“Dirava Gari Henia” Distrik Hebouhebouna Dekenai Umui Mai
IEHOVA ena hesiai taudia idau negai be Mose ena Taravatu hegeregerena, lagani ta ta iboudiai amo tomadiho ariadia negadia toi ai idia hebou. Idia be moale negadia bona lauma dalanai idia hagoadadia.—Deuteronomi 16:16.
Iehova ena hesiai taudia hari inai negai danu be lagani ta ta iboudiai amo nega toi idia hebou: dina tamona hebouhebouna neganai, dina rua sekit hebouhebouna neganai, bona dina toi o dina hani distrik hebouhebouna neganai. Hesiai laganina 1994 ai, Iehova ena Witness taudia do idia hebou, “Dirava Gari Henia” Distrik Hebouhebouna neganai.
Dirava ena Hereva ese ia hahedinaraia goevagoeva Dirava gari henia karana be mai anina bada. Baibel ese unai bamona garina be nega 200 bamona ia gwauraia. Dirava gari henia karana ese ita ia gimaia. Hereva Lada-isidia 16:6 ia gwau: “Iehova gari henia karana ai tau ta be kara dika amo ia raka oho.” Bona Salamo 111:10 ia gwau Iehova gari henia karana be aonega ena matamana!
Dirava gari henia karana be mai ena badina rua. Idia ta be lalokau. Dirava ita lalokau henia bada dainai, do ita habadua garina ita gari. (Hereva Lada-isidia 27:11) Ma ta be aonega. Ita diba kara dika idia goadalaia taudia dekediai Dirava be “lahi badana momokani . . . gau ibounai ia araia haorea noho” lahina, bamona, unai dainai aonega dalana be Dirava ita gari henia.—Heberu 12:29.
“Dirava Gari Henia” Distrik Hebouhebouna ai, hahediba bona hahegoada herevadia momo do ita kamonai, Dirava gari henia karana ai do ita tubu daekau totona. Unai hahediba be hereva amo, haheitalai amo, drama amo, bona haida edia sivarai amo do ita abia.
Dirava ese idaunegai Israel taudia ia haganidia, edia hebouhebou do idia lao henidia ima kavakava lasi; unai hegeregerena, namona be iseda hebouhebou edia moale bona edia kwalimu havaradia karadia ai do ita heduru mai eda ura ida. (Deuteronomi 16:17) Inai do ita karaia, Iehova ena pata matauraia karadia amo. Unai kara haida be inai: Nega korikori ai do ita ginidae, platfom amo do idia gwauraidia herevadia do ita hakala henidia, bona ane do ita abidia mai eda lalo-goada ida. Program ena nega ai do ita herevahereva lasi bona do ita raka loaloa lasi. Namona be iseda diba hegeregerena hebouhebou haheaua gaukaradia ai do ita heduru. Bona Iehova ese ita ia hanamoa hegeregerena kontribiusen do ita henia be namo.
Namona be ita Iehova ena hesiai taudia ta ta iboudiai ese dala do ita lailaia matamaia, “Dirava Gari Henia” Distrik Hebouhebouna ai dina toi lalodiai do ita hebou, Friday dabai, hebouhebou kehoa anena abia negana amo ela bona hadokoa gurigurina, Sunday adorahi ai.