Hahenamo Momo “Diari Loalaia Taudia” Distrik Hebouhebou Ai
LAGANI 2,700 bamona gunanai, peroveta tauna Isaia ese inai hereva ia torea, ia gwau: “Itaia! dibura ese tanobada do ia koua, bona dibura masemase ese tanobada besedia danu do ia koudia.” (Isaia 60:2) Ia hedinarai goevagoeva unai hereva be ia momokani! To, helaro ia noho, badina Iehova ese diari ia hahedinaraia. Lagani gunanai, Dirava ena diari idia ura henia taudia idia boiridia “Diari Loalaia Taudia” edia Distrik Hebouhebou dekenai do idia mai totona.
June lalonai unai hebouhebou ena program be North America dekenai idia karaia hamatamaia. Bona murina pura lalodiai East bona West Europe, Central bona South America, Africa, Asia, bona davara motumotudia dekenai unai program idia karaia. Unai hebouhebou dekenai idia lao taudia edia namba be milion momo. Bona lauma aniani bada herea idia moalelaia!
“Diari Loalaia Taudia E, Namo!”
Gabu momo dekenai, unai hebouhebou idia hamatamaia Friday dinanai bona Sunday adorahi idia hadokoa. Hebouhebou taudia be Friday dabai idia helai hegaegae bona hereva ginigunana ese hari inai nega dokona lalonai Iehova ena diari ia bada ia lao sivaraina idia kamonai henia. Murinai, hebouhebou ena seamani ese ena hereva ia henia. Ia hahedinaraia goevagoeva Keristen momokani taudia ese diari idia loalaia be gau badana, bona mai moale danu ia gwau: “Diari loalaia taudia e, namo!” Hebouhebou ena program ese hebouhebou taudia iboudiai ia durudia Iehova ena diari idia hahedinaraia noho totona.
Hebouhebou ena hereva badana ese hebouhebou ena badina ia hahedinaraia. Unai hereva ia henia tadikakana ese hebouhebou dekenai idia mai taudia ia hamaorodia Eden umana dekenai taunimanima edia helaro ia ore, diari ia bodo bamona. Unai nega amo ia mai hari, Satana ese taunimanima edia matadia ia hadiburaia hereva momokani do idia itaia lasi totona. (2 Korinto 4:4) To, Iesu ia mai bona ia be “tanobada bese edia diari.” (Isaia 42:1-6) Ia ese tomadiho ena koikoi karadia, dibura ena kara dikadia ia hahedinaraia, bona Iehova ena lohia dalana ena maoro ia abia dae, bona Basileia ena sivarai namona ia harorolaia. Gunaguna bona hari danu—Iesu murinai idia raka taudia be unai bamona idia karaia! (Mataio 28:19, 20) Mai goada danu hereva henia tauna ia gwau: ‘Iesu bamona, ita danu be diari loalaia taudia ai ita lao diba. Hari inai nega lalonai unai gaukara ena namo ese gaukara iboudiai edia namo ia hanaia. Bona unai gaukara ita karaia be hahenamo bada.’
Hebouhebou ena daba ginigunana edia hereva idia hadokoa neganai, moale gauna ta ia vara. Hebouhebou ena seamani ia raka lasi bona Society ese ia halasia pepapepa matamatadia hani ia hahedinaraia. Hebouhebou taudia be mai moale danu edia imadia idia hapatapataia, bona hebouhebou taudia iboudiai dekenai unai pepapepa hani idia abia.
Friday adorahi ai, hebouhebou ena program dekenai, diari loalaia Keristen taudia dekenai sisiba idia henia. Hereva ginigunadia rua dekena amo sisiba namodia idia henia inai dibura tanobadana ese ita ia hadikaia garina. Satana ese ia hahedinaraia ia be diari aneruna bamona, unai dainai, gau badana be lauma dalanai ita goada, namo lasi tanobada ena miro karadia ese ita idia hadikaia. (2 Korinto 11:14) Paulo ena sisiba be inai: “Inai tanobada taudia edia kara bamona do umui karaia lasi, to Dirava ese emui lalona do ia hagiroa, do idia matamata, bona idau momokani. Unai dekena amo Dirava ena ura be do umui diba momokani. Do umui diba edena kara be namo, edena kara Dirava ia ura henia, bona edena kara be goeva momokani.” (Roma 12:2) Hebouhebou taudia idia kamonai herevana ese ia hahedinaraia, Keristen taudia edia lalona idia hamatamataia karana be do idia karaia noho karana. Dirava ena Hereva ita stadilaia bona ita badinaia noho lalonai, iseda lalona be hanaihanai ita hagoevaia bona ita haidaua noho. Unai dala amo, Iesu bamona ai ita lao, ia be ‘hebogahisi bona hereva momokani amo ia honu momokani.’—Ioane 1:14.
Diari Loalaia Memero Kekeni
Friday adorahi dekenai hereva haida idia henia memero kekeni durudia totona. Hereva ginigunana lalonai, (“Memero Kekeni e, Dahaka Umui Gavaia Noho?”) ese mai edia abidadama Keristen memero kekeni ia hanamodia idia be haheitalai namodia dainai. To danu ia hahedinaraia namona be idia laloaboio lasi, Satana be ia ura dikadika idia ia hadikaia. Ena be tau ta be spot gadara ia diba momo, to ta ese ia hadibaia noho be gau badana. Unai hegeregerena, memero kekeni be edia tamana bona sinana dekena amo heduru idia abia be gau badana, unai neganai diari lalonai idia raka noho diba.
Friday program hadokoa totona, Dirava Vairanai Ita Kara Maoromaoro, ena drama namona lalona unai idia hahedinaraia goevagoeva. Unai drama ese Pavapava Iosia ena haheitalai namona ia hahedinaraia. Ena mero maragi negana amo ena lalona ia hadaia Iehova ena hesiai gaukara ia karaia totona. Kara dikadia momo ese idia veria diba, to hahelaga tauna Hilkaia ese ia hakaua namonamo dainai bona ia ese Dirava ena Taravatu ia ura henia bada dainai, Iosia ia kara maoromaoro Iehova vairanai. Namona be hari inai nega lalonai memero kekeni momo be unai bamona idia karaia danu.
Diari Hahedinaraia
Friday hanuaboi ai idia mahuta namonamo, bena Saturday dabai hebouhebou ai idia giroa lao bona idia hegaegae Baibel dekena amo hagoadaia sisiba hereva ma haida do idia kamonai henia totona. Bona unai ia vara. Dina ena siri idia kamonai henia murinai, unai program ena hereva haida amo Keristen tauna ese ena diari ia hahedinaraia dala idauidau ia gwauraia. (Mataio 5:14-16) Dala badana ta be haroro gaukara amo, bona kara namo danu be gau badana. Hereva ia henia tauna ia gwau, “haroro gaukara amo taunimanima ita hadibaia dahaka ita abidadama henia, to lalokau hahedinaraia karana ese unai ia hamomokania.”
Hebouhebou taudia idia laloa bada totona idia ese heduru bada gaudia idia kikilaia—unai be pepapepa. Dina gunana dekenai unai pepapepa matamatadia idia halasia idia do laloa noho, bona hari idia kamonai henia ekspiriens haida ese idia hahedinaraia unai pepapepa maragidia edia siahu be bada. Hebouhebou taudia idia hagoadaia unai pepapepa be nega ibounai idia dekenai idia noho totona, unai neganai idia hegaegae noho idia haroro totona.
Murinai, pioneer taudia totona hereva idia kamonai, nega ibounai Basileia idia harorolaia goadagoada diari idia hahedinaraia totona. Iseda pioneer taudia idia gaukara goadagoada dainai ita moale idia dekenai! Bona edia namba be ia bada ia lao. Ena be tano haida dekenai hari sibona dala ia kehoa taravatu lasi dekenai tomadiho idia karaia diba, to unai gabu dekediai pioneer taudia edia namba be ia bada ia lao. Pioneer taudia ese hagoadaia hereva idia kamonai edia gaukara idia laloa bada totona. Pioneer gaukara idia do karaia lasi taudia idia hagoadaia unai gaukara idia laloa totona. Reana dala idia hegaegaelaia diba nega ibounai hesiai gaukarana amo edia diari idia hahedinaraia bada totona.
Diari loalaia totona, nega momo iseda ura haida ita reaia, bona murinai idia henia hereva ese unai ia hahedinaraia, ena ladana be, “Sibomu emu Ura Oi Dadaraia, Iehova Oi Hesiai Henia.” Paulo ia noinoi inai bamona: “Emui tauanina umui henia Dirava dekenai. Boubou gauna bamona do umui henia, mai mauri bona mai helaga danu, Dirava umui dekenai do ia moale totona.” (Roma 12:1) Dagedage karadia idia haheaukalaia taudia be sibodia edia ura reaia karana idia hahedinaraia. Dina ta ta iboudiai pioneer taudia be sibodia edia ura idia reaia nega ibounai hesiai gaukarana idia karaia noho totona. Oibe, Keristen momokani taudia iboudiai ese edia ura haida idia reaia, idia ese Iehova ena hesiai gaukara idia goadalaia, idia ura lasi inai tanobada ena kara, hegeregere sibodia edia ura bona kohu momo tahua karadia idia karaia. Unai bamona kara amo Iehova ena hahenamo momo idia davaria.
Unai hereva murinai ma hereva ta idia henia—bapatiso herevana. “Diari Loalaia Taudia” Distrik Hebouhebouna ta dekenai bapatiso idia abia taudia ese unai hereva do idia laloaboio diba lasi. Edia mauri lalonai bapatiso idia abia be mai anina bada gauna ta. Hereva henia tauna ia hahedinaraia idia be Iesu Keriso ena kara idia tohotohoa, ena mauri lagani ia 30 neganai bapatiso ia abia. Ma danu, bapatiso idia abia taudia idia moale badina hereva henia tauna ia hahedinaraia idia be ‘dibura ena kara idia negea,’ bona edia lalona idia hadaia ‘Iehova ena gaukara’ idia karaia totona. (Roma 12:11; 13:12) Mai moale danu, hebouhebou taudia vairanai idia gini toreisi bona gado badana amo henanadai idia haerelaia murinai idia raka oho bapatiso do idia abia totona. (Roma 10:10) Ai guriguri Iehova ese “Diari Loalaia Taudia” Distrik Hebouheboudia dekenai idia gwauhamata bona ranu amo bapatiso idia abia taudia do ia hanamodia totona.
Saturday adorahi ai, sisiba aukadia idia henia. Hereva haida amo unai sisiba idia henia, edia ladana be “Mataganigani ena Tarapu amo Raka Siri,” “Ta ese Emu Kara Namo Ia Hadikaia Noho, A?” bona “Naria Namonamo, Gau ta be Kaivakuku ta Bamona Do Oi Laloa Bada Garina.” Unai hereva toi lalonai Satana ese ia gaukaralaia gaudia Keristen taudia hamanokaia totona idia hahedinaraia. Iuda Iskariota be aposetolo tauna ta, to Iesu ia samania moni ia abia totona. Mero matamata, Samuel, ia tubu daekau Iehova ena tomadiho rumana dekenai, to unuseniai hebamo dikadia idia noho. (1 Samuel 2:12, 18-20) Kaivakuku bamona tomadiho henia kara haida be sihari kava bona haida edia kohu ura henia dikadika karadia. (Efeso 5:5; Kolose 3:5) Oibe, mataganigani, hebamo dikadia, bona kaivakuku tomadiho henia karadia be dika bona ita dadaraidia be gau badana.
Murinai, hebouhebou dekenai idia henia herevadia be idia idau. Idia henia herevadia dekenai Baibel amo henanadai haida idia gwauraia bona edia haere idia hahedinaraia. Hegeregere, hisihisi badana ia do mai lasi neganai hereva momokani idia dadaraia taudia bema idia mase, do idia toreisi lou, a? Keristen memero eiava kekeni be idia ura headava neganai to idia adavaia diba turana namona ta idia davaria lasi, dahaka do idia karaia? Edia diba Baibel dekenai do idia habadaia totona, hebouhebou taudia idia hagoadaia Watch Tower Publications Index buka, “Questions From Readers” kwarana henunai idia torea sivaraidia do idia tahua totona.
Keriso Ena Noho Negana bona Do Ia Hedinarai Negana
Saturday adorahi program ena hereva dokodia ese peroveta herevadia idia kikilaia, edia ladana be “Keriso Ena Noho Negana bona Do Ia Hedinarai Negana.” Iesu Keriso ena noho negana ia hamomokanilaia “toana” idia riviulaia. (Mataio 24:3) Hereva namba 2 dekenai hari inai negai “hesiai tauna mai ena kamonai bona mai ena kara maoromaoro” oreana ena gaukara ia kikilaia. (Mataio 24:45-47) Ia hahedinaraia lagani 1919 dekena amo unai hesiai taudia be mai abidadama danu Basileia ena sivarai namona harorolaia gaukarana idia biagua. Bena murinai bese ibounai amo hutuma bada herea taudia idia gogodia bona idia be horoa Keristen taudia ida Iehova ena diari idia hahedinaraia hebou. Hereva henia tauna be ena hereva dokona dekenai ia gwau: “Namona be ita ibounai be hesiai tauna mai ena kamonai bona mai ena kara maoromaoro oreana ita durua goadagoada noho. Unai dala sibona amo mamoe bamona taudia be inai moale herevana do idia kamonai henia diba: ‘Umui mai, egu Tamana ese ia hanamoa taudia e, basileia umui abia, tanobada ia karaia neganai ia ese ia karaia hegaegae umui emui.’ ”—Mataio 25:34.[4]
Hereva dokona ia henia tauna ese Iesu Keriso do ia hedinarai negana ena anina bona dahaka do ia vara ia kikilaia. (1 Korinto 1:7) Do ia hedinarai negana be moale gauna momokani! Babulono Badana do ia ore vaitani. Inai tanobada do ia ore neganai Satana ena tanobada bona Iesu bona ena aneru edia hepapahuahu do ia ore. Bena murinai, Satana be guri dobu masemase gabuna dekenai do idia negea bona dika do ia havaraia diba lasi. To, Dirava ena taunimanima be do idia moale, badina be guba dekenai Mamoe do ia headava bona tanobada matamatana do ia havaraia. Hereva henia tauna ese idia halasia buklet matamata ladana Dirava Ese Ita Ia Laloa Eiava? ia hahedinaraia neganai, hebouhebou taudia idia moale bada. Unai buklet ese manau taudia ia durudia gau ibounai ia Havaraia Diravana ena lalokau bona ena ura ita dekenai do idia diba totona!
Keristen Ruma Besedia
Sunday, hebouhebou ena dina dokona ia ginidae. To, hereva momo idia do noho. Dina ena siri idia kikilaia, bena murina hereva haida ese Keristen ruma bese naria dalana idia hahedinaraia, ena ladana be “Keristen Ruma Besena Lalonai Helalo Heheni.” Hereva ginigunana ese hebouhebou taudia ia durudia bena idia diba Keristen ruma bese namona abia dalana be: edia mauri lalonai lauma gaudia do idia atoa guna. Hereva iharuana ese ruma bese taudia ia hagoadaia do idia gaukara hebou totona, herevana unai be hebou lao henia, idia lao haroro, ruma bese stadi idia karaia, eiava moale karana idia karaia. Bona hereva ihatoina ese hebouhebou taudia ia hadibaia namona be idia laloaboio lasi edia maduna bona edia gaukara be buruka taudia idia durudia. Hereva henia tauna ia gwau: “Iseda buruka tadikaka bona taihu ese kongregesen idia durua bada.” Namona be edia aonega ita laloa bada bona edia abidadama kara ita tohotohoa.
Murinai “laloa namonamo” ena anina idia kikilaia. (1 Petero 4:7) Ia laloa namonamo tauna ena kara be maoro, namo, hegeregere, manau, bona ena kara ia sikeilia namonamo. Ia be maoro bona dika, bona momokani bona koikoi karadia edia idau ia diba. Ma danu, ia goada karaia lauma dalanai ia gorere lasi totona.
Sunday daba ena program ena hereva dokona ai, ita be Dirava bona Keriso henunai ita noho ia hahedinaraia. Hereva henia tauna ia gwau: “Mai abidadama danu ita be Iehova Dirava bona iena Natuna, Iesu Keriso henunai ita noho be mai anina bada.” Ma ia hahedinaraia unai be mai anina iseda mauri ibounai lalonai. Dahaka ese ita ia durua idia ita badinaia noho totona? Gau hani ese: lalokau, Dirava gari henia, abidadama, bona manau karadia.
Sunday Adorahi
Kara haraga Sunday adorahi ia ginidae bona hebouhebou ena kahana ginigabena ia matamaia. Momo idia laloa hebouhebou ia matamaia ela bona do ia doko ena nega be haraga herea ia ore.
Pablik tok ena ladana be “Tanobada ena Diari Gavaia.” Unai hereva ese hebouhebou taudia ia hadibaia diari korikori ita abia be gau badana ita mauri noho totona. Bena murinai ia hahedinaraia lauma dalanai diari ita abia be gau bada herea momokani. Diari korikori ese ita ia durua lagani haida sibona ita mauri totona, to lauma ena diari ese ita ia durua do ita mauri hanaihanai totona. Unai hereva ena namo be Ioane 1:1-16 ena siri ta ta iboudiai edia anina ia kikilaia, unai siri ese idia hahedinaraia Iesu be tanobada ena diari. Hari inai negai, inai tanobada dikana ena dina dokodia lalodiai, gau badana be Iesu ena kara ita tohotohoa.
Unai pura ena Gima Kohorona Stadi herevana idia kikilaia murinai, hereva dokona henia negana ia ginidae. To ita moale badina hereva henia tauna ese ia hahedinaraia dina vairai gau momo do ita moalelaidia. Hegeregere, ia gwau drama ena audiokaset matamatana, ladana be Doing God’s Will With Zeal idia halasia. To unai mo sibona lasi. Videokaset matamatadia edia ladana be The Bible—A Book of Fact and Prophecy, unai be The Bible—Accurate History, Reliable Prophecy ena kaset ginigunana.
Bena murinai hereva henia tauna ia gwau lagani 1993 ai, dina hani distrik hebouheboudia do ita abia, danu Africa, Asia, Europe, bona South America dekenai spesel intenesenel hebouheboudia do idia karaia. Ena be “Diari Loalaia Taudia” Distrik Hebouhebou ia doko gwauraia, to hebouhebou taudia idia hegaegae diba lagani vairai ena hebouhebou do idia lao henia totona.
Hebouhebou taudia be edia ruma dekenai do idia giroa lao negana ia ginidae. Momokani, ena be inai tanobada be dibura dekenai ia noho, to edia lalona idia hadaia vadaeni diari idia hahedinaraia noho totona. Dina toi lalodiai lauma dalanai hereva namodia momo idia kamonai henia, bona hereva henia tauna ese ia gwauraia siri dokona ena anina be bada herea, ia gwau: “Iehova be Dirava, bona diari ia henia ita dekenai. . . . Iehova umui hanamoa, umui taunimanima, badina ia be namo; badina ena lalokau-hebogahisina ia noho hanaihanai.”—Salamo 118:27, 29.
[Picture on page 15]
Hebouhebou ena program Russia edia gado ai
[Pictures on page 16, 17]
Hebouhebou momo dekenai Hakaua Oreana taudia ese hereva idia henia
Japan amo idia mai taudia be St. Petersburg, Russia ena hebouhebou ai idia lao
Bible drama namona ese ia hahedinaraia Iehova matanai ita kara maoro be gau badana
Diari loalaia taudia matamatadia ese edia gwauhamata Iehova dekenai be bapatiso amo idia hahedinaraia
St. Petersburg ai, hebouhebou taudia be program ena hereva idia kamonai henia namonamo
[Picture on page 18]
Hebouhebou taudia idia moale badina inai buklet matamatana idia abia dainai