Edena Dirava Do Ita Tomadiho Henia?

TAUNIMANIMA bona animal idia idau dalana be inai: ita taunimanima be tomadiho karana ita diba bona ita karaia hanaihanai, to animal be unai kara idia diba lasi. Unai tomadiho karana be ita vara neganai iseda lalonai ia noho vadaeni. Bona iseda lalonai danu be lalo-parara ia noho, lalohadai maoromaoro ese ita ia durua kerere bona maoro toana ita diba totona. Dala idauidau ai ita taunimanima ibounai ese unai lalohadai maoromaorona idia badinaia hanaihanai dainai, momo be dirava ta eiava dirava idauidau dekenai idia tabekau hanaihanai.

Idia hanaia lagani 200 bamona lalonai, tanobada ena aonega taudia idauidau idia gwau siahu ibounai Diravana, Gau Ibounai Ia Karaia Tauna unai, be lasi. Lagani 1844 ai, Karl Marx ia gwau tomadiho be “taunimanima edia drug bamona.” Murinai, Charles Darwin ese evolusen [mauri gaudia be hoa dalana ai sibona idia vara] ena lalohadai ia havaraia. Gabeai Bolshevik [Russia ena politik orea badana] ena haheparara karana ia vara. Europe ena East kahana tanodia ese atheism [Dirava dadaraia karana] lalohadaina idia atoa edia gavamani taravatudia lalonai bona idia gwau tomadiho karana be lagani 1917 uru taudia ida do idia mase hebou. To unai atheism idia hahedualaia taudia ese taunimanima edia lalonai ia noho gauna be idia haidaua diba lasi. Badina hari inai negai East Europe dekenai tomadiho karana be ia bada momokani.

To Buka Helaga ena hereva hegeregerena, “dirava idauidau idia noho guba dekenai bona tanobada dekenai danu. Oibe, dirava bona lohiabada momo idia noho, idia gwau.” (1 Korinto 8:5) Uru gunadia bona matamatadia ibounai ese dirava idauidau idia tomadiho henidia. Oibe, taunimanima ese idia tomadiho henidia dirava haida be inai: hua-hua, lalokau, tuari, vine ranuna bona lebulebu diravadia. Hindu tomadiho lalonai dirava ibounai be milion momo idia davaria.

Babulono, Asuria, Aigupito bona Buddhist tomadiho tanodia ai toi tamona diravadia momo idia tomadiho henia. Kerisendom ai danu Toi Tamona idia “hahelagaia.” Islam tomadiho be toi tamona dirava idia tomadiho henia lasi, to idia gwau “Allah vairana ai, dirava ma ta ia noho lasi.” Siahu Ibounai Dirava idia dadaraia taudia danu be mai edia dirava. Hegeregere, Filipi 3:19 ai, Buka Helaga ia gwau tauanina ena ura idia tahua guna taudia “edia dirava be edia tauanina ena ura.”

Taunimanima momo ese edia tano eiava edia bese diravadia idia tomadiho henidia. To unai kara dainai henanadai haida idia vara. Tomadiho iboudiai be gabu tamona dekenai idia lao​—hegeregere, dala momo be idia daekau ororo tubuana ta dekenai, a? Eiava tomadiho edia dala hehunidia ibounai be dika idia lao henia—​hegeregere idoa ta idia lao henia bamona, a? Tomadiho dala maorodia momo idia noho eiava tamona sibona ia noho? Bona do ita imodaia diravadia momo idia noho a, eiava Siahu Bada Dirava tamona ia noho bona ia sibona ita badinaia bona ita tomadiho henia be maoro?

Dirava Koikoidia Edia Vara Dalana

Namona be ita ese unai henanadai ibounai edia anina ita tahua namonamo. Dahaka dainai? Badina tomadiho ena buka ginigunana, Buka Helaga, ese ia hahedinaraia koikoi diravana ta ese gaigai ena uduna amo iseda tubuna ginigunadia ia koidia bena idia ese mase dalana idia abia hidi. Iena kara amo ia vara dikana be hari inai nega ai ita ese danu ita mamia noho. (Genese 3:1-13, 16-19; Salamo 51:5) “Dirava ena Natuna,” Iesu, ese unai gwau-edeede diravana ia gwauraia “inai tanobada ena lohia.” Iesu ena aposetolo ta ese ia gwauraia “tanobada ena dirava.” (Ioane 1:34; 12:31; 16:11; 2 Korinto 4:4) Apokalupo karoa 12, siri 9, ese ia hahedinaraia ia be “idaunegai gaigaina, bona iena ladana be Diabolo bona Satani. Ia be tanobada taudia ibounai ia koia noho gauna.” Tanobada ena tomadiho koikoi ibounai be Satana ena siahu henunai idia noho.

Satana be koikoi ena tamana. (1 Timoteo 2:14) Ia diba taunimanima be tomadiho kara ura henia danu idia vara dainai ia ese ia haduadia idia ese tubuna laumadia, kaivakuku, helaga taudia edia laulau eiava Maria ena kohoro o laulau idia tomadiho henia. Ia ese taunimanima hegeregere, lohia taudia, idia kwalimu tuari biagudia, muvini piksa idia karaia taudia bona gadara helulu taudia ibounai be dirava ai ia halaodia. (Kara 12:21-23) Namona be ita ese eda raka dalana ita naria bona Dirava momokani sibona ita tomadiho henia, ia be “daudau lasi ita ta ta dekenai.”​—Kara 17:27.

Do ita tomadiho henia Diravana tamona be daika? Lagani 3,000 bamona gunanai, Buka Helaga ena salamo torea tauna ese inai bamona ia herevalaia: “Atai Momokani Dirava . . . , Siahu Ibounai Dirava . . . , lauegu Dirava, oi lau abidadama henia,” bena ena ladana badana “Iehova” ia atoa. (Salamo 91:1, 2) Gunaguna ai, Mose be inai bamona ia gwauraia: “Iehova iseda Dirava be Iehova tamona.” (Deuteronomi 6:4) Bona peroveta tauna Isaia ese Dirava ena hereva be inai bamona ia halasia: “Lau be Iehova. Unai be lauegu ladana. Lauegu hairai be ta do lau henia lasi, bona lau idia hanamoa herevadia be idia koroa kaivakukudia do lau henidia lasi.”​—Isaia 42:8.

Iehova Dirava ena ura korikori be iena ladana hadikaia hereva, unai koikoi ibounai diravana, Satana, ese ia gwauraia gaudia, do ia hamaoromaoroa. Unai do ia karaia dalana be lagani 1513 B.C.E. ai, ia haheitalaia, ia ese Mose ia gaukaralaia neganai, Israel besena be Aigupito hesiai henia gaukara amo ia hakaudia siri totona. Unai neganai, Dirava ese ena ladana Iehova ia gwauraia neganai inai bamona ia hereva: “Vadaeni Dirava ese Mose dekenai ia hamaoroa, ia gwau, LAU INAI LAU NOHO. Ma ia gwau, Israela taudia dekenai inai bamona oi haere henia, oi gwau, LAU NOHO ese ia siaia lau umui dekenai.” (Esodo 3:14, 15) Ia ese ena siahu be Aigupito ena Farao dekenai do ia hahedinaraia, to ia ese unai dagedage pavapava inai bamona ia hamaoroa guna: “To inai totona mauri lau henimu vadaeni, lauegu siahu dohore oi itaia, vadaeni tanobada ibounai lauegu ladana dohore idia matauraia totona.”​—Esodo 9:16.

Hari inai nega danu be unai bamona. Gunaguna Farao bamona, inai tanobada ena dirava, Satana, ese Iehova Dirava ia gwau-edeede henia bona lauma tuari ia karaia kara maoromaoro bona hereva momokani ura henia taudia dekenai. (Efeso 6:11, 12, 18) Oibe, ena be Satana ia dagedage bada, to Dirava ese ena ladana badana do ia hahedinaraia goevagoeva lou. To, Iehova ese ia idia tomadiho henia taudia ia gaukaralaia Iena ladana be inai tanobada hegegemadai ibounai ai do idia harorolaia, bena unai murinai Satana bona ena gaukara ibounai do ia haoredia. Iena ladana hahedinaraia gaukara be tomadiho momokani ena kahana badana ta.

Momokani, Dirava sibona ia gwau ia idia tomadiho henia taudia be iena witness taudia ai do idia lao, idia be Iehova ena Witness taudia, “lau ese bese ta lau haboua lau totona, idia ese lau hanamoa herevadia do idia gwauraia.” (Isaia 43:10-12, 21) Edena bamona idia ese Iehova idia hanamoa? Ruma ta ruma ta dekenai idia haroro bona taunimanima ibounai idia hadibaia Iehova ena Gavamani, ena Natuna, Iesu Keriso, ese do ia lohiaia gauna, henunai be kara maoromaoro taudia do idia noho bona idia ese hahenamo momo herea do idia davaria. Io, idia be Keristen taudia ginigunadia bamona Dirava idia tomadiho henia, bona unai “gaukara idia hadokoa lasi.” (Kara 45:42; 20:20, 21) Unai kara lalonai, idia ese Dirava ena hahenamo idia davaria, a? Vaira dekenai idia noho raudia dekenai haere do ita davaria.