Ita be Abidadama Taudia

Italy Dekenai Hagoadaia Sivaraina Idia Halasia

IEHOVA be, “durua ibounai ia henia Diravana.” Ia tohotohoa karana idia dibaia dainai, iena hesiai taudia be ‘hisihisi idia abia noho taudia idia durua diba.’ (2 Korinto 1:​3, 4; Efeso 5:⁠1) Iehova ena Witnes taudia ese idia karaia haroro gaukarana ena badina badana ta be unai.

Heduru Ia Ura Abia Hahinena Idia Durua

Vanegai laganidia lalonai, momo be hitolo, tuari, bona noho namona tahua urana ese idia doria dainai tano namodia dekenai idia lao. To gabu matamata manadalaia be ia auka. Manjola be Albania taudia ma haida danu Borgomanero dekenai ia noho. Italy dekenai ia noho totona gavamani amo gwaumaoro ia abia lasi dainai, ia ura lasi Wanda, Iehova ena Witnes hahinena ta, danu ia herevahereva. To, gabeai Wanda be dala ia kehoa Manjola danu idia hedavari totona, bona karaharaga Dirava ena Hereva stadilaia karana dekenai ura bada ia hahedinaraia, ena be gado dekenai ia hekwarahi sisina. To, nega haida Manjola ia vadivadi murinai, Wanda ese ruma dekenai ta ia davaria lasi. Dahaka ia vara? Gabeai Wanda ia kamonai unai ruma ai idia noho taudia ibounai idia heau boio badina idia ta​​—⁠Manjola danu ia noho tauna​​—⁠ese tau ta ia alaia dainai polisi ese ia tahua!

Hua hani murinai, Wanda ese Manjola ia davaria lou. Wanda ia laloa lou bona ia gwau: “Iena toana be labora bona ena tauanina be maragi momokani, hekwakwanai momo ia abia tauna bamona.” Manjola ia gwau, ia danu guna ia noho tauna be dibura dekenai bona heduru abia totona ena turana haida dekenai ia lao neganai idia durua lasi. Ia daradoko bada dainai, heduru totona Dirava ia guriguri henia. Bena Wanda, Baibel ia herevalaia hahinena, ia laloatao. Wanda ia itaia lou neganai Manjola ia moale bada herea!

Baibel stadi idia hamatamaia lou, bona karaharaga Manjola ese Keristani heboudia ia lao henia. Ia ese gavamani amo gwaumaoro ia abia Italy dekenai ia noho totona. Lagani ta murinai, Manjola be bapatiso Witnes ta ai ia lao. Dirava ia henia gwauhamatadia ese ia idia hagoadaia dainai, Albania dekenai ia giroa lou Baibel ena hagoadaia sivaraina be ena tano tamona taudia dekenai ia gwauraia totona.

Tano Ma Ta amo Idia Mai Taudia Edia Kamepa Dekenai Idia Haroro

Italy ena kongregesen momo be dala idia karaia Manjola bamona taudia, tano ma ta amo idia mai taudia, dekenai idia haroro totona. Hegeregere, Florence dekenai ia noho kongregesen ta be dala ia karaia tano ma ta amo idia mai taudia edia kamepa idia vadivadi henia hanaihanai totona. Unai kamepa dekenai idia noho taudia​​—⁠idia momo be Eastern Europe, Macedonia, bona Kosovo amo​​—⁠ese mauri aukana idia davaria. Idia haida ese drag anina kava eiava inuinu kekero ena hekwakwanai idia abia. Idia momo ese gau maragidia idia henaoa edia mauri durua gaudia abia totona.

Unai gabu dekenai haroro be ia auka. To, ful-taim haroro gaukara ia karaia taihuna ta ladana Paola ese Jaklina, Macedonia hahine, ia hereva henia. Nega haida idia herevahereva murinai, Jaklina ese ena turana, Susanna, ia hagoadaia Baibel ia stadilaia totona. Bena Susanna ese varavara ma haida ia hereva henidia. Daudau lasi murinai, edia bese taudia ima be hanaihanai Baibel idia stadilaia, Keristani heboudia dekenai idia lao, bona idia dibaia gaudia be edia mauri lalonai idia badinaia. Ena be hekwakwanai idia davaria, to goada be Iehova bona ena Hereva amo idia abia.

Sista ta ese Iehova amo Ia Mai Goadana Ia Abia Dae

Formia ena taoni dekenai, ful-taim haroro gaukara ia karaia taihuna ta ladana Assunta ese ia raka namonamo lasi hahinena ta ia hereva henia. Unai hahine be sista ta tomadiho orea ta dekenai, unai orea ese gorere bona buruka taudia be edia ruma ai bona hospital dekenai idia durua.

Assunta ese unai sista dekenai ia gwau: “Oi danu be oi hisihisi, ani? Madi, ita ibounai ese hekwakwanai ita davaria.” Unai hereva dainai, unai sista ia taitai bona ia gwau ia be gorere dikana ta ia abia. Assunta ese ia hagoadaia ia gwau, Baibel ese ia gwauraia Diravana ese ia dekenai goada ia henia diba. Assunta ese ia henia Baibel magasin ia abidia dae.

Edia herevahereva iharuana lalonai, unai sista, ena ladana be Palmira, ia gwau ia be hisihisi bada herea ia abia noho. Nega daudau sista ese idia haheaua gabuna ta ai ia noho. Ena gorere dainai nega sisina lalonai unai gabu ia rakatania murinai, idia abia vareai lou lasi. To, Palmira ia laloa, ia sista neganai ia karaia gwauhamatadia be Dirava vairanai ia hagugurua be namo. Ia be gorere hanamoa taudia dekenai ia lao ia idia “durua” totona, to unai ese lalohisihisi ia havaraia. Palmira ese Baibel stadi ia abia dae, bona lagani ta lalonai Keristani heboudia dekenai ia lao. Bena gabu idauna ma ta dekenai ia lao, bona Witnes taudia ese idia davaria lou lasi. Lagani rua murinai, Assunta ese ia davaria lou. Palmira ese dagedage bada herea be ena ruma bese taudia bona dubu gunalaia taudia amo ia abia. To, ia ese ena Baibel stadi ia hamatamaia lou, lauma dalanai ia tubu, bona Iehova ena Witnes ta bamona bapatiso ia abia.

Oibe, momo be “goada ia henia Diravana” ena sivarai amo goada idia abia. (Roma 15:​4, 5) Unai dainai, Iehova ena Witnes taudia Italy dekenai ese edia lalona idia hadaia Dirava do idia tohotohoa noho ma haida dekenai unai hagoadaia sivarai namona idia henia totona.