Umui Mai “Diari Loalaia Taudia” Edia Distrik Hebouhebou Ai

“ITAIA! Dibura ese tanobada do ia koua, bona dibura masemase ese tanobada besedia do ia koua.” (Isaia 60:2) Hari inai negai, unai hereva be ia momokani! Ita diba momokani, tomadiho koikoi ese taunimanima be dibura dekenai idia atoa, bona Dirava ese ia moalelaia tomadihona idia laloa bada lasi. Badina be dahaka? Badina inai tanobada ena dirava Satana, “ese edia lalona ia hadiburaia.”​—2 Korinto 4:4.

Iehova ena Witness taudia be idau momokani, badina Satana ese edia lalona ia hadiburaia lasi. Idia dekenai peroveta tauna Isaia ena hereva ita gwauraia diba, ia gwau: “Iehova ese oi do ia hadiaria, bona ia sibona ena hairai be oi latanai do ia hedinarai.” (Isaia 60:2) Idia moale bada herea badina dibura amo idia raka lasi, bona Dirava ena diari namona dekenai idia vareai! Unai be lauma diarina, Dirava ena Hereva momokani ese taunimanima edia lalona ia hadiaria, unai dainai matana idia kepulu momokani taudia danu ese hereva momokani idia itaia diba.

Momokani, heduru ita abia be gau badana. Bema ta be Bible sibona ia duahia to Dirava ena amo heduru bukadia ia duahidia lasi neganai, diari ia abia diba lasi. Unai dainai, Iehova ese “hesiai tauna mai ena kamonai bona mai ena kara maoromaoro” oreana ia henia ita ia durua totona, Mataio 24:​45-47 ese ia perovetalaia bamona. Hari inai nega lalonai, unai “hesiai tauna” be Iehova ena Witness taudia edia Hakaua Oreana amo idia hereva. Unai Hakaua Oreana ena naria siahuna henunai, idia ese “Diari Loalaia Taudia” Distrik Hebouhebouna idia hegaegaelaia.

Unai hebouhebou ena badina be Iehova ena taunimanima ibounai idia durudia diari loalaia taudia namodia ai do idia lao totona, Paulo ena hereva Filipi 2:​15 ese ia hahedinaraia hegeregerena. Unuseniai Keristen taudia ia hagoadaia “diari do idia loalaia tanobada dekenai.”​—Mataio 5:​14, 16, NW.

United States dekenai, “Diari Loalaia Taudia” edia Distrik Hebouheboudia be Friday, June 5, ai do idia hamatamaia. Daba 10:20 a.m. dekenai, miusik ese taunimanima do ia durudia edia kudou bona darana do idia hegaegaelaia lauma gaudia edia program do idia abia namonamo totona. Dina ta ta be mai edia hereva kwarana ta ta Friday ena hereva kwarana be “Oiemu Diari bona Emu Hereva Momokani Oi Siaia Mai.”​—Salamo 43:3.

Friday daba ena program ese Hebouhebou ena hereva badana, “Diari Ita Loalaia​—Badina be Dahaka?” do ia herevalaia. Momokani, ita gwau lasi Keristen taudia be diari idia loalaia sibodia edia ura idia tahua dainai. To idia ese Iesu Keriso ena gaukara idia tohotohoa, tanobada dekenai ia be Diari Loalaia Tauna Badana, ia ese hereva momokani ia gwauraia hedinarai bona Havaraia Tauna ia hahairaia totona. Ia maoro Iesu be sibona ia gwauraia, ia gwau: “Tanobada dekenai lau noho neganai lau be tanobada ena diari.” (Ioane 9:5) Unai dainai, ia ese haheitalai namona ia karaia iena aena murinai ita raka totona. (1 Petero 2:21) Dina ginigunana ena adorahi dekenai, hereva ta bona Bible drama ta do idia halasia, unai be Pavapava Iosia ena drama, bona memero kekeni ese do idia ura henia bada.

Saturday ena hereva kwarana be “Umui be Tanobada Ena Diari . . . Emui Diari . . . Umui Hedinaraia.” (Mataio 5:​14, 16) Daba ena program hereva badana be “Emui Diari Umui Hahedinaraia Noho.” Iehova dekenai idia gwauhamata taudia be do idia hegaegae bapatiso do idia abia totona. Adorahi ena program ai be hereva namo herea ta do idia halasia, ena ladana be “Keriso Ena Lou Mai Negana bona Do Ia Hedinarai Dinana Hadiaridia.”

Hebouhebou ena dina dokona, dina namba 3 ai, Sunday ena hereva kwarana be “Diari Ena Natuna Hegeregeredia Umui Raka Noho.” (Efeso 5:8, NW) Daba ena program ena hereva ta be “Keristen Ruma Besena Lalonai Heduru Heheni Dalana.” Unai be ruma bese ena maduna idauidau do ia kikilaia. Bona hereva ta ese do ia hahedinaraia Dirava bona Iesu do ita kamonai henidia ena anina be dahaka.

Sunday adorahi dekenai, hebouhebou ena hereva badana, pablik tok ta do ita kamonai, ena ladana be “Tanobada Ena Diari Umui Badinaia Noho.” Unai hereva lalonai Ioane 1:​1-16 do idia kikilaia, Bible ena diba abia be gau badana do idia hahedinaraia, bona Iesu Keriso be inai tanobada ena diari do idia gwauraia bada. Hebouhebou be hagoadaia herevana ta amo do idia koua, ena ladana be “Diari Lalonai Umui Raka Noho.”

Namona be Dirava ese ena tanobada oreana amo ia hegaegaelaia lauma ariana oi moalelaia karana oi hahedinaraia. Namona be Friday ena hamatamaia anena ia lao Sunday adorahi ena koua gurigurina dekenai oi noho. Platfom amo idia gwauraia herevadia ibounai oi kamonai henidia namonamo be gau badana. Namona be nout haida umui torea umui kamonai namonamo totona, bona vaira dinadia do umui itaia lou totona. Danu, namona be sibona oi henia volantia gaukara oi karaia totona. Unai amo abia karana sibona do oi moalelaia lasi, to henia karana ena hahenamo bada do oi davaria danu.​—Kara 20:35.