Ia be Mesia Ena Dala Lailaia Tauna
TAU ta ena kopina ia korema, dina ese ia gabua dainai, bona ena gaba gauna lababana be boromakau ena kopina. Ena dabua be kamelo ena huina, unai dainai unai tau ena toana be peroveta tauna ena toana bamona. Taunimanima momo be ia dekenai idia lao, Ioridane Sinavaina dekenai, badina be idia ura do idia itaia. Ia hereva goada, ia gwau ia hegaegae helalo-kerehai taudia do ia bapatiso henidia.
Taunimanima idia hoa! Hari tau be daika? Iena ura be dahaka?
Iesu Keriso ese ia gwauraia, ia gwau: “Dahaka itaia totona umui lao? Peroveta tauna, a? Oibe, umui lau hamaoroa, peroveta taudia ibounai be Ioane ese ia hereaia. . . . Hahine edia bogana dekena amo idia vara taudia ibounai be ta ese Ioane ia hereaia lasi.” (Mataio 11:9-11) Dahaka dainai Ioane be idau? Badina ia be Mesia ena dala lailaia tauna.
Ena Gaukara Idia Perovetalaia
Lagani 700 mai kahana idia do noho ela bona Ioane ia vara, Iehova ia gwau hari tau be tano gagaena ai do ia boiboi, do ia gwau: “Lohiabada ena dala do umui karaia. Tano kaukauna dekenai, Dirava ena dala do umui hamaoromaoroa!” (Isaia 40:3; Mataio 3:3) Lagani 400 mai kahana idia do noho ela bona Ioane ia vara, Siahu Ibounai Diravana ia gwau: “Inai dina badana do ia ginidae neganai, taunimanima be do idia gari bada momokani. To unai dina do ia ginidae lasi neganai, lau ese peroveta tauna Elia do lau siaia umui dekenai guna.” (Malaki 4:5) Hua 6 bamona idia do noho ela bona Iesu ia vara neganai Ioane Bapatiso ia vara be vara kava gauna ta lasi, bona ia be ena tamana sinana edia tauanina edia siahu sibona dainai ia vara lasi. Dirava ese ia gwauhamatalaia merona, Isako, ena vara hegeregerena, Ioane ena vara be hoa gauna ta, badina be unai neganai ena tamana sinana, Sekaraia bona Elisabeta, be idia buruka vadaeni.—Luka 1:18.
Elisabeta ia do rogorogo lasi neganai, aneru Gabriela ese Ioane ena dagi, ena gaukara, bona ena noho dalana ia gwauraia hedinarai. Elia ena kara bona ena siahu hegeregerena ai, Ioane ese gwau-edeede taudia be mase dalana amo do ia hakaua siri bona do ia hahegaegaedia, bena do idia abia dae Iesu be Mesia. Ioane ia vara negana amo ia be Nasiri tauna, Dirava dekenai ia helaga, bona uaina o kekero muramurana do ia inua lasi. Oibe, tano kaukauna ai ia noho neganai, “iena aniani be kwadi bona hani.” (Mareko 1:6; Numera 6:2, 3; Luka 1:13-17) Samuela ia abia hidi hegeregerena, Ataiai Momokani Diravana ese Ioane ia abia hidi, ena mero negana amo Iena hesiai gaukarana namona do ia karaia.—1 Samuela 1:11, 24-28.
Inai ladana Ioane danu be Dirava ese ia abia hidi. Heberu gado ai Ioane ena ladana ena anina be “Iehova Ia Lalo-Namo; Iehova Ia Hebogahisi.”
Dina namba 8 ai, mero ena kopina idia utua neganai, ena tamana, Sekaraia, be Dirava ena lauma ese ia hasiahua, bena ia gwau: “Oi, egu natuna e, Ataiai Momokani Diravana ena peroveta tauna do idia gwauraia oi, badina oi be Lohiabada ena vairana dekenai do oi raka. Lohiabada ena dala do oi kehoa. Mauri dalana oi ese iena bese taudia dekenai do oi hadibaia, edia dika Dirava ese do ia gwauatao totona. Badina be iseda Dirava ena bogahisihisi ia bada ita dekenai. Iena hamauria do ia siaia mai ita dekenai, guba ena Diari matamata ia siaia bamona.” (Luka 1:76-78) Ioane ena mauri lalonai ena haroro gaukarana be mai anina bada, ma gau iboudiai be mai anina maragi. Unai dainai, Baibel ese Ioane ena mauri laganidia gunadia 30 be siri tamona amo ia gwauraia inai bamona: “Inai mero be ia tubu daekau, iena tauanina bona ena lauma danu ia goada. Ia be taunimanima idia noho lasi tano dekenai ia noho, ia mai bona Israela taudia dekenai do ia hedinarai dinana.”—Luka 1:80.
Gado ta Tano Gagaena Ai
Tiberio Kaisara ena lohia laganina namba 15 ai, Pontio Pilato be Iudea ena gavana neganai, Ioane Bapatiso be tano gagaena ai ia hedinarai bena ia haroro, ia gwau: “Emui lalona umui giroa, badina be Dirava ena Basileia be kahirakahira ia mai.” (Mataio 3:2; Mareko 1:4; Luka 3:1, 2) Unai ese unai gabu ibounai lalonai idia noho taudia ia haoa. Ena haroro herevana ese helaro korikorina idia tahua taudia edia lalona ia hamoalea. Ioane ena hereva ese danu taunimanima edia manau ia tohoa, badina be ia hamaorodia namona be do idia helalo-kerehai mai edia momokani ida. Iena lalo-momokani bona ena abidadama ese lalo-momokani taudia hutuma mai edia kara maoromaoro idia veria, bena idia abia dae ia be Dirava ese ia siaia tauna ta.
Karaharaga gabu daudaudia dekenai Ioane sivaraina idia kamonai. Iena dabua ena toana bona ena abidadama dainai, ia hedinarai goevagoeva ia be Iehova ena peroveta tauna ta. (Mareko 1:6) Hahelaga taudia bona Levi oreana taudia be Ierusalema amo idia lao, badina be idia ura do idia diba taunimanima momo ese idia herevalaia gauna be dahaka. Badina be dahaka bona dahaka amo taunimanima do idia helalo-kerehai be namo? Hari tau be daika? Ioane ia gwau: “ ‘Lau be Keriso lasi.’ Ma idia nanadaia, idia gwau, ‘Sedira, oi be Elia, a?’ Ia gwau, ‘Lau be Elia lasi.’ Ma idia gwau, ‘Ai naria noho Peroveta Tauna be oi, a?’ Ia haere, ia gwau, ‘Lasi.’ Vadaeni idia ese idia nanadaia lou, idia gwau, ‘Oi be daika? Oiemu haere be ai idia siaia mai taudia dekenai do ai hamaoroa. Oi sibona oiemu sivarai be mani oi gwauraia.’ Vadaeni Ioane ese sibona ena sivarai ia gwauraia, ia gwau, ‘Lau be, Gado ta taunimanima idia noho lasi tano dekenai ia boiboi noho, ia gwau: Lohiabada ena dala umui karaia hegaegae.’ Inai be Isaia, peroveta tauna, ena hereva hegeregerena. Inai Farisea idia siaidia taudia ese ma idia nanadaia lou. Idia gwau, ‘Bema oi be Keriso lasi, Elia lasi, bona unai ai naria noho Peroveta Tauna lasi, badina dahaka bapatiso oi karaia noho?’ ”—Ioane 1:20-25.
Basileia lalonai do idia vareai taudia be idia helalo-kerehai bona bapatiso idia abia guna be gau badana. Unai dainai, Ioane ia gwau: ‘Edia kara dika amo idia helalo-kerehai taudia be ranu amo lau bapatisoa, to tau ta do ia mai, iena siahu ese lauegu siahu ia hanaia, be lauma helaga bona lahi amo umui do ia bapatisoa. Lau be namo lasi iena tamaka varona do lau ruhaia. Umui naria namonamo! Iena itapo be iena imana ai; uiti haboua rumana lalonai uiti do ia haboua, to uiti ena momoru be lahi ai do ia gabua ore.’ (Luka 3:15-17; Kara 1:5) Momokani, Mesia ese ia murinai idia raka taudia be lauma helaga do ia henidia, to lahi ese iena inai taudia do ia gabua ore.
“Taunimanima Ibounai” Ia Sisiba Henidia
Ioane ena hereva dainai, Iuda taudia momo mai edia lalo-momokani ese edia kara dikadia, Taravatu kontrakana badinaia lasi karadia, idia gwauraia hedinarai. Idia lao Ioane dekenai bena Ioridane Sinavaina lalonai ia bapatisodia, unai amo idia hahedinaraia idia helalo-kerehai vadaeni. (Mataio 3:5, 6) Unai dainai, edia lalona be hegeregere Mesia do idia abia dae. Idia ura dikadika Dirava ena taravatu maoromaorodia do idia diba, unai dainai Ioane ese ia hadibadia mai ena moale ida, bona guriguri dalana danu ia hadibadia.—Luka 11:1.
Aposetolo Ioane ese Mesia ena dala lailaia tauna ia torelaia, ia gwau: “Ia be hereva momokani do ia gwauraia, bona Diari do ia hedinaraia totona ia mai, taunimanima ibounai ese iena hereva do idia kamonai, bona Diari do idia abidadama henia totona.” (Ioane 1:7) Unai hegeregerena, Ioane Bapatiso ese “lalona giroa ena bapatiso Israela taudia ibounai edia vairanai ia harorolaia” neganai, taunimanima idauidau idia mai bona iena hereva idia kamonai. (Kara 13:24) Ia ese takisi gogoa taudia ia sisiba henidia, moni do idia abia koikoi lasi. Tuari taudia ia sisiba henidia, taunimanima do idia dagedage henidia lasi bona do idia samanidia koikoi lasi. Bona idia helaga koikoi Farisea taudia bona Sadukea taudia ia hamaoroa, ia gwau: “Gaigai edia natudia e, daika ese umui ia hamaoroa, gabeai do ia vara badu dekena amo do umui heau mauri? Emui lalona umui giroa, vadaeni lalona giroa ena anina umui hedinaraia! Bona emui lalona dekenai umui hereva lasi, ‘Aiemai tamana be Aberahamo,’ badina be umui lau hamaoroa, Dirava be mai ena siahu inai nadi dekena amo ena natudia do ia havaraia Aberahamo ena.”—Mataio 3:7-9; Luka 3:7-14.
Tomadiho gunalaia taudia edia orea Ioane ena nega lalonai ese iena hereva idia abia dae lasi bona idia samania koikoi, idia gwau ia be mai ena lauma dikana. Kara maoromaoro dalana, mauri hanaihanai ia lao henia dalana, idia dadaraia. To, kara dika taudia, takisi gogoa taudia bona ariara hahinedia, Ioane ena hereva idia abia dae taudia, idia helalo-kerehai bona bapatiso idia abia. Gabeai, Iesu Keriso idia abia dae ia be Mesia.—Mataio 21:25-32; Luka 7:31-33.
Mesia Ia Gwauraia Hedinarai
Hua 6 lalonai—April ela bona September bamona lagani 29 C.E. ai—Iehova ena witness tauna mai ena kamonai, Ioane, ese Iuda taudia ia hamaoroa Mesia do ia mai. Mesia Pavapavana do ia hedinarai negana be unai. Ia hedinarai neganai, ia lao Ioridane Sinavaina, Ioane ia noia do ia bapatisoa. Matamanai Ioane ia gwau do ia bapatisoa lasi, to gabeai ia bapatisoa. Unai neganai Ioane ia moale bada, badina be lauma helaga be Iesu latanai ia diho bona Iehova ena gado ia kamonai, ia gwau Ena Natuna ia lalo-namo henia.—Mataio 3:13-17; Mareko 1:9-11.
Ioane ia lalo-parara guna Iesu be Mesia, bena sibona ena hahediba taudia ia hakaua lao unai Horoa Tauna dekenai. Ia gwau: “Itaia, Dirava ena Mamoe Natuna ia mai inai, ia be tanobada ena dika kokia tauna.” Ma ia gwau: “Guna lau gwauraia tauna be inai. Lau gwau, ‘Tau ta be lauegu murinai do ia mai, lau be maragi, to ia be bada, badina lau do lau vara lasi neganai, ia be ia mauri noho.’ Lau be lau diba lasi ia, to inai tau Israela dekenai do ia hedinaraia totona, taunimanima lau bapatiso henidia ranu dekenai.”—Ioane 1:29-37.
Iesu ia gaukara matamaia, bena hua 6 bamona lalonai Ioane ia gaukara noho. Ta ese ma ta ena gaukara ia lalo-pararalaia. Ioane ia laloa ia be Headava Matamata Tauna ena turana, bona ia moale, badina be ia itaia Keriso be ia bada ia lao, to ia bona ena gaukara idia maragi idia lao.—Ioane 3:22-30.
Iesu ia gwau Ioane be ena dala lailaia tauna, Elia ese ia laulaulaia tauna. (Mataio 11:12-15; 17:12) Nega ta Iesu ia gwau: “Mose ena taravatu bona peroveta taudia edia hereva ese umui idia hakaua ia mai bona Ioane ena nega. Ioane ena nega ia mai bona hari, Dirava ena Basileia ena Sivarai Namona be idia harorolaia noho, bona taunimanima ibounai be mai edia goada ibounai idia vareai noho.”—Luka 16:16.
Dirava Ia Badinaia ela Bona Mase
Ioane ese hereva momokani ia gwauraia goadagoada dainai, haida ese idia dogoatao bona dibura rumana ai idia koua. Ia ese danu King Heroda ena kara dika gwauraia hedinarai garina ia gari lasi. King ese ena kakana ena adavana, Herodia, ia adavaia; unai be Dirava ena taravatu utua karana. Ioane ia hereva mai ena goada ida, king do ia helalo-kerehai bena Dirava ese do ia hebogahisi henia totona.
Ioane ena abidadama bona ena lalokau be haheitalai namona! Ia hamomokania Iehova Dirava ia badinaia bona taunimanima ia lalokau henidia, bena unai dainai dibura rumana lalonai idia koua. Bena lagani tamona murinai, ena kwarana idia utua oho, badina be “ia badu” henia hahinena dikana, Herodia, be Diabolo ese ia hasiahua, bena ena mase dalana ia lailaia. (Mareko 6:16-19; Mataio 14:3-12) To Mesia ena dala lailaia tauna ese Iehova ia badinaia mai ena lalo-maoromaoro ida, bona nega daudau lasi mase amo do ia toreisi lou, bena Dirava ena tanobada matamatana mai kara maoromaoro lalonai do ia noho mai ena moale ida.—Ioane 5:28, 29; 2 Petero 3:13.