Dirava Dainai Gau Haida Idia Henia Taudia ese Moale Hanaihanai Do Idai Abia
“Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.”—IOANE 3:16.
1, 2. (a) Daika be Gau Henia Tauna badana, bona dahaka gau hereadaena taunimanima dekenai ia henia? (b) Unai gau hereadaena ia henia neganai, Dirava ese dahaka kara ia hahedinaraia?
IEHOVA DIRAVA be Gau Henia Tauna badana momokanina. Hahediba tauna Iakobo ese Ia, guba bona tanobada Havaraia Tauna unai, ia herevalaia, ia gwau: “Gau namodia ibounai, bona harihari gaudia namodia momokani ibounai be Dirava dekena amo idia diho mai. Dirava ese diari ibounai ia karaia, bona nega haida edia toana idia senisia, nega haida mai edia dibura nega. To Dirava ese iena kara ia senisia lasi, ia diari hanaihanai, bona mai ena dibura taina lasi.” (Iakobo 1:17) Danu, Iehova be gau hereadaena momokanina Henia Tauna, gau ta ese unai henia gauna ia hereaia diba lasi. Unai taunimanima dekenai ia henia gau hereadaena be tau ta ia herevalaia neganai, ia gwau: “Badina be Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.”—Ioane 3:16.
2 Unai bamona ia hereva tauna be Dirava ena Natuna tamona sibona. Vaia ena kara, ia be ena tamana ena natuna tamona dainai, tau ta ese ena tamana ia laloa momo bona ia lalokau henia, badina ia ena mauri bona ena mauri hanamoa gaudia ibounai be tamana ena amo ia abia. To, Dirava ena lalokau be ia bada bona unai Natuna sibona lasi to ma haida ia lalokau henidia danu. Unai bamona lalokau henia gauna be ena mauri gaudia ma haida dekenai ia henidia dainai, Dirava ese ena lalokau hereadaena ia hahedinaraia. (Roma 5:8-10 itaia danu.) Bema unai hereva “ia henia vadaeni” ena anina korikorina ita davaria neganai, unai lalokau hereadaena ia hedinarai momokani.
Dirava ese “Iena Natuna, Iena Lalokau” Ia Henia
3. “Iena Natuna, iena lalokau” ese ena guba Tamana amo lalokau ia davaria, to daidia ese unai lalokau idia davaria danu?
3 Ita diba lasi edena nega daudauna lalonai, Dirava bona ena Natuna tamona sibona—“iena lalokau” unai—idia noho hebou guba dekenai. (Kolose 1:13) To, unai nega ibounai lalonai, Tamana bona Natuna be edia lalokau heheni bona ura henia karana idia habadaia bada, unai dainai ita gwau diba ma mauri haida be edia lalokau heheni karana idia tohotohoa diba lasi. Ia be ena Natuna tamona sibona amo ia havaraia mauri gaudia ibounai ia lalokau henidia badina idia danu be Iehova Dirava ena bese lalonai idia noho dainai. Unai dainai, Dirava ena bese ibounai lalonai lalokau karana ia lohia bamona. Maoromaoro Bible ia gwau “Dirava be lalokau.” (1 Ioane 4:8) Unai dainai ita diba unai bese lalonai idia noho mauridia be Tamana, Iehova Dirava, ese ia lalokau henidia mauridia.
4. Dirava ese iena Natuna ia henia neganai, edena bamona Ia ida idia hetura heheni karana sibona ia haboioa lasi, to ma gau ta ia haboioa danu?
4 Badina Iehova bona ena Natuna tamona idia lalokau heheni bada dainai, bema edia hetura heheni karana idia hadokoa do idia dabu bamona. (Kolose 1:15) To, unai ena Natuna tamona ia ‘henia’ neganai anina be “iena Natuna, iena lalokau” ena hetura karana amo ia dabu sibona lasi. Ena anina be Iehova ese ena Natuna ena mase, bona nega sisina Dirava ena bese amo ia boio karana, be ia koua lasi. Unai bamona ia mase Dirava ena bese ai idia noho lasi taudia ia durua totona. Idia dabu tanobada taudia dainai Iehova ena henia gauna bada hereana be ena Natuna tamona sibona. Bible ese unai tauna ia gwauraia “Dirava ia karaia gaudia ena badina momokani.”—Apokalupo 3:14.
5. (a) Adam ena natudia edia noho dika ena badina be dahaka, bona Dirava ena hahemaoro maoromaorona dainai namona be Iena abidadama natuna ta ese dahaka do ia karaia? (b) Dirava ese dahaka do ia karaia ena henia gauna hereadaena do ia henia totona?
5 Taunimanima ginigunadia, Adam bona Eva, be edia gabu Dirava ena bese lalonai idia haboioa. Dirava dekenai idia kara dika dainai Eden umana murimuriai ia luludia neganai, unai bamona idia noho. Idia be Dirava ena bese amo idia boio sibona lasi, to Dirava ia gwau do idia mase danu. Unai dainai, edia natudia be Dirava ena bese dagina idia abia lou sibona be namo lasi, to Dirava ena hamasedia gwauhamatana be dala ta amo ia kokia danu be namo. Dirava ena hahemaoro maoromaorona do ia hadikaia lasi totona, namona be Iehova Dirava ena abidadama natudia amo ta do ia mase, idia ia boloa, eiava edia davana do ia karaia totona. Unai dainai henanadai badana be inai: Do ia abia hidi tauna do ia ura tanobada kara dika taudia totona do ia mase, edia davana karaia totona, a? Danu, unai bamona karaia totona Siahu Ibounai Diravana ese hoa karana ta do ia karaia. Unai kara karaia totona Dirava ese ena lalokau bada hereana do ia hahedinaraia.—Roma 8:32.
6. Dirava ena Natuna be kara dika taudia edia hekwakwanai edena bamona ia kokia diba, bona ia ese unai kara edena bamona ia herevalaia?
6 Iehova ena vara guna Natuna sibona ia hegeregere kara dika tanobada taudia hamauridia totona. Ia be ena guba Tamana ena toana ia tohotohoa bada dainai Dirava ese ia havaraia besena ia lalokau henidia bada; unai dainai Dirava ena natudia ma iboudiai ese ia idia hereaia diba lasi. Badina be mai edia lalohadai mauri gaudia iboudiai be ia ena amo Dirava ese ia havaradia, ia ese idia ia lalokau henidia bada. Danu, Iehova ena Natuna tamona sibona, Iesu Keriso, ena kara badana ta be lalokau, badina ia “be Dirava ena hairaina ena diari, bona iena toana be Dirava ena toana hegeregerena momokani.” (Heberu 1:3) Ia ura ena mauri ia henia kara dika taudia ia davalaidia totona, bona unai amo ena lalokau ia hahedinaraia bada. Unai kara ia gwauraia neganai, Iesu ese ena aposetolo taudia 12 ia hamaorodia, ia gwau: “Badina Taunimanima ena Natuna ia mai lasi, hesiai taudia ese iena gaukara idia karaia totona, to ia mai be hesiai gaukara ia karaia totona, bona iena mauri ia henia taunimanima momo edia dika davana karaia totona.”—Mareko 10:45; Ioane 15:13 itaia danu.
7, 8. (a) Dahaka badina dainai Dirava ese Iesu Keriso ia siaia diho tanobada taudia dekenai? (b) Dirava ese ena Natuna tamona sibona ia siaia dahaka kara do ia karaia totona?
7 Iehova Dirava be mai ena badina badana dainai Iesu ia siaia inai tanobada taudia manokadia dekenai. Unai badina badana be Dirava ena lalokau, badina Iesu ia gwau: “Badina be Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia. Badina be Dirava ese ena Natuna tanobada dekenai ia siaia mai be tanobada ia kota henia totona ia mai lasi, to tanobada be ia dainai mauri do ia abia.”—Ioane 3:16, 17.
8 Dirava ese ena lalokau amo ena Natuna tamona sibona taunimanima hamauridia karana karaia totona ia siaia. Dirava ese ena Natuna ia siaia, tanobada kota henia totona lasi. Bema Dirava ese unai kara karaia totona ena Natuna ia siaia tanobada taudia do idia mauri diba lasi. Unai dainai bema Iesu Keriso ese hahemaoro maoromaorona ia karaia taunimanima dekenai, mase sibona idia abia diba. (Roma 5:12) Unai dainai, Dirava ena lalokau karana idauna amo ia ese ma dala ta amo taunimanima edia amo hahemaoro maoromaorona, mase unai, ia davalaia.
9. Salamo torea tauna David ese Iehova ena heduru henia karana edena bamona ia laloa?
9 Gau ibounai dekenai, Iehova Dirava ese iena lalokau karana ia herevalaia bona ia hahedinaraia, unai be iena kara badana ta. Bona ita gwau diba Dirava ese mai lalokau danu ena abidadama taudia tanobada dekenai gau namodia momo ia henidia. Salamo torea tauna David be unai bamona ia laloa. Dirava ia hereva henia neganai, ia gwau: “Emu hahenamo be bada herea, oi abia hegaegae, oi idia gari henia taudia edia! Oi idia heau henia taudia dekenai oi henia, taunimanima edia natudia vairanai oi karaia.” (Salamo 31:19) David ese Israel besena ia lohiaia neganai—oibe, Dirava ese unai bese ia abia hidi bona David be unai bese tauna ta dainai ena mauri ibounai lalonai—nega momo ia ese Iehova ena kara namo ia davaria. Bona David ia diba unai kara namo be bada herea momokani.
Israel ese Dirava Ia Henidia Harihari Gauna Badana Idia Haboioa
10. Dahaka dainai Israel gunana be tanobada besena ma ta bamona lasi?
10 Idau negai Israel besena edia Dirava be Iehova, unai dainai tanobada besedia iboudiai amo idia be idau momokani. Iehova ese ena maino karaia tauna bona peroveta tauna, Mose, dekena amo Abraham, Isako, bona Iakobo edia natudia ida gwauhamata ta ia karaia, ia danu idia raka hebou totona. Ma bese ta dekenai unai bamona ia karaia lasi. Unai dainai, lauma helaga amo, salamo torea tauna ia gwau: “Iena hereva be Iakobo dekenai ia hamaoroa, iena hahegani bona hahemaoro herevadia be Israel dekenai ia henia. Unai bamona ia karaia lasi bese idauna ta dekenai; iena hahemaoro herevadia idia diba lasi. Umui taunimanima, Iehova hanamoa!”—Salamo 147:19, 20.
11. Ela bona edena negai Israel besena be Dirava ena namo lalonai idia noho, bona Iesu ese unai noho namona idia haboioa dalana edena bamona ia herevalaia?
11 Tauani Israel besena be unai bamona Dirava ena namo henunai idia noho ela bona lagani 33 C.E. dekenai, idia ese Iesu idia dadaraia negana unai. Unai be nega dikana momokanina bona Iesu ese inai bamona ia gwauraidia, ia gwau: “Ierusalema e! Ierusalema e! Peroveta taudia oi alaia mase, bona oi dekenai Dirava ese ia siaia taudia be nadi dekenai oi hodoa. Nega momo lau ura oiemu natuna lau haboua, kokoroku hahine ese ena natuna ena hanina dekenai ia koua bamona, to oi ura lasi! Inai, umui emui ruma be do ia noho kava anina lasi.” (Mataio 23:37, 38) Iesu ena hereva amo ita diba, ena be Israel besena be guna Iehova ese ia hanamodia, to murinai idia ese Dirava ia henia gau namona idia haboioa. Edena bamona?
12. ‘Ierusalem ena natuna’ be daidia? Bema Iesu ese idia ia haboudia, anina be dahaka idia dekenai?
12 Iesu ese unai hereva “natuna” ia gwauraia dainai ita diba ia ese tauani ai idia peritome Iuda taudia, Ierusalem ai idia noho taudia sibona, ia herevalaidia. Idia be Iuda besena ibounai totona idia gini taudia. Bema Iesu be ‘Ierusalem ena natuna’ ia haboudia anina be unai “natuna” ia hakaudia lao Dirava danu gwauhamata matamatana lalonai idia vareai totona, ia sibona be Iehova bona unai tauani Iuda taudia edia huanai Maino Havaraia Tauna ai ia lao unai. (Ieremia 31:31-34) Unai bamona ia karaia neganai, edia kara dika Dirava ese do ia gwauatao, Iena lalokau bada hereana amo. (Malaki 1:2 itaia danu.) Unai be momokani henia gauna badana ta.
13. Israel besena ese Dirava ena Natuna idia dadaraia dainai dahaka idia haboioa, to dahaka dainai Iehova ena moale ia maragi ia lao lasi?
13 Ena peroveta Herevana hegeregerena, Iehova ia naria ela bona nega korikorinai bena Iuda lasi taudia edia dala ia kehoa idia be gwauhamata matamatana lalonai idia vareai totona. Badina idia ese Dirava sibona ena Natuna, Mesia unai, idia dadaraia dainai tauani Israel ena bese ese unai henia gauna badana idia haboioa. Natuna idia dadaraia taudia edia gabu abia totona ia ese Iuda lasi bese taudia ia boiridia unai henia gauna idia abia totona. Unai dala amo, Iehova ese ena Gau Henia Bada Tauna ena dagi ia haboioa lasi.
Henia Karana Ena Moale
14. Dahaka dainai guba bona tanobada ibounai lalonai idia mauri noho taudia iboudiai amo Iesu Keriso be moale hereadae tauna?
14 Iehova be “moale Diravana.” (1 Timoteo 1:11, NW) Ma taunimanima haida dekenai gau ta ia henidia neganai ia moale. Lagani 100 C.E. ia do mai lasi neganai, iena Natuna tamona ia gwau: “Henia kara ena moale be bada, abia kara ena moale be maragi.” (Kara 20:35) Unai hereva hegeregerena ai, guba bona tanobada ia Havaraia Tauna ese ia havaraia taudia iboudiai amo Iesu be moale tauna hereadaena. Edena bamona ia moale? Badina Iehova Dirava sibona henunai, Iesu Keriso ese henia gauna hereadaena ia henia vadaeni, taunimanima hanamodia totona ena mauri ia henia unai. Momokani, ia be ‘moale Pavapavana.’ (1 Timoteo 6:15, NW) Unai dainai Iesu ese ia gwauraia henia karana ena moale ena haheitalai namo hereana be ia.
15. Iehova be dahaka noho hanaihanai haheitalaina, bona iena aonega mauri taudia ese iena moale sisina edena bamona do idia abia?
15 Iesu Keriso amo, Iehova Dirava be ena aonega mauridia dekenai Gau Henia Tauna namona ai ia lao, bona edia gau henia karana ena haheitalai namona ai ia lao danu. Dirava ese henia gaudia namodia ma taunimanima haida dekenai ia henidia neganai moale ia davaria. Unai hegeregerena, tanobada aonega taudia edia kudou dekenai henia kara ena ura ia atoa. Unai dala amo idia ese iena kara idia hahedinaraia bona idia tohotohoa bona iena moale ena mamina idia abia sisina. (Genese 1:26; Efeso 5:1) Unai hereva bamona, Iesu ese ena hahediba taudia ia hamaorodia, ia gwau: “Taunimanima dekenai umui henia lao, vadaeni Dirava do ia henia umui dekenai. Taunimanima ese emui puse do idia hahonua ela bona do ia bubua danu. Oibe, umui dekenai idia haria gauna be do ia hegeregere momokani, bona ia hanaia danu.”—Luka 6:38.
16. Iesu ese dahaka henia karana ia gwauraia Luka 6:38 dekenai?
16 Badina Iesu ese ena hahediba taudia edia raka dalana ia hahedinaraia dainai ia be haheitalai namona ta. Ia gwau unai heduru idia abia taudia do idia moale bona kara haida do idia karaia. Luka 6:38 dekenai, Iesu be kohu henia karana ia herevalaia sibona lasi. Ia ese ena hahediba taudia ia hamaorodia lasi edia kohu ibounai idia henia haida dekenai. To edia mauri lalonai lauma dalana hagugurua karana ia hadibadia.
Moale Hanaihanai Do Idia Abia Momokani
17. Inai nega dokona lalonai Dirava ese dahaka harihari gauna namona ena Witness taudia dekenai ia henidia?
17 Momokani inai nega dokona lalonai, Iehova, idia vara gaudia iboudiai edia Biaguna, ese ena Witness taudia edia harihari gauna namona ta ia henidia! Ia ese ena Basileia ena sivarai namona ia henia ita dekenai. Iena amo ita abia gau namona be inai: Dirava ena Basileia, ena Natuna, ia lohia tauna Iesu Keriso, ena imana dekenai, ita harorolaia diba. (Mataio 24:14; Mareko 13:10) Ita ese Atai Herea Diravana ena Witness taudia ai ita lao karana be henia gauna hereadaena Iehova amo ita abia, bona Dirava ena gau henia karana ita tohotohoa ena dala namona be Basileia ena sivarai ma haida dekenai ita harorolaia inai nega dikana ia do ore lasi negana lalonai.
18. Ita be Iehova ena Witness taudia dainai, ma taunimanima haida dekenai dahaka do ita henidia?
18 Unai Basileia ena sivarai ma taunimanima haida dekenai ia harorolaia neganai ia davaria hekwakwanaidia be Paulo ese ia herevalaidia. (2 Korinto 11:23-27) Basileia ena helaro ma taunimanima haida dekenai idia henia totona, inai nega ena Iehova ena Witness taudia danu ese hekwakwanai idia davaria bona sibodia edia ura haida idia koua unai kara idia karaia totona. Bema ita be hemarai taudia, reana ita ura lasi taunimanima edia ruma dekenai ita lao. To ita be Keriso ena murinai ita raka taudia dainai, ma haida dekenai lauma gaudia henia gaukarana ita dadaraia diba lasi, unai dainai inai “Basileia ena Sivarai Namona” idia dekenai ita harorolaia. (Mataio 24:14) Namona be Iesu ena lalohadai ita tohotohoa. Ia vairanai mase ia noho neganai, ia guriguri, ia gwau: “Egu Tamana e, . . . lauegu ura lasi, oiemu ura sibona.” (Mataio 26:39) Basileia ena sivarai namona ma haida dekenai idia henia neganai, Iehova ena hesiai taudia ese Dirava ena ura idia karaia, sibodia edia ura lasi—ia ura idia karaia gauna idia karaia, idia sibodia edia ura lasi.
19. Daidia be “idia ore lasi rumadia” edia Biagudia, bona idia dekenai edena bamona ita turana karaia diba?
19 Unai bamona ita henia neganai iseda nega bona iseda kohu ia haorea diba, to Dirava ena ura dainai gau haida ita henia neganai, ita ese moale hanaihanai do ita abia. Badina be dahaka? Badina Iesu ia gwau: “Kohu dikadia [“inai tanobada ena kohu,” New International Version], dekena amo tura haida umui tahua, unai kohu do idia ore neganai, do idia ore lasi rumadia dekenai oi do idia abia dae totona.” (Luka 16:9, NW) Namona be ita ura “kohu dikadia” amo ita ese “idia ore lasi rumadia” edia Biagudia ita tura henidia. Badina Havaraia Tauna, Iehova, be gau ibounai edia Biaguna bona ena Natuna be Vara Guna Tauna dainai ia danu be mai ena siahu unai gaudia dekenai. (Salamo 50:10-12; Heberu 1:1, 2) Idia dekenai ita turana karaia totona, namona be kohu ita gaukaralaia idia moalelaia dalana dekenai. Unai dekenai namona be iseda kohu ma haida totona ita gaukaralaia neganai ita laloa namonamo. (Mataio 6:3, 4; 2 Korinto 9:7 itaia danu.) Iseda moni ita gaukaralaia dala maorona dekenai, unai amo Iehova Dirava bona Iesu Keriso ida ita turana karaia. Haheitalai ta be inai, ita ese iseda kohu amo idia dabu momokani taudia ita durudia totona bona ita dekenai idia noho moni bona kohu ita gaukaralaidia Dirava ena Basileia ena gaukara durua totona.—Hereva Lada-isidia 19:17; Mataio 6:33.
20. (a) Dahaka dainai Iehova bona Iesu ese ita “idia ore lasi rumadia” dekenai idia hakaudia vareai diba, bona reana unai rumadia be edeseniai? (b) Nega hanaihanai lalonai dahaka gau namodia do ita davaria?
20 Badina idia mase diba lasi dainai, Iehova Dirava bona Iesu Keriso be iseda Tura hanaihanaidia ai idia lao diba bona “idia ore lasi rumadia” dekenai ita idia hakaua vareai diba. Unai bamona do ia vara, herevana unai gabu be idia lao guba dekenai, aneru helagadia ida, eiava tanobada dekenai, do ia vara lou Paradaisona lalonai. (Luka 23:43) Unai bamona ia vara diba badina Dirava ena lalokau amo Iesu Keriso ia henia ita totona. (Ioane 3:16) Bona Iehova Dirava ese Iesu do ia gaukaralaia lao ia havaraia gaudia iboudiai dekenai gau haida do ia henidia totona, Ia sibona ena moale idauna havaraia totona. Momokani, nega hanaihanai lalonai ita be namo do ita davaria Iehova Dirava bona ena Natuna tamona sibona, iseda Lohiabada bona Hamauria Tauna, Iesu Keriso, edia pavapava siahuna henunai. Unai amo moale hanaihanai do ia vara Dirava ena ura hegeregerena edia kohu idia henia taudia iboudiai dekenai.
Inai Oi Laloatao, A?
◻ Dirava ena henia gauna hereadaena ia henia dainai dahaka kara ia karaia?
◻ Dirava ese iena Natuna ia siaia dahaka ia karaia totona?
◻ Daika be guba bona tanobada ibounai ena moale hereadae tauna, bona dahaka dainai?
◻ Edena bamona Dirava ena ura hegeregerenai gau haida idia henia taudia ese moale hanaihanai do idia abia?
[Picture on page 10]
Dirava ese iena Natuna kara dika davana henia boubou gauna ai ia halaoa totona dainai oi moale, a?
[Pictures on page 12]
Oi ese Dirava ena Basileia oi tahua guna sivarai namona oi harorolaia bona ena gaukara oi durua amo, a?