“Dirava ese Ia Henia Tuari Dabua Ibounai Do Umui Atoa”

KERISTEN ese tuari kohudia idia atoa, a? Dahaka dainai idia ese tuari kohudia do idia dogoatao, a? Idia be maino lalokau henia taudia, ani? (2 Timoteo 2:24) Oibe. Keristen momokani taudia iboudiai be tuari ta lalonai idia vareai​—unai tuari ai do idia ala-ala lasi to idia kwalimu sibona.

Bema Satana ese gwau-edeede karana ia karaia lasi neganai unai tuari be do ia vara lasi. To ia gwau-edeede bona ia ese Adam bona Eva edia lalona ia ania bena ia danu nega tamona idia hepapahuahu hebou. Unai nega amo ia mai bona hari tanobada ena lohia ibounai be “Satani” Diabolo ena siahu henunai idia noho. (1 Ioane 5:19) Lohia korikorina, Lohiabada Iehova idia tomadiho henia taudia ese inai tanobada ena kara bona ena lohia edia siahu dikana do idia dadaraia momokani. Ema bona inai nega dokona ai, Keristen taudia be inai bamona hahegoada idia davaria: “Dirava ese ia henia tuari dabua ibounai do umui atoa, vadaeni do umui goada, Satani ena koikoi karadia do umui koua.”​—Efeso 6:11.

Tuari Dabuana

Ita itaia vadaeni siri ia gwau ita be “Dirava ese ita ia henia tuari dabua ibounai” do ita gaukaralaia, dika amo ita roho mauri totona. Namona be Paulo ese ia gwauraia tuari kohudia ta ta do ita laloa bona ita ta ta sibona ita tohoa ita be unai lauma tuari kohudia ita abia eiava.​—Efeso 6:​14-17.

“Vadaeni do umui gini goada, emui gabana dekenai hereva momokani ena beleta dekena amo do umui hagegea.” (Efeso 6:14a) Guna Bible idia torea negadiai tuari taudia edia gabana beleta ena lababa be 15 sentamita bamona. Unai beleta ese ena gabana ibounai ia koua goevagoeva. Bema tuari tauna ese unai beleta ia ha-aukaia neganai, unai anina be tuari totona ia hegaegae vadaeni.

Oibe tuari tauna ena beleta be hereva momokani danu ita hahegeregerea be maoro vaitani. Unai dainai ita ese Dirava ena Hereva momokanidia be ita badinaia namonamo beleta ita atoa bamona. Namona be ita ese Buka Helaga ena hereva ita lalohadailaia namonamo ita badinaia totona. Unai amo koikoi bona lalo-ani ese ita do ia hakaua kerere lasi. Oibe, Iehova ena hereva ese lauma dalanai ita do ia naria bona hagoadaia, bona iseda abidadama do ia hagoadaia.

“Emui kemena dekenai kara maoromaoro ena auri dabuana do umui atoa.” (Efeso 6:14b) Tuari tauna ena kesi ese tauanina ai gau badana​—ena kudouna unai​—ia koua. Vadaeni, Dirava ese ita ia henia lauma tuari kohuna ta, kara maoromaoro unai, ese iseda kudouna ia naria. Buka Helaga ena toretore ese ia hahedinaraia kudouna ese iseda lalona korikori ia laulaulaia​—hegeregere iseda hemami, lalohadai bona ura gaudia. Namona be ita ese Iehova ena ura hegeregerena kara maoromaoro ita karaia, badina Buka Helaga ena toretore ese ia hahedinaraia kudou ese kara dika ia ura henia momo. (Ieremia 17:9) Dirava kamonai henia karana be taunimanima ese do idia itaia totona ita karaia lasi to iseda lalona korikori amo ia mai be gau badana. Anina be ita ta ta ibounai ese kara namo do ita lalokau henia bada bona kara dika do ita inai henia momokani. (Salamo 45:7) Unai dala amo iseda kudouna do ita naria namonamo diba.

“Emui aena dekenai maino ena Sivarai Namona do umui atoa, tamaka bamona.” (Efeso 6:15) Emu aena dekenai unai bamona tamaka oi atoa, a? Emu aena ese oi ia abia lao nega ibounai sivarai namona harorolaia gaukara oi karaia totona, a? Oi be oi hekwarahi noho badina oi ura emu haroro bona hadibaia gaukara do oi hanamoa totona, a? Momokani, ita haroro gabudia haida ai kamonai taudia be momo lasi. Sedira haida idia ura lasi kamonai, haida idia ura lasi hereva ena anina idia tahua, bona haida idia badu. Oibe, iseda haroro gaukara dainai dagedage do ita davaria diba danu. To, haheauka ese Keristen tauna do ia durua boga-auka ia diba totona bena unai neganai ia ese Satana ena hahetoho ibounai do ia koua diba. Ena be dagedage ia davaria, to Paulo be ia haroro goadagoada, bona unai ese ita ia hagoadaia, ‘ia karaia bamona do ita karaia, Keriso ena kara ia karaia bamona.’​—1 Korinto 11:1.

Basileia haroro gaukara ita goadalaia neganai, unai ese iseda abidadama sivarai namona dekenai ia hagoadaia momokani. Bona unai ese danu dala ia kehoa Iehova ena lauma helaga ena heduru amo Iehova ena ura ita hagugurua totona. Oibe, unai bamona gaukara ai ita vareai neganai​—anina be aneru bona Iehova danu ita gaukara hebou. (1 Korinto 3:9; Apokalupo 14:6) Bona ‘Lohiabada ena gaukara do ita karaia goadagoada’ neganai, ‘do ita gini goada, do ita marere lasi.’ (1 Korinto 15:58) Momokani, unai be iseda henari gauna hereadaena!

“Nega ibounai abidadama, emui kesi bamona do umui abia loaloa.” (Efeso 6:16) Gunaguna, tuari tauna ese kesi badana ia gaukaralaia ia dekenai idia mai io bona diba koua totona. Bema unai kesi ia gaukaralaia lasi neganai bero badana o mase do ia davaria diba. Keristen taudia dekenai idia lao hahedika gaudia be “Satani ena diba bona peva mai lahi danu”, unai ese tuari kohudia ibounai ia hanaia momokani. Satani ese aonega dala idauidau ia gaukaralaia iseda abidadama hamanokaia totona bona lauma dalanai ita ia hamasea totona. Ia gaukaralaia daladia haida be dagedage, koikoi, tanobada taudia edia aonega herevadia, kohu ura henia, bona matabodaga ena lalo-ani karadia. Unai kara iboudiai amo ita roho mauri totona, kesi badana ita gaukaralaia be namo. Dika iseda tauanina sisina ita koua namonamo lasi dainai Satana ese ita do ia gwadaia.

Abraham bona ena adavana, Sara, ruaosi be abidadama ai idia gini goada momokani. Ena be idia rua be idia buruka vadaeni bona natuna havaraia negana be ia ore, to Dirava dekenai idia abidadama hanaihanai badina idia diba gwauhamata garana be ia ese idia rua edia amo do ia havaraia. Gabeai, Abraham ena abidadama be ia hedinarai goevagoeva ia ese Dirava ena hereva dainai ena natuna tamona ia lalokau henia hahine, Sara ena amo ia abia merona ia bouboulaia gwauraia neganai. Iehova ese Abraham imana ia dogoatao bona boubou gauna ma ta ia hahedinaraia. To Abraham be mai ena ura ibounai ida ia kamonai bona karana ia ura karaia. Dahaka dainai? Iehova dekenai ia abidadama momokani dainai ia lalo-parara Iehova ese ena natuna do ia hamauria lou bona mero latanai ia gwauhamatalaia gauna be do ia hagugurua.​—Roma 4:​16-21; Heberu 11:​11, 12, 17-19.

Mose ena abidadama danu be ita ese do ita tohotohoa gauna. Ia ese Aigupito ena kohu bona moni ia dadaraia Dirava ena taunimanima danu ia hisihisi hebou totona. Badina be dahaka? Badina ia diba momokani Iehova ia noho, bona ia lalo-parara Iehova ese Israel besena be hesiai gaukara amo do ia hamauridia. Mose ena abidadama be ia auka momokani dainai “ita itaia diba lasi Diravana, be Mose ena matana dekenai ia itaia bamona.”​—Heberu 11:​6, 24-27.

Iseda abidadama Iehova dekenai be unai bamona, a? Iseda hebamo karana Iehova dekenai be ia namo herea hegeregere ia be iseda matana dekenai ita itaia bamona, a? Ita ura eda kohu eiava ura ita dadaraia eiava ita ura dika ita haheaukalaia Dirava ita hebamo henia noho totona, a? Iehova dekenai ita abidadama momokani, a? (Heberu 11:1) Bema ita gwau io neganai, Satana ena diba bona peva mai lahi danu ese iseda abidadama kesina do idia hamakohia diba lasi.

“Bona hahemauri do umui abia dae, emui tuari kwara gauna bamona.” (Efeso 6:17a) Tuari tauna ena kwara gauna ese ena kwarana bona kwarana ena harana​—lalohadai havaraia gauna unai, ia koua. Keristen tauna ta ena helaro hahemauri ai be unai kwara gauna ta bamona, badina helaro ese iseda lalona ia naria. Keristen tauna ena lalona be hereva momokani ese ia hamatamataia, to unai lalona be ia manoka bona ia goevadae lasi tauanina lalonai ia noho. (Roma 7:18; 12:2) Bema iseda lalona be inai tanobada ena abidadama hamanokaia miro lalohadai amo ita hahonua neganai, unai ese iseda helaro hahemauri ai do ia hadikaia bona do ia kokia diba. To bema ita ese eda lalona be Dirava ena Hereva ena abidadama hagoadaia gaudia amo ita hahonua neganai, iseda helaro be do ia marere diba lasi. Oi ese emu hahemauri ena kwara gauna be oi atoa namonamo, a?

“Lauma Helaga ena tuari kaia danu do umui dogoatao. Ia be Dirava ena hereva.” (Efeso 6:17b) Taunimanima idia gwau tuari neganai namona be mai aonega danu oi tuari. Keristen ena tuari ai unai hereva be ia momokani vaitani. Iseda aena ai maino ena sivarai namona tamakana ita atoa bona Dirava momokanina idia diba lasi taudia padadiai ita raka, to iseda tuari kohudia be momo. Dirava ena Hereva, Bible, be iseda tuari kaia goadana bona ia ese lauma dalanai koikoi hereva bona lalohadai kerere ibounai do ia utua momokani, bena unai amo kudou-maoro taudia be lauma dalanai do idia ruhaia bona mauri namona do idia abia.​—Ioane 8:​31, 32.

Iesu ese unai tuari kohuna ena siahu ia hahedinaraia Satana Diabolo danu ia heai neganai. Satana ese nega toi ia dibagania neganai, Iesu ese Dirava ena Hereva amo Satana ia koua, badina inai bamona ia gwau: “Buka Helaga lalonai ia torea vadaeni.” (Mataio 4:​1-11) Bema ita ese unai kaia be mai aonega danu ita gaukaralaia neganai, manau taudia momo do ita durudia diba Satana ena siahu henuna amo idia siri totona. Danu, haida ese tadikaka manokadia edia lalona idia ania bona edia abidadama idia hamanokaia garina, kongregesen elda taudia ese Dirava ena Hereva idia gaukaralaia mamoe naridia totona.​—Kara 20:​28-30.

Tuari tauna ese tuari kaia gaukaralaia dalana ia diba haraga lasi. Ia ese nega bada do ia negea unai kaia davea namonamo dalana do ia karaia loulou ela bona ia diba momokani. Lauma ena tuari danu be unai bamona, stadi bona haroro gaukara karaia loulou karana amo Dirava ena Hereva do ita gaukaralaia diba mai aonega danu. Gau badana be ita ta ta ibounai do ita hekwarahi lauma ena tuari kaia ita gaukaralaia namonamo totona, bena “oi ese hereva momokani do oi hadibaia maoromaoro.”​—2 Timoteo 2:15.

Umui Guriguri Noho, Umui Gini Goada

Lauma tuari dabua ena kohu ta ta ibounai ese ita idia durua Dirava ita abidadama henia noho totona. To edena dala ai ita ese unai tuari dabua do ita atoa hanaihanai diba? Nega ibounai Bible ita duahia, Keristen hebou ibounai totona ita hegaegae guna, hebou ena hereva ibounai danu ita hakala henia namonamo bona hebou ena gaukara idauidau ai ita vareai danu. Unai ese ita do ia durua tuari dabua be iseda kopina dekenai do ia noho hanaihanai totona. (2 Timoteo 3:16; Heberu 10:​24, 25) Bema nega ibounai haroro gaukara ita goadalaia bona Keristen tadikaka danu ita hebamo neganai, iseda lauma tuari ai do ita kwalimu diba.​—Hereva Lada-isidia 13:20; Roma 15:​15, 16; 1 Korinto 15:33.

Gau badana ta be lalohadai maoromaoro ita abia. Ita ese inai tanobada ena lebulebu karadia ibounai do ita dadaraia. Namona be iseda ‘matana ia namo.’ (Mataio 6:​19-24) Oibe, namona be Iesu Keriso ena haheitalai ita tohotohoa, ia ese kara maoromaoro ia lalokau henia bona kara dika ia inai henia momokani. (Heberu 1:9) Unai gaudia ibounai ese ita idia durua Dirava ese ia henia lauma ena tuari dabua do ita atoa hanaihanai totona.

Lauma ena tuari dabua ta ta ibounai ia herevalaia murinai, Paulo ena hereva dokona be inai: “Nega ibounai Lauma Helaga ena siahu dekena amo guriguri bona noinoi do umui gwauraia . . . to nega ibounai guriguri totona do umui noho hegaegae. Dirava ena taudia totona do umui guriguri nega ibounai.” (Efeso 6:18) Kamonai tuari taudia be nega ibounai edia hedikwota ese ia siaia oda herevana idia badinaia. Ita be Keristen tuari taudia dainai, nega ibounai eda Lohia Badana, Iehova Dirava, bona ena “bese iboudiai edia tuari biaguna,” Iesu Keriso do ita hakala henidia. (Isaia 55:4) Unai bamona do ita karaia dalana be guriguri kava karana amo lasi to kudou ena hemami amo ia mai gurigurina. Io, namona be iseda kudou ese Iehova turana henia bona abidadama henia karadia ia hahedinaraia goevagoeva. Bema nega ibounai Iehova danu ita herevahereva neganai, ia ena amo goada do ita davaria bena lauma tuari ai do ita kwalimu diba.

Iesu ia gwau: “Lau ese tanobada lau halusia vadaeni.” (Ioane 16:33) Iehova ia ura ita danu do ita kwalimu. Io, Paulo ena mase negana ia kahikahi neganai, inai bamona ia hereva: “Tuari namona lau tuarilaia vadaeni, lauegu heau helulu be ia ore vadaeni, bona lauegu abidadama lau karaia haorea vadaeni.” (2 Timoteo 4:7) Ita danu be idia bamona ita hereva be namo. Bema unai bamona ita ura dikadika neganai, Dirava ese ia henia tuari dabua ibounai do ita atoa, ‘vadaeni do ita goada bona Satana ena koikoi karadia do ita koua.’​—Efeso 6:11.