Iehova Oi Hanamoa Ena Kara Badadia Dainai!
“Lauegu lalona ese Lohiabada ia hanamoa noho . . . badina be Siahu Diravana ese hoa kara lau dekenai ia havaraia vadaeni.”—LUKA 1:46-49.
1. Dahaka kara badadia dainai Iehova ita hanamoa be maoro?
IEHOVA ena kara badadia dainai ia ita hanamoa be maoro. Peroveta tauna Mose be Dirava ena kara, Israela taudia be Aigupito amo ia ruhaia, ia herevalaia neganai, ia gwau: “Io, umui ese, emui matana dekena amo, Lohiabada ese inai kara badadia ibounai ia karaia neganai umui itaia.” (Deuteronomi 11:1-7) Unai hegeregerena, aneru Gabriela ese rami-hebou kekenina Maria dekenai Iesu do ia vara sivaraina ia herevalaia neganai, Maria ia gwau: “Lauegu lalona ese Lohiabada ia hanamoa noho . . . badina be Siahu Diravana ese hoa kara lau dekenai ia havaraia vadaeni.” (Luka 1:46-49) Ita be Iehova ena Witnes taudia dainai, ia ita hanamoa ena kara badadia dainai, hegeregere Aigupito amo Israela taudia ia ruhaia bona ena lalokau Natuna be hoa dalanai Maria ena bogana lalonai ia atoa.
2. (a) Dirava ena noho hanaihanai urana be dahaka kamonai taudia totona? (b) Ioane be Patamo motumotuna dekenai ia noho neganai, dahaka ia vara ia dekenai?
2 Iehova ena kara badadia momo idia vara ena noho hanaihanai urana, Mesia bona ena Basileia lohiaia karana amo kamonai taudia do ia hanamoa, do ia hagugurua totona. (Efeso 3:8-13) Unai ura ia vara noho neganai, aposetolo burukana, Ioane, be matahanai dekenai guba ai ia kehoa iduarana amo idia vara gaudia ia itaia. Kibi ena rege bamona gadona ia kamonai: “Oi daekau mai iniseni, vadaeni gabeai do idia vara momokani gaudia oi dekenai do lau hedinaraia.” (Apokalupo 4:1) Ioane ese ‘Dirava ena hereva bona ena abidadama Iesu dekenai ia gwauraia hedinarai’ dainai, Roma gavamani ese ia idia dogoatao bona Patamo motumotuna dekenai idia siaia lao, unuseniai ‘Iesu Keriso ese’ Ioane dekenai matahanai ia ‘hahedinaraia.’ Aposetolo tauna ia itaia bona kamonai gaudia ese Dirava ena noho hanaihanai urana idia hahedinaraia, bona unai amo lauma diarina ia henia bona nega korikori ai Keristani taudia momokanidia ibounai ia hagoadaia.—Apokalupo 1:1, 9, 10.
3. Ioane be matahanai lalonai ia itaia elda taudia 24 be daidia idia laulaulaia?
3 Guba ena iduara ia kehoa neganai, Ioane ese elda taudia 24 ia itaia, terona latanai idia helai bona pavapava bamona korona idia abia. Dirava vairanai idia tui diho bona idia gwau: “Aiemai Lohiabada, aiemai Dirava e, oi be hegeregere momokani vadaeni, taunimanima ibounai ese hairai bona mataurai, be oi dekenai do idia henia, bona oiemu siahu henunai do idia noho. Badina gau ibounai be oi ese oi havaraia. Oiemu ura dainai oi karadia, bona oiemu ura dainai idia noho.” (Apokalupo 4:11) Unai elda taudia be idia toreisi lou bona Dirava ese ia gwauhamata henidia dagi badana idia abia horoa Keristani taudia ibounai idia laulaulaia. Iehova ia havaraia gaudia dekenai ena kara badadia idia itaia dainai ia idia hanamoa. Ita danu ita hoa, badina unai gaudia idia hahedinaraia Iehova “ena siahu be ia doko diba lasi, bona . . . ia sibona be Dirava momokani.” (Roma 1:20) Bona Iehova dekenai diba ma haida ita abia neganai, iena kara badadia dainai badina momo ita davaria ia do ita hanamoa totona.
Iehova Ena Kara Namodia Gwauraia Hedinarai!
4, 5. Davida ese Iehova ia hanamoa herevadia, edia haheitalaia haida, mani oi gwauraia.
4 Salamo torea tauna Davida be Dirava ia hanamoa Iena kara badadia dainai. Hegeregere, Davida be inai ane ia abia: “Lohiabada, Siona dekenai ia noho Dirava, be do umui hanamoa! Iena kara be, bese idauidau edia huanai do umui herevalaia! Lohiabada e, lau dekenai do oi bogahisihisi henia! Lau idia hadikaia noho taudia dekena amo, lau abia hisihisi mani do oi itaia. Lohiabada e, mase dekena amo lau do oi hamauria. Unai neganai, Ierusalema taudia, edia vairanai do lau gini diba, bona oi ese lau oi hamauria kara ibounai, be idia dekenai do lau hamaorolaia.” (Salamo 9:11, 13, 14) Davida ese ena natuna Solomona dekenai dubu haginia palani ia henia murinai, ia ese Dirava ia hanamoa bona ia abia isi, ia gwau: “Lohiabada e, goada bona siahu bona hairai bona kwalimu, bona King ena toana be oiemu; . . . Oi be King momokani, basileia ibounai be oi ese oi biagua noho. . . . Aiemai Dirava, harihari ai ese oi dekenai ai tanikiu henia, bona oiemu ladana namo herea momokani ai hanamoa noho.”—1 Sivarai 29:10-13.
5 Baibel ese ita ia boiria loulou—oibe, ita ia hagoadaia—Davida bamona, Dirava ita hanamoa be namo. Salamo bukana lalonai, Dirava hanamoa herevadia momo idia noho, bona haida idia gwau unai ane rua rua amo ta ta be Davida ese ia torea. Hanaihanai Iehova ia hanamoa bona tanikiu henia. (Salamo 69:30) Danu, idaunegai ema bona hari, taunimanima ese Davida ena bona ma haida edia ane, Dirava ena lauma amo idia vara anedia unai, idia gaukaralaia Iehova idia hanamoa totona.
6. Edena dala ai Dirava ena lauma ese ia havaraia bukana, Salamo, be ita ia durua bada?
6 Salamo bukana be Iehova idia tomadiho henia taudia ia durua bada! Bema ita ura Dirava ita tanikiu henia ita totona ia karaia kara badadia dainai, reana unai neganai Salamo bukana lalonai idia noho hereva namodia ita laloa. Hegeregere, dina matamatana ai ita noga neganai, reana ita ura inai bamona hereva ita gwauraia: “Lohiabada e, oi be Ataiai Momokani Diravana, ai tanikiu henia be namo. Ane dekena amo oiemu ladana do ai abia isi be namo. Daba ibounai neganai, oiemu noho hanaihanai lalokauna do ai gwauraia. Hanuaboi ibounai neganai danu, oiemu kara momokanidia do ai gwauraia. . . . Badina be, Lohiabada e, oi ese oi karaia kara badadia ese lau idia hamoalea. Oiemu gaukara badadia dainai, mai moale bada danu ane lau abia noho.” (Salamo 92:1-4) Lauma dalanai ita goada ita lao karana ia koua gauna ita hanaia neganai, reana ita ura guriguri lalonai iseda moale bona tanikiu herevadia ita gwauraia, salamo torea tauna be inai ane dekenai ia karaia hegeregerena: “Umui mai! Lohiabada hanamoa totona, ane do ita abia. Mai moale ena boiboi danu, ita ia hamauria Nadi Badana do ita hanamoa! Lohiabada ena vairanai do ita haboua mai. Ia hanamoa totona ane do ita abia, mai moale bada danu.”—Salamo 95:1, 2.
7. (a) Keristani taudia ese idia abia ane momo be edeseniai amo idia abia? (b) Hebou dekenai ita ginidae haraga bona ita noho ela bona dokona ena badina ta be dahaka?
7 Nega momo ita be mai gado bada ida Iehova hanamoa anedia ita abia kongregesen heboudia, sekit, bona distrik hebouheboudia ai. Unai ane momo be Salamo bukana amo idia abia, idia be Dirava ena lauma ese ia havaraia lalohadai. Ita moale bada badina iseda kudouna idia hamarerea anedia momo idia haboua Iehova ita hanamoa totona! Hebou dekenai ita ginidae haraga bona ita noho ela bona dokona ena badina namona ta be Dirava hanamoa anedia do ita abia, bona iseda tadikaka ida ane bona guriguri amo Iehova do ita hanamoa.
“Dirava Do Umui Hanamoa!”
8. Inai hereva “Aleluia” ena anina be dahaka, bona nega momo edena dala ai idia hahanaia?
8 Inai hereva “Aleluia” ena anina be Iehova hanamoa, ia be Heberu gado herevana amo idia abia bona nega momo idia hahanaia “umui taunimanima e, Iah do umui hanamoa!” Hegeregere, Salamo 135:1-3 ai, inai boiboi herevana namona mai goadana ita davaria: “[“Iah,” NW ] do umui hanamoa! Lohiabada ena gaukara umui karaia taudia e, Lohiabada ena ladana do umui hanamoa Lohiabada ena Ruma helagana lalonai umui gini noho, iseda Dirava ena Dubu Helaga lalonai. Dirava do umui hanamoa, badina Lohiabada be ia namo. Ane dekenai iena ladana do umui hanamoa, badina ia be mai ena bogahisihisi.”
9. Dahaka ese ita ia hagoadaia Iehova ita hanamoa totona?
9 Dirava ia havaraia gau namodia bona ita totona ia karaia karadia ita laloa neganai, mai kudouna ibounai ida idia ita laloa bada dainai, ita ia hagoadaia ia ita hanamoa totona. Iehova ese ena taunimanima totona guna ia karaia hoa karadia ita laloa neganai, iseda kudouna ese ita ia hagoadaia ia ita hanamoa. Bona Iehova ese gabeai do ia karaia gau namo hereadia edia gwauhamata ita laloa dobu neganai, ita be dala haida ita tahua ia ita hanamoa bona tanikiu henia totona.
10, 11. Ita noho ese edena bamona badina ia henia Dirava ita hanamoa totona?
10 Ita noho ese badina namona ia henia Iah ita hanamoa totona. Davida be inai ane ia abia: “[Iehova] oi lau tanikiu henia, badina mai hoa danu lau oi karaia. Oiemu kara ibounai be mai hoa bona gari danu. Lauegu kudouna dekenai, inai bamona lau diba momokani.” (Salamo 139:14) Oibe, ia be “hoa” dalanai ita ia havaraia, bona ita be mai iseda harihari gaudia namodia, ita itaia diba, kamonai diba, bona ita laloa diba. Unai dainai iseda mauri ita gaukaralaia ita ia Karaia Tauna ita hanamoa totona be namo, ani? Paulo be unai ia herevalaia, ia gwau: “Umui aniani o umui inuinu, o dahaka dahaka umui karaia neganai, inai gau ibounai do umui karaia Dirava hanamoa totona.”—1 Korinto 10:31.
11 Bema Iehova ita lalokau henia momokani, gau ibounai do ita karaia ia ita hanamoa totona. Iesu ia gwau taravatu ginigunana be inai: “Lohiabada oiemu Dirava oi ura henia, mai oiemu kudouna ibounai, mai oiemu lauma ibounai, mai oiemu lalona ibounai, bona mai oiemu goada ibounai.” (Mareko 12:30; Deuteronomi 6:5) Iehova be iseda Karaia Tauna bona ia be “gau namodia ibounai, bona harihari gaudia namodia momokani ibounai” ia Henia Tauna dainai, ia ita lalokau henia bona hanamoa be namo. (Iamesi 1:17; Isaia 51:13; Kara 17:28) Momokani, laloa namonamo karana, iseda diba ena bada lauma gaudia dekenai, bona iseda tauanina ena goada—iseda kara bona diba ibounai—be Iehova amo idia mai. Ia be iseda Havaraia Tauna dainai, ia be hegeregere momokani iseda lalokau bona hanamoa ia abia totona.
12. Iehova ena kara badadia bona Salamo 40:5 dekenai idia noho herevadia oi laloa neganai, emu hemami be edena bamona?
12 Iehova ena kara badadia ese badina momo herea idia henia ia ita lalokau henia bona hanamoa totona! Davida ese inai ane ia abia: “Lohiabada e, lauegu Dirava, oiemu durua karadia ai dekenai be momo herea. Tau ta be oiemu kara bamona ia karaia diba lasi. Lau ese oiemu kara, bona oiemu laloa, be taunimanima dekenai lau ura gwauraia, to lau be hegeregere lasi momokani. Badina oiemu kara bona laloa be momo herea, duahia diba lasi.” (Salamo 40:5) Davida be Iehova ena gaukara namo hereadia ibounai ia duahia diba lasi, bona ita duahia diba lasi danu. To Dirava ena kara badadia ta ita laloa neganai, nega ibounai ia ita hanamoa be namo.
Dirava Ena Noho Hanaihanai Urana Durua Karadia
13. Edena dala ai Dirava ena kara badadia be mai anina bada iseda helaro dekenai?
13 Dirava ena noho hanaihanai urana idia durua kara badadia be mai anina bada iseda helaro vaira negana totona. Eden lalonai gwau-edeede ia vara murinai, Iehova ese helaro henia peroveta herevana ginigunana ia gwauraia. Dirava be gaigai dekenai ena kerere davana ia gwauraia neganai, ia gwau: “Bona lau ese badu oi bona hahine ihuanai do lau atoa bona oiemu garana bona iena garana ihuanai. Ia ese emu kwarana do ia haberoa bona oi ese iena aena geduna do oi haberoa.” (Genese 3:15, NW ) Iehova ena kara badana ta, tanobada ibounai Abata amo kara dika taudia ia haorea bona Noa bona ena ruma bese taudia ia hamauria murinai, unai helaro, hahine ena gwauhamata Garana dekenai, be abidadama taudia edia kudouna dekenai ia mauri noho. (2 Petero 2:5) Abidadama taudia, hegeregere Aberahamo bona Davida, idia abia gwauhamatadia dainai, Iehova be unai Garana amo do ia karaia gaudia dekenai lalo-parara ma haida idia abia.—Genese 22:15-18; 2 Samuela 7:12.
14. Iehova be taunimanima totona ia karaia kara hereadaena ta be dahaka?
14 Iehova be taunimanima totona ia karaia kara hereadaena ta be, ia sibona ese ia havaraia Natuna tamona—gwauhamata Garana, Iesu Keriso—be mauri davalaia boubouna ta bamona ia henia. (Ioane 3:16; Kara 2:29-36) Unai mauri davana ese dala ia kehoa Dirava ida maino ita karaia totona. (Mataio 20:28; Roma 5:11) Pentekoste 33 C.E. ai, Iehova ese Keristani kongregesen ia haginia bona Ia ida maino idia karaia taudia ginigunadia be ia lalonai ia haboua. Lauma helaga ena heduru amo, sivarai namona idia harorolaia gabu ibounai dekenai, idia hahedinaraia Iesu ena mase bona toreisi lou ese dala ia kehoa kamonai taudia be Dirava ena guba Basileia ena lohia henunai hahenamo do idia abia ela bona hanaihanai.
15. Hari iseda nega lalonai, Iehova be edena dala namo hereana ai ia kara?
15 Iseda nega lalonai, Iehova be dala namo hereana ai ia kara, horoa Keristani taudia ginigabedia ia gogoa totona. Dika bada do idia havaraia laidia ia dogoatao noho ela bona Keriso ida guba dekenai do idia lohia 144,000 taudia oredia ibounai be maka idia abia. (Apokalupo 7:1-4; 20:6) Dirava ese “Babulonia badana,” tanobada ena tomadiho koikoi ibounai oreana, amo horoa Keristani taudia be lauma dalanai ia ruhaia. (Apokalupo 17:1-5) Lagani 1919 ai, Dirava ese horoa orena taudia ia ruhaia bona unai nega amo ia gimadia dainai, dahaka idia karaia? Idia ese edia diari idia hahedinaraia, bona Iehova ese Satani ena tanobada dikana be “hisihisi badana” ai ia do haorea lasi lalonai, taunimanima do idia haroro henia noho.—Mataio 24:21; Daniela 12:3; Apokalupo 7:14.
16. Hari inai negai, tanobada hegegemadai Basileia harorolaia gaukarana dainai, dahaka ia vara?
16 Iehova ena horoa Witnes taudia be mai lalo-goada ida tanobada ibounai Basileia harorolaia gaukarana idia gunalaia. Unai dainai, “mamoe idaudia” momo herea be hari Iehova tomadiho henia taudia ai idia lao. (Ioane 10:16) Ita moale badina dala ia do noho tanobada ena manau taudia ese ita idia bamoa, Iehova do ita hanamoa hebou totona. Inai boiboi herevana, “oi mai,” idia abia dae taudia be hisihisi badana amo do idia roho mauri, bena Iehova do idia hanamoa ela bona hanaihanai.—Apokalupo 22:17.
Tausen Momo be Tomadiho Momokani Idia Abia Dae
17. (a) Iehova be iseda haroro gaukara idia durua kara badadia ia karaia noho, idia be dahaka? (b) Sekaraia 8:23 be edena dala ai ia guguru?
17 Iehova be iseda haroro gaukara idia durua kara badadia ia karaia noho. (Mareko 13:10) Vanegai laganidia lalonai, ia ese gaukara idauidau dekenai idia lao henia ‘iduara badadia ia kehoa.’ (1 Korinto 16:9) Unai dainai, guna, hereva momokani idia inai henia taudia ese gabu badadia dekenai haroro gaukara idia koua, to hari, sivarai namona idia harorolaia diba. Guna lauma dibura dekenai idia noho taudia momo be hari unai boiboi idia kamonai henia bona Iehova idia hanamoa. Idia ese inai peroveta herevana idia hagugurua: “Ma Siahu Ibounai Lohiabada ia gwau, ‘Unai dinadia lalonai tau ibounai 10, gado idauidau ibounai besedia dekena amo, ese Iuda tauna ta dekenai do idia mai, iena dabua do idia dogoatao, do idia noia, do idia gwau, “Mani emu kara, oi danu do ita lao, badina be ai be ai kamonai vadaeni, Dirava be oi dekenai ia noho.” ’ ” (Sekaraia 8:23) ‘Tatau 10’ idia hereva henia tauna be lauma Iuda taudia, idia be hari inai negai horoa Keristani taudia oredia. Namba 10 be tanobada gauna ibounai ia laulaulaia diba dainai, unai ‘tatau 10’ be “hutuma bada herea” taudia idia laulaulaia, idia bona idia bamoa “Dirava ena lauma Israela” taudia be mamoe ‘orea tamona’ lalonai idia noho. (Apokalupo 7:9, 10, NW; Galatia 6:16) Hari, taunimanima momo herea be Iehova Dirava tomadiho henia taudia bona edia hesiai gaukara helagana ita itaia neganai ita moale bada!
18, 19. Dahaka ese ia hamomokania Iehova be iseda haroro gaukara ia hanamoa noho?
18 Ita moale badina taunimanima tausen momo—oibe, taunimanima handred tausen haida—be sivarai namona idia abia dae, to guna tomadiho koikoi ese unai tanodia idia gunalaia auka bona toana be sivarai namona do idia abia dae lasi. Inai lagani ai idia halasia Yearbook of Jehovah’s Witnesses bukana oi itaia, bona idia gwau Basileia pablisa taudia edia namba be 100,000 ia lao kahirakahira 1,000,000 tanodia mani oi laloa. Unai ese ia hamomokania vaitani Iehova be Basileia harorolaia gaukarana ia hanamoa.—Aonega Herevadia 10:22.
19 Ita be Iehova ena taunimanima, bona iseda guba Tamana ita hanamoa bona tanikiu henia badina ita dekenai mauri ena anina korikori, iena hesiai gaukara lalonai gaukara namona, bona vaira negana totona helaro namona ia henia. Dirava ena gwauhamata ibounai do idia guguru negana ita naria noho mai eda ura ida bona iseda lalona ita hadaia ‘Dirava ena lalokau lalonai do ita noho, badina mauri hanaihanai ita dekenai do ia henia.’ (Iuda 20, 21) Ita moale bada badina hari Dirava idia hanamoa noho hutuma bada herea taudia edia namba be 6,000,000 mai kahana! Iehova ena hanamoa karana ita itaia goevagoeva diba, horoa orena taudia bona edia bamodia, mamoe idaudia, be hari tano 235 lalonai idia noho kongregesen 91,000 dekenai idia gaukara. “Hesiai tauna mai ena kamonai, bona mai ena kara maoromaoro” oreana be mai hesiku lasi ida ia gaukara dainai, lauma dalanai ita idia ubua namonamo. (Mataio 24:45) Ia tubu noho tiokratik oreana be lalokau dalanai Basileia gaukara ia gunalaia noho, Iehova ena Witnes taudia edia brens opesi 110 ai. Ita moale badina Iehova ese ena taunimanima edia kudouna ia hamarerea dainai edia dava bada gaudia amo ia idia hanamoa. (Aonega Herevadia 3:9, 10) Unai dainai, iseda tanobada ibounai haroro gaukara ita karaia noho, bona printaia gabudia, Betele bona misinari rumadia, Kingdom Hall, bona Assembly Hall be nega maorona ai idia haginia.
20. Iehova ena kara badadia ita laloa neganai, dahaka ita karaia be namo?
20 Iseda guba Tamana ena kara badadia ibounai ita gwauraia diba lasi. To kudou-maoro tauna ta be do ia ura lasi Iehova idia hanamoa taudia edia hutuma lalonai ia vareai, a? Lasi vaitani! Unai dainai, namona be Dirava idia lalokau henia taudia ibounai be mai moale ida idia boiboi, idia gwau: “Lohiabada ena ladana do umui hanamoa! Guba dekenai, ataiai dekenai umui noho taudia ibounai e, Lohiabada do umui hanamoa. Lohiabada ena aneru ibounai e, Lohiabada ena ladana do umui abia isi. . . . Ulato bona uhau, buruka taudia, bona natuna maragidia danu, namona be idia ibounai ese, Lohiabada ena ladana do idia hanamoa bada! Iena ladana badana ese, taunimanima ibounai edia ladana badana ia hereaia noho. Iena hairaina be ataiai momokani, ia ese tanobada bona guba ia hereaia noho.” (Salamo 148:1, 2, 12, 13) Oibe, hari ela bona hanaihanai, namona be Iehova ena kara badadia dainai ia do ita hanamoa!
Edena Bamona Do Oi Haere?
• Iehova ena kara, ita hanamoa be namo karadia haida be dahaka?
• Dahaka dainai oi ura Iehova oi hanamoa?
• Edena dala ai Dirava ena kara badadia be mai anina iseda helaro dekenai?
• Iehova be edena dala ai Basileia harorolaia gaukarana dekenai kara badadia ia karaia noho?
[Picture on page 10]
Mai emu kudouna ibounai ida Iehova hanamoa anedia oi abia, a?
[Pictures on page 13]
Ita moale badina dala ia do noho manau taudia be ita ida Iehova do idia hanamoa diba