Duahia Taudia Edia Henanadai

◼ Badina be dahaka Bible ena histori dekenai taunimanima idia laloa Luka 3:1 dekenai ia gwauraia tauna, Kaisara Tiberia, ena lohia negana ia hamatamaia laganina, lagani 14 C.E., be lagani badana lasi to lagani 29 C.E. be lagani badana?

Bible ese Tiberia ena lohia ia hamatamaia negana ia gwauraia lasi, to ia lohia laganina namba 15 ena dokonai ia vara gauna ta ia herevalaia. Unai ese Bible idia stadilaia taudia ia durudia bena idia diba unai gau be lagani 29 C.E. ai ia vara; Bible dekenai unai lagani be lagani badana.

Histori dekenai, Roma ena lohiabadana iharuana, Kaisara Tiberia, ena lohia negana idia abia dae vadaeni. The New Encyclopædia Britannica bukana ia gwau: “Augusto [lohiabadana ginigunana] be AD 14, August 19 ai, ia mase. Unai murinai, Tiberia ese lohia badana ena siahu ia abia, to Gavamani Oreana dekenai politikol kara idau ia karaia bona ia ura lasi idia ese ia idia gwauraia lohiabadana ela bona kahirakahira hua tamona ia ore murinai, to September 17 ai, ia be lohia tauna badana ena dagi ia abia.”a

Bible lalonai, Tiberia ena lohia ia hamatamaia negana idia makaia be mai anina, badina Luka 3:​1-3 dekenai Ioane Bapatiso ena hesiai gaukara be inai bamona ia herevalaia, ia gwau: “[Tiberia] Kaisara be lagani 15 ia lohia neganai, Pontio Pilato be Iudea edia gavana. . . . Unai neganai Dirava ese Ioane Sekaria dekenai ia hereva, taunimanima idia noho lasi tanona dekenai. Unai dainai Ioane ese Ioridane sinavaina kahana ena tanona idoinai dekenai ia loaloa. Ia haroro, ia gwau, ‘Umui emui lalona umui giroa, bapatiso umui abia, bona Dirava ese emui kara dika do ia gwauatao.’ ”

Ioane be haroro gaukara bona bapatiso gaukara ia hamatamaia lasi Tiberia be lohiabadana ai ia lao neganai, to “[Tiberia] Kaisara be lagani 15 ia lohia neganai” haroro bona bapatiso gaukara ia hamatamaia. Unai lagani namba 15 be 28 C.E. ena keru sisina negana ia hamatamaia ia lao 29 C.E. ena keru sisina negana ai. To ita gwau lasi unai ita diba dainai Ioane ena hesiai gaukara ia hamatamaia negana unai lagani lalonai eiava unai neganai idia vara gaudia haida edia nega ita makaia diba.

To Bible ese ma hereva haida amo ita ia durua. Haheitalai ta be inai: Daniel ena “wiki 70” peroveta herevana ese 29 C.E. ia makaia Mesia ia hedinarai totona. Ma danu ia hahedinaraia Iesu ena hesiai gaukara be lagani toi bona kahana ai do ia karaia. (Daniel 9:​24-27) Unai hereva dekenai inai Bible hereva ma haida ita gwauraia diba: Ioane ia vara hua 6 murinai Iesu ia vara; Iesu ia bapatiso neganai, ena “vara lagani be 30 bamona”; bona Iesu be 33 C.E. ena medu ginigunana negana ai (Paseka negana) ia mase, unai neganai ena lagani be 33 bona kahana.​—Luka 1:​24-38; 3:23; 22:​14-16, 54.b

Unai Bible diba maoromaorona idia abia dainai, bona tanobada taudia be Tiberia ena lohia negana idia makaia dainai, Bible idia stadilaia taudia be idia makaia diba, 29 C.E. ena medu ginigunana negana ai, Ioane ena hesiai gaukara ia hamatamaia bona hua 6 murinai, 29 C.E. ena keru sisina negana ai, Ioane ese Iesu ia bapatisoa. Unai dainai, Bible lalonai, lagani badana be 14 C.E. lasi to 29 C.E.

[Footnotes]