Iehova ese Taunimanima Edia Dika Ia Gwauatao Bada Herea

“Kara dika tauna ese ena dala ia rakatania, bona kara gagevagageva tauna ena lalohadai ia rakatania be namo; bona Iehova dekenai ia giroa be namo, . . . badina ia ese ena dika do ia gwauatao.”​—ISAIA 55:7.

1. Iehova ese edia dika ia gwauatao taudia be hari dahaka hahenamo idia abia?

IEHOVA ese idia helalo-kerehai taudia edia dika ia gwauatao dainai idia be lauma paradaisona dekenai lalo-maino idia abia diba. Unai ia vara diba badina idia be inai taravatu idia badinaia: “Iehova umui tahua, umui do davaria diba neganai. Ia dekenai umui boiboi, ia do kahirakahira neganai. Kara dika tauna ese ena dala ia rakatania, bona kara gagevagageva tauna ena lalohadai ia rakatania be namo; bona Iehova dekenai ia giroa be namo, badina ia dekenai do ia hebogahisi. Bona iseda Dirava dekenai ia giroa be namo, badina ia ese ena dika do ia gwauatao.”​—Isaia 55:​6, 7.

2. (a) Isaia 55:​6, 7 ena hereva ia gwau ‘Iehova oi tahua’ bona ‘ia dekenai oi giroa lou,’ unai ena anina be dahaka? (b) Dahaka dainai Babulono dekenai idia abidia lao Iuda taudia be Iehova dekenai idia giroa lou be gau badana, bona idia haida dekenai dahaka ia vara?

² “Iehova [ia] tahua” bona Iehova ese ena noinoi ia kamonai henia totona, gau badana be kara dika tauna be ena kara dika ia rakatania bona taunimanima kara dika henia lalohadaina do ia negea danu. Gau badana be “Iehova dekenai ia giroa,” unai ena anina be guna unai tauna be Dirava danu idia hetura namo herea, to dika ia karaia murinai ia ese Dirava ia rakatania. Iudea dekenai idia noho taudia be unai bamona, edia abidadama kara Dirava dekenai idia rakatania dainai, gabeai idia be idau gabu ai idia noho, Babulono dekenai idia abidia lao. Gau badana be unai idau gabu ai idia noho Iuda taudia idia helalo-kerehai bona Iehova dekenai idia giroa lou be namo, badina edia dika dainai igui hesiai lalonai Babulono dekenai idia abidia lao, bona lagani 70 lalodiai edia tano ia noho kava peroveta hereva ia gwauraia hegeregerena. Lagani 537 B.C.E. ai, gavamani ena oda dainai Babulono dekena amo idia ruhaia nege dainai, Dirava idia gari henia Iuda orena taudia be edia tano idia noholaia lou. (Esera 1:​1-8; Daniel 9:​1-4) Iudea tanona dekenai edia hanua idia haginia lou namo herea dainai idia gwau ia be Eden Paradaisona bamona.​—Esekiel 36:​33-36.

3. Lauma Israel orena taudia bona Babulono amo Iudea dekenai idia giroa lou Dirava gari henia taudia idia davaria gauna be edena bamona ia hegeregere?

³ Lauma Israel taudia bona Babulono amo Iudea tanona dekenai idia giroa lou Dirava gari henia Israel taudia idia davaria gauna be hegeregere. (Galatia 6:16) Tanobada Ibounai Tuarina Ginigunana murinai lauma Israel orena taudia edia kara bona edia lalohadai idia haidaudia danu. Lagani 1914 ai, Babulono Badana, tomadiho koikoi ibounai oreana unai, ena igui hesiai dekena amo idia ruhaia bona Dirava ese ia lalo-namo henidia lou. Guna taunimanima idia gari henidia bona Iehova ena hesiai gaukara idia karaia lasi, to idia helalo-kerehai, unai dainai Dirava ese Babulono Badana dekena amo ia ruhadia, bona lauma dalanai edia gabu korikori dekenai ia hakaudia lou, bona ia gaukaralaidia Basileia ena sivarai idia harorolaia totona. Unai nega amo ia mai hari Dirava ena taunimanima huanai lauma paradaisona ia noho, bona unai ese iena ladana helagana ia hanamoa. (Isaia 55:​8-13) Unai idau negai laulauna bona hari inai negai ia guguru negana lalonai, ia hedinarai goevagoeva Dirava ese taunimanima edia dika ia gwauatao murinai hahenamo idia davaria, bona momokani Iehova ese helalo-kerehai taudia edia dika ia gwauatao bada herea.

4. Iehova ena hesiai taudia haida be dahaka kara dainai idia gari?

⁴ Hari inai negai, Iehova ena hesiai taudia be mai edia abidadama ia ese edia dika do ia gwauatao. To, edia dika gunadia dainai idia haida idia lalohisihisi, bona idia hemarai dikadika. Idia laloa unai lauma paradaisona dekenai idia noho be maoro lasi. Oibe, idia haida idia laloa gwauatao diba lasi kara dikana ta idia karaia dainai Iehova ia ura lasi edia dika do ia gwauatao. Unai be momokani, a?

Kara Dika Haida Edia Gwauatao Dalana be Lasi

5. Dahaka dainai ita gwau diba kara dika haida edia gwauatao dalana be lasi?

⁵ Kara dika haida edia gwauatao dalana be lasi. Iesu Keriso ia gwau: “Taunimanima edia kara dika bona edia hereva dika ibounai be do ia gwauatao. To Lauma Helaga dekenai ia hereva dika tauna be ena dika do ia gwauatao lasi.” (Mataio 12:31) Vadaeni, tau ta ese Dirava ena lauma helaga, eiava iena gaukara siahuna, dekenai ia hereva dika henia neganai iena dika gwauatao dalana be lasi. Aposetolo Paulo be unai bamona kara dika ia gwauraia inai siri dekenai, ia gwau: “Edia abidadama idia rakatania taudia be edena bamona edia lalona do idia giroa diba? Gunaguna edia lalona idia diari . . . [to] edia abidadama idia rakatania neganai idia be mai edia dala do edia lalona idia giroa lou, a? Lasi momokani. Idia ese edia kara dika dekena amo Dirava ena Natuna satauro dekenai idia hamasea lou bamona. Idia ese Keriso taunimanima edia vairana dekenai idia hahemaraia lou bamona.”​—Heberu 6:​4-6.

6. Edena bamona ita diba kara dika ta be mai ena gwauatao dalana eiava lasi?

⁶ Tau ta ia kara dika neganai, Dirava mo sibona ia diba unai be gwauatao diba gauna ta eiava lasi. To, unai hereva dekenai Paulo be inai bamona ia torea, ia gwau: “Keriso ena hereva momokani ita diba murinai, bema iseda ura dekenai kara dika ita karaia noho, boubou gauna ta lasi ese unai dika do ia gwauatao diba. To iseda dokona be unai, mai gari bada danu Kota Badana do ita naria noho.” (Heberu 10:​26, 27) Gwau-edeede tauna be mai ena ura danu kara ta ia karaia, eiava ena “lalona ia auka bona ena be ia diba ia maoro lasi to sibona ena ura ia do karaia noho.” (Webster’s New Collegiate Dictionary) Bema tau ta be hereva momokani ia diba to mai ena ura bona mai ena gwau-edeede danu kara dika ia do karaia noho, unai tau ena kara dika gwauatao dalana be lasi. Unai dainai ena be kara dika be gau namona lasi, to kudou ena kara be gau badana, iena ura unai kara dekenai ena bada ese ia hahedinaraia unai kara dika be mai ena gwauatao dalana eiava lasi. To, bema Keristen tauna ta be ena dika dainai ia lalohisihisi bada, reana unai ena anina be dahaka? Ena dika ia lalohisihisilaia dainai, unai ese ia hahedinaraia reana ia be gwauatao diba lasi kara dikana ta ia karaia lasi.

Edia Kara Dika Gwauatao Dalana be Lasi

7. Dahaka dainai ita gwau diba Iesu idia inai henia tomadiho taudia haida edia kara dika gwauatao dalana be lasi?

⁷ Iesu idia inai henia Iuda tomadiho ena gunalaia taudia haida be mai edia ura danu kara dika idia karaia, bona unai kara dika gwauatao dalana be lasi. Ena be Dirava ena lauma helaga ena siahu idia itaia Iesu ese kara namo bona hoa karadia ia karaia neganai, to unai dubu taudia idia gwau ia ese Belesebulo amo, eiava Satana Diabolo amo, ia mai siahuna ia gaukaralaia. Ena be idia diba unai be Dirava ena lauma helaga siahuna, to mai edia ura danu idia kara dika. Unai dainai, gwauatao diba lasi kara dikana idia karaia, badina Iesu ia gwau: “Lauma Helaga dekenai ia hereva dika tauna be ena dika do ia gwauatao lasi, hari inai mauri lalonai bona mauri gabeai danu.”​—Mataio 12:​22-32.

8. Dahaka dainai Iuda Iskariote ia karaia kara dikana be gwauatao diba lasi gauna?

⁸ Iuda Iskariote be gwauatao diba lasi kara dikana ia karaia. Mai ena ura danu ia ese Iesu ia samania, iena koikoi bona henaohenao karadia ese idia veria unai ia karaia totona. Hegeregere, Iuda ia itaia Maria be davana bada dehorona be Iesu dekenai ia bubua neganai, ia henanadai ia gwau: “Badina dahaka inai dehoro be ia hoia lasi? 300 kina do ia abia, ogogami taudia dekenai do idia harihari henia.” Aposetolo Ioane ma ia gwau: “Unai bamona [Iuda] ia hereva [neganai ia] be ogogami taudia dekenai ia bogahisihisi lasi, badina ia be henaoa tauna, ia be moni ena maua ia naria, bona idia udaia moni be ia ese ia henaoa.” Daudau lasi murinai, Iuda ese Iesu ia samania siliva moni 30 ia abia totona. (Ioane 12:​1-6; Mataio 26:​6-16) Momokani, unai kara ia karaia murinai Iuda be ia lalohisihisi dainai sibona ia hamasea. (Mataio 27:​1-5) To Dirava ese ena kara dika ia gwauatao lasi, badina mai ena ura danu, hanaihanai sibona ena ura ia tahua bona Iesu ia samania koikoi karana ese ia hahedinaraia ia be lauma helaga ia kara dika henia. Iesu ese Iuda ia gwauraia “dika ia davaria tauna” be maoro!​—Ioane 17:12; Mareko 3:29; 14:21.

Edia Kara Dika Ia Gwauatao

9. Dahaka dainai Dirava ese David ena kara dika Bataseba dekenai ia gwauatao?

⁹ Kara dika haida be mai edia ura danu idia karaia, to kara dika ma haida idia karaia idia kerere dainai, bona Dirava ese unai kara dika kerere gaudia ia gwauatao diba. Hegeregere, Israel ena Pavapava David ena sivarai oi laloa. Ia be Uria adavana, Bataseba danu ia heudahanai, bona gabeai Ioab ia hadibaia kara ta do ia karaia bena tuari lalonai Uria do idia durua lasi do idia hamasea totona. (2 Samuel 11:​1-27) Dahaka dainai Dirava ese David dekenai hebogahisi ia hahedinaraia? Badina badana ta be iena Basileia gwauhamatana dainai, to danu ia hebogahisi henia badina David be hebogahisi tauna bona ena kara dika amo ia helalo-kerehai momokani dainai.​—1 Samuel 24:​4-7; 2 Samuel 7:12; 12:13.

10. Ena be Petro ena kara dika be bada, to dahaka dainai Dirava ese iena kara dika ia gwauatao?

¹⁰ Danu, namona be aposetolo Petro ena sivarai oi laloa. Nega momo ia gwau Iesu ia diba lasi neganai ena kara dika be bada. Dahaka dainai Dirava ese Petro ena kara dika ia gwauatao? Ia be Iuda Iskariote bamona lasi, Petro be Dirava bona Keriso edia hesiai gaukara be koikoi dalana amo ia karaia lasi. Unai aposetolo tauna ia kara dika badina ena tauanina be ia manoka dainai, to murinai ena kara dika amo ia helalo-kerehai momokani, bona “ia tai dikadika.”​—Mataio 26:​69-75.

11. ‘Helalo-kerehai’ ena anina be dahaka, bona ia helalo-kerehai momokani tauna be dahaka do ia karaia be gau badana?

¹¹ Ita kikilaia vadaeni sivaraidia ese idia hahedinaraia ena be tau ta ena kara dika be bada herea, to dala ia tahua diba Iehova Dirava ese iena kara dika do ia gwauatao totona. To Dirava ese tau ta ena kara dika do ia gwauatao totona gau badana be kara dika tauna ena lalohadai be edena bamona? Dirava ese ia kerere Keristen tauna ena dika ia gwauatao totona, gau badana be ia helalo-kerehai momokani. Tau ta ia helalo-kerehai ena anina be “guna ia karaia kara dikadia dainai ia sori bona unai kara amo ena lalona ia giroa” eiava “ia karaia karana eiava ia karaia lasi karana dainai ia lalohisihisi eiava ia hemarai.” (Webster’s Third New International Dictionary) Ia helalo-kerehai momokani tauna be do ia lalohisihisi bema ena kara dika amo Iehova ena ladana bona iena orea ia hadikaia, ia hahisihisia, eiava ia hahekwakwanaia dainai. Ena kerere amo ia helalo-kerehai tauna ese huahua namodia do ia hahedinaraia, ia ese kara do ia karaia ena lalona ia hagiroa karana hamomokania totona. (Mataio 3:8; Kara 26:20) Hegeregere, bema koikoi dalana amo tau ta ena kohu ia henaoa, do ia goada karaia ia henaoa kohuna ena davana do ia henia lou totona. (Luka 19:8) Bible ese ia hahedinaraia hegeregerena, helalo-kerehai Keristen tauna be mai ena abidadama Iehova ese kara dika do ia gwauatao bada herea. Bible ena hereva haida be dahaka?

Ita Hamomokania Dirava ese Dika Ia Gwauatao Ena Badina Haida

12. Salamo 25:11 ese ia hahedinaraia ia helalo-kerehai tauna ena dika gwauatao dalana ena badina be dahaka?

¹² Ia helalo-kerehai momokani tauna be Iehova ena ladana dekenai ia guriguri diba ena kara dika ia gwauatao totona. David be inai bamona ia noinoi: “Oiemu ladana dainai, Iehova, lauegu kerere oi laloa lasi, badina unai kerere be bada herea.” (Salamo 25:11) Unai bamona ia guriguri dainai, bona ena kara dika amo Iehova ena ladana ia hadikaia karana amo ia helalo-kerehai neganai, gabeai ia ura lasi momokani unai kara dika badana ia karaia lou.

13. Dirava ese edia kara dika ia gwauatao totona guriguri be edena bamona mai anina bada?

¹³ Ena be iena hesiai taudia idia kerere to idia helalo-kerehai neganai bona edia kudouna ibounai danu Iehova Dirava idia guriguri henia neganai, ia ese edia guriguri ia haerelaidia. Hegeregere, David ia diba ena kara Bataseba dekenai be kara dika badana ta bona ia be ena kudouna ibounai ida ia guriguri neganai, Iehova ese ena guriguri ia dadaraia lasi. Oibe, David ena hereva Salamo 51 dekenai ese noinoi taudia momo herea edia lalohadai ia hahedinaraia. Ia noinoi, ia gwau: “Lau oi hanamoa, Dirava e, oiemu lalokau hebogahisi hegeregerena. Oiemu hebogahisi momo amo lauegu kerere oi kokidia. Lauegu kara kerere amo lau oi huria namonamo, bona lauegu kara dika amo lau oi hagoevaia. Dirava ese ia abia dae boubou gauna be lauma manauna; Dirava e, ena lalona ia manau bona ena dika amo ia helalo-kerehai tauna do oi dadaraia lasi.”​—Salamo 51:​1, 2, 17.

14. Bible ena hereva be edena bamona ia hahedinaraia Dirava ese Iesu ena boubou karana idia abia dae taudia edia dika do ia gwauatao?

¹⁴ Dirava ese Iesu ena boubou karana dekenai idia abidadama taudia edia dika ia gwauatao. Paulo ia torea, ia gwau: “Keriso ese iena mase dekena amo ita ia hoia lou vadaeni, iena rarana dainai. Iseda dika danu ia ese ia gwauatao vadaeni.” (Efeso 1:7) Unai hegeregerena, aposetolo Ioane ia torea, ia gwau: “Lauegu natuna e, inai hereva umui dekenai lau torea noho, be umui ese do umui kara dika lasi totona. To tau ta bema ia kara dika, ita be mai iseda durua tauna, iseda Tamana vairanai. Ia be Iesu Keriso, kara maoromaoro tauna. Bona Keriso sibona be iseda kara dika gwauatao dalana. Bona iseda dika sibona lasi, to Keriso be taunimanima ibounai edia dika gwauatao dalana.”​—1 Ioane 2:​1, 2.

15. Dirava ena hebogahisi abia hanaihanai totona, gau badana be ena kara dika amo ia helalo-kerehai tauna be dahaka do ia karaia?

¹⁵ Iehova ena hebogahisi karana dainai ta ese ena dika amo ia helalo-kerehai neganai, ia diba dala ia noho ena dika gwauatao totona. Nehemia ia gwau: “Oi be dika gwauatao Diravana. Mai emu hariharibada, bona mai emu hebogahisi; oi badu haraga lasi bona lalokau amo oi honu.” (Nehemia 9:17; Esodo 34:​6, 7 itaia danu.) Momokani, Dirava ena hebogahisi abia hanaihanai totona, gau badana be kara dika tauna ia goada karaia Dirava ena taravatu ia badinaia totona. Salamo torea tauna ia gwau: “Emu hebogahisi be lau dekenai do ia mai, do lau mauri totona; badina be emu taravatu be egu moale gauna. Iehova e, oiemu hebogahisi be bada herea; lau dekenai mauri oi henia noho, emu kara maoromaoro hegeregerena.”​—Salamo 119:​77, 156.

16. Ita be kara dika taudia dainai Iehova ese ita ia hebogahisi henia, dahaka dainai unai ita moalelaia?

¹⁶ Ita be kara dika taudia dainai Iehova ese ita ia hebogahisi henia, bona unai dainai ia helalo-kerehai kara dika tauna ia lalo-maino bona gari lasi dekenai Dirava ia guriguri henia, badina ia be mai ena helaro ena dika do ia gwauatao. (Salamo 51:5; Roma 5:12) Salamo torea tauna David ena hereva ese ita ia hagoadaia, ia gwau: “[Iehova Dirava ese] iseda kara dika hegeregerena ita ia kara henia lasi; iseda kerere ena davana korikori ita ia henia lasi. Guba be tanobada ataiai ia noho hegeregerena, iena hebogahisi be unai bamona ia bada iena garina idia gari taudia dekenai. Dina ia daekau gabuna bona dina ia diho gabuna edia padana ena daudau hegeregerena, iseda kara dika be ita amo ia atoa daudau herea. Tamana be natuna dekenai ia hebogahisi hegeregerena, Iehova ese hebogahisi ia hahedinaraia ia idia gari henia taudia dekenai. Badina ia sibona ia diba iseda lalona bona tauanina, bona ia laloatao ita be tano ena kahu.” (Salamo 103:​10-14) Oibe, iseda guba Tamana ena hebogahisi bona durua karadia be iseda tanobada tamadia edia kara ia hereaia.

17. Dirava ese tau ta ena dika ia gwauatao neganai, guna unai tau be mai ena abidadama danu ia karaia hesiai gaukarana ia laloa, a?

¹⁷ Ia helalo-kerehai kara dika tauna be gari lasi dekenai Iehova ia guriguri henia diba ena dika do ia gwauatao totona, badina Iehova ese iena abidadama hesiai gaukara gunadia do ia laloaboio lasi. Ena be Nehemia ese ena kara dika gwauatao totona ia guriguri lasi, to ia gwau: “Lauegu Dirava e, lau oi laloatao kara namo dainai.” (Nehemia 13:31) Ena dika amo ia helalo-kerehai Keristen tauna be inai hereva dainai do ia moale diba: “Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi. Umui ese Dirava umui lalokau henia.”​—Heberu 6:10.

Elda Taudia amo Heduru Oi Abia

18. Bema Keristen tauna ese ia karaia kara dikana dainai lauma dalanai ia gorere, dahaka do ia karaia be namo?

¹⁸ Bema Keristen tauna ta ia laloa ia hegeregere lasi lauma paradaiso dekenai do ia noho totona eiava ena kara dika dainai lauma dalanai ia gorere bena ia guriguri diba lasi, dahaka do ia karaia diba? Hahediba tauna Iakobo ia gwau: “Ekalesia gunalaia taudia do ia boiria be namo. Idia ese ia dainai do idia guriguri, bona ia dekenai dehoro do idia atoa, [Iehova] ena ladanai. Inai guriguri mai abidadama danu ese gorere tauna do ia hanamoa. [Iehova] ese iena mauri do ia hanamoa, bona iena kara dika do ia gwauatao.” Oibe, kongregesen ena elda taudia be ia helalo-kerehai kara dika tauna ida eiava unai abidadama tauna totona idia guriguri diba, lauma dalanai do idia hagoadaia toho lou totona.​—Iakobo 5:​14-16.

19. Bema tau ta be orea murimurinai idia atoa, ena kara dika gwauatao bona orea dekenai ma ia vareai lou totona, dahaka do ia karaia be namo?

¹⁹ Ena be hahemaoro komiti taudia ese ia helalo-kerehai lasi tauna ta be orea murimurinai idia atoa, to ita gwau diba lasi unai tau ena kara dika be reana gwauatao diba lasi gauna ta. To, ena kara dika gwauatao bona orea dekenai ia vareai lou totona, gau badana be mai manau danu Dirava ena taravatu ia badinaia, helalo-kerehai huahuana ia hahedinaraia, bona elda taudia dekenai ia lao orea dekenai ia vareai lou urana ia gwauraia hedinarai totona. Idau negai Korinto hanuana dekenai, heudahanai tauna be kongregesen murimurinai idia atoa murinai, Paulo ia torea, ia gwau: “Unai tau ena kara dika davana be umui momo ese umui henia, vadaeni ia hegeregere. Harihari iena dika do umui gwauatao, bona iena lalona do umui hagoadaia be namo, iena lalohisihisi ese iena abidadama do ia haorea garina. Unai dainai umui lau noia, emui lalokau ia dekenai do umui hedinarai henia lou, vadaeni do ia diba umui lalokau henia momokani.”​—2 Korinto 2:​6-8; 1 Korinto 5:​1-13.

Dirava ese Goada Ia Henia

20, 21. Bema tau ta ia lalohisihisi badina ia laloa gwauatao diba lasi kara dikana ta ia karaia, ia durua gauna be dahaka?

²⁰ Bema oi gorere eiava oi lalo-metau bona unai dainai oi laloa oi ese gwauatao diba lasi kara dikana ta oi karaia, reana oi ia durua gaudia be oi laga-ani bona oi mahuta namonamo. To, gau badana be, Petro ena hereva oi laloatao, ia gwau: “[Dirava] ese umui ia naria noho. Unai dainai emui laloa hekwarahi gaudia ibounai iena imana dekenai do umui atoa.” Bona oi naria noho Satana ena hagoadaia lasi karana ese oi ia hamanokaia garina, badina Petro ma ia gwau: “Do umui laloa maoromaoro bona naria namonamo. Umui ia tuari henia tauna, Satani be leona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho. Emui abidadama dekenai do umui gini goada, vadaeni Satani do umui koua. Namo umui diba, emui ekalesia varavara tanobada kahana ibounai dekenai, be hisihisi inai bamona idia abia noho. Umui be nega sisina do umui hisihisi, vadaeni gabeai, hariharibada ibounai Diravana ese umui do ia hanamoa momokani, umui do ia haginia goada, bona badina korikori latanai umui do ia haginia.”​—1 Petero 5:​6-10.

²¹ Vadaeni, bema emu dika amo oi helalo-kerehai, to oi hemarai noho badina oi laloa gwauatao diba lasi kara dikana ta oi karaia, namona be oi laloatao Dirava be aonega, kara maoromaoro, bona lalokau daladia ia gaukaralaidia. Unai dainai, mai emu abidadama dekenai oi guriguri henia. Bona “hesiai tauna mai ena kamonai bona mai ena kara maoromaoro” orea dekena amo ia henia lauma anianina oi ania noho. (Mataio 24:​45-47) Witness orea taudia oi bamodia bona hua iboudiai Keristen ena haroro gaukara oi karaia. Unai ese oiemu abidadama do ia hagoadaia bona lalo-maino do oi abia, do oi laloa lasi Dirava ese emu kara dika ia gwauatao lasi.

22. Murina sivarai dekenai dahaka do ita kikilaia?

²² Lauma paradaiso dekenai idia noho taudia idia moale badina idia diba Iehova ese taunimanima edia dika ia gwauatao bada herea. To, hari, edia mauri lalonai hekwakwanai idia do davaria noho. Reana idia lalo-metau badina edia lalokau tauna ta ia mase eiava edia turana namona ta be gorere dikana ia davaria dainai. Murina sivarai dekenai do ita itaia, unai bamona ia vara bona ma kara haida idia vara neganai, Iehova ese iena taunimanima be iena lauma helaga siahuna dekena amo ia durudia bona ia hakaudia.

Oiemu Haere be Dahaka?

◻ Iehova ese ‘taunimanima edia dika ia gwauatao bada herea’ hamomokania gaudia be dahaka?

◻ Gwauatao diba lasi kara dikana be dahaka?

◻ Kara dika gwauatao dalana be dahaka?

◻ Dahaka dainai edia dika amo idia helalokerehai taudia idia diba Dirava ese edia dika do ia gwauatao?

◻ Edia dika amo idia helalo-kerehai taudia ese dahaka heduru do idia abia diba?

[Picture on page 10]

David bona Petro edia dika gwauatao dalana ia noho to Iuda Iskariote ena dika gwauatao dalana be lasi ena badina oi diba, a?

[Picture on page 12]

Kongregesen elda taudia be gaukara idauidau idia karaia diba lauma dalanai Keristen tauna durua totona