Dirava Ia Henia Mauri Namona ese Moale Ia Havaraia
“Iehova moalelaia karana be emui goada gauna.”—NEHEMIA 8:10.
1. Moale be dahaka, bona dahaka dainai Dirava dekenai idia gwauhamata taudia be unai moale idia abia diba?
IEHOVA ese iena taunimanima edia kudouna be moale amo ia hahonua. Unai moale bada eiava moale hisidae mamina idia abia badina idia diba gabeai namo do idia davaria. Dirava dekenai edia mauri idia gwauhamatalaia taudia be unai moale mamina idia abia, badina moale be iena lauma helaga, iena gaukara siahuna, ena huahua ta. (Galatia 5:22, 23) Unai dainai, reana hekwakwanai ita davaria, to ita be Iehova ena hesiai taudia bona iena lauma helaga ese ita ia hakaua dainai ita moale noho diba.
2. Esera ena nega lalonai, dahaka dainai nega ta Iuda taudia idia moale bada?
2 Lagani 500 ia mai 400 B.C.E. lalonai, Iuda taudia ese Dirava ia henia mauri namona idia gaukaralaia namonamo; Ierusalem dekenai idia be mai moale danu Kalaga Ariana idia karaia. Esera bona Levi taudia ma haida ese taunimanima dekenai Dirava ena Taravatu idia duahia, bena murinai “taunimanima iboudiai be idia raka siri do idia aniani, do idia inuinu, bona haria ahuna do idia siaia lao bona do idia moale bada herea totona; badina idia kamonai herevadia edia anina idia diba dainai.”—Nehemia 8:5-12.
Iehova Moalelaia Karana be Iseda Goada Gauna
3. Edena negai “Iehova moalelaia karana” be iseda goada gauna ai ia lao diba?
3 Unai ariana lalonai, Iuda taudia idia diba inai hereva be ia maoro, ia gwau: “Iehova moalelaia karana be emui goada gauna.” (Nehemia 8:10) Bema Iehova ena gwauhamata bona bapatiso Witness taudia ai ita lao bona Dirava ia henia mauri namona dainai ita gini goada, unai bamona moale be iseda goada gauna danu. Lauma helaga ese ita haida ia horoa vadaeni bona Dirava ena ruma bese taudia ai do idia lao, guba dekenai Keriso danu do idia lohia hebou totona. (Roma 8:15-23) To hari inai nega lalonai, ita momo herea eda helaro be tanobada paradaisona dekenai do ita noho. (Luka 23:43) Unai dainai namona be ita moale bada herea!
4. Keristen taudia be hisihisi bona dagedage karadia edena bamona idia haheaukalaia diba?
4 Ena be ita diba gabeai namo bada do ita davaria, to hisihisi bona dagedage karadia harihari ita haheaukalaidia be ia auka. To, Dirava ese ita dekenai iena lauma helaga ia henia dainai, ita haheauka diba. Lauma helaga dainai ita moale diba bona ita diba gau ta lasi ese iseda helaro eiava Dirava ena lalokau ita dekena amo ia kokia diba. Ma danu, ita diba bema iseda kudouna, lalona, goada, bona lalohadai ibounai amo Iehova ita lalokau henia, Iehova be iseda goada gauna.—Luka 10:27.
5. Ita moale ena badina haida be edeseniai do ita davaria diba?
5 Iehova ena taunimanima ese hahenamo momo idia davaria bona idia moale ena badina be momo. Idia moale ena badina haida be Paulo ena revareva Galatia taudia dekenai ia torea. Badina ma haida be Bible buka ma haida dekenai idia torea. Unai moale hahenamo sivaraidia haida ita tahua be namo badina idia ese iseda lalona do idia hamoalea.
Dirava Ia Henia Mauri Namona Laloa Bada
6. Dahaka dainai Paulo ese Galatia Keristen taudia ia hagoadaia idia haheauka noho totona?
6 Ita be Keristen taudia dainai, Dirava ese ita ia lalo-namo henia karana be hahenamo mai moalena. Keriso ese iena hahediba taudia be Mose Taravatuna amo ia ruhaia, unai hegeregerena, Paulo ese Galatia taudia ia hagoadaia idia haheauka noho totona bona “igui hesiai ena metau” do idia abia lasi totona. Ita be edena bamona? Bema Taravatu badinaia karana amo ita ura ita idia gwauraia maoro, unai anina be Keriso dekena amo ita gini siri. To, Dirava ena lauma helaga ese ita ia durua dainai, ita naria noho, lalokau dekena amo ia vara abidadama karana ese ita ia gwauraia maoro totona, kopina utua karana eiava Taravatu badinaia karana ta amo do ia vara lasi.—Galatia 5:1-6.
7. Iseda helaga hesiai gaukara Iehova dekenai be edena bamona ita laloa be namo?
7 Dirava ia henia mauri namona ita gaukaralaia “Iehova ena hesiai gaukara” karaia totona be hahenamo gauna ta. (Salamo 100:2) Momokani, ‘Iehova, Siahu Ibounai Diravana,’ ena hesiai gaukara ita karaia be gaukara namona, badina ia be “Pavapava ela bona hanaihanai”! (Apokalupo 15:3, NW) Bema nega haida oi hemarai badina oi laloa oiemu kara bona diba be hegeregere lasi, oi ia durua herevana be inai: Iesu Keriso dekena amo Dirava ese oi ia boiria mai bona ia ura oi heduru “Dirava ena Sivarai Namona” harorolaia gaukara helagana lalonai. (Roma 15:16; Ioane 6:44; 14:6) Unai gaukara dainai ita moale bona Dirava ita tanikiu henia!
8. Ena be Babulono Badana ia noho, to dahaka dainai Dirava ena taunimanima be idia moale diba?
8 Ita moale ena badina ma ta be inai: Dirava ese ita ia ruhaia Babulono Badana, eiava tanobada ibounai tomadiho koikoi basileiana, dekena amo. (Apokalupo 18:2, 4, 5) Haheitalai dekenai ena be tomadiho ariara hahinena be “ranu momo gabudia” dekenai ia helai, anina be “tano idauidau taudia, bese idauidau taudia, kopina idauidau taudia bona gado idauidau taudia” dekenai ia helai, to tomadiho dalanai Iehova ena hesiai taudia dekenai ia helai lasi, anina be idia dekenai ena siahu be lasi bona ia biagudia lasi. (Apokalupo 17:1, 15) Dirava ena hairai diarina dekenai ita noho be moale bada gauna, to Babulono Badana ena orea taudia be lauma dalanai dibura dekenai idia noho. (1 Petero 2:9) Oibe, reana “Dirava ena laloa dobu gaudia” edia anina haida ita diba be ia auka. (1 Korinto 2:10) To bema ita guriguri aonega bona lauma helaga ena heduru ita abia totona, unai guriguri ese ita idia durua Bible ena hereva momokanidia edia anina do ita lalo-pararalaidia totona, bona lauma dalanai unai ese ita ia ruhaia.—Ioane 8:31, 32; Iakobo 1:5-8.
9. Tomadiho kerere amo ruhaia maurina ena hahenamo do ita dogoatao noho totona, dahaka do ita karaia be gau badana?
9 Dirava ese ita be tomadiho koikoi dekena amo ita ia ruhaia ena hahenamo ita abia, to unai mauri namona dekenai ita gini goada noho totona, Dirava negea herevana ita dadaraia be gau badana. Guna, Galatia taudia be Keristen ena heau helulu dekenai idia heau namonamo, to hereva momokani idia badinaia lasi dainai, taunimanima haida ese idia hahekwakwanaidia toho. Edia lalona ia hakererea toho kara dikana be Dirava dekena amo ia mai lasi, unai dainai idia dadaraia be gau badana. Hatubua muramura sisina ese paraoa ibounai do ia hatubua, unai hegeregerena, hahediba koikoi taudia eiava Dirava dadaraia herevadia ese kongregesen taudia iboudiai do ia hadikaia diba. Taunimanima haida be Galatia taudia edia abidadama idia hadikaia gwauraia, idia gwau kopina utua karana idia abia be maoro, unai dainai Paulo ia gwau unai koikoi herevana idia gwauraia taudia edia kopina idia utua sibona lasi, to namona be edia natuna havaraia gauna idia utua oho danu. Unai be hereva aukana momokani! Tomadiho koikoi dekena amo Dirava ese ita ia ruhaia bona mauri namona ita dogoatao noho totona, gau badana be Paulo bamona Dirava negea herevadia ita dadaraia momokani.—Galatia 5:7-12.
Lalokau Dekenai Ita Hesiai Heheni
10. Keristen tadikaka oreana lalonai ita noho dainai iseda maduna be dahaka?
10 Dirava ia henia mauri namona ese ita ia haboua lalokau oreana dekenai bona ita ibounai be tadikaka bamona ita noho hebou, to unai bamona ita noho dainai lalokau ita hahedinaraia be gau badana. Galatia taudia be Dirava ese ia henidia mauri namona idia gaukaralaia “tauanina hamoalea totona” eiava idia gaukaralaia sibodia edia namo idia tahua totona be namo lasi, badina unai be lalokau lasi karana. To namona be lalokau dainai iboudiai ta ta idia heduru heheni. (Levitiko 19:18; Ioane 13:35) Ita danu be hadikaia heheni herevadia bona inai heheni karadia ita dadaraia be gau badana, badina unai bamona karadia dainai ita hadikaia heheni diba. To, momokani, bema tadikaka bamona ita lalokau heheni, unai bamona do ita karaia lasi.—Galatia 5:13-15.
11. Taunimanima haida be edena dala amo ita hanamodia diba, bona edena bamona idia be ita idia hanamoa diba?
11 Dirava ia henia mauri namona bema ita gaukaralaia iena lauma helaga ena hakaua dalana hegeregerena, lalokau do ita hahedinaraia bona unai be hahenamo gauna ma taunimanima haida dekenai. Namona be nega ibounai lauma helaga ena hakaua siahuna henunai ita noho. Unai neganai, ita ese iseda kara dika tauanina hamoalea karadia do ita tahua haraga lasi, badina “iseda tauanina ena ura be idau, Lauma Helaga ena ura danu be idau.” Bema Dirava ena lauma helaga ese ita ia hakaua, ita be lalokau karadia do ita karaia, to ita gwau lasi ita karaia badina unai be taravatu dainai, bona kara kerere taudia ese hahemaoro do idia abia dainai. Hegeregere, taravatu mo sibona lasi—to lalokau—ese ita do ia koua haida ita gwauraidia dika garina. (Levitiko 19:16) Lalokau ese ita do ia doria iseda hereva amo bona iseda kara amo hebogahisi do ita hahedinaraia totona. Lalokau be lauma huahuana ta bona ita hahedinaraia dainai, ma taunimanima haida ese ita do idia hanamoa, eiava ita do idia gwauraia namo. (Hereva Lada-isidia 10:6) Ma danu, idia be ita idia bamoa neganai hahenamo do idia abia.—Galatia 5:16-18.
Huahua Idaudia
12. “Tauanina ena kara” dikadia ita dadaraia neganai ita davaria hahenamodia haida be dahaka?
12 “Tauanina ena kara” dikadia ita dadaraidia dainai Dirava ia henia mauri namona ena hahenamo momo ita davaria. Ita be Dirava ena taunimanima dainai, ita momo be ita lalohisihisi momo lasi, badina sihari kava, miro karadia, bona kara dikadia ita karaia lasi. Kaivakuku tomadiho henia karana ita dadaraia neganai, ita moale badina ita diba unai kara amo Iehova ita hamoalea. (1 Ioane 5:21) Meamea karadia ita karaia lasi, unai dainai demoni ese ita idia biagua lasi. Iseda tadikaka bamona oreana ia dika lasi badina ia lalonai, heai, heatu, mama, badu, sibona ena ura tahua kara, hepapahuahu, orea hapararaia kara, bona laloa dikadia idia noho lasi. Danu, kekero bona lebulebu karadia ita karaia lasi dainai iseda moale ia boio lasi. Paulo ia sisiba, ia gwau tauanina ena kara idia karaia taudia be Dirava ena Basileia do idia abia lasi. To, ita be iena hereva ita badinaia dainai, mai moale danu Basileia ena helaro ita laloa noho.—Galatia 5:19-21.
13. Iehova ena lauma helaga ese ia havaraia huahuadia ta be dahaka?
13 Dirava ia henia mauri namona amo moale ita davaria badina Keristen taudia ese Iehova ena lauma huahuadia idia hahedinaraia. Paulo ena hereva Galatia taudia dekenai ese idia hahedinaraia tauanina ena kara dikadia be ginigini bamona, to lauma huahua namodia, Dirava idia gari henia taudia edia kudouna dekenai idia noho gaudia, be idau, idia be lalokau, moale, maino, haheauka, hebogahisi, kara maoromaoro, abidadama momokani kara, manau, bona tauanina ena ura koua karana. Iseda lalona ita hadaia vadaeni tauanina ena kara dikadia do ita karaia lasi totona, bona ita ura Dirava ena lauma helaga ese ita ia hakaua bona ena siahu be iseda mauri lalonai ia noho. Unai lauma helaga ena siahu dainai manau bona maino karadia ita hahedinaraia, ita “hekokoroku lasi, ita ta ta ita habadua lasi, bona ita ta ta dekenai kohu totona ita mama henia lasi.” Lauma huahua idia hahedinaraia taudia bamoa karana be moale gauna momokanina!—Galatia 5:22-26.
Moale Ena Badina Ma Haida
14. Lauma dikadia ita tuari henidia totona, namona be ita atoa dabuadia be dahaka?
14 Dirava ese ita ia henia lauma dalanai ia noho mauri namona be ita ia naria dainai Satana bona ena demoni ese ita idia hadikaia lasi bona unai be hahenamo bada gauna ta. Lauma dikadia tuari henidia karana dekenai ita kwalimu totona, gau badana be “tuari dabua ibounai do [ita] atoa.” Namona be iseda gabana dekenai hereva momokani ena beleta ita kwatua bona iseda kemena dekenai kara maoromaoro ena auri dabuana ita atoa. Iseda aena dekenai maino ena sivarai namona do ita atoa. Danu, abidadama ena kesi badana do ita abia Satana ena diba mai ena lahi danu do ita habodoa totona. Namona be hahemauri ena tuari kwara gauna ita atoa bona Dirava ena Hereva, “Lauma Helaga ena tuari kaia danu do [ita] dogoatao.” Danu namona be “nega ibounai Lauma Helaga ena siahu dekena amo [ita] guriguri.” (Efeso 6:11-18) Lauma dalanai bema unai tuari dabua ibounai ita karaia bona demoni karadia ita dadaraia, do ita gari lasi bona do ita moale diba.—Kara 19:18-20 itaia danu.
15. Dirava ena Hereva ita badinaia dainai dahaka moale hahenamona ita davaria?
15 Moale ita abia badina Dirava ena Hereva ia gwauraia hegeregerena kara ita karaia, bona kara kerere taudia momo idia abia hemarai mamina ita abia lasi. Ita goada karaia ‘mai lalona maoromaoro danu ita noho Dirava vairana dekenai bona taunimanima vairanai danu.’ (Kara 24:16) Unai dainai, Dirava ese mai edia ura danu idia kara dika bona unai dika amo idia helalo-kerehai lasi taudia do ia hahemaoro henidia neganai do ita gari lasi. (Mataio 12:22-32; Heberu 10:26-31) Hereva Lada-isidia 3:21-26 ena sisiba herevana ita badinaia neganai, ita diba unai hereva be ia guguru vadaeni, ia gwau: “Aonega korikori bona lalo-parara oi dogoatao auka herea, bona idia be oiemu tauanina ena mauri bona gau hairaina oiemu aiona dekenai. Bena emu dala dekenai do oi raka mai emu namo ida, bona oiemu aena ese gau ta dekenai ia hekwakwanai lasi. Oi hekure neganai oi gari lasi; bona do oi hekure, bona oiemu mahuta ia namo. Hahegari gauna garina do oi gari lasi, eiava kara dika taudia latadiai do ia mai lai gubana garina do oi gari lasi. Badina be Iehova sibona do oi abidadama henia, ia ese oiemu aena do ia naria, idoa dekenai do oi atoa lasi totona.”
16. Dahaka dainai guriguri be moale gauna, bona unai kara dekenai Iehova ena lauma helaga ena heduru be dahaka?
16 Moale gauna ma ta be Dirava ese ita ia henia mauri namona dainai, Iehova be guriguri amo ita hereva henia bona ita diba unai guriguri do ia kamonai henia. Oibe, iseda guriguri ia haerelaia badina mai hemataurai danu “Iehova ita gari henia” dainai. (Hereva Lada-isidia 1:7) Ma danu, “Lauma Helaga ena siahu dekena amo do [ita] guriguri” neganai, unai ese ita ia durua Dirava ena lalokau dekenai ita noho totona. (Iuda 20, 21) Unai ita karaia diba bema iseda kudouna ibounai ida iena ura bona iena Hereva hegeregerena ita guriguri, bona unai ese ita ia hadibaia edena dala ai ita guriguri bona dahaka gaudia ita gurigurilaia diba. (1 Ioane 5:13-15) Bema ita lalo-hekwarahi bada dainai ita diba lasi dahaka totona do ita guriguri, ‘lauma helaga danu ia mai, ita goada lasi taudia ia durua noho. Ita totona ia noinoi Dirava dekenai, mai taitai bada danu.’ Dirava be unai bamona guriguri ia haere henidia. (Roma 8:26, 27) Namona be ita guriguri lauma helaga do ita abia totona bona namona be hetoho ta do ita hanaia totona ena huahua be iseda mauri lalonai ita hahedinaraia. (Luka 11:13) Danu, iseda moale do ita habadaia diba bema mai guriguri danu Dirava ena lauma ia havaraia Herevana bona lauma helaga ena siahu henunai idia karaia Keristen bukadia bona magasin ita stadilaidia namonamo.
Heduru Hanaihanai Ena Hahenamo
17. Mose dekenai idia vara gaudia bona David ena hereva be edena bamona idia hahedinaraia Iehova be Ena taunimanima danu ia noho?
17 Dirava ese ita ia henia mauri namona be dala maorona dekenai ita gaukaralaia dainai, ita diba Iehova be ita dekenai ia noho, bona unai be moale gauna ta. Hekwakwanai ia vara dainai Mose ese Aigupito ia rakatania neganai, ia be mai ena abidadama dainai “ena lalona ia goada noho, ita itaia diba lasi Diravana, be Mose ese matana dekenai ia itaia bamona.” (Heberu 11:27) Ita gwau diba lasi Mose be sibona ia raka; ia diba Iehova be ia danu ia raka. Unai hegeregerena, Kora besena tataudia be ane idia abia, idia gwau: “Dirava be iseda roho mauri gabuna bona iseda goada, iena heduru ita davaria haraga. Unai dainai ita gari lasi, ena be tanobada do ia idau bona ena be ororo idia mareremarere bona davara bogaraginai idia moru; ena be davara ranudia idia regerege bona idia hurehure, ena be ororo idia heudeheude unai regerege dainai.” (Salamo 46:1-3) Bema oiemu abidadama Dirava dekenai be unai bamona ia bada, oi do ia rakatania diba lasi. David ia gwau: “Bema lauegu tamana bona lauegu sinana ese lau idia rakatania, Iehova sibona ese lau ia abia dae diba.” (Salamo 27:10) Ita diba Dirava ese iena hesiai taudia ia lalodia bada bona unai be moale gauna momokanina!—1 Petero 5:6, 7.
18. Dahaka dainai Iehova idia moalelaia taudia be Dirava ia henia mauri namona dainai idia lalo-hekwarahi momo lasi?
18 Iehova ita moalelaia dainai, Dirava ese ia henia mauri namona lalonai lalo-hekwarahi bada amo ita ia ruhaia. Paulo ia gwau: “Gau ta totona do umui laloa hekwarahi lasi. To emui dabu gaudia do umui abia totona Dirava do umui noia. Bona umui noia negadia ibounai, mai tanikiu danu do umui guriguri henia. Dirava ena maino ese taunimanima edia diba ia hanaia momokani. Keriso Iesu umui danu ia hakapua tamona dainai, inai maino ese emui laloa gaudia bona emui kudouna idia mamia gaudia ibounai do ia naria namonamo.” (Filipi 4:6, 7) Dirava ena maino ita abia neganai, ena be hekwarahi badana ta ita davaria, to lalo-manau ita abia diba. Unai lalo-manau ita abia neganai iseda kudouna idia hekwarahi momo lasi—lauma dalanai, iseda lalona ena mamina dekenai, bona iseda tauanina dalanai namo ita ia henia. (Hereva Lada-isidia 14:30) Danu, ita ia durua ita lalohadai maoromaoro totona, badina, ena be ita hekwarahi bona Dirava ese unai hekwarahi ia koua lasi, to ita diba unai hekwarahi do ia noho ela bona hanaihanai lasi. (Mataio 10:28) Keriso dekena amo Dirava ita bamoa dainai unai maino ita abia diba, badina Iehova dekenai gwauhamata ita karaia bona iena lauma helaga ena siahu amo ita ia hakaua, bona unai lauma huahua ese moale bona maino ia havaraia.
19. Iseda kudouna ibounai danu dahaka ita laloa neganai moale do ita davaria diba?
19 Iseda kudouna ibounai danu Dirava ese ita ia henia mauri namona bona Basileia ena helaro ita laloa noho neganai, unai ese ita ia durua ita moale totona. Hegeregere, nega haida iseda gorere be ta ese ia hanamoa diba lasi, to ita guriguri diba aonega bona goada ita abia unai gorere ita haheaukalaia totona. Danu bema iseda goada lauma dalanai ita laloa bona gabeai Basileia ena lohia negana lalonai tauanina ena gorere do idia ore sivaraina ita laloa, unai ese ita ia hamoalea diba. (Salamo 41:1-3; Isaia 33:24) Ena be hari inai nega lalonai, gau haida dekenai reana ita dabu, to kahirakahira do ia mai tanobada Paradaisona lalonai, mauri durua gaudia iboudiai do ita abia. (Salamo 72:14, 16; Isaia 65:21-23) Oibe, harihari iseda guba Tamana ese ita ia durua bona gabeai dala do ia kehoa ita moale bada herea totona.—Salamo 145:14-21.
Dirava Ia Henia Mauri Namona Oi Naria Namonamo
20. Salamo 100:1-5 ena hereva hegeregerena, mai iseda dahaka danu Iehova vairanai do ita gini be namo?
20 Ita be Iehova ena taunimanima dainai, Dirava ia henia mauri namona amo ita davaria moalena bona hahenamodia momo ita lalodia bada be gau badana. Salamo 100:1-5 ese ita ia hagoadaia ‘mai eda moale danu’ Dirava vairanai ita mai gini totona. Iehova ese ita ia biagua bona ia be lalokau Mamoe Naria Tauna dainai ita ia naria namonamo. Oibe, “ita be iena bese taudia bona ena heubu mamoedia.” Ia be Gau Ibounai Havaraia Tauna dainai bona iena kara namo hereadia dainai, ita ura iena dubu ena ariara dekenai ita raka vareai, mai eda moale anedia amo ita hanamoa bona ita tanikiu henia totona. Ita ura “ena ladana ita hanamoa,” bona ita ura Iehova Dirava ita gwauraia namo. Ma danu, ita diba iena lalokau, eiava iena hebogahisi karana ita dekenai, ita tabekau henia diba. “Uru iboudiai lalodiai” Iehova be iena ura idia karaia taudia dekenai iena lalokau ia hahedinaraia, bona unai kara ia haidaua lasi.
21. Inai magasin ginigunana idia halasia neganai, dahaka hagoadaia herevana ta ia noho, bona Dirava ia henia mauri namona dainai dahaka do ita karaia be namo?
21 Ita be kara dika taudia dainai, hetoho haida sibona ita reaia diba, iboudiai lasi. To, Dirava ena heduru amo gari lasi dekenai bona mai moale danu Iehova ena Witness taudia ai ita lao diba. Namona be inai English gado magasin ginigunana (July 1879 gauna) lalonai hereva ta oi laloa, inai bamona ia hereva: “Gari lasi . . . egu Keristen tadikaka o taihu e, dala maragina dekenai mai hekwarahi danu oi raka. To unai dala aukana do oi laloa momo lasi; ia be helaga dalana, Biaguna ese ena aena dekena amo ia hahelagaia. Ginigini ibounai be palaoapalaoa bamona oi lalodia; nadi mai matana iboudiai be oi hanaia gaudia oi lalodia, oi idia haharagaia oi lao henia gabuna dekenai. . . . Emui matana be ahuna dekenai idia raraia noho.” Hari inai nega lalonai, taunimanima milion momo be Iehova ena hesiai gaukara idia karaia bona edia matana be ahuna dekenai idia raraia noho. Idia gari lasi bona idia moale ena badina be momo. Namona be idia danu oi gini, Dirava ia henia mauri namona do oi abia totona. Ena badina do oi reaia lasi, bona nega ibounai Iehova moalelaia karana be emu goada gauna ai do ia lao.
Edena Bamona Do Oi Haere?
◻ “Iehova moalelaia karana” be edena bamona iseda goada gauna ai ia lao diba?
◻ Tomadiho dalanai, Dirava ia henia mauri namona amo Iehova ena taunimanima be dahaka hahenamo idia davaria?
◻ Lalokau dekenai ita heduru heheni ena badina be dahaka?
◻ Dirava ia henia mauri namona amo ita davaria hahenamodia haida be dahaka?
◻ Dirava ena taunimanima be edena bamona do idia moale noho diba?
[Picture on page 23]
“Ginigini ibounai be palaoapalaoa bamona oi lalodia; nadi mai matana iboudiai be oi hanaia gaudia oi lalodia, oi idia haharagaia oi lao henia gabuna dekenai”