinaraia gau badana be unai heau helulu lalonai idia noho bona idia heau lao ela bona dokona. To dahaka ese idia ia durua diba unai bamona idia karaia totona? Paulo be ma ia gwau: “Gadara helulu do idia uini totona, heau helulu taudia ese edia tauanina ena ura idia atoa diho, idia tereini goadagoada.” Oibe, idaunegai gadaradia lalonai idia vareai taudia idia tereini goadagoada, idia ania bona inua gaudia dekenai idia naria namonamo, bona edia kara ibounai idia biagua do idia kwalimu totona.​—⁠1 Korinto 9:​24, 25.

⁶ Keristani taudia idia vareai heau heluluna be edena bamona? Iehova ena Witness taudia edia kongregesen ta ena elda ta ia gwau: “Bema oi ura mauri ena heau helulu lalonai oi haheauka, namona be oi ese lauma aniani oi laloa bada.” Iehova, ‘haheauka ia henia Diravana,’ ese ita dekenai ia henia lauma aniani mani oi laloa. (Roma 15:⁠5) Iena Hereva, Baibel, be iseda lauma aniani ita abia dalana badana. Baibel duahiduahi sediual namona ta ita badinaia be namo, ani? Danu, “hesiai tauna mai ena kamonai, bona mai ena kara maoromaoro” amo Iehova ese nega korikori ai Gima Kohorona bona Awake! magasin bona Baibel bukadia ma haida ia henia. (Mataio 24:45) Unai gaudia ita stadilaia namonamo karana ese lauma dalanai ita do ia durua. Oibe, namona be nega ita atoa sibona eda stadi totona​—⁠‘nega ita haorea kava lasi.’​—⁠Efeso 5:⁠16.

7. (a) Dahaka dainai Keristani hahediba hamatamaia herevadia sibona ita diba be hegeregere lasi? (b) Edena dala ai “hereva badadia do ita tahua”?

⁷ Keristani hahediba dalana ai ita noho totona, namona be “diba hamatamaia gaudia” sibona lasi, to “hereva badadia do ita tahua” danu. (Heberu 6:⁠1) Namona be hereva momokani “ena lababa, bona ena lata, bona ena ataiai, bona ena dobu” tahua urana ita habadaia bona ‘taunimanima badadia edia aniani korikori’ ita ania. (Efeso 3:18; Heberu 5:​12-14) Hegeregere, Iesu ena mauri tanobada ai idia gwauraia sivarai momokanidia hani​—⁠Mataio, Mareko, Luka, bona Ioane edia Evanelia bukadia​—⁠mani ita laloa. Unai Evanelia bukadia ita stadilaia namonamo karana amo, Iesu ena kara bona ia be edena bamona tauna ita diba sibona lasi, to ia kara totona ia ia hauraia laloa dalana danu ita dibaia. Unai neganai “ita be Keriso ena laloa ita abia” diba.​—⁠1 Korinto 2:⁠16.

8. Keristani heboudia ese ita be edena dala ai idia durua mauri ena heau helulu lalonai ita haheauka totona?

⁸ Paulo ese abidadama tamona taudia ia hagoadaia: “Umui ta ta dekenai durua henia daladia do umui laloa noho. Unai bamona lalokau dekena amo kara namodia do umui karaia. Iseda guriguri hebou kara do umui hadokoa lasi, haida ese idia hadokoa bamona. To umui ta ta emui Keristani varavara taudia edia lalona do umui hagoadaia, oibe, inai kara do umui habadaia be namo. Badina be Lohiabada ena Dina be kahirakahira do ia ginidae.” (Heberu 10:​24, 25) Keristani heboudia be goada abia gabudia! Bona ita idia laloa bada lalokau tadikaka bona taihu, ita haheauka ela bona dokona totona ita idia durua taudia, ida ita noho hebou be hagoadaia gauna! Unai gauna, Iehova ese mai ena lalokau ida ia henia gauna, ita laloa maragi lasi be namo. Namona be sibona eda stadi ita karaia namonamo bona hebou ita lao hanaihanai karana amo, ‘tau badadia bamona laloa dobu gaudia do ita laloa.’​—⁠1 Korinto 14:⁠20.

Itaia Taudia ese Oi Idia Hagoadaia

9, 10. (a) Edena dala ai haheauka heau heluluna dekenai itaia taudia ese ita idia hagoadaia diba? (b) Heberu 12:1 ese ia gwauraia ‘ita idia hagegea witness taudia hutuma bada ori ta bamona’ be daidia?

⁹ Ena be heau helulu tauna ta ia hegaegae namonamo, to reana dala dekenai do idia vara gaudia haida ese ia do idia hamanokaia diba. Paulo ia henanadai: “Guna be Keriso ena dala dekenai umui raka namo herea. Daika ese emui dala ia hadikaia, vadaeni hereva momokani umui badinaia lasi, a?” (Galatia 5:⁠7) Toana be Galatia Keristani taudia haida ese taunimanima dikadia idia bamoa matamaia, bona unai dainai, mauri ena heau helulu lalonai idia heau namonamo lasi. To, ma haida edia heduru bona hagoadaia karana dainai heau helulu dekenai ita haheauka diba. Unai be gadara ta idia itaia taudia ese gadara taudia idia hagoadaia karana bamona. Gadara ena matamana amo ela bona dokona, gadara idia itaia taudia edia hagoadaia karana ese gadara taudia ia doria moale mamina ia habadaia. Gadara idia itaia taudia edia boiboi, nega momo miusiki mai ena regerege bada bona imana patapataia karana danu, ese gadara taudia idia hagoadaia bada, dokona idia heau henia totona. Momokani, gadara idia itaia taudia edia hagoadaia karana ese heau helulu lalonai idia gadara taudia ia durua bada.

¹⁰ Keristani taudia idia vareai heau heluluna lalonai, daidia be itaia taudia? Paulo be Heberu karoa 11 lalonai, Keriso ia do vara lasi neganai Iehova ena ladana idia gwauraia taudia mai edia kamonai ia herevalaia murinai, ia gwau: “Unai dainai, witness taudia hutuma bada ori ta bamona ese ita idia hagegea dainai, . . . ita vairanai ia noho heau helulu lalonai do ita heau mai eda haheauka ida.” (Heberu 12:⁠1 NW ) Paulo ese ori ia gwauraia neganai, ia ese Greek herevana ta, ori ta ena bada bona ena toana ia hahedinaraia goevagoeva herevana, ia gaukaralaia lasi. To, diksenari torea tauna W. E. Vine ena hereva hegeregerena Paulo ia gaukaralaia herevana ese, “toana lasi guba ia koua ori bada hereana ia hahedinaraia.” Ia hedinarai goevagoeva, Paulo ia laloa gauna be witness taudia edia hutuma bada​—⁠idia be momo herea dainai edia toana be ori bada herea bamona.

11, 12. (a) Keriso ia do vara lasi neganai Iehova ena ladana idia gwauraia taudia ese edena bamona ita idia hagoadaia diba, heau helulu lalonai ita haheauka totona? (b) Edena dala ai ita be witness taudia “hutuma bada ori ta bamona” amo namo bada ita davaria diba?

¹¹ Keriso ia do vara lasi neganai Iehova ena ladana idia gwauraia taudia be hari inai negai heau helulu idia itaia diba, a? Lasi. Idia ibounai be mase dekenai idia mahuta noho, toreisi lou idia naria noho. To, idia do mauri neganai idia be idia kwalimu heau taudia, bona edia haheitalai namona be Baibel lalonai ia do noho. Baibel ita stadilaia neganai, iseda lalona ai ita itaia unai abidadama taudia be hegeregere idia mauri noho bona ita idia hagoadaia diba, heau helulu lalonai ita heau lao ela bona dokona.​—⁠Roma 15:⁠4.a

¹² Hegeregere, bema dala ia kehoa tanobada ena dagi o ladana badana abia totona ita idia tohoa, Mose ese Aigupito dekenai ia abia diba gaudia ia dadaraia karana ese ita ia durua diba, mauri ena heau helulu dekenai ita noho totona, ani? Bema toana be ita abia hahetoho be bada, Aberahamo ese ena natuna Isako ia bouboulaia totona ia abia hahetoho aukana ita laloa ese ita do ia hagoadaia, abidadama dekenai ita hesiku lasi totona. “Hutuma bada ori ta bamona” witness taudia ese unai dala ai idia henia heduru be bada, bema ita ese edia mauri sivarai ita lalo-pararalaia goevagoeva.

13. Hari inai negai Iehova ena Witness taudia ese edena dala ai ita idia hagoadaia mauri ena heau helulu lalonai?

¹³ Danu, hari inai negai Iehova ena Witness taudia momo herea ese ita idia gegea. Horoa Keristani taudia bona “hutuma bada herea” taudia ese abidadama karana dekenai haheitalai namona idia hahedinaraia! (Apokalupo 7:⁠9, NW ) Nega ta ta ai, inai magasin bona Watch Tower Society ena buka ma haida lalonai, edia mauri ena sivarai ita duahia diba.b Edia abidadama ita laloa neganai, ita do idia hagoadaia do ita haheauka ela bona dokona. Bona mai abidadama ida Iehova idia hesiai henia turadia bona varavara edia heduru ita abia be namo herea! Oibe, mauri ena heau helulu lalonai ita idia hagoadaia taudia be momo.

Mai Aonega ida Oi Heau

14, 15. (a) Dahaka dainai mai iseda aonega ida ita heau be gau badana? (b) Dahaka dainai iseda tahua gaudia ita abia hidi neganai ita laloa manada be namo?

¹⁴ Bema ta be heau helulu daudauna ta ai ia heau, namona be mai ena aonega danu ia heau. Magasin ladana New York Runner ia gwau: “Bema matamanai oi heau haraga, do oi kwalimu lasi. Kilomita oredia lalonai do oi hekwarahi bada o do oi hadokoa.” Heau helulu daudauna ai ia heau tauna ta ia gwau: “Heau helulu hegaegaelaia totona idia henia hereva ta kamonai henia totona lau lao neganai, hereva henia tauna ia gwau: ‘Idia heau haraga taudia idia heau bamona oi heau toho lasi. Emu goada hegeregerena oi heau. Bema lasi do oi hesiku bona do oi hadokoa.’ Unai sisiba herevana lau badinaia ese lau ia durua heau helulu lau hagugurua.”

¹⁵ Mauri ena heau helulu lalonai, Dirava ena hesiai taudia idia hekwarahi be namo. (Luka 13:24) To, hahediba tauna Iamesi ia gwau: “Dirava dekena amo aonega [be ia] . . . laloa manada.” (Iamesi 3:17) Ena be haida edia haheitalai namona ese ita idia durua ma gaukara haida ita karaia totona, to laloa manada karana ese ita do ia durua iseda diba bona noho dalana hegeregerena ita karaia diba tahua gaudia ita abia hidi totona. Baibel ese ita ia hadibaia, ia gwau: “Ibounai ta ta ena kara ena kara ia diba be namo. Bema iena kara be namo, ia sibona ia heagilaia diba. To bema iena kara be tau ta ena kara danu ia hahegeregerea, unai tau do ia gwauraia kerere totona, unai be namo lasi. Badina be ibounai ta ta sibona ena metau, ena metau do idia huaia.”​—⁠Galatia 6:​4, 5.

16. Manau karana ese edena bamona ita ia durua ita heau namonamo totona?

¹⁶ Mika 6:⁠8 ai inai lalona veria herevana ia gwauraia: ‘Iehova ia ura ita karaia gauna be . . . mai manau danu Dirava danu do ita raka hebou.’ Manau ena anina be sibona eda kara ena hetoana ita laloa. Gorere eiava buruka dainai Iehova ena hesiai gaukara lalonai ita karaia diba gaudia be mai edia hetoana, a? Iseda lalona ia manoka lasi be namo. Iehova ese iseda hekwarahi bona ita henia gaudia ia abia dae, ita dekenai ia noho gauna “hegeregerena,” ita dabu gauna hegeregerena lasi.​—⁠2 Korinto 8:12; mani Luka 21:​1-4 itaia.

Kwalimu Ahuna Oi Laloa Noho

17, 18. Iesu ese dahaka ia laloa dainai satauro ena hisihisi ia haheaukalaia?

¹⁷ Korinto Keristani taudia be mauri ena heau helulu lalonai idia haheauka be gau badana ia hahedinaraia neganai, Paulo ese Isthmian Gadara edia kahana ta, Korinto Keristani taudia idia laloa be namo gauna, ia herevalaia. Paulo ese unai gadara lalonai idia vareai taudia ia herevalaia, ia gwau: “Inai bamona idia [heau] be, do ia dika haraga kwalimu ahuna abia totona. To ita ese unai bamona do ita [heau] be, noho hanaihanai kwalimu ahuna do ita abia totona. Lau heau maoromaoro, mai laloa tamona danu, lauegu heau dokona dekenai do lau ginidae totona. Lau be boksini tauna bamona lau paisia goadagoada, do lau uini totona. Hodahoda lau paisia lasi.” (1 Korinto 9:​25, 26) Unai idaunegai taudia edia gadara lalonai ia uini tauna ena ahuna be pine au ena raurau amo o ma tubutubu gaudia haida amo idia karaia korona ta eiava kwara gauna ta—⁠momokani “ia dika haraga” gauna. To, idia haheauka ela bona dokona Keristani taudia be dahaka do idia abia?

¹⁸ Aposetolo Paulo ese iseda Haheitalai Tauna, Iesu Keriso, ia herevalaia, ia gwau: “Ia diba guba ena moale be iena vairanai ia noho dainai, ia ese satauro ena hemarai bona ena mase ia laloa lasi. Bona hari ia be Dirava ena helai gabuna badana ena idiba kahanai ia helai noho.” (Heberu 12:⁠2) Iesu ia haheauka ela bona ena tanobada maurina dokona bona unai ia karaia dalana be satauro ena hisihisi ia laloa lasi to ia abia hahenamo ia laloa. Unai hahenamo be, Iehova ena ladana hahelagaia karana ia durua dainai, taunimanima edia mauri davana ia henia dainai, bona Pavapava bona Hahelaga Tauna Badana bamona do ia lohia neganai kamonai taudia be tanobada paradaisona lalonai mauri hanaihanai do idia abia totona ia durudia dainai, ia abia moalena.​—⁠Mataio 6:​9, 10; 20:28; Heberu 7:​23-26.

19. Keristani hahediba dalana ai ita raka noho lalonai dahaka ita laloa bada be namo?

¹⁹ Keristani hahediba dalana ai ita raka noho lalonai iseda vairanai ia noho moalena mani oi laloa. Iehova ese Dirava ena Basileia sivarai namona harorolaia gaukarana bona Baibel ena mauri havaraia dibana be ma haida ita hadibalaia gaukarana mai moalena be ita dekenai ia henia. (Mataio 28:​19, 20) Dirava momokanina ia ura dibaia tauna ta ita davaria bona ia ita durua mauri ena heau helulu lalonai ia vareai totona be moale gauna momokani! Bona ena be ita haroro henia taudia idia kamonai lasi, to Iehova ena ladana hahelagaia gaukarana lalonai ita gaukara be hahenamo ta. Bema haroro gaukara lalonai, iseda teritori dekenai idia noho taudia idia ura lasi kamonai o idia dagedage neganai ita haheauka, ita moale diba badina Iehova ena kudouna ita hamoalea. (Aonega Herevadia 27:11) Bona ia gwauhamatalaia kwalimu ahuna namona be mauri hanaihanai. Unai be do ita moalelaia gauna badana! Namona be unai hahenamo ita laloa noho bona heau helulu lalonai ita heau noho.

Dokona Ia Kahirakahira Lalonai

20. Edena dala ai dokona ia kahirakahira lalonai mauri ena heau helulu ena hekwarahi ia bada?

²⁰ Mauri ena heau helulu lalonai, Satani Diabolo, iseda inai tauna badana dainai ita hekwarahi noho. Dokona ita lao henia lalonai, ia be ia gaukara goada noho ita ia hahekwakwanaia o ita ia hamanokaia totona. (Apokalupo 12:​12, 17) Bona Basileia harorolaia goadagoada taudia be tuari, hitolo, ta ta dekenai idia hanaia gorere, bona “dokona negana” idia makaia hekwakwanai ma haida lalonai idia abidadama noho be auka. (Daniela 12:⁠4; Mataio 24: ​3-14; Luka 21:11; 2 Timoteo 3:​1-5) Danu, nega haida reana ita laloa dokona ia daudau, bona bema ita be lagani momo gunanai heau helulu lalonai ita vareai unai lalohadai ia vara diba. To, Dirava ena Hereva ese ita ia hadibaia loulou dokona be do ia mai. Iehova ia gwau do ia leiti lasi. Dokona be kahirakahira.​—⁠Habakuku 2:⁠3; 2 Petero 3:​9, 10.

21. (a) Mauri ena heau helulu lalonai ita heau noho lalonai dahaka ese ita do ia hagoadaia? (b) Dokona ia kahirakahira lalonai iseda lalona ita hadaia dahaka ita karaia totona?

²¹ Vadaeni, mauri ena heau helulu lalonai ita kwalimu totona, namona be Iehova ese mai ena lalokau ida ita dekenai ia henia lauma aniani amo goada ita abia. Danu, namona be iseda abidadama tamona taudia, idia danu be heau helulu lalonai idia heau taudia, ida ita hebou hanaihanai karana amo goada ita abia be namo. Ena be dagedage bona idia vara kava gaudia ese iseda heau idia ha-aukaia, ita haheauka diba ela bona dokona, badina Iehova ese “siahu badana” ia henia. (2 Korinto 4:⁠7) Iehova ia ura ita be mai kwalimu ida unai dala do ita hagugurua ita diba neganai, ita moale bada! Namona be iseda lalona ita hadaia auka, “iseda vairana dekenai ia noho heau helulu, be mai haheauka danu do ita heau goada,” bona ita diba momokani “bema ita manoka lasi, nega do ia ginidae huahua do ita abia.”​—⁠Heberu 12:⁠1; Galatia 6:⁠9.

[Footnotes]

Oi Laloatao, A?

◻ Dahaka dainai ita haheauka ela bona dokona be gau badana?

◻ Edena gaudia Iehova ese ia henia be ita dadaraia lasi be namo?

◻ Dahaka dainai mai aonega ida ita heau be gau badana?

◻ Heau helulu lalonai ita heau noho lalonai dahaka moale gauna be ita vairanai ia noho?

[Picture on page 18]

Keristani heboudia amo goada oi abia