Iehova Gari Henia bona Iena Ladana Helagana Abia Isi

“Lohiabada e, daika ese oi do ia gari henia lasi? Daika ese oiemu ladana do ia hanamoa lasi? Badina be oi sibona be helaga.”​—APOKALUPO 15:4.

1, 2. (a) Lagani 1991 lalonai, Iehova ese guba ena iduara be edena bamona ia kehoa? (b) Dahaka be iena mauri lalonai ia davaria dainai, ia gini goada misinari tauna ta ena sisiba herevana be “Iehova umui gari henia”? (Lagani 1991 Yearbook, English gado gauna, rau 187-9 oi itaia.)

IEHOVA ese ‘guba ena iduara ia kehoa bona hahenamo ia bubua diho ela bona dabu iboudiai idia ore.’ Hari inai negai, nega momo unai hereva be Iehova ena Witness taudia dekenai idia vara momokani. (Malaki 3:10) Haheitalai ta be inai: Lagani 1991 ena hesiai laganina lalonai, tanobada ibounai dekenai hebouhebou badadia idia karaia neganai, idia vadivadi Witness taudia bona nega ibounai unai gabu idia noholaia taudia ese edia moale idia hahedinaraia. Unai hebouhebou badadia gabudia be “Gado Goevadaena” Distrik Hebouheboudia Buenos Aires, South America dekenai; bona Manila, Taipei, bona Bangkok, Orient (Asia) dekenai; ia lao “Mauri Namona Idia Ura Henia Taudia” Distrik Hebouheboudia Budapest, Prague, bona Zagreb (August 16-18, 1991), East Europe dekenai.

² Tano idaudia amo idia mai hebouhebou taudia idia moale badina unai gabu dekenai nega daudau lalonai abidadama dekenai idia gini goada Witness taudia idia hedavari henidia dainai! Haheitalai ta be inai: Bangkok dekenai, Frank Dewar​—guna ia sibona be Basileia pablisa Thailand dekenai​—ese lagani 58 lalodiai ia karaia misinari gaukarana ia sivarailaia. Ia ese iena hesiai gaukara ia karaia Pacific motumotudia dekenai, Southeast Asia dekenai bona China dekenai danu. Hekwakwanai bada herea ia davaria, iena bouti ia mutu dainai, dagedage animal gunika gabudia dekenai, siahu tanodia edia gorere dainai, bona Japan dagedage lohiadia edia kara dainai. Ia idia nanadaia dahaka sisiba hebouhebou taudia dekenai ia ura henia, bena inai haere sibona ia henia, ia gwau: “Iehova umui gari henia!”

3. Dahaka dainai Dirava gari henia karana ita hahedinaraia be namo?

³ “Iehova umui gari henia!” Ita ibounai ese unai gari namona ita hahedinaraia be gau badana! “Iehova gari henia karana be aonega ena matamana.” (Salamo 111:10) Inai gari ena anina be dika lasi, hegeregere Iehova ena amo dika do ita davaria garina ita gari. Lasi, to idau, unai gari anina be iena dagi bada herea bona iena kara hereadaedia dainai Iehova ita matauraia bada herea; bona unai hemataurai ita henia badina Dirava ena Hereva ita stadilaia neganai, lalo-parara ita abia dainai. Apokalupo 15:​3, 4 dekenai, Mose bona Mamoe Natuna edia ane ia gwau: “Oiemu gaukara be bada herea momokani. Oiemu hoa karadia be idau momokani. Oi be bese ibounai edia King! Oiemu kara ibounai be maoromaoro bona momokani. Lohiabada e, daika ese oi do ia gari henia lasi? Daika ese oiemu ladana do ia hanamoa lasi? Badina be oi sibona be helaga.” Iehova ese ia idia tomadiho henia taudia ia naria namonamo dainai, dala ia karaia bena “Iehova garina idia gari taudia bona iena ladana idia laloatao taudia . . . be laloatao bukana dekenai idia torea.” Idia ese edia davana namona idia abia, mauri hanaihanai unai.​—Malaki 3:16; Apokalupo 20:​12, 15.

Dirava Gari Henia Karana Ia Kwalimu

4. Dahaka idau negai hamauria karana ese ita ia hagoadaia be namo, Iehova ita gari henia totona?

⁴ Israel besena be Farao ia lohiaia Aigupito amo idia raka oho neganai, Mose ia hahedinaraia goevagoeva ia ese Iehova sibona ia gari henia. Nega daudau lasi murinai, Israel taudia be Davara Kakakakana bona Aigupito tuari orena badana edia padanai idia noho. Dahaka idia karaia diba? “Mose ia gwau, Umui gari lasi, umui gini auka masemase, Iehova ena hamauria kara do umui itaia, hari dina umui dekenai do ia hamauria, badina be Aigupito taudia harihari umui itaia be do umui itaia lou lasi, lasi bona lasi momokani. Iehova be umui totona do ia tuari karaia, umui be umui noho kava, noho kava.” Hoa dalana ai, Iehova ese davara ena ranu ia hapararaia. Israel taudia be davara ena tano gabuna idia hanaia. Bena unai ranu idia moru diho bona tano idia botaia. Farao ena tuari orea taudia iboudiai idia mase. Iehova ese ia idia gari henia bese taudia ia hamauridia, bona unai negai danu Dirava idia hadikaia Aigupito taudia ia hamasedia. Unai hegeregerena, hari inai negai danu iena abidadama karana do ia hahedinaraia, Ia idia gari henia Witness taudia be Satana ena tanobada amo do ia hamauridia neganai.​—Esodo 14:​13, 14; Roma 15:4.

5, 6. Iosua ena negai dahaka gaudia idia vara dainai idia hahedinaraia namona be Iehova ita gari henia to taunimanima ita gari henidia lasi?

⁵ Israel taudia ese Aigupito idia rakatania murinai, Mose ese spai taudia 12 be Gauhamata Tanona dekenai ia siaia. Unai tano idia noholaia tatau bada hereadia idia itaia neganai, spai taudia 10 idia gari dikadika, bona Israel taudia idia hamaorodia namona be unai tano lalonai idia vareai lasi. To spai taudia rua, Iosua bona Kaleb, idia gwau: “[Unai tano] be tano namo herea momokani. Bema Iehova ese ita ia lalo-namo henia, ia ese unai tano dekenai ita do ia hakaua vareai bona ita do ia henia; oibe, hari rata bona gaiho ranuna idia aru noho tanona be ia ese ita do ia henia. To gau tamona, Iehova umui inai henia lasi, bona unai tano taudia garidia umui gari lasi. Idia be iseda aniani bamona. Idia ia naridia gauna ese ia rakatanidia, bona Iehova be ita ida. Umui gari henidia lasi.”​—Numera 14:​7-9.

⁶ To, unai Israel taudia be taunimanima garina idia gari. Unai dainai, gwauhamata tanona dekenai idia ginidae lasi. To Iosua bona Kaleb, bona uru matamata Israel taudia, be unai tano namona lalonai idia vareai bona iena vine bona olive audia idia naria. Israel taudia idia hebouhebou negana ta ai, Iosua ese iena hereva dokona idia dekenai ia henia neganai, inai sisiba ia henidia: “Iehova gari henia, bona iena hesiai gaukara oi karaia mai emui kara goevagoeva ida bona mai momokani danu.” Bena Iosua be ma ia gwau: “Lau bona lauegu ruma bese taudia ese Iehova ena hesiai gaukara do ai karaia.” (Iosua 24:​14, 15) Unai hereva ese ruma bese kwara taudia bona ita ibounai idia hagoadaia Iehova ita gari henia, Dirava ena kara maoromaoro tanobada matamatana lalonai ita vareai totona ita hegaegae neganai!

7. David be edena bamona ia hahedinaraia goevagoeva Dirava gari henia karana be gau badana?

⁷ Mamoe naria merona David danu be Dirava ena ladanai Goliata ia tuari henia neganai, ia ese haheitalai namona ia hahedinaraia. (1 Samuel 17:​45, 47) Iena mase be kahirakahira neganai, David ia gwau diba: “Iehova ena lauma be egu uduna amo ia hereva, iena hereva be egu malana dekenai. Israel Diravana ia hereva, lau dekenai Israel ena Nadi Aukana ia hereva, ia gwau ‘Taunimanima ia lohiaia tauna be kara maoromaoro tauna, bona Iehova gari henia karana lalonai idia lohia neganai, unai be daba ena rere bamona, dina ena diaridiari bona daba dekenai guba lalonai ori ta be lasi neganai.’ ” (2 Samuel 23:​2-4) Inai tanobada ena lohiadia ese Dirava gari henia karana idia hahedinaraia lasi, bona unai amo dika bada ia vara! “[David] ena Natuna,” Iesu, ese tanobada be Iehova gari henia dalana ai do ia lohiaia neganai, mauri toana be unai amo do ia idau momokani!​—Mataio 21:9.

Iehova Gari Henia Dalanai Kara Ia Karaia

8. Dahaka dainai Iehosafat ese Iuda ia lohiaia neganai, Iuda besena ia noho namo, bona hari inai negai unai ese dahaka ia hahedinaraia?

⁸ David ia mase lagani 100 bamona murinai, Iehosafat be Iuda lalonai pavapava ai ia lao. Unai pavapava danu ese iena hesiai gaukara ia karaia Iehova gari henia dalana dekenai. Iuda lalonai Dirava ena kara ia haginia lou, bona tano ibounai lalonai hahemaoro taudia ia haginidia, bona inai sisiba ia henidia: “Emui hahemaoro gaukarana be tau ta dainai umui karaia lasi to ia be Iehova dainai umui karaia; bona ia be umui danu ia gaukara hebou emui hahemaoro gaukarana lalonai. Bona namona be hari Iehova gari henia karana be emui latanai ia noho. Umui naria namonamo bona kara umui karaia, badina iseda Dirava Iehova dekenai kara gagevagageva ta bona lalo-ani monidia abia dae karana ta ia noho lasi. . . . Iehova gari henia karana dekenai, namona be unai bamona oi karaia mai emui kara maoromaoro bona mai emui kudou ibounai danu.” (2 Sisiga 19:​6-9) Unai dala amo, Iuda bese taudia be Iehova gari henia dalana lalonai idia kwalimu. Unai hegeregerena, hari inai negai, Dirava ena orea taudia ese hebogahisi elda taudia edia hesiai gaukara amo namo idia davaria.

9, 10. Iehosafat be edena bamona ia kwalimu, Iehova gari henia dalana dekenai?

⁹ To, bese haida ese Iuda besena idia inai henia. Idia ura Dirava ena bese idia hadikaia ore. Amono, Moab bona Seiri ororona taudia ese Iudea tanona lalonai idia heau vareai bona Ierusalem idia tuari henia gwauraia. Unai tuari oreana ia bada herea. Iehosafat ese Iehova ia guriguri henia, “Iuda taudia bona edia natuna maragidia danu, bona edia hahine bona edia natudia danu be Iehova ena vairanai idia gini neganai.” Bena, unai guriguri haerelaia totona, Iehova ena lauma be Levi tauna Iahasial latanai ia diho mai, bona unai tau ia gwau: “Iehova ese inai hereva be umui dekenai ia henia: ‘Unai tuari orea bada hereana dainai do umui gari lasi bona emui kudou do idia hetaha lasi; badina inai tuari be emui tuari lasi, to ia be Dirava ena. Kerukeru umui lao bona umui tuari henidia. . . . Hari negai do umui tuari lasi. Emui gabu ai umui gini noho, bena Iehova ena kwalimu umui dainai do umui itaia. Iuda bona Ierusalem e, umui gari lasi. Kerukeru umui tuari henidia totona umui lao, bona Iehova be umui danu do ia noho.’ ”​—2 Sisiga 20:​5-17.

¹⁰ Daba maragi ai, Iuda tataudia idia toreisi haraga. Mai edia kamonai ida edia inai taudia idia heau henia neganai, Iehosafat ia gini toreisi bona ia gwau: “Iuda taudia e, bona Ierusalem umui noholaia taudia e, umui kamonai! Iehova emui Dirava umui abidadama henia bena do umui mauri nega daudau lalonai. Iena peroveta taudia umui abidadama henidia bona unai dala amo umui kwalimu.” Tuari tataudia edia vairanai, Iehova dekenai ane idia abia taudia idia raka lao bona inai hereva idia anelaia: “Iehova umui hanamoa, badina iena hebogahisi do ia noho ela bona hanaihanai.” Iehova ese heiriheiri be Iuda idia tuari henia taudia edia bogaraginai ia havaraia idia daradara totona, bona unai dainai idia hadikaia ore heheni. Iuda taudia be gima kohorona dekenai tano gagaena dekenai idia mai neganai, idia itaia edia inai taudia edia mase tauanina sibona idia noho.​—2 Sisiga 20:​20-24.

11. Tanobada besedia edia gari karana be Dirava ena orea taudia edia gari karana amo edena bamona ia idau?

¹¹ Dekena besedia ese unai hahemauri karana ena sivarai idia kamonaia neganai, “Dirava dainai gari dikadika mamina” be idia latanai ia mai. To Iehova idia gari henia dainai iena hereva idia kamonai henia besena be unai amo idia idau. Iehova ese laga-ani ia henidia “edia gabu iboudiai dekenai.” (2 Sisiga 20:​29, 30) Unai hegeregerena, Aramagedono lalonai Iehova ese iena hahemaoro ia karaia neganai, inai tanobada besedia be Dirava dainai bona iena Natuna, Taunimanima Hamasea Tauna Iesu Keriso, dainai do idia gari dikadika, bona Dirava ena badu dikadika dinana badana amo do idia roho mauri diba lasi.​—Apokalupo 6:​15-17.

12. Nega gunanai, Iehova idia gari henia dainai, taunimanima haida ese dahaka hahenamo idia davaria?

¹² Taunimanima be dala maorona ai Iehova idia gari henia neganai, hahenamo badadia ia davaria. Noa ese “Dirava ia kamonai henia, bona lagatoi badana ia karaia. Noa, iena hahine mai edia natudia ese lagatoi dekenai idia mauri noho, dika idia davaria lasi.” (Heberu 11:7) Keristen taudia ginigunadia edia sivarai ia gwau, nega sisina daudau lalonai dagedage idia davaria, bena murinai, “maino idia abia vadaeni, bona idia goada daekau, bona Lohiabada dekenai idia gari noho, bona Lauma Helaga ese goada ia henia. Vadaeni ekalesia ia bada daekau,” hari inai negai East Europe tanodia dekenai ia karaia hegeregerena.​—Kara 9:31.

Namo Ura Henia, Dika Inai Henia

13. Iehova amo hahenamo ita abia dalana tamona be dahaka?

¹³ Iehova ia kara namo sibona. Unai dainai “Iehova ita gari henia anina be dika ita dadaraia.” (Hereva Lada-isidia 8:13) Iesu idia herevalaia neganai, inai idia torea: “Oi ese kara maoromaoro oi ura henia. To kara dika be oi badu henia. Unai dainai lau Dirava, oiemu Dirava, ese oi lau abia hidi, oiemu kwarana dekenai dehoro lau bubua, vadaeni oiemu hanamoa be bada.” (Heberu 1:​9) Bema, Iesu bamona, ita ura Dirava ese ita ia hanamoa, gau badana be Satana ena tanobada ena hekokoroku taudia edia kara dika, edia heudahanai, edia dagedage, bona edia mataganigani ita dadaraia bona ita inai henia vaitani. (Hereva Lada-isidia 6:​16-19 itaia danu.) Gau badana be ita ese Iehova ia ura henia gaudia ita ura henidia bona ia inai henia gaudia ita inai henidia. Namona be ita gari Iehova habadua karana ta do ita karaia garina. “Iehova ia gari henia tauna ese dika ia dadaraia.”​—Hereva Lada-isidia 16:6.

14. Iesu ese haheitalai namona edena bamona ita dekenai ia hahedinaraia?

¹⁴ Iesu ese haheitalai namona be ita dekenai ia hahedinaraia, ita be iena aena gabudiai do ita raka totona. “Idia hereva dika henia, to ia hereva dika henia lou lasi. Hisihisi ia abia neganai, ia dagedage lasi. To mai abidadama danu, sibona ena mauri Dirava ena imana dekenai ia henia. Badina Keriso ia diba Dirava be Kota Karaia Tauna maoromaorona.” (1 Petero 2:​21-23) Satana ena tanobada taudia ese ita idia hereva dika henia neganai, ita idia kirikirilaia neganai, bona ita idia dagedage henia neganai, Iehova gari henia dalana ai, ita danu ita gini goada diba.

15. Dahaka dainai Iehova ita gari henia be namo to iseda tauanina idia hamasea diba taudia ita gari henidia be dika?

¹⁵ Mataio 10:​28 (NW) dekenai, Iesu be ita ia sisiba henia, ia gwau: “Tauanina be do idia alaia diba, to souli be do idia alaia diba lasi taudia dekenai do umui gari lasi. To souli bona tauanina ruaosi [Gehena] dekenai do ia alaia mase diba Diravana dekenai be do umui gari, be namo.” Bema Iehova ia gari henia tauna ta ena inai tauna ta ese ia hamasea, mase dekenai do ia noho nega sisina sibona. (Hosea 13:14) Ia toreisi lou neganai, unai tau be do ia hereva diba, ia gwau: “Mase e, oiemu kwalimu be edeseni? Mase e, oiemu hisihisi siahuna be edeseni?”​—1 Korinto 15:55.

16. Iesu be edena dala ai ia hahedinaraia Iehova ia gari henia bona edena dala ai Iehova ia hanamoa?

¹⁶ Iehova ena kara maoromaoro idia ura henia bona kara dika idia inai henia taudia iboudiai vairanai, Iesu ese haheitalai namo herea ia hahedinaraia. Ioane 16:33 ia hahedinaraia, Iesu ese iena hahediba taudia dekenai ia gwauraia hereva dokodia ese idia hahedinaraia Iehova ia gari henia, ia gwau: “Inai hereva lau hamaoroa vadaeni umui dekenai, egu lalona dekenai maino do umui abia totona. Tanobada dekenai umui be hisihisi do umui abia. To, do umui goada noho, badina be lau ese tanobada lau halusia vadaeni.” Ioane be ma ia torea, ia gwau: “Iesu unai bamona ia hereva, vadaeni guba dekenai ia itaia, ia guriguri, ia gwau, ‘Egu Tamana e, negana inai, emu Natuna do oi hanamoa, vadaeni emu Natuna ese oi do ia hanamoa. . . . Tanobada dekenai oi henia lau dekenai taudia be oiemu ladana lau hadibaia vadaeni idia dekenai.’ ”​—Ioane 17:​1-6.

Iehova Gari Henia bona Hanamoa

17. Ita be dahaka dala idauidau amo Iesu ena haheitalai ita tohotohoa diba?

¹⁷ Ita ese Iesu ena gari lasi karana ita tohotohoa diba, a? Oibe, bema ita be Iehova ita gari henia! Iesu be ita dekenai Iehova ena ladana hereadaena bona iena kara ia hadibaia vadaeni. Iehova ita gari henia, ia be iseda Atai Herea Lohiabada dainai, unai dainai Iehova ita hanamoa bada, dirava koikoi iboudiai ita hanamoa lasi, bona Kerisendom ena ladana lasi Toi Tamona diravana, ita hanamoa lasi. Iesu ese Iehova ena hesiai gaukara ia karaia mai ena gari maoromaorona danu, bona ia ura lasi idia mase diba taudia garina ia gari. “Ia be tanobada dekenai ia noho neganai Iesu ese Dirava ia guriguri henia mai taitai bona mai matana ranu danu. Ia noinoi badina ia diba Dirava ese mase dekena amo ia hamauria lou diba. Bona Dirava ese Iesu ena noinoi ia abia dae, badina Iesu be sibona ena ura ia noia lasi, bona ia be Dirava henunai ia manau noho dainai.” Namona be ita danu be Iesu bamona Iehova ita gari henia, bona ita abia hisihisidia amo Dirava kamonai henia dalana ita hadibaia​—nega ibounai hahemauri hanaihanai ita tahua neganai.​—Heberu 5:​7-9.

18. Ita be edena bamona Dirava ita tomadiho henia mai hemataurai bona mai gari danu?

¹⁸ Paulo ese unai revareva be Heberu taudia dekenai ia siaia. Gabeai, unai revareva lalonai horoa Keristen taudia ia hagoadaia, ia gwau: “Inai ita abia vadaeni Basileia be tau ta ese do ia hamarerea diba lasi gauna. Unai dainai Dirava ita tanikiu henia be namo. Bona namona be Dirava do ita tomadiho henia, mai hemataurai bona mai gari danu.” Hari inai negai, “hutuma bada herea” danu ese unai hesiai gaukara helagana idia karaia. Bona unai gaukara be dahaka? Paulo ese Iehova ena hebogahisi bada, Iena Natuna, Iesu Keriso, ena boubou dalana ia karaia dainai ia hebogahisi bada karana unai, ia kikilaia. Bena murinai ia gwau: “Unai dainai namona be Dirava do ita hanamoa, Iesu ena ladana dainai. Bona inai hanamoa Dirava do ita henia nega ibounai, boubou gauna bamona. Oibe, ita ese iseda uduna bibina Iesu dekenai do ita henia, bona ia do ita gwauraia hedinarai, ia be Lohiabada.” (Heberu 12:28; 13:​12, 15) Ita ese Iehova ena hebogahisi badana ita laloa bada dainai, namona be ita ura hora momo be iena hesiai gaukara helagana lalonai ita negea. Hari inai negai, hutuma bada herea taudia be horoa Keristen taudia oredia edia bamodia dainai, unai gaukara ena kahana badana idia karaia noho. Laulau dalanai idia be Dirava ena terona ena vairanai idia gini neganai, idia gwau hahemauri siahuna be Dirava bona Keriso edia amo ia mai, bona “dina bona hanuaboi iena dubu helaga lalonai Dirava ena hesiai gaukara idia karaia noho.”​—Apokalupo 7:​9, 10, 15.

Iehova Hanamoa ela bona Hanaihanai

19, 20. “Iehova ena dina” lalonai dahaka gari karadia rua do idia hedinarai?

¹⁹ Kahirakahira, Iehova do ia hahedinaraia iena kara iboudiai idia maoro! “Iehova ia gwau: ‘Itaia! Dina ta ia mai, amudo badana ena lahi bamona, bona hekokoroku taudia iboudiai bona kara dika idia karaia taudia iboudiai be rei bamona. Unai dina ese idia do ia araia haorea, bona edia rigina bamona edia ramuna danu do idia ore vaitani.” Unai hekwakwanai bada negana be “Iehova ena dina badana mai garina.” (Malaki 4:​1, 5) Kara dika taudia edia kudouna lalonai “gari bada” do ia havaraia, bona unai taudia “do idia roho mauri diba lasi.”​—Ieremia 8:15; 1 Tesalonika 5:3.

²⁰ To Iehova ena orea taudia idia idau, edia gari karana be idau. “Noho hanaihanai Sivarai Namona” ia gwauraia aneruna ese ia boiboi henidia goadagoada, ia gwau: “Dirava do umui gari henia, ia do umui hanamoa bada, badina be Dirava ese taunimanima ibounai do ia kota henia ena nega ia ginidae vadaeni.” (Apokalupo 14:​6, 7) Unai hahemaoro karana dainai Aramagedono ena siahu bada ese Satana ena tanobada do ia araia ore neganai do ita hoa dikadika. Dala maoromaorona ai Iehova gari henia karana be iseda kudouna dekenai do ia noho ela bona hanaihanai. Namona be unai nega ai hahenamo ita abia badina ita be ‘Dirava ena ladana ita noinoi henia dainai mauri ita davaria’!​—Ioel 2:​31, 32; Roma 10:13.

21. Iehova gari henia karana ese dahaka hahenamo do ia mailaia?

²¹ Unai murinai, hahenamo namo hereadia bona “mauri laganidia” momo herea ela bona hanaihanai do idia abia! (Hereva Lada-isidia 9:11; Salamo 37:​9-11, 29) Unai dainai, herevana iseda helaro be Basileia do ita abia eiava do ia lohiaia gabuna, tanobada, dekenai hesiai gaukara do ita karaia, to namona be hari Dirava ita tomadiho henia noho mai hemataurai bona mai gari danu. Namona be iena ladana helagana ita hahairaia noho. Bona unai dainai dahaka hahenamo do ita davaria? Ela bona hanaihanai Dirava do ita tanikiu henia badina iseda kudouna ai ita ese inai aonega sisibana ita badinaia dainai: nega ibounai Iehova ita gari henia!

Oiemu Haere be Dahaka?

◻ “Iehova gari henia” ena anina be dahaka?

◻ Idau negai Dirava gari henia karana ese iena orea taudia edena bamona ia durudia?

◻ Iesu ese Dirava gari henia karana dekenai dahaka haheitalai namona be ita dekenai ia hahedinaraia?

◻ Ita be edena bamona ita kara maoromaoro noho Iehova gari henia dalana dekenai?

[Picture on page 18]

Apokalupo bukana lalonai, Iesu ena tadikaka idia hedinarai, bona “Mose ena ane” idia abia, unai ane ese Iehova ia hanamoa

[Picture on page 20]

Iehosafat ena tuaria orea taudia idia kwalimu Iehova gari henia dalana lalonai

[Picture on page 23]

Iehova idia gari henia taudia edia davana namona be mauri laganidia momo herea ela bona hanaihanai