Iehova Dekenai Kerere Ita Atoa Lasi

“Tamana be natuna dekenai ia hebogahisi hegeregerena, Iehova ese hebogahisi ia hahedinaraia ia idia gari henia taudia dekenai. Badina ia sibona ia diba iseda lalona bona tauanina, bona ia laloatao ita be tano ena kahu.”​—SALAMO 103:​13, 14.

1, 2. Abraham be daika, bona dahaka dainai iena vavana Lot be siti dikana Sodom dekenai ia noho?

IEHOVA dekenai kerere ita atoa lasi ita sibona eda kerere dainai ita hekwarahi neganai. Unai hereva dekenai namona be lagani 3,900 bamona gunanai ia vara sivaraina oi laloa. Dirava ena turana Abraham (Abram) bona iena vavana Lot be taga taudia ai idia lao. (Iakobo 2:23) Oibe, edia kohu bona edia animal be momo herea dainai ‘tano be hegeregere lasi idia ruaosi gabu tamona dekenai do idia noho hebou totona.’ Ma danu, unai tau ruaosi edia boromakau naria taudia dekenai hepapahuahua ia vara. (Genese 13:​5-7) Dahaka do idia karaia hamaoromaoroa totona?

² Hepapahuahu hadokoa totona, Abraham ia gwau namona be idia parara, bona Lot ia hamaoroa edeseniai ia ura lao ia abia hidi guna. Ena be idia ruaosi amo Abraham ena lagani be bada, bona dala maorona be Abraham ese tano namona ia abia, to ena vavana Lot be tano namona ia abia hidi​—Ioridane Kourana ena ranu momo gabu ibounai ia abia hidi. To unai hairai gabuna be mai ena dika, badina kahirakahira dekenai idia noho siti rua, Sodom bona Gomora, edia kara be dika herea. Gabeai Lot bona iena ruma bese taudia be Sodom ena siti dekenai idia noho, bona lauma dalanai unai ese idia ia hadikaia diba. Ma danu, Pavapava Kedoralaomere bona idia durua besedia be tuari dekenai Sodom ena pavapava idia halusia neganai Lot bona ena ruma bese be igui dekenai idia abidia lao. Abraham bona iena taunimanima ese idia ruhadia, to Lot bona ena ruma bese taudia be idia giroa lao Sodom dekenai.​—Genese 13:​8-13; 14:​4-16.

3, 4. Dirava ese Sodom bona Gomora ia hadikaia ore neganai, Lot bona iena ruma bese taudia dekenai dahaka ia vara?

³ Sodom bona Gomora lalonai kara bodaga bona mauri ena kara goeva hadikaia karadia be bada herea dainai, Iehova ese unai siti rua ia hadikadia ore. Mai ena hebogahisi dainai ia ese aneru rua ia siaidia bena idia ese Lot, iena adavana, bona edia natudia kekeni rua be Sodom dekena amo idia hakaudia. Edia murina kahana dekenai idia roharoha lasi be gau badana, to Lot ena adavana be murina kahana dekenai ia roharoha, reana ia ese ia rakatania kohudia ia lalodia. Unai ia karaia neganai, ia be damena nadina ai ia lao.​—Genese 19:​1-26.

⁴ Lot bona iena natuna kekenidia be idia haboioa gaudia be momo! Kekeni rua ese do idia adavaia taudia idia rakatanidia. Lot be ia dogai bona ena taga bada be ia boio. Oibe, ia bona ena natuna kekeni rua be kohua ta lalonai idia noho. (Genese 19:​30-38) Guna ia laloa unai tano be ia namo herea, to murinai ia be dika bada ia davaria. Ena be kerere badadia ia karaia, to gabeai idia gwauraia “kara maoromaoro tauna Lota.” (2 Petero 2:​7, 8) Bona Lot ena kerere be Iehova Dirava ena kerere ita gwauraia be maoro lasi.

‘Daika be Kara Kereredia Do Ia Diba?’

5. Kara kerere bona hekokoroku karadia dekenai Dirava ena lalohadai be dahaka?

⁵ Ita be goevadae lasi bona mai iseda kara dika dainai, ita iboudiai be ita kara kerere. (Roma 5:12; Iakobo 3:2) Lot bamona, reana ita laloa gau ta ena toana be ia namo, to gabeai ia hedinarai iseda lalohadai unai gauna dekenai be ia kerere. Unai dainai, salamo torea tauna David ia noinoi, ia gwau: “Daika be tau ta ena kara kereredia do ia diba? Kara kerere hehunidia amo mani lau oi gwauraia goeva. Danu, oiemu hesiai tauna mani oi koua hekokoroku karadia do ia karaia garina; mani dala oi koua lau do idia biagua garina. Unai negai, gau ta do lau reaia lasi bona kara dika momo do lau karaia lasi.” (Salamo 19:​12, 13) David ia diba kara haida do ia karaia to ia diba lasi unai be kara dika karadia. Unai dainai, ia noinoi Dirava ese unai kara kerere hehunidia ia gwauatao totona. Iena goevadae lasi tauanina ese ia doria dainai ia be dala dikana ia abia hidi bona kerere badana ia karaia neganai, ia ura dikadika Iehova ena heduru ia abia. Ia ura Dirava ese ia durua hekokoroku karadia ia dekena amo ia koua totona. David ia ura lasi hekokoroku tauna ai ia lao. To, ia ura iena mauri ibounai lalonai Iehova Dirava ia tomadiho henia goevagoeva.

6. Salamo 103:​10-14 ese ita edena bamona ia hagoadaia?

⁶ Hari inai nega lalonai, ita be Iehova ena gwauhamata hesiai taudia, to ita be goevadae lasi taudia dainai ita kara kerere. Hegeregere, Lot bamona, reana ita noholaia gabuna be ita abia hidi kerere. Reana dala ia noho to iseda helaga hesiai gaukara Dirava dekenai ita habadaia lasi. Ena be Iehova ese unai kerere ia itaia, to kara maoromaoro tahua kudouna idia abia taudia ia diba. Ena be kara dika badana ita karaia, to bema ita helalo-kerehai Iehova ese unai kara dika do ia gwauatao, ita ia durua, bona iena matana dekenai ita be Dirava tomadiho henia taudia bamona ita ia kara henia noho. David ia gwau: “Iseda kara dika hegeregerena ita ia kara henia lasi; iseda kerere ena davana korikori ita ia henia lasi. Guba be tanobada ataiai ia noho hegeregerena, iena hebogahisi be unai bamona ia bada ia garina idia gari taudia dekenai. Dina ia daekau gabuna bona dina ia diho gabuna edia padana ena daudau hegeregerena, iseda kara dika be ita amo ia atoa daudau herea. Tamana be natuna dekenai ia hebogahisi hegeregerena, Iehova ese hebogahisi ia hahedinaraia ia idia gari henia taudia dekenai. Badina ia sibona ia diba iseda lalona bona tauanina, bona ia laloatao ita be tano ena kahu.” (Salamo 103:​10-14) Iseda hebogahisi guba Tamana be reana dala do ia kehoa iseda kerere ita hamaoromaoroa diba eiava iseda helaga hesiai gaukara ita habadaia lou diba totona, bona unai ese iena ladana do ia hanamoa.

Dirava Dekenai Kerere Atoa Ena Dika

7. Dahaka dainai dika ita davaridia?

⁷ Kerere ia vara neganai, vaia taunimanima edia kara be ma tau ta eiava gau ta dekenai unai kerere idia atoa. Taunimanima haida be Dirava dekenai kerere idia atoa. To Iehova ese taunimanima dekenai hekwakwanai ia havaraia lasi. Ia ese kara namodia ia havaraia, kara dikadia ia havaraia lasi. Ia ese “kara dika taudia bona kara namo taudia edia latanai dina ena diari ia henia noho. Medu danu kara maoro taudia bona kara kerere taudia edia latanai ia siaia diho”! (Mataio 5:45) Dika ita davaria ena badina badana ta be inai: ita noholaia tanobadana dekenai taunimanima be sibodia edia ura idia tahua bona idia be Satana Diabolo ena siahu dekenai idia noho.​—1 Ioane 5:19.

8. Dika ia davaria neganai Adam ese dahaka ia karaia?

⁸ Ita kara kerere dainai hekwarahi ita davaria neganai, unai kerere be Iehova Dirava dekenai ita atoa be aonega lasi karana bona dika ita davaria diba. Bema unai bamona ita karaia iseda mauri ita haboioa diba. Namona be tau ginigunana, Adam, be Dirava ese ia henia gau namodia dainai ia hanamoa. Oibe, ia mauri dainai, bona uma hairaina, Eden dekenai ia noho dainai, namona be Adam ese iena moale bada Iehova dekenai ia hahedinaraia. (Genese 2:​7-9) Iehova ia gwau-edeede henia bona taravatu au huahuana ia ania dainai ia kerere neganai, Adam be dahaka ia karaia? Adam ia maumau Dirava dekenai, ia gwau: “Oi ese oi karaia lau dekenai hahine be unai au huahua ia henigu, bona lau ania.” (Genese 2:​15-17; 3:​1-12) Oibe, namo lasi Adam bamona kerere ita atoa Iehova dekenai.

9. (a) Bema aonega lasi karadia ita karaia dainai hekwarahi ita davaria, dahaka ese ita ia hagoadaia? (b) Hereva Lada-isidia 19:​3 ena hereva hegeregerena, sibodia edia kara dainai hekwakwanai idia davaria neganai taunimanima haida be dahaka idia karaia?

⁹ Bema iseda aonega lasi karadia dainai hekwakwanai ita davaria, namona be ita laloatao ena be siboda eda manoka ita diba, to Iehova ese iseda manoka ia diba herea bona iseda hekwarahi dekena amo ita do ia hamauria bema ia mo sibona ita tomadiho henia. Dirava ese ita ia durua dainai namona be ita moale, bona sibona eda kerere dainai idia vara dikadia bona hekwakwanaidia ita gwauraidia lasi Dirava ena kerere. Unai kara dekenai aonega herevana ta ia gwau: “Tau ta ena kavakava ese ena dala ia hakererea vaitani neganai, ia ese Iehova ia badu henia.” (Hereva Lada-isidia 19:3) Bible ma ta dekenai unai siri ia gwau: “Taunimanima haida be sibodia edia kavakava karadia dainai dika idia davaria bena murinai idia gwau unai be LOHIABADA ena kerere.” (Today’s English Version) Bible ma ta dekenai unai siri ia gwau: “Diba lasi karana ese tau ta ena kara ia haheiriheiria bena Iehova ia badu henia.”​—Byington.

10. Adam ena kavakava karana be edena bamona “ena dala ia hakererea”?

¹⁰ Unai aonega hereva ena anina bada hegeregerena, Adam be sibona ena ura ia tahua bona ena lalohadai kavakavana ese sibona “ena dala ia hakererea.” Iena kudouna be Iehova Dirava dekena amo ia siri, bona sibona ena ura ia tahua, sibona ena dala ia abia hidi. Oibe, Adam ese Dirava ia moalelaia lasi, ia gwau ia vara kererena be Havaraia Diravana ena kerere bona unai ia herevalaia neganai ia be Atai Herea Diravana ena inai tauna ta ai ia lao! Adam ia kara dika neganai ia bona ena ruma bese taudia edia dala ia hadikaia. Unai be sisiba namona ita dekenai! Dika karadia idia vara neganai bema haida idia gwau unai be Iehova ena kerere, namona be sibona dekenai idia gwau: Lau moalelaia namo gaudia dainai lau ese Dirava lau hanamoa, a? Lau moale lau be ia havaraia mauri tauna ta dainai, a? Lau sibona egu kerere dainai hekwarahi lau davaria, a? Iehova ena lauma helaga siahuna amo iena Hereva, Bible ena hakaua herevana lau badinaia dainai lau dekenai namo eiava heduru ia henia be maoro, a?

Dirava Ena Hesiai Taudia Ia Hakereredia Danu

11. Keristen ginigunadia edia nega lalonai, Iuda tomadiho gunalaia taudia edia lalohadai kerere Dirava dekenai be dahaka?

¹¹ Keristen ginigunadia edia nega lalonai, Iuda tomadiho gunalaia taudia idia gwau Dirava idia hesiai henia, to iena hereva momokani idia dadaraia bona sibodia edia aonega dekenai idia tabekau. (Mataio 15:​8, 9) Iesu Keriso ese edia lalohadai kerere ia hahedinaraia dainai, idia hamasea. Murinai, iena hahediba taudia dekenai badu dikadika karana idia hahedinaraia. (Kara 7:​54-60) Unai taudia edia lalohadai idia kerere momokani dainai, idia be Iehova dekenai idia badu dikadika.​—Kara 5:​34, 38, 39 itaia danu.

12. Keristen kongregesen lalonai haida ese hekwakwanai idia davaria neganai, dahaka ese ia hahedinaraia idia ura Iehova dekenai unai kerere idia atoa?

¹² Keristen kongregesen lalonai danu taunimanima haida be dika ia havaraia lalohadai kereredia idia abia, idia gwau idia davaria hekwakwanaidia be Dirava ena kerere. Hegeregere, kongregesen ta lalonai elda dagina idia abia taudia idia laloa ia maoro headava hahine ta dekenai Bible ena sisiba be hebogahisi bona gari lasi dalana amo idia henia, badina ia ese Witness lasi tauna ia turana henia dainai. Nega ta idia kiki hebou neganai, ia gwau unai tau ia turana henia noho ena hetoho ia hanaia lasi badina Dirava ese ia durua lasi, ia gwau unai be Dirava ena kerere. Ia gwau Dirava dekenai ia badu! Ia laloa namonamo totona Bible ena hereva momo idia henia bona nega momo idia durua toho, to ia ura lasi kamonai, bona gabeai ia sihari kava noho dainai Keristen kongregesen murimurinai idia atoa.

13. Dahaka dainai maumau karadia ita dadaraia be namo?

¹³ Tau ta be hanaihanai ia maumau neganai, daudau lasi murinai do ia gwau Iehova ese unai kerere ia havaraia. Keristen ginigunadia edia nega lalonai, “Dirava idia negea” taudia be hehuni dalanai Keristen kongregesen lalonai idia vareai bona idia be unai bamona lalohadai kererena idia abia, bona lauma dalanai lalohadai dikadia ma haida danu idia abia. Hahediba tauna Iuda ia gwau bamona, unai taudia be “Dirava ena hariharibada idia hadibaia kerere, edia lebulebu karadia do idia karaia diba totona. Inai taudia ese iseda Lohiabada Iesu Keriso, iseda Biaguna tamona, idia negea vadaeni.” Danu Iuda ia gwau: “Unai dika taudia ese haida edia kara idia maumauraia noho, bona ma haida idia gwauraia kerere.” (Iuda 3, 4, 16) Iehova ena ura idia badinaia aonega taudia be idia guriguri moale toana idia hahedinaraia totona, idia ura lasi maumau toana idia hahedinaraia badina unai kara ese edia lalona ia ania bona edia abidadama karana Dirava dekenai bona edia hebamo karana ia dekenai ia haboioa diba.

14. Bema edia Keristen bamona ta ena kara ese edia lalona ia hahisihisia neganai reana dahaka do idia karaia, to dahaka dainai unai be dala maorona lasi?

¹⁴ Reana oi laloa oi dekenai unai do ia vara diba lasi. To, iseda kara eiava haida edia kara dainai kerere ia vara neganai, reana do ita laloa unai be Dirava ena kerere. Hegeregere, tau ta be ena Keristen bamona ena hereva eiava ena kara dainai ia lalohisihisi diba. Ia lalohisihisi tauna​—ia be Iehova ena ura ia badinaia daudau tauna unai—​reana do ia gwau: ‘Bema unai tau be kongregesen lalonai ia noho, lau be hebou dekenai do lau mai lasi.’ Bema ena lalohisihisi be bada herea reana ena kudouna dekenai do ia gwau: ‘Bema inai kara do ia idau lasi, lau ura lasi kongregesen lalonai lau noho.’ To Keristen tauna ta be unai bamona ia laloa be maoro, eiava? Bema goevadae lasi tauna ta ena kara dainai goevadae lasi tauna ma ta ia lalohisihisi, ia lalohisihisi tauna ena badu be kongregesen taudia iboudiai dekenai ia hahedinaraia be namo lasi, badina Dirava ese unai taudia ia lalo-namo henidia bona iena ura idia badinaia dainai hesiai gaukara idia karaia, ani? Iehova dekenai idia gwauhamata taudia be iena ura idia badinaia karana idia hadokoa bona unai amo Dirava idia badu henia be maoro lasi, ani? Tau ta eiava kara ta ese oiemu hebamo kara namona Iehova dekenai ia hadikaia be aonega lasi karana, ani? Momokani, herevana dahaka badina ta dainai Iehova Dirava tomadiho henia karana ita rakatania unai be kavakava karana bona ia be kara dikana ta.​—Iakobo 4:17.

15, 16. Diotrefe ena kerere be dahaka, bona Gaio ese dahaka ia karaia?

¹⁵ Namona be inai oi laloa, oi bona mai ena lalokau Keristen tauna Gaio danu kongregesen tamona lalonai umui noho. Ia be “gaukara namo herea” ia karaia ia ese vadivadi ekalesia taudia ia abidia dae neganai​—bona madi unai taudia ia diba lasi danu! To unai kongregesen tamona lalonai, hekokoroku tauna Diotrefe ia noho danu. Ia be hemataurai lasi karana dekenai Iesu Keriso ena aposetolo tauna Ioane ena hereva ia dadaraia. Oibe, Diotrefe be mai ena hereva dika danu Ioane ia maumauraia. Unai aposetolo tauna ia gwau: “Inai sibona lasi, to ekalesia varavara taudia idia vadivadi gwauraia neganai, [Diotrefe be] idia ia abia dae lasi. Ma inai vadivadi taudia idia ura abia dae taudia edia dala be Diotrefe ese ia koua. Ma ia ese unai abia dae kara taudia ekalesia dekena amo ia atodia siri gwauraia danu.”​—3 Ioane 1, 5-10.

¹⁶ Bema Ioane be unai kongregesen dekenai do ia mai, ia ese Diotrefe ena kara do ia laloatao. Unai kara ia vara noho lalonai, unai kongregesen dekenai Gaio bona heabidae Keristen taudia ma haida edia lalohadai be dahaka? Bible ese ia hahedinaraia lasi idia gwau: ‘Bema Diotrefe be kongregesen lalonai ia noho, ai be ai ura lasi ai mai. Ai oi davaria lasi hebou dekenai.’ Reana Gaio bona ia bamoa taudia be idia gini goada. Dirava ena ura badinaia kara ia hadikaia gaudia idia dadaraia, bona idia be Iehova idia badu henia lasi. Oibe, idia be Satana Diabolo ena idoa dekenai idia moru lasi, to bema edia abidadama Iehova dekenai idia rakatania bona idia gwau unai be Dirava ena kerere, Satana bema moale dikadika.​—Efeso 6:​10-18.

Iehova Dekenai Oi Badu Lasi!

17. Bema tau ta dainai eiava kara ta dainai ita lalohisihisi eiava ita moale lasi, dahaka do ita karaia be namo?

¹⁷ Ena be kongregesen lalonai tau ta ena hereva eiava kara ta dainai Dirava ena hesiai tauna be ia moale lasi eiava ia lalohisihisi, to bema Iehova ena taunimanima danu ia hebou lasi, ia be sibona ena dala ia hagagevaia. Unai bamona tauna be ia lalo-parara namonamo lasi. (Heberu 5:14) Oi be abidadama tauna ta dainai, namona be emu lalona oi hadaia hekwakwanai iboudiai do oi hanaidia totona. Iehova Dirava, Iesu Keriso, bona Keristen kongregesen edia ura oi badinaia noho. (Heberu 10:​24, 25) Mauri hanaihanai ia havaraia hereva momokanina be ma gabu ta dekenai oi davaria diba lasi.

18. Ena be nega haida Dirava ena kara ena anina ita lalo-pararalaia lasi, to Iehova Dirava dekenai dahaka ita diba?

¹⁸ Inai oi laloatao danu, Iehova ese dika karadia amo taunimanima ia tohodia lasi. (Iakobo 1:13) Dirava be lalokau, kara namodia ia karaia, bona ia idia lalokau henia taudia dekenai kara namo bada ia hahedinaraia. (1 Ioane 4:8) Ena be nega haida Dirava ena kara ita lalo-pararalaidia lasi, to ita diba Iehova Dirava be nega ibounai iena hesiai taudia edia namo ia tahua. Petro ia gwau: “Dirava ena imana goadana henunai do umui manau, vadaeni iena nega namona lalonai ia ese umui do ia abia isi. Ia ese umui ia naria noho. Unai dainai emui laloa hekwarahi gaudia ibounai iena imana dekenai do umui atoa.” (1 Petero 5:​6, 7) Oibe, Iehova ese ena taunimanima ia naridia namonamo.​—Salamo 94:14.

19, 20. Ena be hedibagani ita davaria dainai ita lalo-metau, to dahaka ita karaia noho be namo?

¹⁹ Unai dainai, gau ta eiava taunimanima ta ese oi do ia hahekwakwanaia karana oi dadaraia. Salamo torea tauna ena hereva namona ta ia gwau: “[Iehova Dirava ena] taravatu idia ura henia taudia be maino badana idia abia, gau ta ese do ia hahekwakwanaidia diba lasi.” (Salamo 119:165) Ita ibounai be hedibagani ita abia, bona nega haida unai hedibagani dainai reana ita lalo-metau bona ita moale lasi. To namo lasi emu kudouna lalonai oi badu, namo lasi Iehova oi badu henia. (Hereva Lada-isidia 4:23) Iena heduru bona Bible ena heduru amo, idia vara hekwakwanaidia oi hanaidia toho, bona oi hanaidia diba lasi gaudia oi haheaukalaidia noho.​—Mataio 18:​15-17; Efeso 4:​26, 27.

²⁰ Namo lasi emu kudouna ena ura ese oi ia veria bena kavakava karana oi karaia bona unai amo emu dala do oi hagagevaia. Emu hereva bona kara namodia amo Dirava ena kudouna oi hamoalea. (Hereva Lada-isidia 27:11) Heduru abia totona, emu kudouna amo Iehova oi guriguri henia, badina oi diba oi be iena hesiai tauna ta dainai oiemu namo ia tahua, bona iena taunimanima danu mauri dalana dekenai oi raka noho totona lalo-parara oi dekenai do ia henia. (Hereva Lada-isidia 3:​5, 6) Gau badana be, Dirava oi badu henia lasi. Kerere idia vara neganai, namona be oi laloatao unai be Iehova ena kerere lasi.

Edena Bamona Do Oi Haere?

◻ Lot ena kerere be dahaka, to Dirava be Lot edena bamona ia laloa?

◻ David ena lalohadai kara kereredia bona hekokoroku karadia dekenai be dahaka?

◻ Kerere ia vara neganai, dahaka dainai ita gwau lasi unai be Dirava ena kerere be gau badana?

◻ Dahaka ese ita ia durua Iehova badu henia karana ita dadaraia totona?

[Picture on page 15]

Abraham amo ia siri neganai, Lot ia abia hidi tanona be namo lasi do ia noholaia totona