Basileia Haroro Ripoti

Witness Taudia be Nega Idaudia ai Idia Haroro bona Namo Idia Havaraia

TAUNIMANIMA momo be Bible ena hereva momokani idia kamonai henia nega ginigunana Iehova ena Witness ta be nega idauna ta ai ia haroro henia negana. Inai kara dekenai Witness taudia be Iesu Keriso ena haheitalai idia badinaia, ia be nega idauna ta ai ranu ia utua totona guri dekenai ia lao Samaria hahinena ta ia haroro henia. (Ioane, karoa 4) East Africa dekenai, nega idauna ta ai Iehova ena Witness ta be Katolik sisita ia haroro henia. Watch Tower Society ena branch opesi be ia vara gauna inai bamona ia herevalaia:

◻ Dabai ta, ia lao taoni neganai, Witness taihuna ta be Katolik sisita ia davaria. Ia be sisita ia nanadaia: “Hari dabai oi be edeseniai oi lao?” Haere be inai: “Lauegu Dirava do lau guriguri henia.” Bena ia ese sisita ia nanadaia: “Oiemu Dirava ena ladana oi diba, a?” Sisita ia haere, ia gwau: “Iena ladana be Dirava, ani?” Witness ia gwau unai adorahi iena ruma dekenai do ia mai bona Dirava ena ladana do idia kikilaia. Idia herevahereva murinai sisita ia lao iena dubu dekenai bona pris ta ia nanadaia Iehova ena ladana ena anina ia diba eiava. Iena haere be, “Ia be Dirava ena ladana.” Sisita ia hoa badina pris tauna be unai ia diba to ia dekenai ia hadibaia lasi.

Witness be dina 9 lalodiai dina ta ta iboudiai ia vadivadi henia bona Toi Tamona, souli, hel lahina, bona mase taudia totona ia noho helaro namona dekenai hereva momokani ena sivarai ia hadibaia. Unai hahine be hereva iboudiai ia kamonai bena Witness ia hamaoroa nega ia henia unai hahediba hereva iboudiai ia lalodia namonamo totona. Wiki rua murinai ia be Witness ia tahua lou bona ia ura ma herevahereva haida idia karaia. Unai nega ia do mai lasi neganai sisita be iena lalona ia hagoadaia dubu do ia rakatania bona ia sibona ena kaivakuku, rosary, bona korosi gaudia ia hadikaia vadaeni. Pris ese ia ena lalona ia ania toho ia giroa totona, to ia ura momokani hereva momokani ia tahua. Gabeai ia bapatiso bona hua momo lalodiai, ena be ia gorere bona ia buruka momokani, to heduru pioneer gaukara be hua ta ta iboudiai lalonai ia karaia.

Iena ruma ia bada dainai, kongregesen dekenai ia henia Kingdom Hall totona idia gaukaralaia. Tadikaka ese guhi matamatana idia atoa, ruma lalonai idia noho haba idia kokia, bona unai ruma ena kahana badana be hebou gabu namona ai idia halaoa. Unai hahine, guna ia be Katolik sisita, be unai hebou gabuna ena murinai ia noho daiutuna lalonai ia noho. Ia moale badina iena harihari gauna Iehova ena tomadiho karana dekenai be inai bamona ia karaia.

◻ Nega idaudia dekenai haroro gaukara karaia karana ena namo be ia hedinarai ekspiriens ma ta be Kampala, Uganda dekenai ia vara neganai. Gavamani opesi ta ia lao henia neganai, Witness misinari ta be ia danu idia daekau taudia ia hereva henidia. Tau ta, ladana Mr. L———— ia gwau ia ura buka ia abia to unai negana ai ia abia diba lasi. Unai dainai misinari dekenai iena ladana bona opesi ena address ia henia. Gabeai inai misinari ia lao unai gabu dekenai bona Mr. L———— ia tahua. Idia boiria to misinari ia hoa, badina ma tau ta ia mai. Unai opesi dekenai tatau rua idia gaukara bona edia ladana be tamona. Nega sisina lalonai Mr. L———— iharuana ia haroro henia, bona ia kamonai neganai ia moale bada herea. Mr. L———— ginigunana ia ura lasi, to Mr. L———— iharuana be Bible stadi ia hamatamaia. Hari ia be bapatiso Witness tauna, bona iena hahine bona natuna be idia goada idia lao bapatiso do idia abia totona.

Iesu Keriso be Mamoe Naria Tauna Namona bona mamoe bamona taudia, kara maoromaoro idia ura henia kudou-namo taudia, ia diba. Inai ekspiriens haida amo ia hedinarai Iesu ese ia murinai idia raka taudia ia hakaudia lao unai bamona taudia dekenai. Nega idaudia ai haroro gaukara ita karaia neganai unai ese huahua namona ia havaraia diba!​—Ioane 10:14.