Lauma Helaga Oi Koua, A?
“Kara dika ta be mase karana.”—1 IOANE 5:16, BHğ.
1, 2. Edena bamona ita diba ta be Dirava ena lauma helaga ia koua diba?
“NEGA momo lau lalohekwarahi, badina reana Dirava ena lauma helaga lau koua.” Germany ai, taihu ta be unai bamona ia hereva. To, Keristani tauna ta be Dirava ena lauma helaga, gaukara siahuna unai, ia koua diba, a?
2 Oibe, Keristani tauna ta be Iehova ena lauma helaga ia koua diba. Iesu Keriso ia gwau: “Taunimanima edia kara dika bona edia hereva dika ibounai be do ia gwauatao. To Lauma Helaga dekenai ia hereva dika tauna be iena dika do ia gwauatao lasi.” (Mataio 12:31) Baibel be ita ia hadibaia: “Keriso ena hereva momokani ita diba murinai, bema iseda ura dekenai kara dika ita karaia noho, boubou gauna ta lasi ese unai dika do ia gwauatao diba. To iseda dokona be unai, mai gari bada danu, be Kota Badana do ita naria noho.” (Heberu 10:26, 27) Bona aposetolo Ioane ia gwau: “Kara dika ta be mase karana.” (1 Ioane 5:16, BHğ) To bema tau ta be kara dika badana ia karaia bona ia gwau ia karaia karana be “mase” gauna; unai be maoro, a?
Dirava ese Helalo-Kerehai Tauna Ena Dika Ia Gwauatao
3. Bema kara dika ta ita karaia dainai ita lalohisihisi bada, unai ese dahaka ia hahedinaraia?
3 Iehova be kara dika taudia do ia kota henia. Ita ibounai be Dirava vairanai iseda dika do ita gwauraia hedinarai, bona hanaihanai Dirava be hahemaoro goeva ia karaia. (Genese 18:25; Roma 14:12) Iehova sibona ese do ia abia hidi eda dika do ia gwauatao o lasi, bona lauma helaga ia kokia be namo o lasi. (Salamo 51:11) To, bema kara dika ta ita karaia dainai ita lalohisihisi bada, unai ese ia hahedinaraia ita helalo-kerehai momokani. Vadaeni, helalo-kerehai momokani ena anina be dahaka?
4. (a) Ita helalo-kerehai ena anina be dahaka? (b) Salamo 103:10-14 be edena dala ai ita ia hagoadaia?
4 Ita helalo-kerehai ena anina be, iseda kara dika gunana o ita karaia gwauraia kara dikana dekenai iseda lalohadai ita haidaua. Eiava anina be, ita karaia kara dikana dainai ita lalohisihisi eiava ita sori bona kara dika ita rakatania. Bema kara dika badana ta ita karaia to unai helalo-kerehai toana ita hahedinaraia, vadaeni salamo torea tauna ena hereva ese ita ia hagoadaia diba, ia gwau: “[Iehova be] iseda kara dika ena bada hegeregerena davana ia henia lasi. Ita ese kara dika momo ita karaia vadaeni, bona Dirava ese kerere davana bada herea ia henia diba, to unai bamona ia karaia lasi. Dirava ese ia dekenai idia gari taudia, be ia lalokau henia momokani. Iena lalokau idia dekenai be bada herea, hegeregere guba be tanobada ena ataiai daudau herea ia noho bamona. Dina ia daekau kahana, bona dina ia diho kahana be daudau herea. Unai daudauna hegeregerena be Dirava ese, iseda kara dika ita dekena amo ia kokidia lao vadaeni. Tamana taudia be edia natuna dekenai idia bogahisihisi noho. Inai bamona danu Lohiabada ese, ia dekenai idia gari taudia ia bogahisihisi henidia noho. Dirava ia diba, ita be tanobada ena kahu dekena amo ita ia karaia. Bona ita dekenai ia laloa noho, ita be kahu sibona.”—Salamo 103:10-14.
5, 6. Ioane Ginigunana 3:19-22 ena point badadia o anina oi gwauraia.
5 Danu, Ioane ena hereva be namo herea, ia gwau: “Iseda lalokau kara dekena amo, be do ita diba ita be momokani taudia. Vadaeni unai dainai, iseda kudouna be mai maino danu, Dirava ena vairana dekenai. Bona bema iseda kudouna ese ita idia kota henia noho neganai, Dirava ena vairanai do ita laloa hekwarahi lasi. Badina Dirava ese gau ibounai ia diba, bona iena diba ese iseda kudouna ena diba ia hereaia momokani. Lauegu lalokau taudia e, bema iseda lalona ese ita idia kota henia lasi neganai, ita be Dirava ena vairanai do ita raka kahirakahira lao, gari ta lasi. Vadaeni do ita noia gaudia ibounai be ia ese ita dekenai do ia henia. Badina be iena taravatu ita badinaia noho, bona ia do ita hamoalea karadia ita karaia noho dainai.”—1 Ioane 3:19-22.
6 Tadikaka ita lalokau henia momokani bona kara dika ita karaia lasi neganai, “ita diba ita be momokani taudia.” (Salamo 119:11) To, bema gau haida dainai iseda lalomamina ia dika, namona be inai ita laloatao: “Dirava ese gau ibounai ia diba, bona iena diba ese iseda kudouna ena diba ia hereaia momokani.” Iehova be ita ia hebogahisi henia, badina ia diba ita be ‘iseda Keristani varavara ita lalokau henidia noho,’ kara dika ita tuari henia, bona ita hekwarahi Iena ura ita karaia totona. (1 Petero 1:22) Unai dainai, bema Iehova ita abidadama henia, iseda tadikaka ita lalokau henia momokani, bona kara dika ita karaia lasi, eda lalona be ita do ia “kota henia lasi.” Ita be mai gari lasi ida Dirava do ita guriguri henia bona ena taravatu ita badinaia dainai, Ia be eda guriguri do ia haerelaia.
Lauma Helaga Idia Koua
7. Edena bamona Iehova ia abia hidi ta ena dika do ia gwauatao o lasi?
7 Iehova be daika ena kara dika ia gwauatao lasi? Unai henanadai ita haerelaia totona, Baibel lalonai sivarai haida mani ita itaia. Unai amo, bema kara dika badana ta ita karaia bona ita helalo-kerehai, to ita lalohisihisi bada noho, vadaeni unai Baibel ena sivarai be ita do ia hagoadaia. Unai sivarai dekenai do ita itaia, herevana kerere tauna be edena kara dika ia karaia, to Iehova ia tahua gaudia be inai: Dahaka dainai kerere tauna be kara dika ia karaia, kerere tauna ena lalohadai be dahaka kara dika dekenai, bona kerere tauna be mai ena ura ida kara dika ia karaia o lasi—bena Iehova ia abia hidi ta ena dika do ia gwauatao o lasi.
8. Edena dala ai Iuda ena tomadiho gunalaia taudia be Dirava ena lauma helaga idia koua?
8 Iesu Keriso idia dagedage henia Iuda tomadiho gunalaia taudia be Dirava ena lauma helaga idia koua. Idia itaia Iesu be Dirava ena lauma helaga ia gaukaralaia dainai, ia be hoa karadia ia karaia bona Iehova ia hanamoa. To, unai tomadiho gunalaia taudia idia gwau, Keriso be Satani Diabolo ena siahu ia gaukaralaia. Iesu ia gwau, Dirava ena lauma helaga idia gwauraia dika taudia be kara dika ta idia karaia, bona Dirava be unai bamona taudia edia dika do ia gwauatao lasi “hari inai mauri lalonai, bona mauri gabeai danu.”—Mataio 12:22-32.
9. Iesu ese lauma helaga idia gwauraia dika taudia be edena bamona ia gwauraia?
9 Dirava be lauma helaga ia henia tauna dainai, lauma helaga ia gwauraia dika tauna be Iehova ia gwauraia dika danu. Bema unai bamona tauna ia helalo-kerehai lasi, Iehova be ena dika do ia gwauatao lasi. Iesu ena hereva ese ia hahedinaraia, Dirava ena lauma helaga o gaukara siahuna idia koua taudia edia dika be Dirava ese do ia gwauatao lasi. Iesu be Iehova ena gaukara siahuna amo hoa karadia ia karaia, to ena inai taudia idia gwau Iesu be Diabolo ena siahu ia gaukaralaia—lauma helaga idia hadikaia karana unai. Iesu ia gwau: “Bema tau ta ese Lauma Helaga ena ladana ia hadikaia, Dirava ese unai dika be do ia gwauatao lasi. Iena dika be ia noho hanaihanai, kokia dalana be lasi.”—Mareko 3:20-29.
10. Dahaka dainai Iesu ia gwau Iuda be “dika ia davaria tauna”?
10 Iuda Iskariote ena sivarai ita laloa danu. Ia be koikoi tauna, badina maua lalonai idia udaia moni be ia ese ia henaoa. (Ioane 12:5, 6) Gabeai, Iuda gunalaia taudia dekenai ia lao bona Iesu do idia dogoatao dalana ia karaia, bona Iuda gunalaia taudia ese ia dekenai siliva moni 30 idia henia. Oibe, Iuda ia diba ia be kerere badana ia karaia, to ia helalo-kerehai lasi. Momokani, Iuda be do ia toreisi lou lasi. Unai dainai, Iesu ia gwau Iuda be “dika ia davaria tauna.”—Ioane 17:12; Mataio 26:14-16.
Lauma Helaga Idia Koua Lasi
11-13. Edena dala ai King Davida bona Bataseba be kara dika idia karaia? Iehova be idia dekenai dahaka ia karaia dainai, unai ese eda lalona ia hagoadaia?
11 Nega haida, ena be Keristani taudia haida be edia kara dika badana idia gwauraia hedinarai bona elda taudia edia heduru idia abia, to Dirava ena taravatu idia utua dainai, idia do lalometau noho. (Iamesi 5:14) Bema ita be unai bamona, vadaeni Baibel ai Dirava ese edia dika ia gwauatao taudia haida edia sivarai ita itaia, badina unai sivarai ese ita do ia durua.
12 King Davida be Uria ena adavana Bataseba dekenai ia karaia karadia be kara dika badadia. Davida be ruma ena guhi ai ia gini bona unai hahine mai hairaina ia itaia ia digu noho, ia boiria, bona idia mahuta hebou. Gabeai, Davida ia kamonai hahine ia rogorogo dainai, ena heudahanai ia hunia totona palani ta ia karaia, unai amo Uria be ena adavana ida idia mahuta hebou totona. To unai palani ia dika neganai, king be dala ia karaia tuari lalonai Uria ia mase totona. Gabeai, Davida be Bataseba ia adavaia bona Bataseba ia havaraia natuna be ia mase.—2 Samuela 11:1-27.
13 Iehova be Davida bona Bataseba ia kota henidia. Reana Dirava be Davida ena helalo-kerehai karadia bona Davida ida ia karaia Basileia gwauhamatana ia laloa dainai, Ia ese Davida ena dika ia gwauatao. (2 Samuela 7:11-16; 12:7-14) Toana be Bataseba ia helalo-kerehai, badina ia be King Solomona ena sinana ai ia lao bona Iesu Keriso ena tubuna ai ia lao. (Mataio 1:1, 6, 16) Bema kara dika ita karaia, namona be ita laloatao: Iehova ia itaia gauna be, ita helalo-kerehai o lasi.
14. Dahaka dainai Iehova be King Manase ena kara dika badana ia gwauatao?
14 Iehova be Iuda ena King Manase ena kara dika badana ia gwauatao danu. Manase be Iehova vairanai ia kara dika. Manase ese Bala dirava ena boubou patadia ia haginia, “guba ena hisiu ibounai dekenai ia tomadiho,” bona dubu ariara ruaosi dekenai dirava koikoi edia boubou patadia ia haginia. Manase ese ena natuna memerodia be lahi dekenai ia gabudia ore, meamea karadia momo ia karaia, bona Iuda bona Ierusalema ai idia noho taudia ia hakaudia kerere dainai, “Lohiabada ese Israela taudia edia vairanai ia lulua besedia edia dika be Iuda taudia edia dika ese idia hanaia.” Manase be Dirava ena peroveta taudia edia hereva ia kamonai lasi. Gabeai, Asuria ena king ese Manase ia hadiburaia. Unai negai, Manase ia helalo-kerehai bona mai manau ida Dirava ia guriguri henia loulou dainai, Dirava ese ena dika ia gwauatao, Ierusalema dekenai ia hakaua lao, bona king dagina ia henia—bona unuseniai Manase ese tomadiho momokanina ia haginia lou.—2 Sivarai 33:2-17.
15. Aposetolo Petero ena mauri dekenai dahaka ia vara dainai, ita diba Iehova be ena dika ia “gwauatao momokani”?
15 Lagani 100 murinai, aposetolo Petero be kara dika badana ia karaia, badina ia gwau ia be Iesu ia diba lasi. (Mareko 14:30, 66-72) To, Iehova ese Petero ena dika ia “gwauatao momokani.” (Isaia 55:7) Dahaka dainai? Badina Petero ia helalo-kerehai momokani. (Luka 22:62) Ita diba Dirava be Petero ena dika ia gwauatao, badina dina 50 murinai o Pentekoste dinanai, Petero be mai gari lasi ida Iesu ena sivarai ia harorolaia. (Kara 2:14-36) Hari inai negai, oi laloa Dirava be idia helalo-kerehai Keristani taudia edia dika ia gwauatao, a? Salamo torea tauna ia gwau: “Bema oi ese aiemai kara dika ibounai oi duahia neganai, daika ese oiemu kota lalonai ia kwalimu diba? To oi ese aiemai dika oi gwauatao noho.”—Salamo 130:3, 4.
Lalohisihisi Noho Lasi
16. Dirava ese eda dika ia gwauatao totona, dahaka ita karaia be namo?
16 Namona be unai bamona sivarai ese ita idia durua Dirava ena lauma helaga ita koua eiava lasi ena lalohekwarahi ita hanaia totona. Badina unai sivarai ese idia hahedinaraia, Iehova be idia helalo-kerehai taudia edia dika ia gwauatao. Gau badana be Dirava ita guriguri henia. Bema kara dika ita karaia, namona be Iehova ita noia Iesu Keriso ena boubou gauna, Dirava be hebogahisi, ita be goevadae lasi, bona Dirava ena hesiai gaukara ita karaia hanaihanai be ia laloa bona iseda dika ia gwauatao. Ita diba Iehova be hebogahisi Diravana dainai ita noinoi neganai, iseda dika do ia gwauatao.—Efeso 1:7.
17. Bema ita kara dika to heduru ita ura, vadaeni dahaka ita karaia be namo?
17 To bema ita kara dika dainai ita lalohisihisi bona Iehova ita guriguri henia be auka be edena bamona? Iamesi ia gwau: “[Unai bamona tauna] ese ekalesia gunalaia taudia do ia boiria be namo. Idia ese ia dainai do idia guriguri, bona ia dekenai dehoro do idia atoa, Lohiabada ena ladana dekenai. Inai guriguri mai abidadama danu ese gorere tauna do ia hanamoa. Lohiabada ese iena mauri do ia hanamoa, bona iena kara dika do ia gwauatao.”—Iamesi 5:14, 15.
18. Ena be ta be kongrigeisen amo idia atoa siri, to dahaka dainai Dirava ese ena dika ia gwauatao diba?
18 Ena be kara dika tauna ia helalo-kerehai lasi dainai kongrigeisen amo idia atoa siri, to Dirava ese ena kara dika ia gwauatao diba. Korinto dekenai horoa tauna ta ia kerere dainai kongrigeisen amo idia atoa siri neganai, Paulo ia gwau: “Unai tau ena kara dika davana be umui momo ese umui henia, vadaeni ia hegeregere. Harihari iena dika do umui gwauatao, bona iena lalona do umui hagoadaia be namo, iena lalohisihisi ese iena abidadama do ia haorea garina.” (2 Korinto 2:6-8; 1 Korinto 5:1-5) To, Iehova ese kerere taudia edia dika ia gwauatao totona, gau badana be kerere taudia be elda ese idia henia Baibel sisiba idia abia dae bona helalo-kerehai momokani toana idia hahedinaraia. Unai ena anina be ‘idia edia lalona idia giroa, bona lalona giroa ena anina korikori do idia hedinaraia.’—Luka 3:8.
19. Iseda “abidadama” ia goada noho totona, dahaka ita karaia be namo?
19 Bema Dirava ena lauma helaga ita koua o lasi ena lalohekwarahi ita abia, dahaka ia vara diba? Reana iseda lalomamina ia dika o ita gorere bamona. Bema unai bamona, Iehova ita guriguri henia bona ita mahuta namonamo be gau badana. Satani ena dala ita kehoa lasi, badina ia ura ita lalometau, unai amo Dirava ena hesiai gaukara ita rakatania. To, Iehova ia ura lasi kara dika taudia eiava ena hesiai taudia idia mase. Bema ita lalohekwarahi badina ita laloa reana ita be lauma helaga ita koua, namona be Baibel ena hereva namodia, hegeregere Salamo bukana, ita duahia hanaihanai. Namona be kongrigeisen heboudia ita lao hanaihanai, bona Basileia ita harorolaia hanaihanai. Unai amo, iseda “abidadama” do ia goada noho bona ita diba Dirava ese eda dika ia gwauatao dainai ita lalohekwarahi lasi.—Tito 2:2.
20. Edena bamona henanadai ese ta ia durua ia laloparara, unai amo ia itaia ia be Dirava ena lauma helaga ia koua lasi?
20 Dirava ena lauma helaga idia koua o lasi ena lalohekwarahi idia abia taudia be inai bamona idia henanadai diba: ‘Lauma helaga lau gwauraia dika, a? Egu kara dika amo lau helalo-kerehai, a? Lau abia dae Dirava be egu dika do ia gwauatao, a? Lau be hereva momokani lau dadaraia, a?’ Reana unai bamona idia henanadai taudia idia laloparara, idia be Dirava ena lauma helaga idia hadikaia lasi eiava aposteit ai idia lao lasi. Idia helalo-kerehai bona idia abia dae Iehova be edia dika ia gwauatao. Unai amo, idia be Iehova ena lauma helaga idia koua lasi.
21. Edena henanadai be stadi gabena ai do ita herevalaia?
21 Bema ita diba ita be lauma helaga ita koua lasi, unai be namo herea! To henanadai haida be stadi gabena ai do ita herevalaia. Hegeregere, ita sibona ita nanadaia: ‘Dirava ena lauma helaga ese lau ia hakaua, a? Egu mauri lalonai lauma helaga ena huahua lau hahedinaraia, a?’
Emu Haere be Dahaka?
• Dahaka dainai haida idia gwau idia be lauma helaga idia koua?
• Helalo-kerehai ena anina be dahaka?
• Iesu be tanobada dekenai ia noho neganai, daidia be lauma helaga idia koua?
• Bema ita lalohekwarahi badina ita laloa reana ita be lauma helaga ita koua, edena bamona unai ita hanaia diba?
[Picture on page 5]
Bema ta ia gwau Iesu be Satani ena siahu amo hoa karadia ia karaia, unai tau be Dirava ena lauma helaga ia koua
[Picture on page 7]
Ena be Petero ia gwau ia be Iesu ia diba lasi, to ena kara dika be Dirava ese ia gwauatao