Kamonai Karana—Maragi Negana ai Ita Dibaia mai Anina Bada Karana, A?

NIUSPEPA ta ena hereva kwarana ia gwau: “Tama Sina Idia Ura Natudia ese Sibona Edia Kara Idia Hahedinaraia, to Kamonai Karana Idia Hahedinaraia Natudia Sibona Lasi.” Unai ripoti maragina be New Zealand dekenai tahua gaukarana idia karaia neganai idia gwauraia, unai tahua gaukarana ese ia hahedinaraia “idia haere taudia amo 22 pesen sibona idia gwau, namona be ruma ai natudia dekenai kamonai karana idia hadibaia.” Unai tahua gaukarana lalonai idia davaria danu, hari tama sina idia laloa natudia dekenai kara namodia, sibona edia mauri naria karana, bona maduna huaia karana idia hadibaia be mai anina bada.

Inai nega ai sibona laloa bona sibona ena ura tahua karadia lalonai, ita hoa lasi taunimanima momo ese kamonai karana bona natudia dekenai unai kara hadibaia karana idia laloa bada lasi. To, maragi neganai natudia ese idia hahedinaraia kamonai karana be gau gunana sibona bona hari inai negai ita laloa bada lasi be namo, a? Eiava ia be natudia ese idia dibaia bona ia amo namo idia abia mai anina bada gauna, a? Bona mai anina bada gauna be, Iehova Dirava, ruma bese ia Hamatamaia Tauna, be dahaka ia laloa tama sina kamonai henia karana dekenai, bona unai bamona kamonai karana ese ia mailaia hahenamo haida be dahaka?​—⁠Kara 17:28; Efeso 3:​14, 15.

“Kara Maorona be Unai”

Aposetolo Paulo ese Efeso dekenai ia noho Keristani taudia ginigunadia edia kongregesen ia tore henia, ia gwau: “Memero bona kekeni e, umui emui tamana bona sinana do umui kamonai henia. Kara maorona be unai.” (Efeso 6:⁠1) Unai dainai, unai bamona kamonai karana idia hahedinaraia ena badina badana be ia be Dirava ena kara maoromaoro taravatuna badinaia karana. Paulo ia gwau bamona, “kara maorona be unai.”

Unai hereva hegeregerena, ita itaia Dirava ena Hereva ese ia hahedinaraia, tama sina ese natudia idia matahakani henia mai lalokau ida karana be hairai gauna ta, “kwarana ena herahera, bona ageva ese oiemu toana idia hanamoa bamona,” bona ia be “Dirava ia ura henia” gauna. (Aonega Herevadia 1:​8, 9; Kolose 3:20) To, Dirava ese tama sina ia kamonai henia lasi tauna ia ura henia lasi.​—⁠Roma 1:​30, 32.

“Mauri Namona Do Umui Abia”

Paulo ese kamonai karana amo ia vara namo ma ta ia herevalaia, ia gwau: “ ‘Emui tamana bona sinana do umui matauraia.’ Inai be Buka Helaga ena Taravatu mai ena gwauhamata ginigunana. Badina be inai bamona umui karaia neganai, gwauhamata be inai: ‘Mauri namona do umui abia, bona emui mauri do ia daudau tanobada dekenai.’ ” (Efeso 6:​2, 3; Esodo 20:12) Edena dala idauidau amo tama sina kamonai henia karana ese namo do ia havaraia?

Gau ginigunana be, momokani tama sina edia mauri lagani be momo bona gau momo idia diba, ani? Ena be idia be kompiuta bona sikuli dekenai idia hadibaia gaudia momo idia diba namonamo lasi, to idia be mauri bona mauri ena hekwakwanai haheaukalaia daladia idia diba. To, matamata taudia be, taunimanima badadia bamona idia laloa namonamo diba lasi. Unai dainai, gau ta idia abia hidi neganai idia haragaharaga, nega momo turadia edia lalo-ani karana dikana dainai gau ta idia abia hidi, bena sibodia dekenai dika idia havaraia. Baibel ena hereva ia momokani, ia gwau: “Natuna maragidia ibounai ese kavakava idia karaia noho.” Hanamoa gauna be dahaka? “Emu natuna oi kwadia neganai, inai kavakava kara do ia rakatania momokani.”​—⁠Aonega Herevadia 22:⁠15.

Kamonai karana ese tama sina bona natudia edia hetura karana lalonai namo sibona ia havaraia lasi. Taunimanima idia noho namonamo bona anina namona idia havaraia totona, idia gaukara hebou be namo, bona unai ia vara totona kamonai karana ia noho be namo. Hegeregere, headava lalonai sibona ena ura laloa bada karana bona ma ta ena maoro bona ena hemami laloa lasi karana amo namo ia vara lasi, to mai ena moale ida sibona ena ura dadaraia karana amo maino, lalo-tamona, bona moale idia vara. Gaukara gabuna dekenai, bisinesi eiava gaukara ta ia kwalimu totona, gaukara taudia idia manau be namo. Gavamani ena taravatu bona hahegani kamonai henia karana ese dika amo ta ia ruhaia sibona lasi, to ta ia naria bona noho namo ia mailaia.​—⁠Roma 13:​1-7; Efeso 5:​21-25; 6:​5-8.

Siahu taudia idia kamonai henia lasi matamata taudia be nega momo taunimanima huanai edia noho ia namo lasi. To, maragi negana ai kamonai karana idia dibaia taudia be edia mauri ibounai lalonai gau namodia momo do idia davaria diba. Maragi negana ai unai ita dibaia be namo herea!

Kamonai Karana amo Ia Vara Ahuna Namona

Kamonai karana ese ruma bese lalonai moale bona mauri ibounai lalonai namo ia mailaia sibona lasi, to badina namona ia hegaegaelaia, ta ese hetura karana namona ia haginia totona​—⁠ia bona ena Havaraia Tauna huanai. Iehova Dirava be Havaraia Tauna Badana bona “mauri ibounai ena badina” dainai, ia ita kamonai henia be maoro.​—⁠Hadibaia Tauna 12:1; Salamo 36:⁠9.

Inai hereva “kamonai henia” be Baibel lalonai nega momo ia hedinarai. Danu, Baibel ena hereva ese nega handred momo Dirava ena taravatu, oda herevadia, hahemaoro herevadia, bona hahegani ia gwauraia, bona idia ibounai ita badinaia be namo. Ita diba momokani Dirava ia ura ena lalo-namo ita moalelaia totona, kamonai karana ita hahedinaraia. Oibe, kamonai karana be, Iehova ida hetura karana ita haginia ena badina ta. (1 Samuela 15:22) Madi, taunimanima edia kara korikori be kamonai karana lasi, to kamonai lasi karana. Baibel ia gwau: “Idia be maragi negana dekena amo, edia laloa be dika.” (Genese 8:21) Unai dainai, kamonai karana be maragi negana ai ita dibaia sibona lasi to iseda mauri ibounai lalonai ita dibaia noho be namo. Unai ita karaia neganai hahenamo namona do ita abia.

Mani oi laloatao, aposetolo Paulo ia gwauraia bamona, tama sina kamonai henia haheganina ida gwauhamata rua ita abia, unai be, “mauri namona do umui abia, bona emui mauri do ia daudau tanobada dekenai.” Aonega Herevadia 3:​1, 2 dekenai, unai gwauhamata ia hamomokania herevana ita davaria, ia gwau: “Egu natuna e, egu hadibaia hereva, be do oi laloaboio lasi. Egu oda hereva, be oiemu kudouna lalonai do oi dogoatao noho. Egu hadibaia hereva ese, oiemu mauri dinadia do idia halataia, bona noho namona momokani, oi dekenai do idia henia.” Kamonai karana idia hahedinaraia taudia edia hahenamo be, hari Iehova ida hetura karana namona do idia abia bona maino tanobada matamatana lalonai mauri hanaihanai do idia abia.​—⁠Apokalupo 21:​3, 4.

[Pictures on page 30, 31]

Kamonai karana ese hetura karana namona ia mailaia ruma bese lalonai, gaukara gabunai, bona Iehova ida