Dirava Ia Henia Mauri Namona Dainai Gini Goada!

“Keriso ese Taravatu ena metau bona ena guia dekena amo ita ia ruhaia vadaeni. Ura kwalimu [mauri namona] ita abia vadaeni. Inai ura kwalimu do umui dogoatao noho, tau haida ese umui do idia guia lou garina.”​—GALATIA 5:1.

1, 2. Dirava ia henia mauri namona be edena bamona ia boio?

IEHOVA ena taunimanima be ia ruhaia bona mauri namona idia abia. To idia ura lasi Dirava ena siahu henuna amo idia siri, badina unai neganai idia be Satana ena igui hesiai dekenai do idia lao. Edia hebamo karana Iehova dekenai idia laloa bada bona idia ia henia mauri namona idia moalelaia bada.

² Iseda tama sina ginigunadia, Adam bona Eva, be idia kerere neganai, idia be kara dika, mase, bona Diabolo edia igui hesiai gaukara idia karaia bona Dirava ese idia ia henia mauri namona idia haboioa. (Genese 3:​1-19; Roma 5:12) Oibe, Satana ena kara dainai tanobada taudia ibounai be mase dekenai ia lao henia kara dika dalana dekenai idia raka! To Dirava ese ia henia mauri namona idia dogoatao taudia be mauri hanaihanai ia lao henia dalana dekenai idia raka.​—Mataio 7:​13, 14; 1 Ioane 5:19.

Igui Hesiai amo Ruhaia Dalana

3. Eden dekenai Dirava ese ia gwauraia helaro herevana be dahaka?

³ Iehova ia ura iena ladana idia hanamoa taudia be Satana amo, kara dika amo, bona mase amo idia do ia ruhaia. Eden dekenai Satana ese gaigai ia gaukaralaia bona Dirava ese unai gaigai ia hereva henia neganai unai helaro namona ia gwauraia, ia gwau: “Lau ese badu oi bona hahine huanai do lau atoa bona oiemu garana bona iena garana huanai. Ia ese emu kwarana do ia haberoa bona oi ese iena aena geduna do oi haberoa.” (Genese 3:​14, 15, NW) Iesu Keriso, Iehova ena guba oreana ena Garana unai, be au dekenai ia mase neganai, unai be Satana ese ena aena ia koria bamona; to mai edia abidadama taudia be kara dika bona mase dekena amo ia ruhadia totona, unai dala amo Dirava ese mauri davana ia henia. (Mataio 20:28; Ioane 3:16) Gabeai, Iesu ese idau negai Gaigaina, Satana, ena kwarana do ia haberoa.​—Apokalupo 12:9.

4. Abraham ia abia mauri namona be dahaka, bona ia dekenai Iehova ese dahaka ia gwauhamatalaia?

⁴ Eden dekenai unai gwauhamata herevana ia gwauraia murinai lagani 2,000 bamona, “Iehova ena turana” Abraham ese Dirava ena hereva ia badinaia dainai Uru hanuana ia rakatania ma tano ta dekenai ia lao totona. (Iakobo 2:23; Heberu 11:8) Unai dala amo Dirava ia henia mauri namona ia abia bona ia be Satana ena tanobada ena tomadiho koikoi, ena kara dika politikol orea, bona ena mataganigani bisinesi orea edia igui hesiai nohona amo ia raka siri. Eden dekenai ia henia peroveta herevana dekenai ma hereva haida ia atoa kau, ia gwau Abraham bona ena Garana dekena amo ruma bese iboudiai bona tanobada besedia iboudiai be sibodia do idia hanamoa. (Genese 12:3; 22:​17, 18) Abraham ia gwauraia dika lasi badina ia ‘ese Iehova dekenai ia abidadama henia, unai dainai Iehova ese ia gwauraia kara maoromaoro tauna.’ (Genese 15:6) Unai hegeregerena, hari inai nega lalonai, Iehova dekenai ita hetura momokani neganai, Dirava ese ita dekenai mauri namona ia henia, ita ia gwauraia dika lasi, bona Satana ena siahu henunai ia noho tanobadana ese ita ia guia lasi.

Parabole Hereva Namona

5. Isako ia vara neganai, dahaka ia vara?

⁵ Abraham be garana ta do ia abia totona, iena gabani adavana, Sara, ese ena hesiai kekenina, Hagara, ia henia ia adavaia bona natuna do ia abia totona. Ia dekena amo, Abraham ese ena natuna Ismaela ia davaria, to Dirava be ia abia hidi lasi gwauhamata Garana ai ia lao totona. To, Abraham ena mauri lagani be 100 bona Sara ena mauri lagani be 90 neganai, Iehova ese dala ia kehoa dainai edia natuna Isako be ia vara. Ismaela ese Isako ia kirikirilaia neganai, Hagara bona ena natuna merona idia siaia lao, bona unai neganai, ura kwalimu hahine Sara ese ia havaraia natuna sibona be Abraham ena garana ai ia lao. Abraham bamona, Isako danu be mai ena abidadama bona Dirava ese ia henia mauri namona ia moalelaia.​—Genese 16:​1-16; 21:​1-21; 25:​5-11.

6, 7. Galatia Keristen taudia ese hahediba koikoi taudia edia hereva idia abia dae; unai hereva be dahaka? To Paulo ena hereva be dahaka?

⁶ Unai sivarai ese gabeai do idia vara gaudia idia laulaulaidia; Dirava ia henia mauri namona idia ura henia bada taudia dekenai unai sivarai be mai anina bada. Lagani 50 ia lao 52 C.E. bamona ai, aposetolo Paulo ese Galatia kongregesen dekenai ia torea revarevana lalonai unai sivarai ia kikilaia. Unai nega ia do mai lasi neganai hakaua oreana ia gwau Keristen taudia be kopina utua karana idia abia be taravatu lasi. To Galatia taudia haida be hahediba koikoi taudia edia hereva idia abia dae bona idia laloa kopina utua karana be Keriso ena tomadiho kara badana ta.

⁷ Paulo be Galatia taudia ia hamaorodia herevana be inai: Keriso abidadama henia karana ese tau ta be kara maoromaoro tauna ia gwauraia, Mose ena Taravatu badinaia karana amo lasi. (Galatia 1:1–3:14) Taravatu ese Abraham ia abia gwauhamatana ena kara ia kokia lasi, to ia ese kara dika ena anina ia hahedinaraia bona taunimanima ia hakaua Keriso dekenai. (Galatia 3:​15-25) Ia mase neganai, Iesu ese Taravatu henunai idia noho taudia ia ruhadia, bena idia be Dirava ena natudia ai idia lao diba. Unai dainai, bema dina, hua, nega, bona lagani hahelagaia karana idia karaia lou, unai anina be igui hesiai karana dekenai do idia giroa lou. (Galatia 4:​1-20) Bena Paulo ia torea, ia gwau:

8, 9. (a) Oi sibona emu hereva kwadogina amo, Paulo ena hereva Galatia 4:​21-26 dekenai ena anina oi gwauraia. (b) Unai parabole herevana lalonai, Abraham bona Sara ese idia laulaulaia gaudia eiava taudia be daidia, bona gwauhamata Garana be daika?

⁸ “Taravatu henunai umui ura noho taudia e, umui be Taravatu ena hereva umui kamonai noho, a? Buka Helaga inai bamona ia torea, Aberahamo ena natuna be rua. Ta be hesiai hahine [Hagara] ena natuna [Ismaela], ta be ura kwalimu hahine [Sara] ena natuna [Isako]. Hesiai hahine ena natuna be tauanina ena kara dekenai ia vara. To ura kwalimu hahine ena natuna be Dirava ena gwauhamata dainai ia vara. Inai sivarai be parabole bamona, inai hahine ruaosi be gwauhamata metaudia rua bamona. Ta be [Mose ena Taravatu] Sinai ororo dekena amo [unuseniai Dirava ese Israel taudia dekenai gwauhamata ia karaia]. Iena natuna be hesiai memero. Iena ladana be Hagara. [Ma ta be Abraham bona iena Garana gwauhamatana.] Inai Hagara be Sinai ororo ena ladana ta, Arabia tano dekenai. Ia be harihari ia noho Ierusalema hanua ena toana bamona. Inai Ierusalema bona iena taudia ibounai [Abraham, Isako, bona Iakobo iduhu taudia be] hesiai mai guia danu lalonai idia noho. To Ierusalema ma ta be guba dekenai ia noho, ia be ura kwalimu hanuana. Ia be iseda sinana.”​—Galatia 4:​21-26.

⁹ Unai parabole herevana lalonai, Abraham ese Iehova ia laulaulaia. “Ura kwalimu hahine,” Sara, ese Dirava ena “hahine,” iena guba bona tanobada ibounai ena orea helagana unai, ia laulaulaia. Unai hahine ese Keriso ia havaraia, parabole dekenai Garana be unai hahine bona Abraham Badana edia amo ia vara. (Galatia 3:16) Taunimanima ese tomadiho mirona, kara dika, bona Satana edia igui hesiai karadia amo idia raka siri dalana idia diba totona, Iesu ese hereva momokani ia harorolaia bona tomadiho koikoi karana ia hahedinaraia, to Ierusalem bona ia lalonai idia noho taudia ese Iesu idia dadaraia dainai tomadiho koikoi ese idia ia guia noho. (Mataio 23:​37, 38) Iesu murinai idia raka Iuda taudia be Taravatu amo idia raka siri, unai Taravatu ese ia hahedinaraia idia be kerere, kara dika, bona mase dekenai idia noho. Taunimanima be mauri namona do idia abia bema idia abia dae Iesu be Dirava ena “hahine” ese ia havaraia Tauna, bona idia abia dae Ia be Mesia Pavapavana bona ia be ‘igui hesiai taudia dekenai hahemauri sivarai ia gwauraia’ Taunimanima Ruhaia Tauna!​—Isaia 61:​1, 2; Luka 4:​18, 19.

Igui Hesiai Ena Metau Dadaraia

10, 11. Keriso ese ena hahediba taudia be edena igui hesiai karana amo ia ruhadia, bona hari inai nega lalonai unai ese dahaka ia laulaulaia?

¹⁰ Keriso, Isako Badana, ida Abraham ena garana taudia ai idia lao taudia dekenai Paulo ia gwau: “Ierusalema ma ta be guba dekenai ia noho, ia be ura kwalimu hanuana. Ia be iseda sinana. . . . Lauegu varavara taudia e, umui be Dirava ena natuna, iena gwauhamata dainai, Isako hegeregerena. To unai neganai, tauanina ena kara dekenai ia vara merona [Ismaela] ese Dirava ena Lauma dekenai ia vara merona [Isako] ia dagedage henia. Bona hari inai neganai danu unai bamona kara ia vara noho. . . . Ita be hesiai hahine ena natuna lasi, ita be ura kwalimu hahine ena natuna. Keriso ese Taravatu ena metau bona ena guia dekena amo ita ia ruhaia vadaeni. Ura kwalimu ita abia vadaeni. Inai ura kwalimu do umui dogoatao noho, tau haida ese umui do idia guia lou garina.”​—Galatia 4:26–5:1.

¹¹ Iesu ena hahediba taudia be Taravatu henunai bema idia noho neganai idia be igui hesiai ena metau dekenai idia noho. Hari inai nega lalonai, tomadiho koikoi be igui hesiai ena metau gauna, bona idau negai Ierusalem bona ena taunimanima ese Kerisendom idia laulaulaia. To horoa taudia be atai Ierusalem, Dirava ia henia mauri namona ena guba oreana, ena natudia. Idia bona abidadama tamona taudia, tanobada ena helaro idia abia taudia unai, be inai tanobada ena amo idia gini siri bona Satana ese idia ia guia lasi. (Ioane 14:30; 15:19; 17:​14, 16) Hereva momokani bona Iesu ia henia mauri davana ese ita ia ruhaia vadaeni dainai, namona be Dirava ese ita ia henia mauri namona ita dogoatao noho.

Dirava Ia Henia Mauri Namona Totona Ita Gini Goada

12. Abidadama taudia be dahaka idia karaia, bona hari dahaka do ita kikilaia?

¹² Taunimanima milion haida ese mauri namona idia abia idia be Iehova ena Witness taudia dainai. Ma taunimanima milion momo dekenai Bible stadi idia karaia, bona idia momo be hegeregere “mauri hanaihanai [do idia] abia totona.” Abidadama taudia ai idia lao neganai, Dirava ia henia mauri namona idia abia dae karana idia hahedinaraia totona, bapatiso idia abia. (Kara 13:48; 18:8) To Keristen bapatiso idia do abia lasi neganai dahaka do idia karaia?

13. Bapatiso karana dekenai diba ena anina be dahaka?

¹³ Tau ta ia do bapatiso lasi neganai, ia ese diba maoromaoro Bible ena hereva dekenai do ia abia bona karana do ia karaia be gau badana. (Efeso 4:13) Unai dainai, Iesu be ena hahediba taudia dekenai ia gwau: “Umui lao, bese ibounai be diba tahua taudia do umui halaoa, bona Tamana, Natuna, Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia.”​—Mataio 28:​19, 20.

14. Tamana, Natuna, bona lauma helaga edia ladana dekenai bapatiso ita abia totona, dahaka ita diba guna?

¹⁴ Ta be Tamana ena ladana dekenai bapatiso ia abia ena anina be Iehova ena dagi bona ena siahu ia diba bona ia matauraia ia be Dirava, Gau Ibounai Havaraia Tauna, bona Guba bona Tanobada Edia Lohia Badana dainai. (Genese 17:1; 2 Hanua Pavapavadia 19:15; Apokalupo 4:11) Ta be Natuna ena ladana dekenai ia bapatiso, anina be ia ese Keriso ena dagi bona siahu ia abia dae, ia be siahu bada laumana, ia be Mesia Pavapavana, bona ia dekena amo Dirava ese taunimanima edia mauri davana ia karaia “taunimanima ibounai hamauria totona.” (1 Timoteo 2:​5, 6; Daniel 7:​13, 14; Filipi 2:​9-11) Ta be lauma helaga ena ladana dekenai ia bapatiso neganai, ia lalo-parara unai be Dirava ena gaukara siahuna, Iehova ese unai siahu ia gaukaralaia gau ibounai ia havaraia totona, bona Bible torea taudia hasiahudia totona, bona unai bamona gaukara ma haida ia karaia totona. (Genese 1:2; 2 Petero 1:21) Momokani, Dirava, Keriso, bona lauma helaga dekenai diba momo do ita abia be namo.

15. Dahaka dainai tau ta be ena abidadama kara do ia hahedinaraia guna bena gabeai bapatiso do ia abia be gau badana?

¹⁵ Ta ia do bapatiso lasi neganai, ia ese diba maoromaoro latanai abidadama karana ia hahedinaraia be gau badana. “Tau ta bema Dirava ia abidadama henia lasi neganai ia hegeregere lasi [Iehova] ena ura do ia badinaia.” (Heberu 11:6) Tau ta be Dirava, Keriso, bona Dirava ena ura dekenai ia abidadama neganai, ia ura Iehova ena Witness tauna ta ai ia lao, bona ia ura iena mauri lalonai Dirava ena Hereva ia badinaia, bona ia ura sivarai namona harorolaia gaukarana ia karaia. Ia ese Iehova ena pavapava lohia hairaina ena sivarai ia herevalaia.​—Salamo 145:​10-13; Mataio 24:14.

16. Helalo-kerehai ena anina be dahaka, bona ena anina Keristen bapatiso dekenai be dahaka?

¹⁶ Ta ia do bapatiso lasi neganai, ia helalo-kerehai be gau badana. Helalo-kerehai ena anina be ena “kara gunana (o ia karaia gwauraia karana) dekenai ena lalohadai ia haidaua, badina unai kara ia moalelaia lasi,” eiava anina be “ia lalohisihisi eiava ia sori ia karaia eiava ia karaia lasi karana dainai.” Keristen ginigunadia edia nega lalonai, Iuda taudia ese Iesu idia kara dika henia karana amo idia helalo-kerehai be gau badana. (Kara 3:​11-26) Korinto dekenai, abidadama taudia haida be guna idia sihari kava, kaivakuku idia tomadiho henia, idia heudahanai, tatau be tatau danu idia mahuta hebou, idia henaohenao, idia mataganigani, idia inuinu kekero, idia hereva dika henia, bona koikoi dalanai taunimanima edia kohu idia dadia; to unai kara amo idia helalo-kerehai. Unai dainai Iesu ena rarana dekenai sibodia idia “huria” bona idia goeva, Iehova ena hesiai gaukara karaia totona “helaga taudia” idia gwauraidia, bona “maoromaoro” taudia idia gwauraidia Iesu Keriso ena ladana dainai bona Dirava ena lauma dainai. (1 Korinto 6:​9-11) Unai dainai kara dika amo ita helalo-kerehai neganai, iseda lalona ena mamina be ia namo ia lao bona Dirava ia henia mauri namona ita abia dainai, iseda kara dika ita lalohisihisilaia hanaihanai lasi.​—1 Petero 3:21.

17. Lalona giroa lou ena anina be dahaka, bona unai anina be bapatiso ia abia gwauraia tauna be dahaka do ia karaia?

¹⁷ Ta ese Iehova ena Witness tauna ai ia lao totona, bona bapatiso ia do abia lasi neganai, ena lalona ia hagiroa be gau badana. Tau ta be ena kara kerere ia dadaraia bona ena lalona ia hadaia kara maoromaoro sibona do ia karaia totona, bena murinai unai helalo-kerehai tauna be ena lalona ia giroa. Heberu bona Greek gado ai unai hereva ‘lalona giroa’ ena anina be “giroa lao, giroa lou, eiava lou lao.” Lauma dalanai, unai hereva ena anina be dala kererena ita rakatania bona Dirava dekenai ita giroa lou. (1 Hanua Pavapavadia 8:​33, 34) Iseda lalona giroa totona, gau badana be ‘kara do ita karaia iseda helalo-kerehai hamomokania totona,’ Dirava ena oda herevana ita badinaia, tomadiho koikoi ita rakatania, bona iseda kudouna ita hadibaia Iehova mo sibona ita tomadiho henia bona iena hesiai gaukara ita karaia totona. (Kara 26:20; Deuteronomi 30:​2, 8, 10; 1 Samuel 7:3) Unai bamona ita karaia totona namona be “kudouna matamatana bona lalona matamatana” ita abia, anina be lalohadai, kara, bona iseda mauri lalonai ita tahua gaudia do ita haidaua. (Esekiel 18:31) Mauri matamatana ena kara namodia ese Dirava ia ura henia lasi mauri gunana ena kara ena gabu idia abia. (Kolose 3:​5-14) Oibe, helalo-kerehai momokanina be tau ta ia doria ena ‘lalona ia giroa’ totona.​—Kara 3:19.

18. Dahaka dainai guriguri amo Dirava ita gwauhamata henia, bona unai bamona ita karaia ena anina be dahaka?

¹⁸ Ta be bapatiso ia do abia lasi neganai, guriguri amo Dirava dekenai gwauhamata herevana ia gwauraia be gau badana. (Luka 3:​21, 22 itaia danu.) Gwauhamata karaia ena anina be tau ta be ena mauri ia atoa helaga gaukarana do ia karaia totona. Bapatiso be mai anina bada karana, unai dainai namona be guriguri amo iseda ura Dirava dekenai ita gwauraia, bona ita hamaoroa ita ura ia mo sibona ita tomadiho henia bona ena hesiai gaukara ita karaia ela bona hanaihanai. (Deuteronomi 5:​8, 9; 1 Sisiga 29:​10-13) Momokani, iseda gwauhamata be gaukara ta dekenai lasi, to ia be Dirava dekenai. Unai hereva be ia hedinarai goevagoeva Watch Tower Society ena presiden ginigunana, Charles Taze Russell, idia guria neganai. Unai be lagani 1916 dekenai, bona Society ena seketere-akaun tauna, W. E. Van Amburgh, ia gwau: “Tanobada ibounai dekenai idia karaia gaukara badana be tau tamona ese ia karaia lasi. Ia be gaukara badana momokani bona taunimanima ta be ia hegeregere lasi unai gaukara ia naria totona. Ia be Dirava ena gaukara bona do ia idau lasi. Idau negai ema bona hari, Dirava ese hesiai taudia momo ia gaukaralaidia bona gabeai ma haida do ia gaukaralaidia danu. Iseda gwauhamata herevana be tau ta dekenai lasi, eiava tau ta ena gaukara karaia totona lasi, to ita gwauhamata Dirava ena ura ita karaia totona, Ia ese Iena Hereva bona hakaua dalana amo ita ia hadibaia hegeregerena. Dirava be inai gaukara ia do taria noho.” To gwauhamata herevana Dirava dekenai ita henia neganai, ma dahaka do ita karaia danu?

19. (a) Taunimanima be edena bamona idia hahedinaraia idia ese Iehova dekenai gwauhamata idia karaia vadaeni? (b) Ranu dekenai bapatiso abia ese dahaka ia laulaulaia?

¹⁹ Ta ese bapatiso ia abia neganai, unai ese ia hahedinaraia Iehova dekenai ia gwauhamata vadaeni. Ta ese ranu dekenai bapatiso ia abia neganai, unai ese ia hahedinaraia ia ese Iesu Keriso dekena amo Iehova Dirava dekenai gwauhamata herevana ia karaia vadaeni. (Mataio 16:24 itaia danu.) Bapatiso tauna be ranu lalonai idia “guria” bamona bena ranu amo idia abia isi, unai be toa ta; ia hahedinaraia ena mauri dalana gunana ia masetania bona ia toreisi lou, mauri dalana matamatana do ia rakalaia Iehova ena ura do ia karaia guguru totona. (Roma 6:​4-6 itaia danu.) Iesu be bapatiso ia abia neganai, sibona ia henia ena guba Tamana dekenai iena ura ia karaia totona. (Mataio 3:​13-17) Bona Buka Helaga dekenai nega momo ia hedinarai abidadama taudia ese bapatiso idia abia be maoro. (Kara 8:13; 16:​27-34; 18:8) Unai dainai, kamonai taudia sibodia, abidadama idia hahedinaraia bona bapatiso idia abia taudia unai, be Iehova ena Witness taudia ai idia lao diba.​—Kara 8:​26-39 itaia danu.

Gini Goada!

20. Edena Bible sivarai ese idia hamomokania bema Dirava ia henia mauri namona dainai ita gini goada bona Iehova ena bapatiso Witness tauna ta ai ita lao neganai, hahenamo do ita abia?

²⁰ Bema Dirava ia henia mauri namona dekenai oi gini goada noho bona oi be Iehova ena bapatiso Witness tauna ta ai oi lao, ia ese oi do ia hanamoa, idau negai iena hesiai taudia ia hanamodia bamona. Hegeregere, Iehova ese buruka taudia Abraham bona Sara dekenai Dirava ia gari henia natuna ta, Isako, ia henidia. Mai ena abidadama dainai peroveta tauna Mose ia ura Dirava ena bese taudia danu do ia hisihisi hebou be namo, “kara dika ena moale, nega daudau lasi idia noho gaudia be ia ura lasi. Mose [ia ese Iesu ia laulaulaia] ia laloa, Keriso [eiava Dirava ena Horoa Tauna] dainai hemarai bona hisihisi do ia abia be namo. To Aigupito ena kohu momo ia abia be dika. Badina be Dirava do ia henia davana namona ia laloa.” (Heberu 11:​24-26) Mose ia abia hahenamo be inai: Iehova ese Mose ia gaukaralaia Israel taudia be Aigupito ena igui hesiai gaukarana amo ia hakaudia lao totona. Ma danu, mai ena abidadama ida Dirava ena hesiai gaukara ia karaia dainai, toreisi lou do ia abia bona Mose Badana, Iesu Keriso, ena siahu henunai ia be “tanobada ibounai lalonai lohia taudia” ta ai do ia lao.​—Salamo 45:16; Deuteronomi 18:​17-19.

21. Ita idia hagoadaia totona idau negai idia noho hahinedia haida edia sivarai haida be dahaka?

²¹ Hari inai nega lalonai, gwauhamata Keristen taudia ese idau negai idia ruhaia bona idia moale hahinedia edia sivarai idia laloa neganai goada do idia abia diba. Idia ta be Moab hahine, Ruta. Ia be vabu ena lalohisihisina ia abia bona danu Dirava ese ia ruhaia tomadiho koikoi amo dainai moale ia abia. Ia be ena varavara bona ena dirava koikoidia ia rakatanidia, bona ena ravana vabuna, Naomi, ia bamoa. Ia gwau: “Oi lao gabuna lau danu do lau lao, bona do oi noho gabuna danu do lau noho; oiemu bese be lauegu bese ai do ia lao, bona oiemu Dirava be lauegu Dirava ai do ia lao.” (Ruta 1:16) Gabeai ia be Boa adavana dainai, Ruta be Obed ia havaraia, unai be David ena tubuna. (Ruta 4:​13-17) Oibe, Iehova ese unai Israel lasi manau hahinena dekenai “davana namona” ia henia, ia be Mesia, Iesu unai, ena tubuna hahinena ai ia lao! (Ruta 2:12) Ruta be do ia toreisi lou bona unai sivarai do ia kamonai neganai do ia moale bada herea! Ariara hahine Rahaba be sihari kava bona tomadiho koikoi karana amo ruhaia dalana ia davaria, bona Bataseba be ena kara dika amo ia helalo-kerehai; bona unai hahine rua be idia toreisi lou neganai bona idia kamonai neganai Iehova ese dala ia koua lasi idia be Iesu Keriso ena tubuna hahinedia ai idia lao totona, reana do idia moale bada herea danu.​—Mataio 1:​1-6, 16.

22. Murina sivarai dekenai dahaka do idia kikilaia?

²² Dirava be mauri namona ia henia taudia edia namba be momo herea. Hegeregere, unai abidadama tatau bona hahine haida edia ladana be Heberu karoa 11 dekenai idia torea. Idia be hisihisi bona dagedage idia davaria, bona “tanobada noho taudia edia kara be hegeregere lasi unai abidadama taudia edia huanai do idia noho.” Danu unai taudia haida be Keriso ena nega lalonai idia noho abidadama hahediba taudia, bona unai nega amo ia mai hari idia noho abidadama taudia, bona hari inai nega lalonai Iehova ena hesiai gaukara idia karaia Witness taudia milion haida danu. Murina sivarai dekenai do ita itaia, bema idia danu oi gini bona Dirava ese ia henia mauri namona oi dogoatao noho, emu moale ena badina do idia momo.

Edena Bamona Do Oi Haere?

◻ Dirava ia henia mauri namona idia haboioa neganai, Dirava ese dahaka helaro namona ia gwauraia?

◻ Keriso ese iena hahediba taudia be edena “igui hesiai” karana amo ia ruhadia?

◻ Iehova ena Witness ta ai do oi lao totona, dahaka do oi karaia guna bena gabeai bapatiso do oi abia?

◻ Bible lalonai edena sivarai ese idia hamomokania bema Dirava ia henia mauri namona dekenai ita gini goada noho neganai, hahenamo do ita abia?

[Picture on page 16]

Iehova ena Witness ta ai do oi lao totona, dahaka do oi karaia guna bena gabeai bapatiso do oi abia?