Keristen Ena Orea Gunana ese Toi Tamona Hahedibana Idia Hadibalaia, A?

Kahana 1—Iesu bona Iena Hahediba Taudia be Toi Tamona Hahedibana Idia Hadibaia, A?

Iesu bona iena hahediba taudia be Toi Tamona hahedibana idia hadibaia, a? Idia murinai lagani sinahu momo lalonai, dubu taudia ese unai hahediba idia hadibaia, a? Edena dala ai ia vara matamaia? Bona badina be dahaka unai hahediba dekenai hereva maoro ita diba be gau badana? Inai magasin lalonai, Kahana 1 dekenai, Gima Kohorona ese unai henanadai be sivarai haida dekenai do ia herevalaidia. Gabeai magasin haida lalonai unai sivarai haida do ai torea.

IDIA abia dae Bible be Dirava ena Hereva taudia idia diba ma haida dekenai Havaraia Tauna idia herevalaia be maoro. Idia diba danu bema haida dekenai Dirava ena sivarai idia hadibalaia, namona be unai sivarai idia maoro.

Dirava ese Iobu ena “turadia” be unai bamona idia karaia lasi dainai ia gwau henidia: “Iehova ese Elifasa, Teman tauna, ia hereva henia, ia gwau: ‘Lau badu dikadika oi dekenai bona oiemu turadia ruaosi dekenai, badina be lauegu sivarai maorona umui gwauraia lasi, lauegu hesiai tauna, Iobu, ese ia karaia hegeregerena.’ ”​—Iobu 42:7.

Aposetolo Paulo, toreisi lou ia herevalaia neganai, ia gwau bema Dirava ena hereva ta ia hadibaia kerere do idia gwau Dirava ena ‘hereva ia gwauraia koikoi.’ (1 Korinto 15:15) Bema unai bamona idia laloa toreisi lou hahedibana dekenai, ita naria namonamo Dirava be daika hahedibana ita hadibalaia neganai!

Toi Tamona Hahedibana

Kerisendom ena dubu kahirakahira iboudiai ese Dirava be Toi Tamona hahedibana idia hadibaia. The Catholic Encyclopedia bukana ia gwau Toi Tamona hahedibana be “Keristen tomadiho ena hahediba badana,” bona ia gwau ena anina be inai:

“Dirava ena mauri tamona lalonai idia gwau Taunimanima Toi idia noho, Tamana, Natuna, bona Lauma Helaga, unai Taunimanima Toi be ta ta ena amo ena amo idia idau. Unai dainai, Atanasia Herevana ia gwau: ‘Tamana be Dirava, Natuna be Dirava, bona Lauma Helaga be Dirava; to Dirava be toi lasi, ia be tamona.’ . . . Tamana, Natuna bona Lauma Helaga idia noho hanaihanai, ta ese ta ia hanaia lasi: idia iboudiai be ta ese ia havaradia lasi bona idia be mai edia siahu ibounai.”¹

The Baptist Encyclopœdia be unai bamona ena anina ia gwauraia danu. Ia gwau:

“[Iesu] be . . . ia noho hanaihanai Iehovana . . . Lauma Helaga be Iehova . . . Natuna bona Lauma be Tamana ida idia hegeregere momokani. Bema ia be Iehova, idia danu be Iehova.”²

Toi Tamona Hahedibana Dadaraia Taudia Idia Gwauraidia Dika

Lagani 325 C.E. ai, Nicea, Asia Minor, ena bisop edia hebou dekenai, hahediba ena badina ta idia karaia, idia gwau Dirava ena Natuna be “Dirava korikorina,” Tamana be “Dirava korikorina” hegeregerena. Unai hahediba ena kahana ta ia gwau:

“Haida idia gwau, Guna [negana ta] ai [Natuna] be lasi, bona, Ia do vara lasi neganai Ia be lasi, bona Ia vara kava sibona, eiava idia gwau Dirava ena Natuna be taunimanima idauna ta eiava tauanina idauna ta, eiava ta ese ia havaraia, eiava ta ese ia haidaua diba​—Katolik dubuna ese unai taudia ia gwauraidia dika.”³

Unai dainai, bema ta ia laloa Dirava ena Natuna be Tamana ida ia noho hanaihanai lasi, eiava ta ese Natuna ia havaraia, idia gwau unai tau be dika hanaihanaina do ia abia. Ita itaia diba dubu taudia momo idia veridia bona mai edia dagedage sisina danu idia doridia, unai bamona idia laloa totona.

Lagani 381 C.E. neganai, Constantinople dekenai, ma hebou ta idia karaia bona idia gwau namona be lauma helaga idia tomadiho henia bona idia hanamoa Tamana bona Natuna idia kara henidia hegeregerena. Lagani tamona murinai, lagani 382 C.E. ai, Constantinople dekenai, dubu hebouna ma ta idia karaia bona idia hamomokania lauma helaga be Dirava.⁴ Unai lagani lalonai, Roma ena hebou taudia vairanai, Pope Damasus be dubu ese ia dadaraia hahedibadia momo edia toretore ia gwauraidia. Unai toretore idia gwauraia Tome of Damasus, bona ena hereva haida be inai:

“Bema tau ta ia gwau Tamana ia noho hanaihanai lasi, Natuna ia noho hanaihanai lasi, bona Lauma Helaga ia noho hanaihanai lasi: ia be dubu ena lalohadai ia dadaraia tauna.”

“Bema ta ia gwau Dirava ena Natuna be Dirava korikorina lasi, Tamana be Dirava korikorina hegeregerena, bona ia be mai ena siahu ibounai lasi, gau ibounai ia diba lasi, bona Tamana ida ia hegeregere lasi; ia be dubu ena lalohadai ia dadaraia tauna.”

“Bema ta ia gwau Lauma Helaga . . . be Dirava korikorina lasi . . . bona ia be siahu ibounai lasi bona gau ibounai ia diba lasi, . . . ia be dubu ena lalohadai ia dadaraia tauna.”

“Bema ta ia gwau unai taunimanima toi, Tamana, Natuna, bona Lauma Helaga, be taunimanima korikoridia lasi, edia dagi be tamona lasi, idia noho hanaihanai lasi, bona idia lalonai ita itaia diba bona ita itaia diba lasi gaudia iboudiai idia noho lasi, bona idia be siahu ibounai lasi, . . . ia be dubu ena lalohadai ia dadaraia tauna.”

“Bema ta ia gwau tanobada tauna ta ai ia lao [Natuna] be guba dekenai Tamana ida ia noho lasi tanobada dekenai ia noho neganai: ia be dubu ena lalohadai ia dadaraia tauna.”

“Bema ta ia gwau Tamana be Dirava bona Natuna be Dirava bona Lauma Helaga be Dirava . . . to idia be Dirava tamona lasi . . . ia be dubu ena lalohadai ia dadaraia tauna.”⁵

Latin gado amo atai ai torea hereva idia hahanaia Jesuit aonega taudia be inai hereva idia torea danu: “Pope Saint Celestine Ginigunana (lagani 422-32) ia laloa unai be dubu ena taravatu; idia be abidadama edia taravatu gwauraia herevadia.”⁶ Bona diba tauna Edmund J. Fortman ia gwau unai toretore be “toi tamona ena hahediba hereva namodia.”⁷

Bema oiemu dubu ese Toi Tamona hahedibana ia abia dae, unai herevadia be oiemu abidadama hegeregerena, a? Bona oi diba eiava, dubu ese idia hadibaia Toi Tamona hahedibana oi abia dae totona, namona be oi abia dae danu Iesu be guba dekenai ia noho ia be tanobada dekenai ia noho neganai, a? Unai hahediba be lagani 300-400 C.E. neganai ia noho dubu tauna Atanasia ia hadibaia hegeregerena, iena buka On the Incarnation lalonai, ia gwau:

“Hereva, [Iesu], ena tauanina ese Ia ia koua lasi, bona Ia be iena tanobada tauanina dekenai ia noho dainai, unai ese ia koua lasi ma gabu ta dekenai ia noho totona. Iena tauanina be gabu ta ai ia lao neganai, unai ese ia koua lasi Iena Darana bona iena goada amo guba bona tanobada ibounai ia hakaua totona. . . . Ia be gau iboudiai edia mauri ena Badina, gau iboudiai edia kahana ibounai lalonai ia noho, to unai kahana ibounai edia murimurina ai ia noho.”⁸

Toi Tamona Hahedibana Ena Anina

Haida idia laloa Toi Tamona hahedibana ena anina be idia gwau Iesu be dirava ta. Ma haida idia laloa, Toi Tamona idia abia dae ena anina be Tamana, Natuna, bona lauma helaga idia abia dae sibona.

To, Kerisendom ena hahediba herevadia ita tahua namonamo bona, unai hahediba badana idia gwauraia dalana ita laloa neganai, ia hedinarai unai lalohadai be maoro lasi. Dubu ese unai hahediba idia gwauraia daladia ese idia hahedinaraia Toi Tamona hahedibana be lalohadai aukana ta. Ia be lalohadai idauidau bona mai ena dobu danu; nega daudau lalonai unai lalohadai ena hereva idia haboua bona idia be lalohadai tamona lalonai idia hakapua.

Lagani 381 C.E. lalonai, Constantinople ena Hebou dekenai idia gwauraia Toi Tamona hahedibana amo, bona lagani 382 C.E. lalonai idia karaia Tome of Damasus amo, bona gabeai ia mai Atanasia Herevana amo, bona ma toretore haida amo, ita itaia namonamo Kerisendom ia laloa Toi Tamona hahedibana be dahaka. Inai lalohadai haida be inai:

1. Dirava taudia toi idia noho​—Tamana, Natuna, bona lauma helaga​—Dirava lalonai.

2. Unai taunimanima ibounai idia noho hanaihanai, ta ia vara guna lasi, ta ia vara gabeai lasi.

3. Idia ibounai be mai edia siahu ibounai, bona ta ese ta ena dagi ia hanaia lasi.

4. Idia ibounai be diba ibounai, gau ibounai idia diba.

5. Idia ibounai idia gwauraia Dirava momokanina.

6. To, idia gwau Dirava be toi lasi to Dirava be tamona sibona.

Ia hedinarai momokani, Toi Tamona hahedibana ena lalohadai idauidau be mai edia dobu. Atai paragraf ena hereva ese ia gwauraia, bona ma hereva haida ese danu, unai gaudia edia hereva maragimaragidia ai tahua neganai, ena hereva dobu idia hahedinaraia. To bema atai paragraf lalonai ai gwauraia gaudia sibona ita laloa, ia hedinarai, bema unai lalohadai ta ita kokia, ia noho herevana be Kerisendom ese idia gwauraia Toi Tamona lasi. Toi Tamona hahedibana ibounai ita diba totona, unai lalohadai iboudiai idia noho be namo.

“Toi Tamona” herevana ena anina dekenai ita lalo-parara sisina dainai, hari inai bamona ita henanadai diba: Unai be Iesu bona iena hahediba taudia ese idia hadibaia hahediba herevana ta, a? Bema idia hadibaia, namona be Keristen ginigunadia edia nega lalonai unai hereva ibounai idia gwauraia namonamo. Bona idia hadibaia gaudia be Bible lalonai idia torea dainai, Toi Tamona hahedibana be Bible hahedibana ta eiava ia be Bible hahedibana ta lasi. Bema ia be Bible hahedibana ta, namona be Bible lalonai ia hedinarai namonamo.

Bema ita laloa Iesu bona iena hahediba taudia be taunimanima dekenai Dirava idia hadibalaia to idia hamaorodia lasi Dirava be edena bamona, unai be lalohadai kererena; bona ena kerere be bada badina unai abidadama taudia haida be Dirava totona edia mauri do idia haboioa. Unai dainai, bema Toi Tamona be maoro, Iesu bona iena hahediba taudia be unai anina bada hahedibana be ma haida dekenai idia hadibaia karana idia laloa guna be namo.

Bible Oi Tahua

Kara karoa 17, siri 11 dekenai, idia gwau unai taudia be “dina ibounai Buka Helaga idia tahua, inai hereva ia momokani eiava lasi” dainai, idia be “namo taudia.” Unai hereva be aposetolo Paulo ese ia hadibaia gaudia. Paulo ese idia ia hagoadaia Bible idia gaukaralaia, aposetolo tauna ta danu ia hadibaia herevadia idia hamomokania totona. Oi danu be unai bamona oi karaia be namo.

Namona be oi laloatao Bible be “Dirava ena Lauma ese ia havaraia” bona idia gaukaralaia be namo “kerere do ia hamaoromaoroa, bona mauri dala maoromaorona ita dekenai do ia hadibaia. Unai hereva momokani dainai Dirava ena tau ena goada be hegeregere momokani, vadaeni kara namodia ibounai do ia karaia diba mai kwalimu danu.” (2 Timoteo 3:​16, 17) Unai dainai hahediba herevadia dekenai Bible be hegeregere momokani. Bema Toi Tamona hahedibana be momokani, namona be unuseniai ia noho.

Oi ai boiria Bible oi tahua totona, bona gau badana be Keristen Greek Revarevadia edia buka 27 oi tahua, bona do oi itaia diba bema Iesu bona iena hahediba taudia be Toi Tamona idia hadibaia. Oi tahua noho lalonai, oi sibona oi henanadai henia:

1. Bible siri ta lau davaria diba ia be “Toi Tamona” ia gwauraia, a?

2. Bible siri ta lau davaria diba ia gwau Dirava be taunimanima idauidau toi, Tamana, Natuna, bona lauma helaga unai, bona idia toi be Dirava tamona sibona?

3. Bible siri ta lau davaria diba ia gwau Tamana, Natuna, bona lauma helaga be dala iboudiai dekenai idia hegeregere, noho hanaihanai dalana dekenai, siahu dekenai, dagi dekenai, bona aonega dekenai?

Ena be oi tahua, to Toi Tamona ia gwauraia sirina ta do oi davaria lasi, bona siri ta do oi davaria lasi ia gwau Tamana, Natuna, bona lauma helaga be dala ibounai dekenai idia hegeregere, noho hanaihanai dalana dekenai, siahu dekenai, dagi dekenai, bona aonega dekenai danu. Siri ta lasi ia gwau Natuna be Tamana danu ia hegeregere unai daladia dekenai​—to bema unai bamona siri ta ia noho, ia be Toi Tamona do ia hamomokania lasi to reana ia hahedinaraia “rua be tamona bamona.” Bible lalonai ia gwau lasi lauma helaga be Tamana danu ia hegeregere.

Diba Taudia Momo Edia Hereva

Diba taudia momo, Toi Tamona idia hadibaia taudia danu, idia gwau Bible lalonai Toi Tamona hahedibana ia noho lasi. Haheitalai be The Encyclopedia of Religion bukana lalonai ia gwau:

“Bible siri edia anina idia gwauraia taudia bona tomadiho idia stadilaia taudia edia lalohadai be tamona, idia gwau Heberu Bible lalonai Toi Tamona hahedibana ia noho lasi . . . Ena be Heberu Bible lalonai ia gwau Dirava be Israel ena tamana bona Dirava idia henia ladana haida be Hereva (davar), Lauma (ruah), Aonega (hokhmah) bona Noho (shekhinah), to Taravatu Gunana ena hereva bona gabeai idia vara toi tamona hahedibana idia hatamonaia toho neganai, unai be Taravatu Matamatana ena hereva dekenai idia torea taudia idia ura lasi torea herevadia idia haboua karana.

“Ma danu, Bible siri edia anina idia gwauraia taudia bona tomadiho idia stadilaia taudia idia laloa Taravatu Matamatana lalonai, Toi Tamona hahedibana ia hedinarai namonamo lasi. Tamana Dirava be gau ibounai edia badina (Pantokrator) bona ia be Iesu Keriso ena tamana danu; ‘Tamana’ be Toi Tamona ena taunimanima ginigunana ena dagina lasi to Dirava ena ladana ma ta. . . .

“Taravatu Matamatana lalonai idia be Dirava ena lauma tauanina (‘gau ibounai lalonai ia noho toi tamona’) idia laloa lasi, bona Taravatu Matamatana lalonai gabeai idia gwauraia hahedibana (hupostasis, ousia, substantia, subsistentia, prosōpon, persona) ena hereva idauna ia noho lasi. . . . Unai hahediba be Bible ena hereva sibona amo ita hamomokania diba lasi.”⁹

Unai hereva dekenai, tanobada ena sivarai amo The New Encyclopœdia Britannica ia gwau:

“Unai hereva Toi Tamona eiava ena hahediba herevana be Taravatu Matamatana lalonai idia hedinarai lasi . . .

“Unai hahediba herevana be lagani sinahu momo lalonai bona hepapahuahu momo dekenai idia havaraia. . . .

“Ela bona lagani 300-400 C.E. neganai, unai taudia toi edia idau bona edia tamona idia gwauraia lasi, dubu ena hahediba hereva badana tamona idia gwauraia neganai.”¹⁰

New Catholic Encyclopedia bukana lalonai, Toi Tamona ena hamatamaia dalana be unai bamona ia herevalaia danu, ia gwau:

“Bible siri edia anina idia gwauraia taudia bona Bible idia stadilaia taudia momo bona edia namba ia bada noho Roman Katolik taudia momo idia laloa bema ita gwau Taravatu Matamatana lalonai Toi Tamona ia herevalaia, namona be iseda hereva lalonai ita gwau ita hamomokania namonamo diba lasi. Dubu edia hahediba herevadia ena sivarai idia torea taudia bona tomadiho idia stadilaia taudia idia laloa bema ita gwau Toi Tamona ita hamomokania namonamo diba, ita be Keristen ia hamatamaia negana ita rakatania bona ita be lagani 375-400 C.E. negana dekenai ita mai. Unai neganai Toi Tamona ena hahediba be dubu lalonai idia gwauraia, ‘Dirava tamona mauri taudia toi lalodiai,’ bona unai neganai sibona Keristen taudia edia mauri bona lalohadai dekenai unai lalohadai idia abia dae momokani. . . .

“Unai bamona ia vara dainai ita gwau lasi unai lalohadai be haraga ia hamatamaia; unai hahediba be lagani sinahu toi dekenai idia havaraia.”¹¹

“Ia Gwauraia Lasi to Unai Lalohadai Ia Havaraia,” A?

Toi Tamona idia abia dae taudia be reana idia gwau Bible lalonai Toi Tamona ena hereva “ia gwauraia lasi to unai lalohadai ia havaraia.” To unai bamona idia hereva Bible idia torea haorea negana daudau murinai. Unai bamona idia karaia neganai idia ura Bible ena hereva dekenai anina ta idia atoa, bona gabeai negana ena dubu taudia ese idia gwauraia kava ia be hahediba herevana ta.

Oi sibona oi nanadaia: Badina be dahaka Bible be ena hahediba badana​—Dirava be daika​—ena hereva “ia gwauraia lasi to unai lalohadai ia havaraia” sibona? Bible be ma hahediba badadia ia hahedinaraia namonamo; to inai hahediba badana dekenai be edena bamona? Unai bamona neganai, namona be gau ibounai ia Havaraia Tauna be buka ta ia torea neganai Toi Tamona do ia hahedinaraia namonamo, ani?

Bible ese Toi Tamona hahedibana ia gwauraia namonamo lasi ena badina be inai: Ia be Bible hahedibana lasi. Bema Dirava be Toi Tamona, momokani ia be unai hereva do ia hahedinaraia namonamo, Iesu bona iena hahediba taudia be ma haida dekenai do idia hadibaia diba totona. Bona unai hereva badana bema ia maoro, vadaeni, Dirava ena lauma dainai idia torea Herevana lalonai do idia torea danu. Ita gwau lasi Dirava ia ura goevadae lasi taudia be lagani sinahu momo murinai idia lalo-hekwarahilaia.

Toi Tamona taudia be Bible siri haida idia gwauraia badina idia ura idia hamomokania Bible be unai hereva “ia gwauraia lasi to unai lalohadai ia havaraia,” to dahaka ita davaria? Ita itaia bona hereva maorona ita gwauraia totona ia hedinarai Bible ese Kerisendom ena Toi Tamona ia gwauraia lasi. To, tomadiho taudia idia ura Bible siri lalonai idia sibona edia lalohadai Toi Tamona dekenai idia atoa vareai. To unai lalohadai be Bible siri lalonai lasi. Unai Toi Tamona lalohadai be Bible ena diari herevadia ibounai amo idia idau.

Unai siri ta idia haheitalaia be Mataio 28:​19, 20. Unuseniai, Tamana, Natuna, bona lauma helaga be nega tamona idia gwauraia. Haida idia gwau unuseniai Toi Tamona ena hereva ia gwauraia lasi to unai lalohadai ia havaraia. To oi sibona be unai siri oi duahia. Unai siri lalonai ia gwau taunimanima toi be Dirava tamona bona edia siahu ia hegeregere noho hanaihanai dalana dekenai, siahu dekenai, dagi dekenai, bona aonega dekenai, a? Lasi, unai bamona hereva ta ia noho lasi. Unai toi be nega tamona idia gwauraia siridia ma haida lalonai danu be unai bamona.

Haida idia gwau Mataio 28:​19, 20 dekenai “ena ladana” tamona dekenai Tamana, Natuna, bona lauma helaga herevana idia hatamonaia neganai, unai ese Toi Tamona ena lalohadai ia havaraia; to mani Genese 48:16 ese Abraham bona Isako “ena ladana” tamona idia gwauraia dalana oi itaia.

Toi Tamona taudia idia gwau danu, Bible haida lalonai Ioane 1:1 be “Hereva” idia gwauraia ia be “Dirava danu” bona ia be “Dirava.” To ma Bible haida lalonai idia gwau Hereva be “dirava ta” eiava ia be “Dirava bamona,” anina be ia be Dirava lasi to siahu bada tauna ta. Ma danu, Bible siri ia gwau “Hereva” be Dirava “ida” ia noho. Unai dainai ita diba ia be unai Dirava lasi. Bona herevana dahaka ita laloa “Hereva” dekenai to Ioane 1:1 dekenai, taunimanima toi ia herevalaia lasi to taunimanima rua sibona. Bema ita tahua namonamo bona maoro dalana dekenai ita tahua, ita davaria, nega momo, Toi Tamona hahedibana hamomokania totona idia gwauraia siridia be idia hamomokania diba lasi.a

Inai ita laloa danu be namo: Bema Iesu bona iena hahediba taudia ese Toi Tamona hahedibana idia hadibaia, ita diba idia murinai idia mai dubu gunalaia taudia be do idia hadibaia danu. To unai taudia, hari inai negai ita gwauraidia Aposetolo Tamadia, be Toi Tamona hahedibana idia hadibaia, a? Unai henanadai be gabeai Gima Kohorona ta dekenai, inai sivarai ena Kahana 2 dekenai do ita herevalaia.

Ai gaukaralaia bukadia

1. The Catholic Encyclopedia, 1912, Volume 15, rau 47.

2. The Baptist Encyclopœdia, William Cathcart ese ena hereva ia hamaoromaoroa, 1883, rau 1168, 1169.

3. A Short History of Christian Doctrine, Bernhard Lohse ese ia torea, 1980 gauna, rau 53.

4. Ibid., rau 64, 65.

5. The Church Teaches, John F. Clarkson, S.J., John H. Edwards, S.J., William J. Kelly, S.J., bona John J. Welch, S.J. ese idia hahanaia bona ena hereva idia hamaoromaoroa, 1955, rau 125-127.

6. Ibid., rau 125.

7. The Triune God, Edmund J. Fortman ese ia torea, 1982 gauna, rau 126.

8. On the Incarnation, Penelope Lawson ese ia hahanaia, 1981 gauna, rau 27, 28.

9. The Encyclopedia of Religion, Mircea Eliade, ena hereva ia hamaoromaoroa gaukarana ia biagua tauna, 1987, Volume 15, rau 54.

10. The New Encyclopœdia Britannica, namba 15 gauna, 1985, Volume 11, Micropædia, rau 928.

11. New Catholic Encyclopedia, 1967, Volume 14, rau 295.

[Footnotes]

[Picture on page 19]

Church at Tagnon, France