Keristen Ena Orea Gunana ese Toi Tamona Hahedibana Idia Hadibalaia, A?

Kahana 4—Edena Negai bona Edena Dala ai Toi Tamona Hahedibana Ia Bada Ia Lao?

Sivarai ginigunadia toi ese idia hahedinaraia Iesu bona iena hahediba taudia bona Dubu Tamadia gunadia be Toi Tamona hahedibana idia hadibalaia lasi. (Gima Kohorona, November 1, 1991; February 1, 1992; bona April 1, 1992) Hari sivarai ginigabena ese do ia hahedinaraia Toi Tamona hahedibana be edena dala ai ia bada ia lao bona, 325 C.E. ai, Nicaea Kaunsolo dekenai idia karaia gaudia be dahaka idia havaraia.

LAGANI 325 C.E. neganai, Roma pavapava badana Konstantin be Nicaea, Asia Minor, dekenai bisop taudia ia boiridia kaunsolo idia karaia totona. Ia ura tomadiho hepapahuahu ta idia gwauraia ela bona lalohadai tamona idia abia; unai hepapahuahu herevana be Dirava ena Natuna bona Siahu Ibounai Diravana edia dagi be edena bamona. Encyclopædia Britannica be unai kaunsolo dekenai ia vara gauna ia herevalaia, ia gwau:

“Konstantin ese unai hebou ia naria, bona hebou taudia edia kiki dalana ia biagua, bona Keriso bona Dirava edia dagi hahegeregerea totona, ia sibona ese inai hereva ia gwauraia: ‘Tamana bona Natuna edia anina be tamona [ho·mo·ouʹsi·os],’ bena kaunsolo ese unai hereva ia halasia . . . Bisop ese pavapava Konstantin idia gari henia dainai, unai hereva badana dekenai edia ladana idia sainia; bisop rua sibodia idia sainia lasi. Unai bisop momo idia ura lasi momokani edia ladana idia sainia.”¹

Unai lohia tauna, Iehova ia tomadiho henia lasi tauna unai, be Bible ena hereva ia abia dae dainai unai kara ia karaia, a? Lasi. A Short History of Christian Doctrine ia gwau: “Konstantin be Greek tomadiho tahua taudia edia henanadai edia anina ia diba lasi momokani.”² Ia diba gauna be ia lohiaia gabudia be tomadiho hepapahuahu dainai idia parara gwauraia, bona ia ura unai hepapahuahu ia ore.

Toi Tamona Hahedibana Ia Havaraia, A?

Nicaea Kaunsolo dekenai idia be Toi Tamona herevana idia gwauraia Kerisendom ena hahediba hereva badana ta, a? Taunimanima momo be unai bamona idia laloa. To idia vara gaudia ese unai ia hamomokania lasi.

Unai kaunsolo dekenai Dirava ena Natuna idia herevalaia daladia dainai dubu taudia momo idia laloa dala ta dekenai Tamana Dirava ida ia tamona. To, ita ura ita diba Nicaea Hahedibana be dahaka ia gwau lasi. Idia torea nega ginigunana neganai unai hahediba ia gwau:

“Ai be Dirava tamona, siahu ibounai Tamana, ita itaia diba bona ita itaia diba lasi gaudia ibounai ia havaraia tauna ai abia dae;

“Bona Lohiabada Iesu Keriso tamona, Dirava ena Natuna, Tamana ese ia havaraia, ia sibona ia havaraia natuna ai abia dae, anina be Tamana ena tauanina amo, Dirava be Dirava amo, diari be diari amo, Dirava momokanina be Dirava momokanina amo, ia havaraia to ia karaia lasi, ia bona Tamana edia anina be tamona, Ia dainai gau iboudiai idia vara, guba gaudia bona tanobada gaudia, ita tanobada taudia totona bona iseda hahemauri totona Ia diho mai bona tanobada tauanina ia abia, tau ta ai ia lao, ia hisihisi, ia mase bena dina ihatoina ai ia toreisi lou, guba dekenai ia daekau, bona do ia mai mauri taudia bona mase taudia do ia hahemaoro henidia totona;

“Bona Lauma Helaga . . . ai abia dae.”³

Unai hahediba hereva ia gwau Tamana, Natuna, bona lauma helaga be taunimanima toi Dirava tamona lalonai, a? Ia gwau unai toi be noho hanaihanai dekenai, siahu dekenai, dagi dekenai, bona aonega dekenai idia hegeregere, a? Lasi, unai bamona ia hereva lasi. Unai hereva dekenai toi tamona hereva be lasi momokani. Nicaea Hahediba ginigunana be Toi Tamona herevana ia haginia lasi bona ia hamomokania lasi.

Unai hahediba hereva dekenai, hegeregerena idia gwau Natuna bona Tamana “edia anina be tamona.” To lauma helaga be unai bamona ia herevalaia lasi. Unai hereva ia gwau: “Lauma Helaga . . . ai abia dae” sibona. Unai be Kerisendom ena Toi Tamona hahedibana lasi.

Ita gwau lasi unai hereva badana “edia anina be tamona” (ho·mo·ouʹsi·os) ena anina be kaunsolo taudia idia laloa Tamana bona Natuna be idia tamona. New Catholic Encyclopedia ia gwau:

“Sedira, ita gwau diba lasi kaunsolo taudia idia ura hamomokania Tamana bona Natuna be idia tamona.”⁴

Bema kaunsolo taudia idia ura idia gwau Natuna bona Tamana be idia tamona, ia be do Toi Tamona lasi. Ia be rua tamona diravana sibona, ia be Toi Tamona hahedibana ese ia gwauraia toi tamona diravana lasi.

“Haida Sibona Edia Lalohadai”

Nicaea dekenai, bisop taudia momo idia laloa Natuna be Dirava ida ia hegeregere, a? Lasi, idia be lalohadai idauidau idia abia. Hegeregere Arius ese lalohadai ta ia gwauraia, ia gwau Natuna be mai ena vara negana bona unai dainai Dirava ida ia hegeregere lasi, to gau ibounai dekenai ia be Dirava henunai ia noho. To Athanasius ia laloa Natuna be dala ta dekenai Dirava ida ia hegeregere. Bona taunimanima edia lalohadai ma haida idia noho.

Kaunsolo taudia edia lalohadai, Natuna be Dirava ena tauanina tamona herevana dekenai Martin Marty ia gwau: “Nicaea dekenai haida sibona be idia ura unai hereva idia abia dae; momo ese idia abia dae momokani lasi bona Arius ena lalohadai idia abia dae lasi taudia danu be unai hereva dekenai idia moale lasi.”⁵ Unai hegeregerena, A Select Library of Nicene and Post-Nicene Fathers of the Christian Church bukana ia gwau “taunimanima momo lasi be Arius ena lalohadai amo ia idau hahedibana ta idia abia dae, to unai taunimanima momo lasi be edia hereva idia kwalimulaia.”⁶ Bona A Short History of Christian Doctrine bukana ia gwau:

“Asia ena bisop bona tomadiho taudia momo idia ura lasi herevana be Konstantin ese ia gwauraia lalohadaina, unai be homoousios [“edia anina be tamona”], unai hereva be gabeai dubu taudia bona dubu ena hereva idia dadaraia taudia idia hepapahuahulaia bada.”⁷

Unai kaunsolo murinai, lagani momo lalodiai unai hereva idia hepapahuahulaia. Natuna bona Siahu Ibounai Diravana idia hahegeregerea taudia be nega sisina lalonai dubu taudia ese idia badu henidia. Haheitalai ta be Athanasius, Martin Marty ese ia gwauraia, ia gwau: “Nega haida dubu taudia ese idia ura henia bona nega haida idia ura henia lasi, bona nega momo [kaunsolo murinai laganidia lalonai] idia lulua bena murinai idia abia dae, ia be hegeregere ia lao, ia mai, ia lao, bona ma ia mai tauna.”⁸ Athanasius be lagani momo lalonai tano idaudia ai idia lulua badina politikol bona dubu edia dagi taudia ese iena lalohadai idia dadaraia, iena lalohadai be Natuna be Dirava ida ia hegeregere.

Unai dainai bema ita gwau lagani 325 C.E. neganai Nicaea Kaunsolo ese Toi Tamona hahedibana ia haginia bona ia hamomokania, unai be koikoi. Gabeai idia gwauraia Toi Tamona hahedibana be unai negana lalonai idia do gwauraia lasi. Unai kaunsolo taudia bona gunaguna Dubu Tamadia ese inai lalohadai idia havaraia lasi: Tamana, Natuna, bona lauma helaga ta ta iboudiai be Dirava momokanina bona noho hanaihanai dekenai, siahu dekenai, dagi dekenai, bona aonega dekenai, idia iboudiai be Dirava tamona​—toi tamona Diravana unai. The Church of the First Three Centuries ia hereva bamona, ia gwau:

“Hari inai negai taunimanima momo ese Toi Tamona Diravana idia abia dae. . . . to Justin [Martyr] ese Toi Tamona ia gwauraia lasi: bona Nicaea Kaunsolo idia do karaia lasi neganai Keristen tomadiho idia gunalaia taudia iboudiai be edia buka lalodiai Toi Tamona idia gwauraia lasi; anina be, ema bona lagani 300 C.E. bamona Keristen toretore taudia ta lasi ese Toi Tamona ia gwauraia. Momokani, Tamana, Natuna, bona . . . Lauma helagana idia gwauraia, to idia gwau lasi edia siahu be tamona, bona gau tamona lalonai idia noho, Toi Tamona hegeregerena, hari Toi Tamona herevana idia halasia taudia ese idia gwauraia hegeregerena. Lasi, unai bamona idia hereva lasi vaitani. Unai dubu Tamadia be Toi Tamona hahedibana ena anina idia gwauraia neganai, edia hereva be hari inai nega ena hereva amo ia idau. Unai ita gwauraia hereva momokanina ta, hegeregere ita be taunimanima edia hereva iboudiai ita gwauraidia hereva momokanina bamona.”

“Ai ura ai diba daika be lagani 1 ia lao 300 C.E. lalonai toretore tauna ta ia gwauraia diba, unai tauna be hari inai nega lalonai [Toi Tamona hahedibana] bamona ia gwauraia.”⁹

To, Nicaea dekenai gau ta ia vara bona edia lalohadai idia haidaua. Unai amo dala ia kehoa dubu ese Tamana be Natuna ida ia hegeregere ena lalohadai idia abia dae totona, bona gabeai Toi Tamona lalohadaina ia havaraia. J. A. Buckley ese ia torea bukana, Second Century Orthodoxy, lalonai ia gwau:

“Ema bona lagani 200 C.E. ai, Katolik Dubuna be gau tamona dekenai idia tamona; idia iboudiai idia abia dae Tamana be hereadae. Idia iboudiai idia laloa Dirava be Siahu Ibounai Tamana sibona, ia be herea, ia idau diba lasi, ia helaga herea, bona ia matamaia lasi. . . .

“Lagani 100 ia lao 199 C.E. ai, toretore taudia bona gunalaia taudia idia mase murinai, Dubu be . . . sisina sisina edia lalohadai idia haidaua ela bona . . . Nicaea Kaunsolo dekenai abidadama herevana gunana idia negea vaitani. Unuseniai, idia hereva goadagoada taudia haida ese edia koikoi herevana dainai taunimanima momo idia doridia dubu ena hereva gunana idia dadaraia totona, bona politikol siahu taudia ese idia durudia dainai, edia abidadama ena goeva idia ura idia dogoatao noho taudia idia doridia, edia lalona idia ania bona idia hagaridia.”¹⁰

Constantinople Kaunsolo

Lagani 381 C.E. neganai, Constantinople Kaunsolo ese Nicaea Hahedibana idia abia dae. Bona unai taudia be ma hereva ta danu idia hakapua. Idia gwau lauma helaga be “Lohiabada” bona “mauri ia henia.” Lagani 381 C.E. ai unai hereva idia habadaia (hari inai negai dubu lalonai unai hereva idia gaukaralaia bona idia gwauraia “Nicaea Hahedibana”) bona ia hahedinaraia Kerisendom be Toi Tamona hahedibana idia hegaegaelaia momokani gwauraia. To, unai kaunsolo ese unai hahediba gwauraia karana idia karaia ore lasi. New Catholic Encyclopedia ia gwau:

“Namo gauna ta be lagani 60 Nicaea Ginigunana murinai, Constantinople Kaunsolo Ginigunana [381 C.E.] be Lauma Helaga ena dirava karadia idia gwauraia neganai, edia hereva dekenai homoousios idia herevalaia lasi.”¹¹

“Diba taudia idia daradara bada unai hahediba hereva kahana ia manoka sisina dainai; hegeregere, unai hereva homoousios ia gaukaralaia lasi Lauma Helaga be Tamana bona Natuna ida ia gwauraia tamona totona.”¹²

Unai buka danu ia gwau: “Homoousios be Bible dekenai ia hedinarai lasi.”¹³ Oibe, Bible ese unai hereva ia gaukaralaia lasi lauma helaga eiava Natuna be Dirava ida anina tamona idia gwauraidia totona. Ia be Bible lasi herevana ta bona ia ese dala ia kehoa Bible hadikaia Toi Tamona hahedibana ia vara totona.

Constantinople murinai danu, Kerisendom ena gabu momo dekenai Toi Tamona hahedibana be lagani daha momo lalonai idia abia dae lasi. New Catholic Encyclopedia ia gwau: “West kahana tanodia ai . . . Constantinople Ginigunana bona ena hahediba idia herevalaia lasi bamona.”¹⁴ Unai buka ese ia hahedinaraia unai kaunsolo hahedibana be West kahana dekenai idia abia dae lasi ela bona lagani 600 ia lao 799 C.E. ai bamona.

Danu, nega momo taunimanima momo be Toi Tamona ena hereva be Atanasia Herevana amo idia gwauraia bona idia hamomokania, to diba taudia idia gwau Athanasius ese ia torea lasi; gabeai momokani ita diba lasi tauna ta ese ia torea. The New Encyclopædia Britannica ena hereva be inai:

“East tanodia edia Dubu lalonai unai hereva badana idia diba lasi ema bona lagani 1100 murinai. Lagani 1600 bamona murinai, diba tahua taudia momo idia gwau Athanasius (lagani 373 ai ia mase) ese Atanasia Herevana ia torea lasi, to reana lagani 400 C.E. murinai, unai hereva be France ena diho kahanai idia torea. . . . Lagani 500 C.E. bona 600 C.E. murinai, taunimanima momo France ena diho kahana bona Spain dekenai ese unai hereva badana idia abia dae. Lagani 800 C.E. murinai, Germany ena dubu lalodiai idia gwauraia, bona gabeai Rome dekenai unai hereva idia gaukaralaia danu.”¹⁵

Hereva Habadaia Dalana

Toi Tamona hahedibana be lagani daha momo lalodiai sisina sisina ia bada ia lao. Plato bamona Greek aonega taudia, Keriso ia do mai lasi lagani daha momo gunanai idia noho taudia unai, edia toi tamona herevadia be sisina sisina dubu ena hahediba herevadia dekenai idia abia dae. The Church of the First Three Centuries bukana ia hereva bamona, ia gwau:

“Ai laloa Dubu ese Toi Tamona hadibaia herevana be metairametaira ia abia dae bona nega gunanai idia abia dae lasi; ia vara dalana be Iuda bona Keristen Buka Helagadia dekenai lasi; Plato ena hereva idia abia dae dubu gunalaia taudia ese Toi Tamona herevana idia habadaia bena Keristen tomadihona dekenai idia hakapua; Justin ena nega lalonai, bona lagani momo unai murinai, taunimanima iboudiai idia hadibaia Natuna be idau bona ia be Dirava henunai; bona Toi Tamona ena hereva badadia sibona idia hedinarai to idia gwauraia hedinarai namonamo lasi.”¹⁶

Plato ena nega do lasi neganai, Babulono bona Aigupito dekenai toi tamona diravadia momo idia noho. Bona dubu taudia idia ura Roma gavamanina ese ia biagua gabudia dekenai Katolik dubuna lasi taudia idia veridia toho, bona sisina sisina unai lalohadai haida be Keristen lalohadai ida idia hakapua. Gabeai, Natuna bona lauma helaga be Tamana ida idia hegeregere lalohadaina idia abia dae.a

Unai hereva “Toi Tamona” idia abia dae haraga lasi danu. Lagani 150 ia lao 199 C.E. neganai, Suria, Antioka dekenai, ena bisop tauna Theophilus be Greek gado dekenai unai hereva tri·asʹ ia torea, ena anina be “toi tamona.” Bena Latin gado toretore tauna Tertullian, Carthage, North Africa dekenai, be iena toretore dekenai trinitas ia torea, ena anina be “toi tamona.”b To unai hereva tri·asʹ be Dirava ena amo Keristen Greek Revarevadia lalonai ita davaria lasi, bona unai hereva trinitas be Latin gado Bible, Vulgate, lalonai ita davaria lasi. Unai hereva rua be Bible amo lasi. To unai hereva “Toi Tamona,” Dirava momokanina idia tomadiho henia lasi taudia edia lalohadai amo idia abia gauna, be sisina sisina dubu ena bukadia dekenai idia torea hamatamaia bona lagani 399 C.E. murinai, dubu ena hahediba hereva dekenai idia abia dae.

Unai dainai, ia hedinarai diba taudia ese Bible idia tahua namonamo lasi unai hahediba hereva be ia lalonai ia noho eiava lasi idia davaria totona. To, gavamani taudia bona dubu taudia ese unai hahediba herevana idia gwauraia. The Christian Tradition bukana lalonai, toretore tauna Jaroslav Pelikan ia hereva unai “hepapahuahu be tomadiho lasi karadia” dekenai, “Nega momo dubu ena politikol karadia bona taunimanima edia hepapahuahu dainai hahediba herevana idia hadikaia eiava idia havaraia.”¹⁷ Yale profesa tauna E. Washburn Hopkins be inai bamona ia gwauraia, ia gwau: “Dubu ena politikol karadia ese toi tamona ena anina idia gwauraia dalana ia havaraia.”¹⁸

Toi Tamona hahedibana, bona Dirava ia herea bona ta be ia bamona lasi be Bible ena hadibaia herevana, ita hahegeregeredia neganai ita itaia Toi Tamona be momokani hereva kavakavana ta! Dirava ia gwau bamona, “Daika ida lau do umui laloa hebou, bena ia ida lau do oi hahegeregerea? Daika ida lau do oi hahegeregerea bena umui gwau ai hegeregere?”​—Isaia 46:5.

Ena Anina

Sisina sisina Toi Tamona lalohadaina ia bada ia lao ena anina be dahaka? Anina be Iesu ese ia perovetalaia karana, taunimanima be Keristen ena kara momokani do idia rakatania. (Mataio 13:​24-43) Aposetolo Paulo danu ese gabeai do ia vara hereva momokani dadaraia karana ia perovetalaia, ia gwau:

“Nega ta do ia mai, taunimanima be hahediba hereva maorona do idia hesikulaia, hereva matamatadia do idia ura henia, bona sibodia edia ura hegeregerena hadibaia taudia idauidau do idia abia hidi; bena hereva momokani do idia kamonai henia lasi, to idia be gori hereva do idia kamonai henia.”​—2 Timoteo 4:​3, 4, Katolik ena Jerusalem Bible.

Unai gori herevana ta be Toi Tamona hahedibana. Sisina sisina idia bada idia lao Keristen hereva amo idia idau gori herevadia ma haida be inai: taunimanima edia souli ia mase diba lasi, pegatori, Limbo, bona hisihisi ela bona hanaihanai hel ena lahi dekenai.

Unai dainai, Toi Tamona hahedibana be dahaka? Ia be dirava koikoidia idia tomadiho henia taudia edia hahediba herevana ta, to idia gwau ia be Keristen hahedibana ta. Satana ese ia havaraia taunimanima ia koidia totona, ia ura do idia daradara Dirava dekenai, hegeregere ia be hunia gauna ta bamona. Unai amo do idia ura ma tomadiho koikoi lalohadaidia bona kara kereredia ma haida idia abia dae.

“Edia Kara Toana Dekena Amo”

Mataio 7:​15-19 dekenai, Iesu ia gwau inai dala dekenai tomadiho koikoina bona tomadiho momokanina edia idau oi itaia diba:

“Umui naria namonamo, peroveta koikoi taudia garina. Idia mai noho, edia toana be mamoe bamona, to edia lalona be uda sisia dagedage bamona. Edia kara toana dekena amo do umui diba. Au ginigini ese vain ena anina ia atoa lasi, bona ava ginigini be fig huahua ena anina ia atoa lasi. Oibe, bona au namona ena huahua be ia namo, to au dikana ena huahua be ia dika. Au namona ese huahua dika ia havaraia diba lasi, bona au dikana be huahua namo ia havaraia diba lasi. Au ibounai huahua namona idia havaraia lasi gaudia be do idia utua, lahi dekenai do idia negea.”

Haheitalai ta oi laloa. Iesu be Ioane 13:35 dekenai ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” Danu, 1 Ioane 4:20 bona 1 Ioane 4:21 dekenai, Dirava ena lauma helaga amo ia torea Herevana ia gwau:

“Tau ta bema ia gwau, ‘Lau ese Dirava lau lalokau henia,’ to ia ese iena tadikakana ia badu henia, unai tau be koikoi tauna. Badina be iena tadikakana, ia itaia diba tauna, bema ia ura henia lasi, edena bamona ia itaia diba lasi Diravana do ia ura henia diba? Keriso ese ita dekenai ia henia taravatu be inai: Dirava ia lalokau henia tauna ese iena tadikakana danu do ia lalokau henia.”

Lagani 1900 murinai tanobada ibounai dekenai idia vara tuaridia bona ma tuari haida dekenai Keristen momokanidia ese idia hahedinaraia lalokauna oi laloa. Kerisendom ena tomadiho tamona taudia be tuari gabudia ai idia hedavari bona idia be bona bese idau dainai idia ala-ala heheni. Kahana rua idia gwau idia be Keristen taudia, bona kahana rua edia dubu gunalaia taudia ese idia durudia, unai gunalaia taudia idia gwau Dirava be edia kahana dekenai ia noho. “Keristen” ta ese ma “Keristen” ta ia alaia mase karana be huahua dikana. Ia be Keristen ena lalokau ia hadikaia, ia be Dirava ena taravatu dadaraia karana.​—Ioane Ginigunana 3:​10-12 itaia danu.

Hahemaoro Henia Dinana

Unai dainai, Keristen dalana rakatania karana ese Dirava dadaraia lalohadaidia, hegeregere Toi Tamona hahedibana, ia havaraia sibona lasi to Dirava dadaraia karadia danu ia havaraia. To, hahemaoro dinana ta do ia mai, badina Iesu ia gwau: “Au ibounai huahua namona idia havaraia lasi gaudia be do idia utua, lahi dekenai do idia negea.” Unai dainai Dirava ena Hereva be ita ia hagoadaia, ia gwau:

“Lauegu orea taudia e, ia dekena amo do umui raka siri, ia danu do umui kara dika hebou garina, bona ia danu panisi do umui abia hebou garina! Badina be iena kara dikadia be momo herea momokani, ororo bamona idia daekau lao ela bona guba dekenai. Bona Dirava ese iena kara dikadia do ia laloaboio lasi.”​—Apokalupo 18:​4, 5.

Nega kahirakahira Dirava be politikol siahu taudia ‘edia lalohadai do ia henia’ idia be tomadiho koikoi do idia hadikaia totona. Idia be “do idia hadikaia momokani . . . Iena tauanina do idia ania, bona lahi dekenai do idia gabua.” (Apokalupo 17:​16, 17) Tomadiho koikoi mai ena Dirava momokani dadaraia aonega herevadia be do idia ore momokani ela bona hanaihanai. Anina be Dirava be tomadiho koikoi idia karaia taudia dekenai do ia hereva Iesu be iena nega lalonai ia hereva bamona, ia gwau: “Inai, umui emui ruma be do ia noho kava anina lasi.”​—Mataio 23:38.

Tomadiho momokanina be Dirava ena hahemaoro herevadia amo do ia roho mauri, bona dokonai Iesu ese ia gwauraia “Dirava momokani tamona” dekenai hemataurai bona hairai ibounai do idia henia. Ia be salamo ese ia herevalaia tauna, ia gwau: “Oiemu ladana be Iehova, oi sibona be Atai Momokani tanobada ibounai ataiai.”​—Ioane 17:3; Salamo 83:18.

Ai gaukaralaia bukadia:

1. Encyclopœdia Britannica, 1971, Volume 6, rau 386.

2. A Short History of Christian Doctrine, Bernhard Lohse ese ia torea, 1963, rau 51.

3. Ibid., rau 52-3.

4. New Catholic Encyclopedia, 1967, Volume 7, rau 115.

5. A Short History of Christianity, Martin E. Marty ese ia torea, 1959, rau 91.

6. A Select Library of Nicene and Post-Nicene Fathers of the Christian Church, Philip Schaff bona Henry Wace ese idia torea, 1892, Volume 4, rau 17.

7. A Short History of Christian Doctrine, rau 53.

8. Ibid., rau 91.

9. The Church of the First Three Centuries, Alvan Lamson ese ia torea, 1869, rau 75-6, 341.

10. Second Century Orthodoxy, J. A. Buckley ese ia torea, 1978, rau 114-15.

11. New Catholic Encyclopedia, 1967, Volume 7, rau 115.

12. Ibid., Volume 4, rau 436.

13. Ibid., rau 251.

14. Ibid., rau 436.

15. The New Encyclopœdia Britannica, 1985, Namba 15 Gauna, Micropædia, Volume 1, rau 665.

16. The Church of the First Three Centuries, rau 52.

17. The Christian Tradition, Jaroslav Pelikan ese ia torea, 1971, rau 173.

18. Origin and Evolution of Religion, E. Washburn Hopkins ese ia torea, 1923, rau 339.

[Footnotes]

[Picture on page 22]

Dirava ese politikol siahu taudia do ia veridia tomadiho koikoi do idia inai henia totona

[Picture on page 24]

Tomadiho momokanina be Dirava ena hahemaoro hereva amo do ia roho mauri