Buka Helagadia Idia Gwau “Keriso be Dirava,” A?

IESU KERISO ese taunimanima edia tomadiho karana ia haidaua momokani. Unai be momokani badina taunimanima milion milion idia gwau Iesu Keriso idia badinaia. To, edia lalohadai Iesu dekenai be idia idauidau.

Idia gwau Iesu ena hahediba herevadia idia abia dae taudia haida idia laloa Iesu be Dirava ena Natuna, to ia be Gau Ibounai Havaraia Tauna lasi. Ma haida idia laloa “Keriso be Dirava.” Idia gwau Iesu be nega ibounai ia noho bona ia be tanobada dekenai ia noho neganai ia be taunimanima ta sibona lasi. Edia lalohadai be ia maoro, a? Buka Helagadia be dahaka idia gwau?

Iesu be Tanobada ai Ia Do Mai Lasi Neganai

Iesu ia gwauraia hedinarai tanobada dekenai ia do mai lasi neganai, ia noho. Ia gwau: “Tau ta lasi guba dekenai ia daekau vadaeni, guba dekena amo ia diho Tauna sibona, Taunimanima ena Natuna unai, iena noho gabuna be guba.” (Ioane 3:13) Danu Iesu ia gwau: “Lau be mauri ena aniani, guba dekena amo lau diho, bema tau ta ese inai aniani ia ania, ia be do ia mauri hanaihanai. Lau ese do lau henia aniani be lauegu tauanina, inai dekena amo tanobada ese mauri do ia abia.”​—Ioane 6:51.

Iesu be inai tanobada dekenai ia do mai lasi neganai ia mauri noho. Unai ia hedinarai goevagoeva badina ia gwau: “Abraham ia do vara lasi neganai, lau noho vadaeni.” (John 8:​58, NW) Abraham be lagani 2018 bona 1843 B.C.E. edia padanai ia mauri noho, to Iesu be tanobada dekenai ia mauri negana be lagani 2 B.C.E. amo ia lao 33 C.E. Nega sisina ia do mase lasi neganai, Iesu ia guriguri, ia gwau: “Egu tamana e, harihari oiemu hairai dekena amo do oi hanamoa lau dekenai, tanobada ia do vara lasi neganai, oiemu vairana dekenai lau abia hairaina.”​—Ioane 17:5.

Iesu ena murinai idia raka taudia edia hereva be unai danu ia hegeregere. Aposetolo Ioane ia toretore, ia gwau: “Matamana neganai Hereva ia noho. Hereva be Dirava danu ia noho, bona unai Hereva be Dirava hegeregerena. Gau ibounai be Dirava ese ia karaia inai Hereva dekena amo. Gau ta ia vara lasi idau dala ta dekena amo, lasi momokani. Inai Hereva be taunimanima ena tauanina dekenai ia halaoa, iseda huanai ia noho. Iena hairai danu ita itaia. Inai hairai be Dirava ese ia henia, badina ia be Dirava ena Natuna tamona sibona. Bogahisihisi kara bona hereva momokani dekenai ia honu momokani.” (Ioane 1:​1, 3, 14) Oibe, “inai Hereva be taunimanima ena tauanina dekenai ia halaoa,” ia be taunimanima ta, Iesu Keriso unai.

Aposetolo Paulo ia hahedinaraia Iesu be tanobada dekenai ia do mai lasi neganai ia mauri noho, ia gwau: “Keriso Iesu ena laloa bamona umui danu do umui laloa be namo. Ia be nega ibounai Dirava bamona ia noho. Oibe, Keriso be Dirava danu ia hegeregere, to ia laloa lasi unai bamona do ia noho, sibona ena gauna. Lasi, to ia ese sibona ena ura dainai iena dagi badana ia negea, bona hesiai tauna momokani ia lao. Ia be taunimanima hegeregerena ia vara, bona taunimanima edia toana ia abia.” (Filipi 2:​5-7) Paulo ia gwau Iesu be “Dirava ese ia havaraia gauna ginigunana; badina ia dekena amo ma gau iboudiai ia havaraia.”​—Kolose 1:​13-16, NW.

Tanobada Dekenai Ia be Dirava Ta Lasi

Buka Helagadia idia hahedinaraia goevagoeva Iesu be beibi bamona ia vara neganai ia lao ena mase dekenai, ia be taunimanima sibona. Ioane ia gwau lasi Hereva be tauanina ia karaia sibona, dabua ia hahedokilaia hegeregerena. Ia be “taunimanima ena tauanina dekenai ia halaoa,” ia be taunimanima kahana bona Dirava kahana lasi. Bema Iesu be taunimanima bona nega tamona ia be Dirava, Bible ia gwau diba lasi “ia be aneru henunai ia noho.”​—Heberu 2:9; Salamo 8:​4, 5.

Iesu be tanobada dekenai ia noho neganai, bema nega tamona ia be Dirava bona taunimanima, dahaka dainai Iehova dekenai ia guriguri loulou? Paulo ia toretore, ia gwau: “Ia be tanobada dekenai ia noho neganai Iesu ese Dirava ia guriguri henia mai taitai bona mai matana ranu danu. Ia noinoi badina ia diba Dirava ese mase dekena amo ia hamauria lou diba. Bona Dirava ese Iesu ena noinoi ia abia dae, badina Iesu be sibona ena ura ia noia lasi, bona ia be Dirava henunai ia manau noho dainai.”​—Heberu 5:7.

Iesu be tanobada dekenai ia noho neganai ia be lauma tauna kahana lasi. Petro ena hereva ta ese unai ia hamomokania, ia gwau, Keriso ena “tauanina idia alaia, to lauma dekenai ia toreisi lou bona ia mauri noho.” (1 Petero 3:18) Iesu be taunimanima dainai, goevadae lasi taunimanimadia edia mamina ia diba, bona unai amo ia be mai ena hebogahisi hahelaga tauna badana ai ia lao diba. Paulo ia toretore, ia gwau: “Iseda Boubou Helaga Karaia Tauna Badana ese ita ia bogahisihisi henia diba. Badina be ia danu ese hedibagani ena mamina ia abia, ita ese ena mamina ita abia hegeregerena. To Iesu ese kara dika ta ia karaia lasi.”​—Heberu 4:15.

Iesu be “Dirava ena Mamoe Natuna . . . , ia be tanobada ena dika kokia tauna.” Unai dainai, sibona ena “mauri ia henia, taunimanima ibounai hamauria totona.” (Ioane 1:29; 1 Timoteo 2:6) Unai dala amo, Iesu be Adam ese ia negea gauna​—taunimanima maurina goevadaena bona hanaihanaina​—ia hoia lou. Dirava ena hahemaoro maoromaoro hegeregerena, ‘mauri ena davana be mauri,’ unai dainai gau badana be Iesu be taunimanima goevadaena ta, Adam be nega matamanai ia noho bamona​—Iesu be nega tamona Dirava bona taunimanima lasi.​—Deuteronomi 19:21; 1 Korinto 15:22.

Bible Siridia Edia Anina Oi Abia Kerere Lasi

Idia gwau Iesu be nega tamona Dirava bona taunimanima taudia ese Bible siridia haida idia gwauraia, badina idia ura hamomokania Iesu be Kerisendom ena Toi Tamona Diravana lalonai ia noho, bona ia be Dirava hegeregerena ena toana dekenai, ena siahu dekenai, ena hairai dekenai, bona ena mauri ena lata dekenai. To unai siri ita tahua namonamo neganai, ita davaria idia gwau “Keriso be Dirava” taudia ese unai siri ena anina idia lalohadailaia kerere.

Bible siri haida lalonai Dirava ia gwau “lau” lasi, to ia gwau “ai.” Haida idia gwau, unai ese ia hahedinaraia Iesu (Hereva) be tanobada dekenai ia do mai lasi neganai, iena siahu be Iehova ena siahu hegeregerena. To, unai hereva “ai” ia hahedinaraia lasi Iehova ia hereva henia tauna ena siahu be Iehova ena siahu hegeregerena. Reana ia hahedinaraia gauna badana be inai sibona: Guba taudia bogaragidiai, guba tauna ta ena dagi be ia bada Dirava vairanai. Momokani, tanobada dekenai ia do mai lasi neganai, Iesu be Dirava ena turana badana, ia be Gaukara Diba Momo Tauna, bona Dirava ena Hereva Halasia Tauna.​—Genese 1:26; 11:7; Hereva Lada-isidia 8:​30, 31; Ioane 1:3.

Iesu ia bapatiso neganai idia vara gaudia idia hahedinaraia lasi Dirava, Keriso, bona lauma helaga edia siahu be ia hegeregere. Iesu be taunimanima neganai bapatiso ia abia bona unai amo ia hahedinaraia ia ese sibona be iena guba Tamana ia henia iena ura karaia totona. Unai negai, “guba be ia kehoa,” bona Dirava ena lauma ia diho mai bona Iesu latanai ia helai pune ta bamona. Danu, Iehova ena gado regena be “guba dekena amo” idia kamonaia, ia gwau: “Inai be lauegu Natuna, egu lalokau, lau moale bada ia dekenai.”​—Mataio 3:​13-17.

Vadaeni, Iesu ese iena murinai idia raka taudia ia henidia herevana ena anina be dahaka, ia gwau hahediba taudia do idia habapatisodia “Tamana, Natuna, Lauma Helaga ena ladanai”? (Mataio 28:​19, 20) Iesu ia gwau lasi ia, iena Tamana, bona lauma helaga edia siahu be hegeregere, bona ena hereva ena anina be unai bamona lasi. To, bapatiso idia abia taudia idia abia dae, Iehova be Mauri Henia Tauna bona Siahu Ibounai Diravana, bona ia dekenai edia mauri idia gwauhamatalaia. Idia abia dae Iesu be Mesia bona ia ena amo Dirava ese mauri davana ia henia abidadama tanobada taudia ia durua totona. Bona idia abia dae lauma helaga be Dirava ena gaukara siahuna, bona ia henunai idia noho be gau badana. To, namo lasi idia ura bapatiso taudia idia laloa Iehova, Iesu, bona lauma helaga be Toi Tamona diravana lalonai idia noho.

To Iesu ena hoa karadia idia hahedinaraia ia be nega tamona Dirava bona taunimanima ta, a? Lasi, badina Mose, Elia, Elisaia, aposetolo taudia Petro bona Paulo, bona ma taunimanima haida ese hoa karadia idia karaia, to idia be nega tamona Dirava bona taunimanima lasi. (Esodo 14:​15-31; 1 Hanua Pavapavadia 18:​18-40; 2 Hanua Pavapavadia 4:​17-37; Kara 9:​36-42; 19:​11, 12) Idia hegeregerena, Iesu be taunimanima ta bona Dirava ese ia henia siahuna amo ia ese hoa karadia ia karaia.​—Luka 11:​14-19.

Isaia be ena peroveta herevana amo Mesia Iesu ia herevalaia neganai, ia gwau ia be “Siahu Bada Diravana.” (Isaia 9:6) Isaia 10:​21 lalonai, unai peroveta tauna Isaia ia gwau Iehova be “Siahu Bada Diravana.” Haida idia gwau, unai siri rua edia hereva be tamona dainai ia hamomokania Iesu be Dirava. To, namona be ita naria namonamo, unai siri edia anina ita lalohadailaia kerere garina. Heberu gado herevana ta be Motu gado ai idia hahanaia “Siahu Badana Diravana.” Unai hereva ese Iehova o ma haida ia gwauraia diba, to “Siahu Ibounai Diravana” ese Iehova sibona ia gwauraia diba, ma ta ia gwauraia diba lasi. (Genese 17:1) Momokani, ta be mai ena siahu bada neganai unai be idau, bona ta be mai ena siahu ibounai neganai unai be ma ia idau; siahu ibounai ia abia tauna ena biaguna ta be lasi.

Isaia 43:​10 lalonai, Iehova ia gwau: “Dirava ta ese lau ia gunalaia lasi, bona lau murinai danu Dirava ta ia hedinarai lasi.” To unai hereva idia hamomokania lasi Iesu be Dirava. Edia anina be ma dirava ta ia noho guna lasi; Iehova ia noho guna badina Iehova ia noho hanaihanai. Iehova murinai Dirava ta do ia vara lasi badina do ia noho ela bona hanaihanai, bona ia be Atai Herea Lohiabadana dainai, iena gabu do idia abia diba taudia be lasi. To, Iehova ese ia havaraia taudia haida ia gwauraia neganai, ia gwau idia be dirava. Buka Helagadia ese unai idia hahedinaraia inai bamona tanobada taudia haida ia herevalaidia neganai: “Lau sibona lau hereva, ‘Umui be dirava, bona umui ibounai be Atai Herea Tauna ena natudia. To momokani, taunimanima hegeregeredia do umui mase; bona pavapava ena natuna ta bamona do umui moru!’ ” (Salamo 82:​6, 7) Unai hegeregerena, Hereva be Iehova ese ia havaraia diravana ta, to namo lasi ita gwau unai badina dainai, nega ta ai, Iesu be Siahu Ibounai Diravana danu ia hegeregere.

Iesu Ena Gabu Korikorina

Haida idia gwau Dirava be nega tamona Dirava bona taunimanima ai ia lao bona tanobada tauna ta bamona ia noho. To namona be unai bamona idia lalohadai taudia idia laloatao, Bible ia hahedinaraia lasi Iesu ese ia sibona be unai bamona ia laloa, lasi momokani. To nega ibounai ia hahedinaraia hanaihanai Iesu be iena Tamana ena siahu henunai ia noho. Ia be tanobada dekenai ia noho neganai, Iesu ia gwau lasi ia be Dirava, to ia gwau ia be Dirava ena Natuna. Danu, Keriso ia gwau: “Egu Tamana ese lau ia hanaia.”​—Ioane 14:28.

Paulo ia hahedinaraia Iehova be idau bona Iesu be ma ia idau, ia gwau: “Ita be mai iseda Dirava tamona, ia be Tamana, gau ibounai ia dekena amo idia vara. Ia dainai ita mauri noho. Bona Lohiabada danu be tamona, Iesu Keriso. Ia ese gau ibounai ia karaia. Ia ese mauri ita dekenai ia henia noho.” (1 Korinto 8:6) Danu, Paulo ia gwau: “Umui be Keriso ena, Keriso danu be Dirava ena.” (1 Korinto 3:​23) Momokani, Keristen taudia be edia Biaguna, Iesu Keriso, ena; unai hegeregerena, Iesu be iena Kwarana Tauna, Iehova Dirava, ena.

Unai hegeregerena, Paulo ia gwau: “Tatau ibounai edia kwarana be Keriso, hahine edia kwarana be edia tau, bona Keriso ena kwarana be Dirava.” (1 Korinto 11:3) Vaira neganai danu Dirava bona Keriso be unai bamona do idia noho, badina Iesu ena Lagani 1,000 Lohia Negana murinai, ia “ese Dirava ena Basileia Tamana Dirava ena imana dekenai do ia atoa” bona “Natuna ese sibona Dirava henunai do ia atoa. Oibe, Dirava, gau ibounai Keriso henunai ia atoa Diravana, be unai neganai gau ibounai edia biaguna momokani do ia lao.”​—1 Korinto 15:​24, 28; Apokalupo 20:6.

Ma Bible Siridia Haida Edia Hereva

Mataio ese Iesu ena vara dalana tanobada dekenai ia herevalaia neganai, ia torea, ia gwau: “Inai kara ibounai idia vara, Lohiabada ese peroveta tauna ena uduna dekena amo [Isaia 7:14 dekenai] ia gwauraia herevana hamomokania totona. Ia gwau, ‘Umui kamonai, tau ia diba lasi kekeni ese ena natuna do ia abia, mero ta. Iena ladana do idia hatoa, Emanuela.’ Emanuela ena anina be, ‘Dirava ita dekenai ia noho.’ ” (Mataio 1:​22, 23) Iesu ena ladana idia hatoa Emanuela lasi, to ia be tanobada tauna neganai, ena gaukara be unai ladana ena anina hegeregerena. Ia be Mesia Garana bona David ena terona abia Tauna dainai, Iesu be tanobada dekenai ia noho neganai, unai ese Iehova idia tomadiho henia taudia dekenai ia hamomokania Dirava be idia danu ia noho, ia be edia kahana dekenai ia gini, bona edia gaukara ia durua.​—Genese 28:15; Esodo 3:​11, 12; Iosua 1:​5, 9; Salamo 46:​5-7; Ieremia 1:19.

Iesu ia toreisi lou murinai, aposetolo Toma ia boiboi henia, ia gwau: “Egu Lohiabada! Egu Dirava!” (Ioane 20:28) Unai sivarai bona ma sivarai haida danu idia torea ena badina be, “[ita] ese do [ita] abia dae Iesu be Keriso, Dirava ena Natuna.” Bona Toma ese Iesu ena hereva ia hakoikoia lasi. Iesu ese inai hereva be Iena hahediba taudia dekenai ia siaia: “Egu Tamana bona emui Tamana, egu Dirava bona emui Dirava dekenai do lau daekau.” (Ioane 20:​17, 30, 31) Unai dainai Toma ia laloa lasi Iesu be Siahu Ibounai Diravana. Reana Toma ese Iesu ia hereva henia neganai ia gwau “egu Dirava” badina ia diba Keriso be “Dirava hegeregerena,” to ia be “Dirava momokani tamona” lasi. (Ioane 1:1; 17:​1-3) Eiava, reana Toma ia gwau “egu Dirava” badina ia abia dae Iesu be Dirava ena Hereva Halasia Tauna bona ia be Dirava ese Ia Siaia Tauna; unai hegeregerena, ma taunimanima haida ese aneru gwaukau tauna idia hereva henia hegeregere ia be Iehova bamona.​—Genese 18:​1-5, 22-33; 31:​11-13; 32:​24-30; Hahemaoro Taudia 2:​1-5; 6:​11-15; 13:​20-22 itaia danu.

Vadaeni, Bible ena hereva be inai: Iesu be tanobada dekenai ia do mai lasi neganai ia noho, ia be Hereva. Tanobada dekenai ia noho neganai, ia be nega tamona Dirava bona taunimanima lasi. Ia be taunimanima sibona, to ia goevadae, nega matamanai Adam ia goevadae hegeregerena. Iesu ia toreisi lou murinai, dagi bada herea ia abia, bona ia be mase diba lasi lauma tauna, to hanaihanai ia be Dirava ena siahu henunai ia noho. Unai dainai, ia hedinarai goevagoeva, Buka Helagadia idia gwau lasi “Keriso be Dirava.”

[Box on page 23]

Aneru ese Iesu Idia Tomadiho Henia, A?

BIBLE HAIDA lalonai Heberu 1:6 dekenai ia gwau: “Dirava ena aneru iboudiai ese ia [Iesu] idia tomadiho henia be namo.” (King James Version; The Jerusalem Bible) Toana be aposetolo Paulo ese Septuagint Bible ena hereva ia gwauraia lou, Salamo 97:7 dekenai ia gwau: “Umui Iena aneru iboudiai, [Dirava] umui tomadiho henia.”​—C. Thomson.

Heberu 1:6 dekenai, Greek gado herevana (pro·sky·neʹo) be Motu gado ai idia hahanaia “tomadiho.” Septuagint Bible lalonai unai Greek gado herevana be Salamo 97:7 dekenai idia torea, Heberu gado herevana sha·hhahʹ idia hahanaia neganai; unai Heberu gado herevana ena anina be “kwarana hadihoa.” Tanobada taudia hemataurai henidia totona unai kara idia karaia be kerere lasi. (Genese 23:7; 1 Samuel 24:8; 2 Hanua Pavapavadia 2:15) Eiava unai hereva ena anina ese Dirava momokanina idia tomadiho henia diba eiava Dirava koikoidia dekenai tomadiho kererena idia henia diba.​—Esodo 23:24; 24:1; 34:14; Deuteronomi 8:19.

Nega momo, pro·sky·neʹo be Iesu dekenai idia henia neganai, ia be hegeregere king taudia eiava ma taunimanima haida dekenai taunimanima idia hanamoa karaia bamona, hemataurai idia henidia totona. (Mataio 2:​2, 8; 8:2; 9:18; 15:25; 20:20 be inai siri danu oi hahegeregerea: 1 Samuel 25:​23, 24; 2 Samuel 14:​4-7; 1 Hanua Pavapavadia 1:16; 2 Hanua Pavapavadia 4:​36, 37.) Nega momo ia hedinarai goevagoeva, taunimanima be Iesu dekenai idia hanamoa karaia ena badina be ia be Dirava dainai lasi, to ena badina korikorina be ia be “Dirava ena Natuna” o Mesia “Taunimanima ena Natuna” dainai.​—Mataio 14:​32, 33; Luka 24:​50-52; Ioane 9:​35, 38.

Heberu 1:6 ia herevalaia gauna be, Iesu be Dirava ena siahu henunai ia noho. (Filipi 2:​9-11) Bible haida ese unai siri lalonai pro·sky·neʹo inai bamona idia hahanaia: “hemataurai . . . henia” (The New English Bible), “hanamoa karaia” (New World Translation), o “kwarana hadihoa” (An American Translation). Bema ta ia ura unai hereva ia hahanaia “tomadiho,” unai tomadiho be Dirava ita henia gauna lasi; unai hegeregerena, Iesu ese Satana ia hamaoroa, ia gwau: “Lohiabada oiemu Dirava do oi tomadiho henia, [unai hereva be pro·sky·neʹo amo idia abia] ia sibona dekenai hesiai gaukara do oi karaia.”​—Mataio 4:​8-10.

Salamo 97:​7 ese Dirava tomadiho henia karana ia herevalaia. Ena be Heberu 1:​6 dekenai Paulo ese unai siri ia gaukaralaia Keriso ia herevalaia totona, to guna ia hahedinaraia vadaeni, Iesu ia toreisi lou murinai, ia be “Dirava ena hairaina ena diari, bona iena toana be Dirava ena toana hegeregerena momokani.” (Heberu 1:​1-3) Unai dainai bema aneru ese “tomadiho” be Dirava ena Natuna idia henia, unai be Dirava idia henia gauna hegeregerena lasi, bona unai tomadiho be Iesu dekena amo Iehova dekenai idia henia.