Dirava ese Ia Henia Mauri Namona Edia Ura Henia Taudai Danu Idia Hebou

IEHOVA ENA WITNESS TAUDIA be dala idauidau dekenai idia idau. Idia mo sibodia be “gado goevadaena” idia herevalaia. (Sefania 3:9) Idia mo sibodia idia lalo-tamona, bona Iesu Keriso ese ia herevalaia lalokauna idia abia dainai idia idau. (Ioane 13:35) Idia mo sibodia ese Iesu Keriso ia gwauraia mauri namona idia abia. Ioane 8:32 dekenai, ia gwau: “Hereva momokani be do umui diba, bona hereva momokani ese umui do ia ruhaia.”

Iesu Keriso, Dirava ena Natuna, ese ena hahediba taudia dekenai unai hereva ia gwauraia, bona unai hereva ia guguru. Bona “Mauri Namona Idia Ura Henia Taudia” Distrik Hebouheboudia dekenai idia lao Iehova ena Witness taudia iboudiai be unai hereva dainai idia moale. Hebouhebou ena program ese mauri namona ena kahana idauidau idia hahedinaraia idia diba namonamo totona, hegeregere, edena bamona do idia gaukaralaia diba, unai mauri namona abia ena maduna be dahaka, bona idia be mauri namona abia besena dainai hahenamo momo idia davaria.

Unai hebouheboudia idia matamaia Los Angeles, California, U.S.A. dekenai, June 7, 1991 ai, bona heduru hereva namodia be nega korikori dekenai idia halasia. Miusik amo program idia kehoa 10:20 daba kahanai, bena murinai ane idia abia bona guriguri idia karaia. Idia henia hereva ginigunana be Iakobo 1:25 dekena amo bona ia be sisiba aukana. The Jerusalem Bible dekenai unai siri ia gwau: “Mauri namona ena taravatu goevadaena ia laloa noho bona ia badinaia noho tauna​—ia be kamonai bena laloaboio tauna lasi, to ia kamonai herevana ia badinaia tauna​—be ena kara ibounai dekenai do ia moale.” Ita be hevarivari dekenai ita itaia iseda toana ita hanamoa totona, unai hegeregerena, namona be Dirava ia gwauraia mauri namona ena taravatu goevadaena dekenai ita raraia hanaihanai badina ita ura iseda mauri toana ita hanamoa. Namona be unai hevarivari bamona gauna dekenai ita raraia hanaihanai.

Murina hereva be seamani ena hereva, ena ladana be “Mauri Namona Umui Ura Henia Taudia Ibounai e, Namo.” Iehova ena Witness taudia be mauri namona idia ura henia bada, bona idia ura unai mauri namona idia dogoatao noho. Hereva henia tauna ese siahu taudia edia hereva ia gwauraia, idia gwau bema taravatu be lasi, mauri namona do ita abia diba lasi. Oibe, Keristen taudia be sibodia edia ura mo idia karaia lasi, to edia mauri namona idia gaukaralaia namonamo, idia ura lasi idia gaukaralaia kerere. Lagani 1919 amo, Iehova ena Witness taudia be mai edia dala edia mauri namona idia gaukaralaia bada totona. Hereva henia tauna ese hebouhebou gunadia edia hereva badadia bona Keristen bukadia edia ladana ia gwauraidia hedinarai, badina idia lalodiai mauri namona ena anina bada idia hahedinaraia. Hebouhebou dekenai idia lao taudia iboudiai ese edia diba Dirava ia henia mauri namona dekenai do idia habadaia bona gaukaralaia dalana do idia diba danu.

Unai heduru hereva namodia murinai, mauri namona idia ura henia bona hebouhebou idia moalelaia taudia haida idia henanadai henidia. Hebouhebou negadia be moale negadia, guna idau negai Israel taudia be lagani tamona lalonai nega toi hebouhebou idia karaia bona idia moale bada herea hegeregerena. Taunimanima haida idia henanadai henidia karana ese ia hamomokania hebouhebou negadia be lauma dalanai ita idia hagoadaia moale negadia.

Murinai hebouhebou ena hereva kwarana idia henia, ena ladana be “Dirava ese Ita Ia Henia Mauri Namona Ena Badina bona Ita Gaukaralaia Dalana.” Unai hereva amo hebouhebou taudia idia diba Iehova sibona be ia ruhaia momokani, badina ia be Siahu Ibounai Diravana bona ta ese iena siahu ia hanaia lasi. To, iena ladana hanamoa totona bona ia havaraia taudia ese namo do idia davaria totona, nega haida ia ese sibona ena ura haida ia koua; unai ia karaia ena badu haraga lasi karana bona ena haheauka karana amo. Dirava ia havaraia aonega mauridia iboudiai be sibodia edia ura ibounai idia karaia diba lasi, badina idia be Iehova henunai idia noho bona tanobada totona ia henia taravatuna bona ia gwauraia mauri taravatudia idia badinaia be gau badana. Iehova ese mauri namona idia ia henia do idia moale totona, to unai sibona lasi, ia ura idia tomadiho henia karana amo ia do idia hanamoa bona idia hamoalea danu. Idia abia mauri namona idia gaukaralaia namonamo dainai, taunimanima idia diba Iehova ena Witness taudia edia kara be idia namo bona edia haroro gaukara idia goadalaia.

Friday Adorahi

Friday adorahi kehoa totona, lalona veria hereva ta ena ladana be “Oi Bisi Mase Karadia Dekenai Eiava Oi Bisi Iehova Ena Hesiai Gaukara Dekenai?” Mase havaraia karadia be tauanina gaudia sibona lasi, to lauma dalanai idia mase karadia, hekokoroku karadia, bona huahua lasi karadia danu​—hegeregere, moni momo tahua karadia. Unai neganai, ita sibona eda kara ita tahua be namo badina ita ura diba iseda mauri lalonai Basileia ita tahua guna eiava lasi.

Murinai idia henia herevana ena anina be unai sivarai bamona danu, ena ladana be “Dirava ese Ita Ia Henia Hesiai Gaukarana Ita Hagugurua.” Inai hereva ia henia tauna ia hahedinaraia, namo lasi Keristen taudia be gaukara sisina mo idia karaia, eiava idia gaukara, hora haida do idia ripotilaia totona. To namona be idia ura edia Keristen haroro gaukara ibounai do idia karaia namonamo. Haheitalai bona henanadai dekena amo hebou taudia be sisiba aukana amo idia hagoadaia. Tadikaka iboudiai ia hagoadaia edia haroro gaukara do idia hagugurua momokani totona.

Hereva ta ladana “Mauri Namona Besena to Mai Edia Maduna” lalonai, hereva ia henia tauna ia hahedinaraia ena be Iehova ena taunimanima idia moale hereva momokani ese idia ia ruhaia dainai, to namona be idia laloatao idia be mai edia maduna danu. Namona be idia abia mauri namona idia gaukaralaia kerere lasi, to idia gaukaralaia Iehova ena ladana hanamoa totona. Idia be Keristen taudia dainai, idia be mai edia maduna “gavamani” ena hereva idia kamonai henia totona bona kongregesen ena elda taudia danu idia gaukara hebou totona. (Roma 13:1) Danu, idia be mai edia maduna edia dabua, edia heduari, bona edia kara do idia namo totona. Namona be idia laloaboio lasi “ita ibounai ta ta iseda kara Dirava vairana dekenai do ita hedinaraia.”​—Roma 14:12; 1 Petero 2:16.

Murinai idia kikilaia hereva ena ladana be “Tanobada Dokona Ia Mai Kahirakahira Dainai Umui Gari Lasi.” Taunimanima be dina vairai dekenai dahaka do ia vara idia gari henia, to namona be Keristen taudia be gari lasi dekenai edia haroro gaukara do idia karaia. Idia gari lasi totona gau badana be Iehova dekenai idia abidadama, badina bema Keristen tauna be Dirava habadua garina ia gari, ia ese taunimanima garina do ia gari bada lasi. Bema taunimanima ta ese Bible ena siri haida ena lalona dekenai ia laloatao, unai ese ia do ia hagoadaia bena do ia durua do ia gari lasi totona. Lauma dalanai do idia goada totona bona idia gari lasi totona, namona be Dirava ena hesiai taudia be hanaihanai dala idia tahua abidadama tamona taudia idia bamodia totona. Danu, namona be idia ta ta ibounai idia laloatao guriguri be gau badana idia gari lasi totona. Gari lasi dekenai idia noho neganai, Keristen taudia be Iehova Dirava danu do idia hetura namonamo diba.

Dina ginigunana ena program idia hadokoa totona drama idia karaia, ena ladana be Idia Ruhaia Tomadiho Momokanina Idia Habadaia Totona. Ia hahedinaraia hari inai nega ruma besena ta ese Esera bona ena tuari taudia 7,000 edia sivarai amo sisiba idia abia, idia be gau ta idia reaia Ierusalem dekenai do idia giroa lao totona. Unai drama ese hebouhebou taudia ta ta iboudiai ia durudia sibodia edia kara idia tahua bona edia hesiai gaukara do idia habadaia dalana idia diba totona. Unai drama ese buruka taudia bona matamata taudia ia durudia.

Saturday Dabai

Miusik idia karaia, ane, bona guriguri idia abia, bona dina ena Bible siri idia kikilaia murinai, Saturday dabai ena program lalonai hereva toi idia karaia, unai hereva toi edia kwarana herevana be “Mauri Namona Abia Taudia Edia Maduna Ruma Bese Lalonai.” Ena kahana ginigunana lalonai, ena hereva ladana, “Tamadia be Iehova Ena Kara Idia Tohotohoa Dalana” ese tamadia ia sisiba henidia dahaka dala idauidau ai iseda guba Tamana idia tohotohoa diba. Timoteo Ginigunana 5:8 ia gwau namona be lauma dalanai edia ruma bese idia naridia danu, tauanina dalanai sibona lasi. Idia ese Iehova idia tohotohoa totona edia ruma bese idia hadibadia namonamo, bona nega ta ta ai lalokau dalanai sisiba idia henidia danu. Tadikaka haida idia hereva henidia unai hereva hamomokanidia totona.

“Hahine ese Ena Tau Ia Durua Dalana” be unai hereva toi ena hereva iharuana. Ia gwau tau ena adavana be Keristen ruma bese lalonai dagi namona ia abia, ruma bese ia durudia namonamo dainai. Unai bamona ia karaia neganai dahaka ia karaia be namo? Namona be ia manau, bona ia ese sibona ena ura mo karaia totona ena adavana ia doria karana ia karaia lasi. Namona be ena adavana bona natuna ia naridia namonamo, bona ena ruma ia hagoevaia bona ruma ena toana namona amo moale bada ia davaria. Ia be Keristen hesiai tauna dainai, haroro gaukara ena dala momo ia davaria diba. Inai hereva lalonai idia ese ruma bese ta idia hereva henidia unai Bible ena aonega sisibana idia hamomokania totona.

Hereva ta ladana “Idia Hakala bona Diba Idia Abia Natudia” lalonai, memero bona kekeni ese sisiba namona idia abia. Bema natudia idia hadibadia idia kamonai bona idia diba totona, tama bona sina ese Iehova idia hanamoa bona edia Keristen tadikaka bona sibodia edia natudia idia lalokau henidia. Bema tama sina bona natudia be mai edia aonega danu idia herevahereva hebou, do idia noho goada hebou diba danu. Namona be tama sina ese edia natudia edia henanadai idia haerelaidia diba, bona idia durudia diba idia ura tahua totona. Unai hereva lalonai danu tadikaka haida idia henanadai henidia hereva ena anina hamomokania totona.

Murinai sisiba herevana namona ta idia kamonai, ladana be “Iehova Hesiai Henia Totona Oiemu Dala Oi Kehoa Noho.” Edena bamona unai kara ita karaia? Tanobada ena dagi badadia tahua karana, sibona eda gadara moale karadia, bona moni bona kohu tahua momo karadia amo ita gini siri. Iesu bona aposetolo Paulo ese edia haheitalai amo ita idia durua ita sibona eda ura mo ita tahua lasi totona. Iehova ena taunimanima be edia matana idia naria namonamo, Basileia ena gaukara sibona idia raraia totona. Bema tanobada ena kohu ta ita tahua neganai, namona be moni ita gogoa guna, gabeai unai gauna ita hoia, namo lasi ita abitorehai unai gau hoia totona. Mero bona kekeni badadia ese edia lalona idia naria namonamo, idau mahuta hebou moalena bona tanobada dagi badadia moalena idia laloa momo garina. Ia headava lasi pioneer tauna ta idia henanadai henia neganai, ia hedinarai hahenamo momo ia abia, tauanina gaudia ia laloa momo lasi bona Iehova ena hesiai gaukara ia karaia neganai.

Saturday dabai ena hereva iboudiai ena hereva dokona be “Gwauhamata bona Bapatiso amo Mauri Namona Lalonai Oi Vareai.” Bapatiso idia abia gwauraia taudia iboudiai idia hamaorodia ena be tanobada taudia iboudiai be hesiai dikana lalonai idia vareai Adam ia gwau-edeede neganai, to Hamauria Tauna badana, Iesu Keriso, ese mauri namona abia lou dalana ia kehoa, ena mauri bouboulaia karana amo. Hereva ia karaia tauna ese Dirava ena ura karaia totona taunimanima idia gini siri karana ena anina ia gwauraia hedinarai, bona idia bapatiso taudia edia maduna bona edia hahenamo ia gwauraidia danu.

Saturday Adorahi

Saturday adorahi ena hereva ginigunana ese iseda lalona ia tahua henanadai badana ta ia gwauraia, henanadai be “Daika Ena Namo Oi Tahua?” Inai tanobada be sibona ena ura ia tahua tauna Diabolo ena lalohadai ia hahedinaraia. To, Keristen taudia ese Iesu Keriso ena lalohadai idia tohotohoa, sibona ena ura tahua momo lasi lalohadaina unai. Iesu be haheitalai namo herea! Ia ese guba ena hairai dagina ia rakatania bona sibona ena mauri ia bouboulaia ita totona. Keristen tadikaka be edia bisinesi karadia lalonai tadikaka danu idia hekwakwanai eiava idia heai sisina neganai, sibodia edia ura karana idia karaia eiava lasi ia tohoa unai. Unai hekwakwanai ese iseda Keristen lalokau idia tohoa. To ta ese ma ta ena namo ia tahua neganai, henia karana ena moale bada ia davaria, bona Iehova ese ia do ia hanamoa.

Murinai, hereva kwarana ia badinaia bamona, hereva ta ladana “Lauma Gaudia Dekenai Ita Manoka Gaudia Edia Toana Ita Itaia bona Hanaia Dalana.” Inai hereva ese lauma manoka ena toana ginigunadia ita itaia dalana bona Satana bona ia atoa hekwakwanai gaudia ita hanaia dalana ia gwauraia namonamo. Iehova ena hesiai taudia ese ia idia lalokau henia bada be namo, bona dika idia ura lasi momokani danu. Unai bamona idia karaia totona namona be idia hegaegae namonamo bona Bible idia stadilaia namonamo idia sibodia bona edia ruma bese taudia ida, Iehova idia diba totona. Dala maorona be idia ese dagedage bona matabodaga buka bona televisen laulaudia mirodia idia raraia lasi. (Efeso 5:​3-5) Guriguri hanaihanai bona hebouhebou lao henia hanaihanai karadia ese lauma manokana do idia kokia diba.

Reana, hebouhebou ai idia herevalaia momo herevana ta be, “Headava ese Ita Do Ia Hamoalea, A?” Memero bona kekeni badadia momo be unai bamona idia laloa! To, hereva ia karaia tauna ia hahedinaraia ita duahia diba lasi kamonai lauma anerudia idia moale ena be idia headava lasi, hegeregerena idia gwauhamata Keristen taudia momo, ena be idia headava lasi to idia moale bada herea bamona. Danu, headava taudia momo be idia moale lasi, bona momo be edia headava idia hadokoa. Ita ta ta ibounai ese gwauhamata Keristen taudia idia davaria hahenamo gaudia iboudiai ita lalodia neganai, ita diba, headava, ena be nega haida moale ia mailaia, to ia be moale ena badina korikorina lasi.

Unai hereva murinai, idia ese hereva toi idia kamonai, edia hereva kwarana be “Keristen Mauri Namona Hari Iseda Nega Lalonai.” Unai hereva ginigunana ia karaia tauna ena hereva ena ladana be “Iseda Keristen Mauri Namona Ena Kahana Ta Ta.” Kahana haida be tomadiho koikoi edia hahediba amo hereva momokani ese ita ia ruhaia, hegeregerena Toi Tamona, taunimanima idia mase neganai edia laulauna ia mauri hanaihanai, bona hisihisi ania hanaihanai gabuna hahediba herevadia bamona. Hereva momokani ese kara dika ena hesiai gaukara dikana amo ita ia ruhaia danu. Ena be Keristen taudia be idia goevadae lasi, to idia ese kara dika momo amo idia gini siri, hegeregerena kuku ania karana, laki bona moni abia totona kasi gadaralaia karana, inuinu kekero karana, bona sihari kava bona heudahanai karadia bamona. Bona hereva momokani ese daradoko amo ia ruhadia, badina gabeai ia mai Paradaisona idia laloa momo bona ma haida dekenai idia herevalaia dainai.

Unai hereva murinai ia hereva tauna ena hereva ena ladana be “Unai Bamona Mauri Namona Oi Laloa Bada, A?” Gau ta oi ura henia bada anina be oi lalokau henia, oi ubua bona oi naria namonamo. Unai bamona ia karaia totona, namona be Dirava ena hesiai tauna be sibona ena lalona ia dogoatao, idau Keristen ena mauri namona ena hetoana ia hanaia garina. Inai tanobada ena mauri namona be koikoi gauna, badina ena dokonai mase bona tauani dika ena hesiai gaukarana ia havaraia.

Unai hereva toi ena hereva dokonai ia karaia tauna be “Mauri Namona Idia Ura Henia Taudia Idia Gini Goada” ena sivarai ia gwauraia. Unai bamona idia karaia totona unai taudia be edia guba tamana bona sinana badibadinai idia noho, Iehova bona ena adavana bamona oreana unai. Iehova ena taunimanima be orea idia rakatania taudia edia hereva koikoidia idia kamonai henidia lasi; mai edia matabodaga karadia amo idia veridia toho taudia idia dadaraidia. Dirava ena mauri namona dekenai idia gini goada totona, Keristen taudia be “lauma dalanai idia raka.”​—Galatia 5:25, NW.

Unai dina ena hereva ginigabena be hereva namona mai moalena. Ena ladana be “Tau Hereadaena.” Iesu Keriso be unai tau hereadaena, badina ia ese tanobada taudia iboudiai edia mauri ia haidaua bada, to tanobada ena ami, nevi, gavamani, bona pavapava be taunimanima iboudiai edia mauri idia haidaua maragi bamona. Ia be Dirava ena Natuna, guna guba dekenai ia noho, murinai tanobada dekenai ia mai. Iesu ese ena hereva bona ena hahediba lalonai ena guba Tamana ia tohotohoa namo herea dainai, inai bamona ia hereva diba, ia gwau: “Lau ia itaia tauna ese egu Tamana danu ia itaia.” (Ioane 14:9) Iesu ese hereva ta ia hahedinaraia namo herea, unai hereva be “Dirava be lalokau”! (1 Ioane 4:8) Iesu ena kara ia herevalaia namonamo murinai, hereva ia karaia tauna ese November 1, 1985 amo, Gima Kohorona dekenai idia karaia vadaeni herevadia, ladadia “Iesu ena Mauri bona Gaukara” ia gwauraidia. Badina tadikaka momo idia ura dainai, Society ese buka matamatana ta ladana Tau Hereadaena hari hebou dekenai idia halasia. Ia be mai ena karoa 133 bona mai ena kala laulaudia momo. Gima Kohorona dekenai idia torea herevadia iboudiai idia atoa, bona idia senisia sisina, unai buka ena rau 448 lalodiai. Momokani, hebouhebou ena dina iharuana be mai ena moale danu idia hadokoa!

Sunday Dabai

Sunday dabai hereva toi idia karaia, edia hereva kwarana be “Taunimanima Haoda Henia Gaukarana.” Hereva ta ladana “Gwarume Momokani bona Laulau Dalanai Abia” ese murinai do idia herevalaia herevadia edia badina ia atoa. Hereva ia karaia tauna ia gwau, Iesu ese hoa dalanai gwarume ia abidia negana murinai, ia ese unai haoda taudia ia hamaorodia namona be taunimanima haoda henia gaukarana do idia karaia. Nega sisina lalonai, Iesu ese ena hahediba taudia ia hadibadia taunimanima idia haoda henia totona, bona Pentekoste Dinana, lagani 33 C.E. negana amo idia ese tatau bona hahine momo idia durudia hahediba gaukarana idia karaia totona.

Murinai ia hereva tauna ese reke parabolena, Mataio 13:​47-50 ese ia sivarailaia gauna, ia herevalaia. Ia gwau unai haheitalai rekena lalonai horoa Keristen taudia bona Kerisendom taudia iboudiai idia noho hebou bamona. Kerisendom taudia idia noho dainai Bible hahanaia, Bible karaia bona Bible hariharilaia gaukaradia idia noho, to unai gaukara ese gwarume dikadia momo danu ia veridia unai reke lalonai. Lagani 1919 amo ia mai hari, taunimanima hapararaia gaukarana ia bada ia lao, bona gwarume dikadia idia negedia, bona gwarume namodia be bosea bamona kongregesen lalodiai idia haboudia noho, unai kongregesen lalodiai Keristen momokanidia be idia naridia, dika idia davaria lasi totona bona Dirava ena hesiai gaukara idia karaia totona.

Hereva ihatoina, ladana be “Tanobada Ibounai Dekenai Taunimanima Haoda Henia,” lalonai ia gwau gwauhamata Keristen taudia iboudiai edia maduna be tanobada ibounai dekenai haoda gaukara idia karaia. Harihari tadikaka 4,000,000 bona ma haida ese unai gaukara idia karaia tanobada 200 bona ma haida lalodiai, bona hari inai lagani gunadia haida lalodiai, lagani ta ta iboudiai 230,000, 230,000 bamona idia bapatiso. Inai hereva ese Iehova ena Witness taudia iboudiai ia sisiba henidia edia haoda gaukarana idia hanamoa totona, bona “haoda taudia” namodia haida idia henanadai henidia.

Murina herevana, ladana “Ita Noga Noho ‘Nega Dokona Lalonai’ ” ia herevalaia tauna ese gau 7 ia gwauraidia, unai gaudia ese Dirava ena taunimanima idia durua idia noga noho totona. Gaudia be inai: iseda nega idia henaoa gaudia ita dadaraia, ita guriguri, inai nega dokona ena sivarai ita harorolaia, Iehova ena orea ita badinaia namonamo, ita sibona eda kara ita tahua, idia guguru peroveta herevadia ita lalodia namonamo, bona iseda hahemauri be ia kahirakahira ia mai ita laloa danu.

Daba ena hereva dokona be “Daika be ‘Hekwakwanai Negana’ amo Do Ia Roho Mauri?” Hereva ia karaia tauna ese Ioel ena peroveta herevana ena anina ia gwauraia, bona ia gwau ena anina ta be aposetolo edia negai ia guguru, to ena anina badana be hari inai negai ia guguru noho, bona ita eda vairana kahanai ena anina do ia guguru vaitani.

Sunday Adorahi

Adorahi kahana herevadia edia hereva ginigunana be pablik tok, ena ladana be “Dirava Ia Havaraia Tanobada Matamatana Mai Ena Mauri Namona Ita Hanamoa!” Unai hereva ese hebou ena hereva kwarana, mauri namona, ma ia gwauraia namonamo. Ia gwau Dirava ena Hereva lalonai ia peroveta tanobada matamatana ta do ia vara, bona unuseniai tomadiho koikoi, politik karana, bisinesi karana bona kopi idau dadaraia karana edia metau do idia noho lasi. Danu, taunimanima ese kara dika bona mase do idia davaria lasi. Tanobada paradaisona lalonai mai edia moale danu do idia mauri hanaihanai totona taunimanima ese tauanina goevadaedia do idia abia danu. Unai amo, kara maoromaoro idia ura henia taudia be unai nega matamatana do ia havaraia Tauna do idia hanamoa, do idia gwau: “Tanikiu, Iehova, ai ese mauri namona momokani ai abia vadaeni dainai!”

Pablik tok murinai distrik hebou edia gau matamatana ta idia karaia​—Gima Kohorona ena stadi ena hereva idia herevalaia. Ma murinai hebou idia koua hereva goadana ta amo, unai hereva ena ladana be “Mauri Namona Ura Henia Taudia e, Umui Goada Noho.” Ia herevalaia tauna ese hebou ena hereva kwarana, mauri namona, ena hereva badadia ia gwauraidia lou. Ia gwau Iehova ena taunimanima be idia moale bada edia mauri namona dainai, bona Keristen taudia be lauma dalanai idia tubu daladia haida ia gwauraidia, ma ia sisiba henidia namona be mai lalo-tamona ida do idia goada noho bena ma hahenamo haida do idia davaria. Ena hereva dokonai ia gwau: “Unai bamona ita karaia neganai, namona be Iehova ese ita ibounai do ia hanamoa noho, bena unai neganai mauri namona ura henia taudia goadadia ai do ita lao noho.”

“Dirava ese ia karaia gaudia be mauri anina lasi idia davaria, sibodia edia ura dainai lasi, to Dirava ena ura dainai. To dala namona ta Dirava ese ia laloa. Dirava ese dina ta iena karaia gaudia be do ia ruhaidia dika ena bodaga dekena amo, vadaeni Dirava ena Natuna edia hairai do idia abia, ma Dirava ese edia dala do ia kehoa, vadaeni kwalimu momokani do idia abia.”​—Roma 8:​20, 21.

[Pictures on page 25]

Tadikaka matamatana ta Prague, Czechoslovakia ena hebouhebou dekenai

[Pictures on page 26]

1. Do idia bapatiso taudia be bapatiso gabuna Prague, Czechoslovakia dekenai idia lao

2. Iehova ena Witness ai ia lao totona ia bapatiso Tallinn, Estonia dekenai

3. Usalye-Sibirskoye dekenai idia hebouhebou taudia idia moale buka matamatadia idia abia dainai

4. Prague hebouhebouna dekenai “New World Translation of the Holy Scriptures” Bible be Czech bona Slovak gadodia ai idia halasia