Sisiba Oi Abia Dae Neganai Kamonai Karana Do Oi Diba

NAMONA be inai bamona oi laloa. Ororo badana dorina dekenai oi gini bona oiemu mamina be namo herea. Gau ta ese oi ia koua lasi unai mamina oi abia dainai oi moale bada herea!

To gau haida ese oi idia koua. Diho kahanai gau iboudiai ia veria siahuna (gravity) ena taravatu ese oiemu tauanina ia biagua; oi raka kerere neganai dika do oi davaria diba. To, unai siahuna ena taravatu ese oi ia dogoatao dainai guba padana dekenai oi roho lao kava lasi. Unai dainai, unai taravatu be oi dekenai namo ia mailaia. Unai ororo dekenai oi gini neganai, unai taravatu ese oiemu tauanina ia dogoatao be namo, oiemu mauri ia naria.

Oibe, nega haida taravatu bona ita badinaia karadia be iseda kara haida idia koua, to ita badinaia lasi be namo, a?

Dirava Ena Lalohadai Kamonai Karana Dekenai

Iehova be “Havaraia Tauna Badana” dainai, ia be “mauri ena badina.” Unai dainai ia havaraia gaudia iboudiai ese idia kamonai henia be maoro. Lalohadai maorona ia hahedinaraia dainai, salamo ia torea tauna ia torea, ia gwau: “Umui mai, do ita guriguri, do ita tomadiho; ita ia karaia Diravana Iehova vairanai do ita tui diho. Badina ia be iseda Dirava, bona ita be iena ubua taudia bona ena imana mamoedia.”​—Kohelete 12:1; Salamo 36:9; 95:​6, 7.

Gunaguna negana amo Iehova ia gwau ia havaraia gaudia ese Ia idia kamonai henia be namo. Adam bona Eva be Paradaiso dekenai idia noho totona namona be idia kamonai. (Genese 2:​16, 17) Ena be taunimanima idia hereaia to Ia ura aneru idia kamonai danu. Unai lauma haida be “Noa ena nega lalonai Dirava ena hereva idia negea. To Dirava ese davana ia henidia haraga lasi,” idia be “dibura masemase gabuna dekenai idia ia negea diho . . . do idia noho ela bona Kota Bada Dinanai.”​—1 Petero 3:​19, 20; 2 Petero 2:4.

Anina be Dirava be ta dekenai ia moale totona namona be unai tauna ese Ia ia kamonai henia. Ita duahia, ia gwau: “Iehova ese idia gabua boubou gaudia bona boubou idauidau ia moalelaia bada, to Iehova ena hereva kamonai henia karana ia moalelaia maragi, a? Oi laloa, kamonai ese boubou ia hereaia, hereva kamonai henia ese mamoe maruanedia edia digara ia hereaia.”​—1 Samuel 15:22.

Ta ese Unai Kara Ia Hadibaia be Namo​—Dahaka Dainai bona Edena Dala Ai

Dirava ese kamonai taudia ia gwauraidia kara maoromaoro taudia, unai dainai unai kara dekenai diba ita abia be gau badana! Tano idauna ena gado dekenai diba ita abia hegeregerena, ita maragi neganai kamonai karana dekenai diba ita abia danu. Unai dainai Bible be beibi negana amo natudia hadibaia karana ia gwauraia bada.​—Iosua 8:35.

Hari inai negai, taunimanima haida be Bible ena hereva idia dadaraia, idia gwau bema natudia ita doridia idia kamonai totona be edia darana ita hadikaia hegeregerena. Idia gwau namona be natudia ita rakatania bona sibodia edia kara idauidau ta ta dekenai idia tubu daekau bona sibodia idia abia hidi taravatu dekenai idia noho, namo lasi taunimanima badadia ese idia koudia toho.

To lagani 1960 ia lao 1969 neganai, tama sina momo be unai bamona idia laloa neganai, taunimanima edia darana stadilaia karana ia herevalaia bona ia torelaia profesa tauna ta, Wilhelm Hansen, be unai lalohadai ia abia dae lasi. Ia torea, ia gwau: “Natuna ta be do beibi neganai, tama sina edia kara ia dekenai be mai anina bada, tama sina ese idia taravatua gaudia be ‘dika’ bona idia gwauraia namo eiava idia hanamoa gaudia be ‘namo.’ Unai dainai, kamonai karana sibona ese natuna ia hadibaia mauri ena taravatu, kara namo bona kara dika, bona mauri ena taravatu namodia badadia dekenai ia hadibaia. Iena lalohadai kara namo bona kara dika ena taravatu dekenai be unai amo idia vara.”​—Hereva Lada-isidia 22:15 itaia danu.

Dirava ena Hereva ia gwau kamonai karana dekenai diba ita abia be gau badana. Ita duahia, ia gwau: “Iehova e, lau diba vadaeni tanobada tauna ese sibona ena raka dalana ia abia hidi diba lasi. Taunimanima edia raka be sibodia idia gwauraia hidi diba lasi.” (Ieremia 10:​23) Tanobada ena sivarai dekenai taunimanima momo be sibodia edia ura hegeregerena edia mauri dalana idia abia hidi, unai dainai hekwakwanai badadia idia davaria. Dahaka dainai unai be nega momo ia vara? Badina taunimanima be diba lasi, aonega lasi, bona lalo-parara lasi sibodia edia mauri dalana idia abia hidi totona. Unai dika sibona lasi, to edia sene taudia hegeregeredia idia laloa kerere dainai nega momo edia dala idia abia hidi kerere. Maoromaoro Abata murinai, Iehova ese taunimanima ia gwauraia inai bamona: “Taunimanima . . . be maragi negana amo edia laloa be dika.”​—Genese 8:21.

Unai dainai, ta lasi be Iehova kamonai henia karana dekenai ia vara. Iseda natudia dekenai ita hadibaia bona iseda mauri lalonai kamonai dekenai diba ita habadaia noho. Namona be ita ta ta ibounai be King David ena lalohadai bamona ita abia, ia torea, ia gwau: “Iehova e, emu kara lau oi hadibaia; oiemu dala lau oi hadibaia. Oiemu hereva momokani dekenai lau oi hakaua, bona lau oi hadibaia, badina oi be lauegu hahemauri Diravana. Dina ibounai lalonai oi dekenai lau naria.”​—Salamo 25:​4, 5.

Kamonai Oi Hahedinaraia Neganai Kamonai Karana Oi Hadibaia

Iesu ena sinana bona ena heubu tamana be Iesu ena vara ena sivarai idia diba namonamo. Unai dainai idia diba ia be Iehova ena ura hagugurua totona kara badana do ia karaia. (Luka 1:​35, 46, 47 itaia danu.) Idia dekenai inai hereva “Itaia! Memero be Iehova ena harihari gaudia” be mai anina idauna ta. (Salamo 127:3) Edia maduna badana idia diba namonamo bona unai dainai Dirava ena hereva idia kamonai henia haraga, hegeregerena Ia ese ia hamaorodia Aigupito dekenai idia heau lao totona, eiava gabeai Galilea dekenai do idia lao neganai.​—Mataio 2:​1-23.

Danu, Iesu ena tama sina idia diba edia maduna be dahaka natudia sisiba henia karana dekenai. Momokani, tanobada dekenai ia do noho lasi neganai, Iesu be hanaihanai ia kamonai. To tanobada dekenai ia noho neganai, iena noho be idau dainai kamonai karana dekenai diba ia abia. Gau tamona be, ena goevadae lasi tama sina ia kamonai henidia be gau badana, goevadae natuna be sisiba ia abia be namo, unai be diba ia abia neganai. Iena tama sina be unai idia karaia. To sisiba idia henia lasi idia panisi totona, badina ia kerere lasi. Nega ibounai Iesu ia kamonai; nega rua idia hamaoroa lasi. Ita duahia, ia gwau: “Ia be idia danu Nasareta dekenai idia lao, bona ia kamonai henia idia dekenai.”​—Luka 2:51.

Danu, Iosef bona Maria idia diba edena dala ai edia haheitalai amo Iesu idia hadibaia. Hegeregere, ita duahia ia gwau “lagani ibounai Iesu ena tamana bona sinana danu Ierusalema dekenai idia lao, Paseka ena aria neganai.” (Luka 2:41) Iena ruma bese taudia ia abidia lao neganai, Iosef ia hahedinaraia lauma dalana dekenai edia mauri ia laloa, bona ia ese Iehova tomadiho henia karana ia laloa bada. Unai be haheitalai namo hereana ta! Unai dala hegeregeredia ai, hari inai negai tama sina be tomadiho karadia dekenai edia kamonai karana amo edia natudia idia hadibaia diba do idia kamonai totona.

Iosef bona Maria be kara maoromaoro dekenai idia hadibaia namonamo dainai, “Iesu ia tubu daekau noho mai aonega danu, Dirava bona taunimanima ese idia ura henia.” Hari inai nega lalonai Keristen tama sina be unai haheitalai namona idia tohotohoa diba!​—Luka 2:52.

“Nega Ibounai . . . Umui Kamonai Henia”

“Memero, kekeni e, nega ibounai emui tamana bona sinana do umui kamonai henia, badina inai kara be Dirava ia ura henia.” (Kolose 3:20) Iesu be gau ibounai dekenai tama sina ia kamonai henidia diba badina Iehova idia kamonai henia dainai Iesu​—eiava iena tadina bona taihuna​—do idia hamaorodia lasi Iehova ia ura lasi gaudia do idia karaia totona.

Hari inai neganai, tama sina momo be edia natudia idia hadibaia namonamo gau ibounai dekenai idia kamonai totona. Tamadia toi edia sivarai oi laloa, edia natudia idia hadibaia bona idia bada vadaeni, bona unai tamadia be Watch Tower Society edia branch opesi dekenai idia gaukara.

Theo ia hereva edena dala ai ia bona iena hahine ese memero ima idia hadibaia. Ia gwau: “Gau badana be natudia idia maragi neganai idia diba taunimanima badadia idia kerere diba danu. Madi, unai kerere ita karaia loulou bona nega hanaihanai iseda guba Tamana ita noia unai kerere ia gwauatao bona ia heduru totona. Aiemai natudia ai hadibaia idia be matamata negana ena metau idia hekwarahilaia hegeregerena, ai be taunimanima badadia edia metau ai hekwarahilaia danu.”

Natuna be kamonai karana dekenai diba ia abia totona, ia bona ena tama sina huanai lalokau ia noho be gau badana. Hermann ese iena adavana ia gwauraia, ia gwau: “Ia be natudia memero edia sinana sibona lasi to ia be edia turana danu. Unai idia ura henia bada, bona idia kamonai be auka lasi.” Bena heduru herevana ia gwauraia tama sina bona natudia edia kara heheni karana hanamoa totona, ia gwau: “Ai be lagani momo lalonai mereki huria masini ai hoia lasi, unai amo mereki be imana amo idia huria bona idia hakaukaua. Aiemai natudia be mereki hakaukaua totona, ta ta edia nega ai makaia. Unai be nega namo herea ai herevahereva totona.”

Tama sina bona natuna idia lalokau heheni hegeregerena namona be Keristen tauna be Iehova ida ia lalokau henia. Rudolf ia hereva edena dala ai ia bona iena adavana be edia natudia memero rua idia durudia unai bamona idia karaia totona: “Nega ibounai ruma bese stadi ai karaia. Natudia dekenai hereva ai abia hidi idia stadilaia totona. Aiemai Bible duahiduahi ai karaia hebou bena unai sivarai ai herevalaia hebou. Aiemai natudia idia lalo-parara Iehova ia ura natudia sibona lasi, to tama sina danu idia kamonai henia.”

Keristen tama sina idia diba Dirava ese ia torea sirina, “Sisiba henia herevadia be mauri dalana,” be edia natudia dekenai sibona lasi, to idia dekenai danu be mai anina. Unai dainai, ena be natudia be nega ibounai edia tama sina idia kamonai henia be namo, namona be tama sina danu be gau ibounai dekenai Iehova idia kamonai henia. Tama sina bona natudia edia turana heheni karana idia hagoadaia sibona lasi, to tama sina bona natudia idia ura edia turana karana Dirava dekenai do idia hagoadaia be namo.​—Hereva Lada-isidia 6:23.

Oi Laloa Kamonai Karana be Gau Namona

Ita moale bada Dirava ena Hereva lalonai natudia hadibaia totona sisiba namo herea ia noho! (Maua itaia.) Kara maoromaoro dekenai tama sina be edia natudia dekenai kamonai karana idia hadibaia neganai, unai ese Keristen tadikaka oreana ia hamoalea.

Dirava kamonai henia karana be mauri dalana dainai, Dirava ena taravatu ita ta ta ibounai eda mauri dalana dekenai be nega sisina sibona lalonai ita laloa do ita negea be namo lasi. Hegeregere, bema nega sisina sibona lalonai gau iboudiai be diho kahanai ia veria siahuna (gravity) ena taravatu ita kokia diba dahaka do ia vara. Gau ta ese ita ia dogoatao lasi dainai ororo amo guba dekenai ita roho daekau diba, unai dainai do ita moale bada herea reana! To unai taravatu ia gaukara lou neganai be edena bamona? Ita moru neganai oi laloa dahaka do ia vara!

Sisiba ita abia dae dainai kamonai karana ita diba, bona unai neganai unai ese ita ia durua iseda lalohadai bona kara idia hegeregere bona ita karaia diba lasi gaudia ita diba. Ita ia durua bena ma haida ita doridia hanaihanai lasi bona edia ura ita hadikaia lasi. Ita ia durua daradara negadia ita hanaia totona. Ia ese moale ia havaraia.

Unai dainai, ena be oi be taunimanima badana eiava natuna ta, sisiba oi abia dae dainai kamonai karana dekenai diba oi abia “mauri namona do [oi] abia” totona bona danu, “[emu] mauri do ia daudau tanobada dekenai” totona. (Efeso 6:​1-3) Daika ia ura sisiba ia abia dae lasi dainai kamonai karana dekenai ia diba lasi bona iena mauri hanaihanai dalana do ia haboioa? Ta lasi, ani?​—Ioane 11:26.

[Box on page 29]

TAMA SINA E, SISIBA MAORONA ESE KAMONAI KARANA IA HAVARAIA

1. Bible ena taravatu bona hahegani amo sisiba oi henia.

2. Hereva aukadia amo oi doridia lasi idia kamonai totona, to oi gwauraia hedinarai badina be dahaka kamonai karana be aonega dalana.​—Mataio 11:19b.

3. Badu dekenai eiava gwaugwau hereva amo sisiba oi henia lasi.​—Efeso 4:​31, 32.

4. Lalokau bona turana namo karana dekenai sisiba oi henia.​—Kolose 3:21; 1 Tesalonika 2:​7, 8; Heberu 12:​5-8.

5. Idia beibi negana amo natudia oi sisiba henidia.​—2 Timoteo 3:​14, 15.

6. Sisiba oi henia hanaihanai bona hereva oi haidaua momo lasi.​—Deuteronomi 6:​6-9; 1 Tesalonika 2:​11, 12.

7. Sibona oi sisiba henia guna bona unai amo haheitalai amo oi hadibaia.​—Ioane 13:15; Mataio 23:​2, 3 itaia danu.

8. Iehova oi tabekau henia momokani neganai sisiba oi henia, guriguri amo iena heduru oi noia.​—Hahemaoro Taudia 13:​8-10.

[Picture on page 28]

“Sisiba henia herevadia be mauri dalana”