Demoni be Edena Bamona Ita Dadaraidia Diba?
“Aneru haida danu, edia dagi korikori ena maka dekenai idia noho lasi, bona edia gabu korikori idia rakatania. Unai dainai Dirava ese hel ena dibura masemase gabuna dekenai idia ia atoa. Unuseni, noho hanaihanai auri seini dekena amo idia ia guia . . . ela bona Dirava ena Kota Bada Dinana.”—IUDA 6.
1, 2. Satani Diabolo bona demoni dainai, dahaka henanadai idia vara?
APOSETOLO Petero ia gwau: “Do umui laloa maoromaoro, bona naria namonamo. Umui dekenai ia tuari henia tauna, Satani, be laiona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho.” (1 Petero 5:8) Paulo ese demoni ia herevalaia neganai, ia gwau: “Lau ura lasi lauma dikadia danu umui gaukara hebou. Lohiabada ena kapusi bona lauma dikadia edia kapusi ruaosi nega tamona umui inua diba lasi. Lohiabada ena pata dekenai noho aniani, bona lauma dikadia edia pata dekenai noho aniani ruaosi be nega tamona umui ania diba lasi.”—1 Korinto 10:20, 21.
2 Satani Diabolo bona demoni be daidia? Edena bamona bona edena negai idia vara? Dirava ese idia ia havaraia, a? Edia siahu taunimanima dekenai be edena bamona? Dahaka ese ita ia durua diba idia ita dadaraia totona?
Satani Bona Demoni be Edena Bamona Idia Vara?
3. Edena dala ai Dirava ena aneru ta be Satani Diabolo ai ia lao?
3 Adamu bona Heva edia negai, aneru ta ese Dirava ia gwau-edeede henia. Dahaka dainai? Badina Iehova ena guba oreana lalonai ia karaia gaukarana ia moalelaia lasi. Dirava ese Adamu bona Heva ia havaraia neganai, unai aneru ia laloa edia lalona do ia veria Dirava idia dadaraia bena ia do idia kamonai bona tomadiho henia. Tau bona hahine ginigunadia ia koia bena Dirava idia gwau-edeede henia neganai, unai aneru be Satani Diabolo ai ia lao. Gabeai, aneru ma haida danu idia gwau-edeede. Edena dala ai?—Genese 3:1-6; Roma 5:12; Apokalupo 12:9.
4. Noa ena negai Abata ia do vara lasi neganai, gwau-edeede aneru haida be dahaka idia karaia?
4 Baibel ese ita ia hadibaia Noa ena negai Abata badana ia do vara lasi neganai, aneru haida be tanobada hahine idia ura henia matamaia. To badina kererena dainai idia ura henia. Baibel ia gwau: “Dirava ena [guba] natuna haida ese idia itaia, inai kekeni be mai edia hairai. Vadaeni, idia ura henia kekenidia idia abia, idia adavaia.” Bona idia havaraia natudia be taunimanima badadia ai idia lao, edia ladana idia gwauraia Nepili. (Genese 6:2-4) Iehova idia kamonai henia lasi aneru be Satani idia badinaia.
5. Iehova be Abata badana ia mailaia neganai, gwau-edeede anerudia dekenai dahaka ia vara?
5 Iehova ese Abata badana ia mailaia neganai, Nepili bona edia sinadia idia mase. To gwau-edeede anerudia be edia tauanina idia haidaua bona guba dekenai idia giroa lou. To, Dirava ese guna idia dekenai ia henia “dagi korikori” idia abia lou lasi. Dirava ese “dibura masemase gabuna” ladana Tartarus dekenai ia negedia.—Iuda 6; 2 Petero 2:4.
6. Demoni ese edena dala ai taunimanima idia koia?
6 Unai aneru dikadia be edia “dagi” idia haboioa negana amo ema bona hari, idia be Satani ena bamodia ai idia lao bona iena ura dikadia idia karaia noho. Abata murinai, demoni be siahu lasi taunimanima edia tauanina hegeregerena ai idia hedinarai totona. To, taunimanima edia lalona idia veria matabodaga karadia idauidau idia karaia totona. Danu demoni be meamea, babalau, vada, bona unai bamona kara ma haida amo taunimanima idia koia. (Deuteronomi 18:10-13; 2 Sivarai 33:6) Unai aneru dikadia bona Diabolo be Dirava ese do ia haorea momokani. (Mataio 25:41; Apokalupo 20:10) To hari inai negai namona be ita gini goada bona idia ita dadaraia. Inai stadi lalonai, Satani ena siahu bona idia ita dadaraia dalana do ita herevalaia.
Satani be mai Ena Siahu Bada
7. Satani ena siahu ena bada be edena bamona?
7 Idaunega amo ema bona hari Satani ese Iehova ena ladana ia hadikaia. (Aonega Herevadia 27:11) Bona tanobada taudia momo herea ia hakaudia kerere. Ioane Ginigunana 5:19 ia gwau: “Satani ese tanobada taudia ibounai ia gunalaia noho.” Unai dainai Iesu ia tohoa neganai, ia dekenai “tanobada ena basileia ibounai” ia henia toho. (Luka 4:5-7) Aposetolo Paulo ese Satani ia herevalaia neganai, ia gwau: “Bema ai ese ai harorolaia Sivarai Namona be hunia gauna, unai be mase dala idia raka noho taudia sibona dekenai ia be hunia gauna. Oibe, idia abidadama henia diba lasi, badina be inai tanobada ena dirava ese edia lalona ia koua, dibura dekena amo. Vadaeni Keriso ena hairaina bona iena Sivarai Namona ena diari idia itaia diba lasi. Keriso be Dirava ena toana momokani Tauna.” (2 Korinto 4:3, 4) Satani be “koikoi ibounai edia tamana” to ia sibona be “diari aneruna” ai ia halaoa. (Ioane 8:44; 2 Korinto 11:14) Ia be mai ena siahu taunimanima bona tanobada ena lohia taudia edia lalona ia hadiburaia totona. Tomadiho ena gori bona koikoi herevadia amo taunimanima ia koia.
8. Baibel ese Satani ena siahu be edena bamona ia gwauraia?
8 Daniela ena negai, unai be lagani 536 B.C.E. bamona ai, Satani ena siahu ia hedinarai. Iehova ese Daniela hagoadaia totona aneru ta ia siaia neganai, “Parasa basileia ena aneru lohia [lauma tauna] badana” ese dina 21 lalonai unai aneru ia koua. To Mikaela, aneru badana ta ia mai bona unai aneru ia durua. Unai karoa tamona ese “Helene ena lohia” ia herevalaia danu. (Daniela 10:12, 13, 20) Bona Apokalupo 13:1, 2 ese Satani ia gwauraia “huala badana” bona ia ese “dagedage gauna”—politikol lohia taudia—dekenai siahu bada ia henia.
9. Keristani taudia be daidia idia tuari henidia noho?
9 Unai dainai aposetolo Paulo ia gwau: “Iseda tuari be taunimanima danu lasi. Iseda tuari be lauma dikadia danu, guba dekenai idia noho. Ma danu inai tanobada ia gunalaia lauma dika badana, mai ena siahu taudia, bona tanobada ena dibura lohiadia, be ita ese ita tuari henidia noho.” (Efeso 6:12) Hari danu, Satani Diabolo bona ena demoni be tanobada ai idia vara gaudia idia gunalaia noho, tanobada taudia bona lohiadia ia veria kara dika badadia hegeregere, bese idaudia hamasea karana, terorist, bona ala-ala karadia idia karaia totona. Hari, namona be unai siahu bada lauma dikadia dadaraia dalana ita itaia.
Dahaka ese Ita Ia Durua Satani Ita Dadaraia Totona?
10, 11. Satani bona ena aneru dikadia be edena bamona ita dadaraia diba?
10 Sibona iseda goada amo Satani bona aneru dikadia ita dadaraia diba lasi. Paulo ia sisiba: “Lohiabada ena siahu dekena amo do umui siahu, bona Lohiabada ena goada dekena amo do umui goada.” Gau badana be Dirava ena heduru ita tahua ita ia gimaia totona. Paulo be ma ia gwau: “Dirava ese ia henia tuari dabua ibounai do umui kwatua, vadaeni do umui goada, Satani ena koikoi karadia do umui koua. . . . Dirava ese ia henia tuari dabua ibounai do umui kwatua. Vadaeni nega dikana ia ginidae neganai, do umui tuari mai goada danu. Do umui tuari noho ela bona tuari ena dokona, bona unai neganai do umui gini goada noho.”—Efeso 6:10, 11, 13.
11 Paulo ese nega rua Keristani taudia ia hagoadaia ‘Dirava ese ia henia tuari dabua ibounai do idia kwatua.’ Inai hereva “ibounai” ese ia hahedinaraia, namona be mai iseda goada ibounai ida demoni ita tuari henia. Unai dainai, hari Keristani taudia ese demoni idia dadaraia totona, tuari dabua idia atoa be namo. To unai tuari dabua ena kahana idauidau be dahaka?
Edena Dala ai Ita “Gini Goada” Diba?
12. Keristani taudia be edena dala ai edia gabana dekenai hereva momokani ena beleta idia kwatua diba?
12 Paulo ia gwau: “Vadaeni do umui gini goada, emui gabana dekenai hereva momokani ena beleta dekena amo do umui hagegea. Emui kemena dekenai kara maoromaoro ena auri dabuana do umui kwatua.” (Efeso 6:14) Unai siri ese beleta bona kemena dekenai ia noho auri dabua ia gwauraia. Tuari tauna be ena beleta ia kwatua auka be namo, unai amo ena gabana (koekoena, bona bogana) ia gimaia bona kaia ia atoa diba. Unai hegeregerena, laulau dalanai Baibel ena hereva momokani ena beleta be iseda gabana dekenai ita kwatua auka be namo, anina be iseda mauri lalonai ita badinaia momokani. Dina ta ta ena Baibel duahiduahi totona oi be mai emu sediual ta, a? Ruma bese taudia ibounai ese unai idia karaia hebou, a? Dina ta ta ai iseda ruma bese taudia ida dina ena siri ita herevalaia hebou, a? Ma danu, “hesiai tauna mai ena kamonai, bona mai ena kara maoromaoro” ia halasia buka bona magasin matamatadia be hanaihanai ita duahia, a? (Mataio 24:45) Bema unai bamona ita karaia noho, ita be Paulo ena sisiba ita badinaia unai. Danu, vidio amo Baibel ena hakaua herevadia ita abia. Hereva momokani ita dogoatao auka neganai, abia hidi maorodia do ita karaia bona dala kererena do ita badinaia lasi.
13. Edena dala ai iseda lalona ita gimaia diba?
13 Tuari tauna ena kemena dekenai ia noho auri dabuana ese ena kemena, kudouna, bona bogana ia gimaia. Keristani tauna ese ena lalona ia gimaia totona, gau badana be Dirava ena kara maoromaoro bona ena taravatu ia ura henia bada. Laulau dalanai, unai auri dabua ese ita ia gimaia dainai Dirava ena Hereva ita laloa bada noho. Kara dika ita inai henia bona ‘kara namo ita ura henia’ neganai, ‘kara dika amo ita raka siri.’—Amosa 5:15; Salamo 119:101.
14. ‘Iseda aena dekenai maino ena sivarai namona be tamaka bamona ita atoa,’ ena anina be dahaka?
14 Roma tuari taudia be tamaka namodia idia karaia be gau badana badina edia haiwei dekenai kilomita momo idia raka. To Keristani taudia ‘edia aena dekenai maino ena sivarai namona be tamaka bamona do idia atoa,’ ena anina be dahaka? (Efeso 6:15) Anina be gaukara totona ita hegaegae. Unai dainai, ita noho hegaegae nega idauidau ai sivarai namona ita gwauraia totona. (Roma 10:13-15) Keristani haroro gaukara ita goadalaia neganai, unai ese Satani ena “koikoi karadia” amo ita do ia gimaia.—Efeso 6:11.
15. (a) Dahaka ese ia hahedinaraia abidadama ena kesi be mai anina bada? (b) Dahaka be ‘peva mai ena lahi’ bamona iseda abidadama ia hadikaia diba?
15 Paulo ia gwau: “Nega ibounai abidadama, emui kesi bamona, do umui abia loaloa. Abidadama dekena amo, Satani ena diba bona peva, lahi gaudia, be do umui habodoa diba.” (Efeso 6:16) Unai siri ese abidadama ena kesi ia do herevalaia lasi neganai, inai hereva “nega ibounai” ia gaukaralaia. Unai ese ia hahedinaraia kesi be mai anina bada. Namona be iseda abidadama ia goada, unai amo kesi badana ta bamona Satani ena ‘peva mai ena lahi’ amo ita do ia gimaia. Hari inai negai, unai ‘peva mai ena lahi’ be dahaka? Idia be aposteit bona ita idia inai henia taudia ese iseda abidadama hamanokaia totona idia gwauraia hahisia bona koikoi herevadia. Danu, unai “diba bona peva” be reana kohu momo tahua karana ena hedibagani, nega bada ita halusia kohu idauidau ita hoia totona bona unai bamona mauri dalana idia badinaia taudia ida ita kara helulu. Reana idia be mai edia ruma badadia bona motuka, eiava idia ura taunimanima ese edia dava bada herahera gaudia bona dabua matamata idia itaia. Herevana taunimanima be dahaka idia karaia, to namona be iseda abidadama ia goada, unai amo Satani ena ‘diba bona peva mai ena siahu’ ita koua diba. Edena dala ai iseda abidadama ita hagoadaia diba?—1 Petero 3:3-5; 1 Ioane 2:15-17.
16. Dahaka ese ita do ia durua abidadama goadana ita hahedinaraia totona?
16 Hanaihanai sibona eda Baibel stadi ita karaia bona ita guriguri, unai ese ita do ia durua Dirava kahirakahira ita lao totona. Namona be Iehova ita guriguri henia iseda abidadama ia hagoadaia totona, bona unai guriguri hegeregerena ita kara. Hegeregere, wiki ta ta ena Gima Kohorona stadi totona ita hegaegae namonamo, bona ita ura haere ita henia, a? Iseda abidadama do ia goada bema Baibel bona Baibel bukadia ita stadilaia.—Heberu 10:38, 39; 11:6.
17. Edena dala ai ‘hahemauri ena kwara gauna’ ita abia dae diba?
17 Paulo ese lauma tuari dabua ia herevalaia bena dokonai inai sisiba ia henia: “Hamauria do umui abia dae, emui tuari kwara gauna bamona. Lauma Helaga ena tuari kaia danu do umui dogoatao. Ia be Dirava ena hereva.” (Efeso 6:17) Tuari tauna ena kwara gauna ese ena kwarana bona harana—abia hidi ia karaia gabuna—ia gimaia. Unai hegeregerena, iseda Keristani helarona be kwara koua gauna bamona, iseda lalona ia gimaia. (1 Tesalonika 5:8) Namo lasi tanobada ena kohu tahua momo karana ita laloa bada, to namona be Keriso hegeregerena, Dirava ese ita dekenai ia henia helarona ita laloa bada.—Heberu 12:2.
18. Dahaka dainai hanaihanai Baibel ita duahia karana ita hadokoa lasi?
18 Tuari dabua ginigabena be Dirava ena Hereva, Baibel. Unai ese Satani bona ena demoni amo ita ia gimaia diba. Unai dainai hanaihanai sibona eda Baibel duahia karana ita hadokoa lasi. Dirava ena Hereva ita dibaia namonamo neganai, unai ese Satani bona ena demoni edia hereva koikoi bona aposteit taudia edia hadikaia herevadia amo ita ia gimaia.
‘Nega Ibounai Do Umui Guriguri’
19, 20. (a) Satani bona ena demoni dekenai dahaka do ia vara? (b) Dahaka ese ita do ia durua lauma dalanai ita goada noho totona?
19 Kahirakahira Dirava ese Satani, iena demoni bona inai tanobada dikana do ia hadikaia ore. Satani ia diba “iena nega be ia kwadogi sibona.” Unai dainai ‘Dirava ena taravatu idia badinaia momokani, bona Iesu ena hereva momokani idia gwauraia hedinarai’ taudia ia badu henia bona ia tuari henia noho. (Apokalupo 12:12, 17) Gau badana be Satani bona ena demoni ita dadaraidia.
20 Dirava ena tuari dabua ibounai do ita atoa ena sisiba namona dainai, ita moale! Paulo ese unai lauma ena tuari dabua ia herevalaia murinai, inai sisiba ia henia: “Nega ibounai Lauma Helaga ena siahu dekena amo guriguri bona noinoi do umui gwauraia. Do umui hesiku lasi, to nega ibounai guriguri totona do umui noho hegaegae. Dirava ena taudia totona do umui guriguri nega ibounai.” (Efeso 6:18) Guriguri ese lauma dalanai ita ia hagoadaia bona ita do ia durua ita noga noho totona. Namona be Paulo ena hereva ita laloa bada bona ita guriguri noho, badina unai ese ita do ia durua Satani bona ena demoni ita dadaraidia totona.
Dahaka Oi Dibaia?
• Satani bona ena demoni be edena bamona idia vara?
• Diabolo ena siahu ena bada be edena bamona?
• Dahaka ese ita ia durua diba Satani bona ena demoni ita dadaraia totona?
• Dirava ena amo ia mai tuari dabua be edena bamona ita atoa diba?
[Pictures on page 8]
“Dirava ena natuna haida ese idia itaia, inai kekeni be mai edia hairai”
[Picture on page 10]
Lauma ena tuari dabua ena kahana siks oi herevalaia diba, a?
[Pictures on page 11]
Inai gaudia ita karaia neganai, unai ese edena bamona ita ia durua Satani bona ena demoni ita dadaraia totona?