“Daika be Iehova Iseda Dirava Bamona?”

“Daika be Iehova iseda Dirava bamona, Ia be ataiai ia noho?”​—SALAMO 113:5.

1, 2. (a) Iehova ena Witness taudia be dahaka idia laloa Dirava bona Bible dekenai? (b) Dahaka henanadai ita laloa be namo?

IEHOVA idia hanamoa taudia be momokani hahenamo idia abia. Unai moale taudia ida ita noho be namo herea! Ita be iena Witness taudia dainai Dirava ena Hereva, Bible, ena sisiba, taravatudia, hahediba herevadia, gwauhamata herevadia, bona peroveta herevadia ita abidia dae. Ita moale badina Bible ena amo diba ita abia bona ‘Iehova ese ita ibounai ia hadibaia.’​—Ioane 6:45.

² Dirava idia matauraia bada dainai, Iehova ena Witness taudia idia henanadai diba: “Daika be Iehova iseda Dirava bamona?” (Salamo 113:5) Salamo ia torea tauna ena hereva ese ia hahedinaraia ia be mai ena abidadama. To dahaka dainai Witness taudia be unai bamona idia abidadama Dirava dekenai? Bona dahaka dainai Iehova idia hanamoa?

Abidadama bona Hanamoa Karana be Maoro

3. Hallel Edia Salamo anedia be dahaka, bona dahaka dainai unai ladana idia henidia?

³ Iehova idia abidadama henia be maoro badina ia be Dirava hereadaena. Salamo 113, 114, bona 115, bona Hallel Edia Salamo anedia 6 edia kahana dekenai unai hereva idia gwauraia bada. Hillel ena Sikuli ai, rabi taudia idia gwau Iuda edia Paseka neganai, uaina be kapusi iharuana ai idia seia neganai bona unai kara ena anina idia gwauraia hedinarai murinai, Salamo 113 bona 114 edia ane idia abia. Uaina be kapusi ihahanina ai idia seia murinai Salamo 115 ia lao 118 edia ane idia abia. (Mataio 26:30 itaia danu.) Idia gwauraidia “Hallel Edia Salamo” badina unai hereva Hallelujah!​—“Iehova hanamoa!”​—idia gwauraia loulou.

4. Unai hereva “Hallelujah” ena anina be dahaka, bona nega hida Bible lalonai idia torea?

⁴ Salamo dekenai nega 24 unai Heberu hereva “Hallelujah!” idia hahanaia. Bible ena kahana ma haida dekenai, unai hereva be Greek gado ai idia hahanaia nega 4, Babulono Badana, tanobada ibounai dekenai tomadiho koikoi oreana hadikaia ore negana ai, bona unai murinai Iehova Dirava be iena King lohia negana ia hamatamaia negana ai, unai hereva idia gaukaralaia. (Apokalupo 19:​1-6) Hallel Edia Salamo toi ita tahua neganai, ita laloa ita ese unai Iehova hanamoa anedia ita abia bamona.

Iehova Hanamoa!

5. Salamo 113 ese dahaka henanadai ia haerelaia bona Salamo 113:​1, 2 ena hahegani herevana ena anina be daika dekenai?

⁵ Salamo 113 ese inai henanadai ia haerelaia, Dahaka dainai Iehova ita hanamoa? Ia kehoa inai hahegani herevana amo: “Iehova hanamoa, umui bese taudia e! Iehova ena hesiai taudia e, umui hanamoa, Iehova ena ladana hanamoa. Iehova ena ladana hanamoa harihari ela bona hanaihanai.” (Salamo 113:​1, 2) “Hallelujah!” Oibe, “Iehova hanamoa!” Hari “dokona negana” ai unai hahegani be Dirava ena taunimanima dekenai ia noho. (Daniel 12:4) Harihari ela bona hanaihanai, Iehova ena ladana be tanobada ibounai dekenai do idia hanamoa. Iena Witness taudia idia gwau Iehova be Dirava, Keriso be King, bona guba dekenai Basileia ia lohia hamatamaia vadaeni. Satana Diabolo bona iena orea ese unai Iehova hanamoa karana idia koua diba lasi.

6. Edena dala ai Iehova idia hanamoa ‘dina ia daekau ela bona dina ia diho gabudia ai’?

⁶ Unai hanamoa anena do idia abia ela bona Iehova ese tanobada ibounai do ia hahonua. “Dina ia daekau amo ela bona dina ia diho Iehova ena ladana do idia hanamoa.” (Salamo 113:3) Ita gwau lasi unai neganai dina ta ta iboudiai lalonai tanobada taudia haida sibona ese do idia tomadiho henia. Dina be east kahana ai ia daekau bona west kahana ai ia diho, tanobada ibounai ia abia. Dina ia diari gabu iboudiai dekenai, tomadiho koikoi amo bona Satana ena orea ena igui hesiai amo idia ruhaia taudia iboudiai be Iehova ena ladana do idia hanamoa. Oibe, ia lao ela bona hanaihanai anena be hari inai negai Iehova ena horoa Witness taudia bona iena King, Iesu Keriso, ena tanobada natudia ai do idia lao taudia ese idia abia. Iehova hanamoa anedia idia abia dainai hahenamo bada idia abia!

Iehova be Hereadae

7. Salamo 113:4 dekenai Iehova ia herea daladia rua be dahaka?

⁷ Salamo torea tauna be ma ia gwau: “Iehova be bese iboudiai ataiai ia lao; iena hairai be guba ataiai.” (Salamo 113:4) Dirava ia herea daladia rua ia gwauraia: (1) “Bese iboudiai ataiai” Atai Herea Tauna Iehova dekenai, tanobada besedia be baketi amo ia bubua ranu orena bamona bona sikeli ai kahu sisina bamona; (Isaia 40:15; Daniel 7:18) (2) iena hairai be guba korikori ena hairai ia hereaia, badina anerudia ese iena ura hereana idia karaia.​—Salamo 19:​1, 2; 103:​20, 21.

8. Guba bona tanobada gaudia ia laloa totona badina be dahaka bona edena dala ai Iehova ia manau?

⁸ Dirava be atai herea momokani ia laloa bada dainai, salamo ia torea tauna ia gwau: “Daika be Iehova iseda Dirava bamona, Ia be ataiai ia noho? Ia ura danu guba bona tanobada ia itaia noho.” (Salamo 113:​5, 6) Dirava be hereadae momokani, unai dainai guba bona tanobada gaudia ia laloa totona ia manau. Ena be Iehova be ma haida henunai ia noho lasi eiava ma haida ia badinaia lasi, to kara dika taudia dekenai hebogahisi bona kara manada ia hahedinaraia neganai ia manau. Iena Natuna, Iesu Keriso, ia henia “kara dika gwauatao dalana” ia kehoa horoa Keristen taudia bona tanobada taudia totona, bona unai ese Iehova ena manau ia hahedinaraia.​—1 Ioane 2:​1, 2.

Iehova be Hebogahisi Ia Hahedinaraia

9, 10. Dirava be edena dala ai ‘lalo-manau tauna ia abia isi, lohia taudia danu ia hahelaia totona’?

⁹ Dirava ena hebogahisi karana ia gwauraia bada neganai, salamo ia torea tauna be ma ia gwau Iehova ese “manau tauna be tano kahuna amo ia abia isi; ogogami tauna be lahi ena kahu amo ia abia isi, lohia taudia danu ia hahelaia totona, iena taunimanima edia lohia taudia ida. Ia ese gabani hahinena ena noho gabuna ia henia, ia hamoalea, memero kekeni edia sinana ai ia halaoa. Iehova umui imodaia, umui bese taudia e!” (Salamo 113:​7-9) Iehova ena taunimanima be mai edia abidadama, idia diba ia ese mai edia kara maoromaoro dabu taudia ia hamauridia diba, edia noho ia haidaua diba, bona edia dabu gaudia bona edia ura maorodia ia henia diba. ‘Atai bona Hereadae Diravana be idia lalo-manau taudia bona idia helalo-kerehai taudia edia kudou ia hagoadaia lou.’​—Isaia 57:15.

¹⁰ Iehova be edena dala ai ‘lalo-manau tauna ia abia isi, lohia taudia danu ia hahelaia totona’? Dirava ia ura neganai, iena hesiai taudia be lohia dagi taudia hegeregeredia ai ia halaodia. Unai bamona ia karaia Iosef dekenai, ia be Aigupito ena aniani haria dagi tauna ai ia lao. (Genese 41:​37-49) Israel dekenai, lohia taudia ida helai karana, eiava Iehova ena taunimanima bogaragidiai siahu abia karana, be idia laloa bada dagina ta. Hari inai nega lalonai Keristen elda taudia bamona, unai bamona tataudia be Dirava ena heduru bona hahenamo idia abia.

11. Dahaka dainai ita gwau diba Salamo 113:​7-9 ena anina badana be hari inai negai Iehova ena bese taudia dekediai?

¹¹ ‘Gabani hahinena be moale sinana ai ia halaoa karana’ be edena bamona? Dirava be gabani hahinena Hana dekenai natuna merona ta ia henia​—unai be Samuel, bona Iena hesiai gaukara totona Hana ese ia gwauhamatalaia. (1 Samuel 1:​20-28) Anina bada gauna be, Iesu ena nega amo bona Pentekoste 33 C.E. neganai, iena hahediba taudia dekenai lauma helaga ia bubua negana amo, haheitalai dekenai, Dirava ena hahine, guba Siona, be lauma dalana ai natudia ia havaradia. (Isaia 54:​1-10, 13; Kara 2:​1-4) Bona Babulono ena igui hesiai negana murinai, Dirava be edia tano dekenai Iuda taudia ia siaidia giroa negana hegeregerena, lagani 1919 lalonai, “Dirava ena [Israel]” ena horoa orena taudia be Babulono ena igui hesiaina amo ia ruhadia, bona dala badana ai lauma hahenamo ia henidia Salamo 113:​7-9 ena anina be idia dekenai ia vara totona. (Galatia 6:16) Idia be Iehova ena ura badinaia Witness taudia dainai, lauma Israel ena orena taudia bona edia bamodia, tanobada helarona idia abia taudia unai, be mai edia kudou ibounai danu Salamo 113 ena hereva ginigabedia idia abia dae: “Iehova hanamoa, umui bese taudia e!”

Iehova be Hereadae Hamomokania Karana

12. Salamo 114 be edena dala ai ia hahedinaraia Iehova be hereadae?

¹² Salamo 114 be Iehova ena kara Israel taudia sibodia dekenai ia herevalaia neganai ia hahedinaraia Iehova be hereadae. Salamo torea tauna ena ane dekenai ia gwau: “Israel be Aigupito amo ia raka lasi neganai, Iakobo besena be gado idau taudia edia amo idia raka oho neganai, Iuda be iena gabu helagana ai ia lao, Israel be iena basileia ai ia lao.” (Salamo 114:​1, 2) Aigupito edia igui hesiai amo Dirava be Israel taudia ia ruhadia, Aigupito taudia edia gado be idau. Ane herevadia dekenai Iehova ena bese tamona taudia idia gwauraidia Iuda bona Israel, bona Iehova ese iena bese taudia ia ruhadia dainai ia hamomokani hari inai nega ai iena hesiai taudia iboudiai do ia ruhadia diba danu.

13. Edena dala ai Salamo 114:​3-6 ese Iehova be hereadae ia hahedinaraia, bona edena dala ai idau negai Israel ena sivarai dekenai ia hahedinaraia?

¹³ Iehova be mauri gaudia iboudiai ia hereadia be inai hereva amo ia hamomokania: “Davara ese ia itaia bona ia heau; Ioridane sinavaina ia giroa lou. Ororo be mamoe maruanedia bamona idia roho lao, ororo maragidia idia roho lao mamoe maruanedia bamona. Davara e, oi be edena bamona, bena oi heau? Ioridane e, oi be edena bamona, bona oi giroa lou? Ororo e, umui be edena bamona, bona mamoe tataudia bamona umui roho lao; umui ororo maragidia e, mamoe maruanedia bamona umui roho lao?” (Salamo 114:​3-6) Davara Kakakakana “ia heau” Dirava be iena bese taudia totona davara ia hapararaia neganai. Unai neganai Israel taudia be Iehova ena imana badana ena gaukara dalana idia itaia, ia be idia giroa lou ranudia amo Aigupito taudia ia hamasedia neganai. (Esodo 14:​21-31) Unai hegeregerena, Dirava be iena siahu ia hahedinaraia Ioridane Sinavaina “ia giroa lou” neganai, unai amo Israel taudia be sinavai idia hanaia bona Kanana dekenai idia vareai diba. (Iosua 3:​14-16) Taravatu gwauhamatana ia vara neganai, “ororo be mamoe maruanedia bamona idia roho lao” bona Sinai Ororona amo kwalahu ia dae bona ia mareremarere. (Esodo 19:​7-18) Iena ane ena hereva dokona ia abia gwauraia neganai, salamo torea tauna be henanadai amo hereva ia gwauraia, reana ia gwau idia mauri lasi davara, sinavai, ororo, bona ororo maragidia be Iehova ena siahu ia hahedinaraia karadia dainai idia hoa mai gari danu.

14. Meriba bona Kade dekenai Iehova ena siahu ese dahaka ia havaraia, bona edena dala ai, hari inai negai, unai be mai anina iena hesiai taudia dekenai?

¹⁴ Iehova ena siahu ia herevalaia noho neganai, salamo torea tauna ena ane dekenai ia gwau: “Tanobada e, Gaubada, Iakobo ena Dirava vairanai oi heudeheude, ia ese nadi gabuna be ranu gohuna ai ia halaoa, nadi aukana be ranu ia lohilohidae gabuna ai ia halaoa.” (Salamo 114:​7, 8) Haheitalai dekenai, salamo ia torea tauna ia hahedinaraia Iehova be tanobada ibounai ena Lohiabada bona ena Pavapava Badana dainai, taunimanima idia gari henia be namo. Ia be Israel, eiava “Iakobo ena Dirava,” bona ia be lauma Israel taudia bona edia tanobada turadia edia Dirava danu. Meriba bona Kade, tano gagaena dekenai, Iehova ese iena siahu ia hahedinaraia ia be hoa karana amo Israel taudia dekenai ranu ia henidia neganai, ia ese “nadi gabuna be ranu gohuna ai ia halaoa, nadi aukana be ranu ia lohilohidae gabuna ai ia halaoa.” (Esodo 17:​1-7; Numera 20:​1-11) Iehova ena siahu bada bona idia ia lalodia karana idia laloa neganai, iena Witness taudia be mai edia badina namodia idia abidadama henia momokani totona.

Kaivakuku Diravadia Bamona Lasi

15. Reana edena dala ai Salamo 115 anena idia abia?

¹⁵ Salamo 115 ese ita ia hagoadaia Iehova ita hanamoa bona ita abidadama henia totona. Ia gwau Iehova ese hahenamo bona heduru ia henia bona ia hamomokania kaivakuku gaudia be anina lasi. Reana ta ese ane ena hereva kahana ia abia bona murinai taunimanima ibounai ese ane ena hereva kahana idia abia hebou. Anina be, tamona ese ane ia abia, ia gwau: “Iehova umui gari henia taudia e, Iehova umui abidadama henia.” Bona reana kongregesen be ane dekenai idia haere, idia gwau: “Ia be edia heduru bona edia kesi.”​—Salamo 115:11.

16. Iehova bona tanobada besedia edia kaivakuku be edena dala ai ita gwauraidia idia idau?

¹⁶ Namo lasi ita idia hanamoa to namona be Iehova ena ladana idia hanamoa, ia be lalokau mai hebogahisi, eiava lalokau mai abidadama, bona mai momokani Diravana. (Salamo 115:1) Reana dagedage taudia idia hevaseha, idia henanadai: “Edia Dirava be edeseni ai?” To Iehova ena bese taudia idia haere diba: “Iseda Dirava be guba ai, bona iena ura hegeregerena ia karaia.” (Sa 115 Siri 2, 3) To, tanobada besedia edia kaivakuku be gau ta idia karaia diba lasi, badina taunimanima be edia imana amo siliva bona golo gaudia dekenai idia karaia. Ena be idia be mai edia ududia, mai edia matadia, bona mai edia taiadia, to idia hereva diba lasi, idia mata-kepulu, bona idia taia kudima. Idia be mai edia ubu-baubau to gau ta idia bonaia diba lasi, mai edia aedia to idia raka diba lasi, mai edia gadodia to rege ta idia karaia diba lasi. Idia gaukara diba lasi kaivakuku idia karaia taudia bona idia abidadama henidia taudia be idia hegeregeredia mauri lasi gaudia ai do idia lao.​—Sa 115 Siri 4-8.

17. Mase taudia be Iehova idia hanamoa diba lasi dainai, dahaka ita karaia be namo, bona gabeai dahaka do ita davaria diba?

¹⁷ Unai murinai hagoadaia herevana idia abia Iehova idia abidadama henia totona, badina ia be Israel, Aaron ena hahelaga taudia iduhuna, bona Dirava idia gari henia taudia iboudiai edia Durua Tauna bona ia naridia Kesina. (Salamo 115:​9-11) Iehova ita gari henia dainai, Dirava ita matauraia bada bona ita ia badu henia garina ita gari. Danu, ita be mai iseda abidadama “guba bona tanobada ia Karaia Tauna” ese iena abidadama tomadiho taudia do ia hanamodia. (Sa 115 Siri 12-15) Guba be iena terona gabuna, to Dirava ese iena ura idia badinaia bona kamonai taudia dekenai tanobada ia henia idia noholaia hanaihanai totona. Idia rege lasi bona gau ta idia diba lasi mase taudia be Iehova idia hanamoa diba lasi dainai, namona be ita mauri noho taudia be abidadama dekenai iseda Dirava ena ura ita badinaia. (Kohelete 9:5) Iehova idia hanamoa taudia sibona be mauri hanaihanai do idia abia diba, bona ela bona hanaihanai “Iehova do idia hanamoa” diba, bona do idia gwauraia namonamo diba “ela bona hanaihanai.” Unai dainai, namona be ita bona inai hereva idia badinaia taudia ida ita gini hebou: “Iehova hanamoa, umui bese taudia e!”​—Salamo 115:​16-18.

Iehova Ena Kara Hereadia

18, 19. Edena daladia ai Iehova ena karadia ese idia hahedinaraia ia be dirava koikoidia amo ia idau?

¹⁸ Ia be mauri lasi kaivakukudia bamona lasi, Iehova be mauri Diravana, kara namo hereadia ia hahedinaraia. Ia be lalokau ia hahedinaraia bada herea bona ia be “hebogahisi bona hariharibada Diravana, ia badu haraga lasi, iena hebogahisi bona kara namo be bada herea.” (Esodo 34:6; 1 Ioane 4:8) Ia be dagedage Kanana diravana, Molek, amo ia idau momokani, Molek dekenai natudia idia bouboulaidia! Haida idia gwau unai dirava ena tauanina toana be tau bamona bona ena kwarana toana be boromakau maruane bamona. Idia gwau unai kaivakuku be lahi amo idia hasiahua bada herea, ena imadia ia palaia noho bona natudia idia negea ena imadia dekenai, idia be henuai ia noho lahi badana dekenai idia moru. To Iehova ena lalokau be bada bona ena hebogahisi be bada dainai, unai bamona taunimanima bouboulaidia karana ia “laloa lasi.”​—Ieremia 7:31.

¹⁹ Iehova ena kara badadia haida be inai: hahemaoro maoromaoro, ia doko lasi aonegana, bona siahu bada hereana. (Deuteronomi 32:4; Iobu 12:13; Isaia 40:26) To gori sivaraidia edia diravadia be edena bamona? Idia be hahemaoro maoromaoro idia karaia lasi, to Babulono ena dirava tataudia bona dirava hahinedia be mai dagedage danu dika davana idia henia. Aigupito ena diravadia be aonega bada idia hahedinaraia lasi, to gori sivaraidia ese idia hahedinaraia idia be taunimanima mai edia kerere. Unai dekenai ita hoa lasi, badina dirava tataudia bona hahinedia koikoidia idia havaraia taudia be ‘laloa diba lasi’ taudia, idia be sibodia idia gwauraia aonega taudia. (Roma 1:​21-23) Idia gwau reana Greek diravadia be palani idia karaia dika idia haloua heheni totona. Hegeregere, gori sivaraidia dekenai, Zeus ese sibona ena siahu ia gaukaralaia kerere iena tamana, Cronus, ena terona ia abia neganai; guna Cronus ese iena tamana, Uranus, ena terona dagina ia henaoa danu. Ia mauri bona ia momokani Diravana, Iehova, ita hesiai henia bona ita hanamoa be hahenamo bada ita dekenai, badina ia ese lalokau hereadaena, hahemaoro maoromaoro, aonega, bona siahu ia hahedinaraia!

Iehova Idia Hanamoa Hanaihanai be Namo

20. King David be dahaka badina haida dainai Iehova ena ladana ia hanamoa?

²⁰ Hallel Edia Salamo anedia ese idia hahedinaraia hegeregerena, Iehova idia hanamoa hanaihanai be namo. Unai hegeregerena, David bona iena Israel turadia be dubu haginia totona hariharibada gaudia idia henia neganai, ia be kongregesen vairanai ia gwau: “Iehova e, aiemai sene tauna Israel ena Dirava, oi ai hanamoa hanaihanai. Iehova e, goada bona siahu bona hairai bona kwalimu bona hereadae be oiemu; badina be gau iboudiai guba dekenai bona tanobada dekenai be oiemu. Iehova e, basileia be oiemu, oi be sibona oi abia isi, gau iboudiai edia kwarana. Taga bona hemataurai idia mai daladia be oiemu amo; oi ese gau iboudiai oi biagua. Siahu bona goada be oi imana dekenai; oiemu imana dekenai gau iboudiai habadaia bona hagoadaia siahuna ia noho. Vadaeni, emai Dirava e, harihari oi ai hanamoa, bona oiemu ladana mai hairaina ai hanamoa.”​—1 Sisiga 29:​10-13.

21. Apokalupo 19:​1-6 be edena bamona ia hamomokania guba anerudia ese Iehova idia hanamoa?

²¹ Guba dekenai danu Iehova do idia hanamoa bona do idia imodaia ela bona hanaihanai. Aposetolo Ioane be “taunimanima hutuma bada guba dekenai” edia hereva ia kamonai, idia gwau: “Aleluia! [Iehova] ita hanamoa! Hahemauri, bona hairai, bona siahu, be iseda Dirava dekenai idia noho. Badina be iena kota henia kara be momokani bona maoromaoro. Ia ese ariara hahine badana [Babulono Badana] ia kota henia vadaeni, unai hahine ese iena matabodaga kara dekena amo tanobada ia hadikaia. Dirava ese ia panisia, badina be unai hahine ese Dirava ena hesiai taudia ia alaia mase dainai.” Ma idia gwau lou: “Aleluia! [Iehova] ita hanamoa!” Bona “badana taudia 24, bona mauri gaudia 4” ese unai bamona idia hereva danu. Terona amo gado ta ia gwau: “Dirava ena hesiai taudia ibounai e, bona ia idia gari henia taudia badadia bona maragidia danu, iseda Dirava do umui hanamoa.” Bena Ioane be ma hereva ta ia gwauraia, ia gwau: “Regena ta lau kamonai, taunimanima hutuma bada edia gado regena bamona. Edia regena be sinavai momo idia aru haraga ena regena bamona, bona guba ena boiboi bada bamona. Unai taudia idia gwau, ‘Aleluia! Dirava ita hanamoa! Lohiabada iseda Dirava, Siahu Ibounai Diravana, ia sibona be king.’ ”​—Apokalupo 19:​1-6.

22. Ia gwauhamatalaia do ia mai tanobada matamatana dekenai Iehova be edena dala ai do idia hanamoa?

²² Ia maoro guba anerudia ese Iehova idia hanamoa! Nega kahirakahira iena tanobada matamatana do ia mai, unai neganai Dirava ena ura idia badinaia toreisi lou taudia bona inai nega dokona amo do idia roho mauri taudia be Iehova do idia hanamoa. Atai herea ororodia be Dirava hanamoa anedia do idia abia. Ororo gadokagadokadia bona huahua idia havaraia audia be ia hanamoa anedia do idia abia. Idia mauri gaudia iboudiai be Hallelujah anena dekenai Iehova ena ladana do idia hanamoa! (Salamo 148) Unai hutuma be mai moale danu ane idia abia neganai, oiemu ane abi do idia kamonai, a? Bema iena bese taudia ida Dirava ena ura oi badinaia, oiemu ane abi do idia kamonai. Namona be oiemu mauri lalonai unai oi tahua, badina ta lasi be iseda Dirava Iehova bamona, ani?

Edena Bamona Do Oi Haere?

◻ Dahaka dainai Iehova Dirava ita hanamoa be namo?

◻ Iehova be edena daladia ai ia hereadae?

◻ Dahaka ese idia hamomokania Iehova be hebogahisi ia hahedinaraia?

◻ Iehova be idia mauri lasi kaivakukudia bona dirava koikoidia edia amo edena bamona ia idau?

◻ Dahaka dainai ita gwau diba Iehova be guba bona tanobada dekenai do idia hanamoa ela bona hanaihanai?

[Picture on page 9]

Hallel Edia Salamo anedia be Paseka ariana dekenai idia abia