“Diari Huaia Taudai” Distrik Hebouheboudiai Umui Mai Taudia E, Namo

HAVARAIA dinana ginigunana lalonai tanobada dekenai diari ia vara. Unai sivarai ita duahia diba, Iehova Dirava ia gwau: “Diari ia vara namo.” Bona “diari be ia vara.” (Genese 1:3) Unai hereva bona aposetolo Ioane ia torea herevana be idia hegeregere, ia gwau: “Dirava be diari, bona dibura sisina sibona ia dekenai ia noho lasi.”​—1 Ioane 1:5.

Dirava ena Natuna be ena Tamana danu idia lalo-tamona dainai, ita hoa lasi badina nega ta Iesu ia gwau: “Lau be tanobada ena diari.” (Ioane 9:5) Dibura dekena amo ita raka oho bona diari dekenai ita raka vareai dalana be Iehova Dirava bona iena Natuna ita abidadama henidia. Danu, Iesu ia gwau: “Lau be tanobada dekenai lau mai vadaeni, diari bamona. Unai dainai lau idia abidadama henia taudia ibounai be dibura lalonai do idia noho lasi.” (Ioane 12:46) Vadaeni, mai maoro danu Iesu Keriso ese ena hahediba momokani taudia inai bamona ia herevalaidia, ia gwau: “Umui be tanobada taudia ibounai edia diari. . . . Umui emui diari taunimanima edia vairana dekenai unai bamona do umui hedinaraia, vadaeni umui emui kara namodia do idia itaia neganai umui emui Tamana guba dekenai do idia hanamoa.”​—Mataio 5:​14, 16.

Hereva momokani ita abia bona “hesiai tauna mai ena kamonai bona mai ena kara maoromaoro” oreana ese Dirava ena Hereva ita ia hadibaia be hahenamo bada herea! (Mataio 24:​45-47) Hari ita daradara lasi badina Toi Tamona ena hahediba hereva ita abia dae lasi; siahu ibounai bona mai ena lalokau Diravana ese kara dika bona dagedage karadia ia do haoredia lasi ena badina ita diba; mase taudia edia noho be dahaka ita daradaralaia lasi to ita diba. Diari ese helaro ita ia henia, unai be Basileia ena helaro. Unai diari ese ita dekenai ia hahedinaraia Dirava be Gau Ibounai Havaraia Tauna hereadaena. Hereva momokani ena diari dainai iseda mauri be mai anina, ita vara ena badina ita hagugurua diba, unai be ita ia Havaraia Tauna, Iehova Dirava, ena ladana do ita hanamoa. Unai bamona do ita karaia dalana be diari huaia karana amo. Diari huaia taudia ai ita lao be hahenamo ta bona gaukara namona ta, to ia be mai anina bada maduna ta danu. Unai maduna do ita huaia namonamo totona, gau badana be Iehova ese ita ia henia heduru gaudia iboudiai ita gaukaralaidia. Iseda lagani 1992 ena distrik hebouheboudia edia ladana be “Diari Huaia Taudia” Distrik Hebouheboudia be namo herea!

Iseda diari huaia gaukarana ita hanamoa bona ita laloa bada totona, gau badana be unai hebouhebou ta dekenai ita lao, bona namona be ita ginidae haraga bona ita noho hebouhebou kehoa anena abia negana amo ela bona unai dina ena guriguri dokona idia karaia. Bona platfom amo idia halasia herevadia iboudiai do ita kamonai henidia namonamo, herevana unai be hereva idia henia, haida idia henanadai henidia, ekspiriens idia gwauraia, eiava drama idia karaia. Hereva be noutbuk dekenai ita torea neganai, gabeai ita duahidia diba; unai sibona lasi, to danu ita ia durua herevadia idia henia noho lalonai ita laloa namonamo totona. Oibe, hebouhebou ena program ibounai lalonai, namona be ‘iseda kamonai karana ita naria namonamo.’​—Luka 8:18.

1992-1993 Hebouhebou Gabudia

Papua New Guinea

DECEMBER 25-27

PORT MORESBY, NCD, (English, Hiri Motu, New Guinea Pidgin).

JANUARY 1-3

ALOTAU, MBP, (English).

KLINWARA, WNBP, (New Guinea Pidgin).

RABAUL, ENBP, (New Guinea Pidgin).

JANUARY 2, 3

KIKORI, GP, (Hiri Motu).

JANUARY 15-17

AGI, MBP, (Hiri Motu).

LAE, MP, (New Guinea Pidgin).

KAVIENG, NIP, (New Guinea Pidgin).

JANUARY 16, 17

KEREMA, GP, (Hiri Motu).

JANUARY 22-24

MADANG, MDGP, (New Guinea Pidgin).

JANUARY 23-24

DARU, WP, (English, Hiri Motu).

POPONDETTA, NP, (New Guinea Pidgin, Hiri Motu).

LORENGAU, MNSP, (New Guinea Pidgin).

JANUARY 29-31

WEWAK, ESP, (New Guinea Pidgin).

JANUARY 30, 31

LAKE MURRAY, WP, (Hiri Motu).