Iehova Oi Badu Henia Lasi

1, 2. Dahaka dainai ita gwau diba tanobada dekenai idia vara hekwakwanai be Dirava ese ia havaraia lasi? Haheitalai gwauraia.

MANI inai oi laloa, oi bona emu adavana be lagani momo lalodiai emui headava umui moalelaia. To nega ta ruma dekenai oi giroa neganai, oi davaria emu kohu ibounai, sea, teibolo, TV, sosipani, mereki, kapusi be ta ese ia hamakohidia bona kapet ia darea. Emu ruma hairaina be disasta ta ese ia hadikaia bamona. Daika dekenai kerere do oi atoa? Do oi gwau, “Dahaka dainai egu adavana be inai ia karaia?” Eiava do oi gwau, “Daika ese inai ia karaia?” Reana oi ese henanadai iharuana do oi gwauraia, badina oi diba emu adavana lalokauna be unai bamona do ia karaia lasi.

² Hari ita itaia tanobada be dagedage bona matabodaga karadia amo ia honu. Danu tano, ranu bona hodahoda be idia miro. To Baibel ita stadilaia dainai ita diba, unai hekwakwanai idauidau be Iehova ese ia havaraia lasi. Ia ese inai tanobada ia karaia paradaiso ai ia lao totona. (Gen. 2:8, 15) Iehova be lalokau Diravana. (1 Ioa. 4:8) Baibel ita stadilaia karana amo ita diba daika ese tanobada ai idia vara hekwakwanai idauidau ia havaraia. Ia be Satani Diabolo, “tanobada ena lohia tauna.”—Ioa. 14:30; 2 Kor. 4:4.

3. Edena dala ai iseda lalohadai ia kerere diba?

³ To, iseda hekwakwanai ibounai be Satani ese ia havaraia lasi. Dahaka dainai? Badina idia haida be ita sibona ese ita havaraia. (Deuteronomi 32:4-6 duahia.) Ena be unai ita abia dae, to ita be goevadae lasi taudia dainai, iseda lalohadai ia kerere diba bona unai ese dika ia havaraia diba. (Aon. 14:12) Reana do ita gwau, iseda hekwakwanai be Satani eiava ita sibona eda kerere lasi, to Iehova ese ia havaraia. Reana, ‘Iehova do ita badu henia’ danu.—Aon. 19:3, NW.

4, 5. Edena dala ai Keristani tauna be ‘Iehova ia badu henia’ diba?

⁴ Momokani ita be ‘Iehova ita badu henia’ diba, a? Unai bamona ita karaia be kavakava karana. (Isa. 41:11) Badina badu karana ese namo ta do ia havaraia lasi. Ane torea tauna ta ia gwau: “Emu imana ia kwadogi dainai, Dirava ida oi boksini be hegeregere lasi.” Reana do ita gwau lasi ita be Iehova ita badu henia, to Aonega Herevadia 19:3 (NW) ia gwau: “Tau ta be ena kavakava karana ese ena dala ia hakererea, bona unai neganai ena kudouna ai Iehova ia badu henia noho.” Momokani, ta be ena kudouna ai Iehova ia badu henia, bona ena kara amo unai ia hahedinaraia diba. Hegeregere, kongrigeisen heboudia bona haroro gaukara do ia rakatania.

⁵ Dahaka gaudia dainai reana ‘Iehova ita badu henia’ diba? Edena dala ai unai tarapu ita dadaraia diba? Unai henanadai edia haere ita diba be namo, unai amo iseda hetura karana Iehova Dirava ida ita gimaia diba!

DAHAKA GAUDIA DAINAI REANA ‘IEHOVA ITA BADU HENIA’ DIBA?

6, 7. Dahaka dainai Mose ena negai, Israela taudia be Iehova dekenai idia maumau?

⁶ Dahaka gaudia dainai Iehova ena hesiai tauna ta be ena kudouna ai, Dirava ia badu henia diba? Hari, unai gaudia faiv do ita herevalaia, bona Baibel lalonai Iehova idia badu henia taudia haida edia sivarai do ita herevalaia danu.—1 Kor. 10:11, 12.

⁷ Haida edia maumau herevadia ese ita idia hakaua kerere diba. (Deuteronomi 1:26-28 duahia.) Iehova ese Israela taudia be Aigupito amo ia hamauria sivaraina mani oi laloa. Ia ese hoa dalanai hisihisi ten be Aigupito dekenai ia havaraia, bona unai murinai Farao bona ena tuari taudia be Davara Kakana ai ia hamasedia. (Eso. 12:29-32, 51; 14:29-31; Sal. 136:15) Dirava ena taunimanima be kahirakahira Gwauhamata Tanona ai do idia vareai. To, unai mai anina bada negana ai, Israela taudia be Iehova dekenai idia maumau. Dahaka dainai edia abidadama ia manoka? Badina spai taudia ten ese ripoti dikana idia henia, unai dainai idia gari. (Num. 14:1-4) Dahaka ia vara? Unai uru be unai “tano namona” dekenai idia vareai lasi. (Deu. 1:34, 35) Unai sivarai amo dahaka ita dibaia? Ita danu be ma haida edia maumau herevadia dainai, eda abidadama ia manoka bona Iehova dekenai ita maumau diba.

8. Dahaka dainai Isaia ena negai, Iuda taudia idia gwau Iehova ese edia hekwakwanai ia havaraia?

⁸ Metau bona hekwakwanai idauidau ese eda abidadama idia hamanokaia diba. (Isaia 8:21, 22 duahia.) Isaia ena negai, Iuda taudia be dika bada idia davaria. Edia inai taudia ese edia hanua idia koua hagegea, aniani be lasi bona idia hitolo bada. To, hekwakwanai badana be inai: Idia be Lohiabada ena hereva totona idia hitolo bona ranu mase. (Amo. 8:11) Edia hekwakwanai hamaoromaoroa totona, Iehova ena heduru idia tahua lasi, to ‘edia king bona edia Dirava idia hereva dika henia’ matamaia. Oibe, idia gwau edia hekwakwanai be Iehova ese ia havaraia. Unai hegeregerena, bema metau eiava hekwakwanai idauidau ita davaria, reana iseda kudouna ai Iehova ita badu henia bona ita gwau, iseda hekwakwanai lalonai ita ia durua lasi.

9. Dahaka dainai Esekiela ena negai, Israela taudia be lalohadai kererena idia abia?

⁹ Sivarai ibounai ita diba lasi. Esekiela ena negai, Israela taudia be sivarai ibounai idia diba lasi dainai, idia gwau Iehova ena “dala be maoro lasi.” (Ese. 18:29) Unai be hegeregere, sibodia edia taravatu idia karaia, bona ena be idia vara gaudia edia sivarai ibounai idia diba lasi, to sibodia edia lalohadai hegeregerena Dirava idia hahemaoro henia. Edena dala ai ita danu be unai tarapu lalonai ita moru diba? Reana Baibel lalonai sivarai haida ita lalopararalaia be auka. Eiava, reana iseda mauri lalonai ia vara gauna ta ita lalopararalaia namonamo lasi. Reana unai nega ai iseda kudouna ai do ita gwau Iehova ena “dala be maoro lasi.”—Iobu 35:2.

10. Edena dala ai ta be Adamu ena haheitalai dikana ia tohotohoa diba?

¹⁰ Kara dika bona kerere ita karaia neganai, kerere be Dirava dekenai ita atoa. Matamanai Adamu ia kara dika neganai, kerere be Dirava dekenai ia atoa. (Gen. 3:12) Adamu be mai ena ura ida Dirava ena taravatu ia makohia bona ia diba dika do ia davaria. To kerere be Dirava dekenai ia atoa, badina ia gwau Dirava ese adavana dikana ia henia. Unai nega amo haida be Adamu ena haheitalai dikana idia tohotohoa, badina idia kara dika neganai kerere be Dirava dekenai idia atoa. Namona be sibona ita nanadaia, ‘Egu kerere dainai lau badu bona lalohisihisi neganai, lau laloa Dirava ena taravatu lau badinaia be auka, a?’

11. Iona ena sivarai amo dahaka ita dibaia?

¹¹ Sibona iseda namo ita laloa bada. Iehova ese Nineva taudia ia hebogahisi henidia neganai, peroveta tauna “Iona be ia badu.” (Iona 4:1-3) Dahaka dainai? Badina Iona ia laloa, bema ia perovetalaia gauna be nega korikori ai ia vara lasi, taunimanima do idia gwau ia be peroveta koikoi tauna. Iona be ena ladana ia laloa bada dainai, idia helalo-kerehai Nineva taudia ia hebogahisi henidia lasi. Ita danu be sibona eda namo ita laloa bada dainai, ‘Iehova ita badu henia’ badina dokona ia mailaia haraga lasi, a? Bema ita be lagani momo lalodiai Iehova ena dina be ia kahirakahira ita harorolaia, to unai ia do vara lasi dainai taunimanima ese ita idia kirikirilaia neganai, Iehova do ita badu henia, a?—2 Pet. 3:3, 4, 9.

‘IEHOVA BADU HENIA’ KARANA DADARAIA DALANA

12, 13. Dahaka ita karaia be namo, bema eda kudouna ai Dirava ena kara haida ita abia dae lasi?

¹² Dahaka ita karaia be namo, bema eda goevadae lasi kudouna ai Dirava ena kara haida ita abia dae lasi? Laloatao, unai bamona lalohadai ita abia be aonega karana lasi. Hari ita ese gau faiv do ita herevalaia, unai gaudia ese ita do idia durua, Iehova badu henia karana ita dadaraia totona.

¹³ Emu hetura karana Iehova ida oi hagoadaia. Bema Iehova ita tura henia namonamo, ia do ita badu henia lasi. (Aonega Herevadia 3:5, 6 duahia.) Iehova ita abidadama henia be gau badana. Danu, sibona eda aonega dekenai ita tabekau lasi, bona sibona iseda namo ita laloa bada lasi. (Aon. 3:7; Had. 7:16) Unai dala amo hekwakwanai idia vara neganai, Iehova dekenai kerere do ita atoa lasi.

14, 15. Dahaka ese ita do ia durua, unai amo ma haida edia maumau herevadia ese ita do idia hakaua kerere lasi?

¹⁴ Namo lasi haida edia maumau herevadia ese oi idia hakaua kerere. Mose ena negai, Israela taudia be badina namodia momo dainai, idia abia dae diba Iehova ese Gwauhamata Tanona ai do ia hakaudia vareai. (Sal. 78:43-53) To spai taudia ten edia ripoti dikana idia kamonai neganai, Iehova ena “siahu bada herea be idia laloaboio.” (Sal. 78:42) Bema Iehova ese ita totona ia karaia gau namodia ita laloa dobu, iseda hetura karana ia ida do ita hagoadaia. Unai amo, haida edia maumau herevadia ese Iehova amo ita do idia hapararaia lasi.—Sal. 77:11, 12.

¹⁵ Bema iseda Keristani tadikaka taihu ita lalokau henidia lasi, dahaka do ia vara? Iseda hetura karana Iehova ida ia dika diba. (1 Ioa. 4:20) Hegeregere, Arona be hahelaga tauna ena dagi ia abia neganai, Israela taudia idia maumau. To, Iehova ena matanai idia be Ia dekenai idia maumau bamona. (Num. 17:10) Unai hegeregerena, bema ita be Iehova ese ena tanobada oreana gunalaia totona ia abia hidi taudia ita maumauraia, unai be Iehova dekenai ita maumau bamona.—Heb. 13:7, 17.

16, 17. Hekwakwanai ita davaria neganai, dahaka ita laloatao be namo?

¹⁶ Namona be ita laloatao, ita dekenai idia vara hekwakwanai be Iehova ese ia havaraia lasi. Ena be Isaia ena negai Israela taudia be Iehova idia rakatania, to Ia ura idia do ia durua noho. (Isa. 1:16-19) Herevana dahaka hekwakwanai ita davaria, to goada ita abia badina ita diba Iehova be ita ia laloa bada bona ia ura ita ia durua. (1 Pet. 5:7) Oibe, ia gwauhamata ita dekenai goada do ia henia ita haheauka noho totona.—1 Kor. 10:13.

¹⁷ Iobu hegeregerena, bema haida ese ita idia kara dika henia, namona be ita laloatao unai dika be Iehova ese ia havaraia lasi. Iehova be kara maoromaoro ia ura henia, to kara dika ia inai henia. (Sal. 33:5) Iobu ena turana Elihu bamona, namona be ita laloatao: “Dirava be nega ta do ia kara dika diba lasi. Siahu Ibounai Dirava be do ia kerere lasi, lasi bona lasi momokani.” (Iobu 34:10) Iehova be ita dekenai “harihari gaudia namodia ibounai bona harihari gaudia hereadaedia ibounai” ia henia, to ita dekenai hekwakwanai ia havaraia lasi.—Iam. 1:13, 17.

18, 19. Dahaka dainai Iehova dekenai ita daradara lasi be namo? Haheitalai gwauraia.

¹⁸ Namo lasi Iehova dekenai ita daradara. Iehova be goevadae, bona iena laloa dalana ese iseda ia hereaia. (Isa. 55:8, 9) Unai dainai bema ita manau, do ita laloparara iseda diba be mai ena hetoana. (Roma 9:20) Nega momo, ita be hekwakwanai ta ena sivarai ibounai ita diba lasi. Reana emu mauri lalonai inai siri ena hereva ia momokani: “Kota dekenai toana be ena hereva ia gwauraia tauna ginigunana ena hereva be momokani, ela bona gabeai tau ma ta ia mai bona unai tauna ena hereva ia tahua.”—Aon. 18:17, New International Version.

¹⁹ Bema iseda tura namona ese ia karaia gauna ta be ita lalopararalaia lasi, o ita mamia ia be dala maorona ia badinaia lasi, maoromaoro do ita gwau ia be kerere ta ia karaia, a? Lasi. To reana do ita gwau ita be sivarai ibounai ita do diba lasi. Bema eda turana namona dekenai unai bamona ita karaia, vadaeni iseda guba Tamana ita abidadama henia be namo, badina iena lalohadai bona kara ese iseda idia hereaia!

20, 21. Dahaka dainai kerere ena badina korikori do ita laloa namonamo be namo?

²⁰ Kerere ena badina korikori do ita laloa namonamo. Namona be ita abia dae iseda hekwakwanai haida be ita sibona ese ita havaraia. (Gal. 6:7) Namo lasi Iehova dekenai kerere ita atoa. Dahaka dainai? Mani inai haheitalai ita laloa: Motuka idia sipidi momokani diba. To, bema draiva ia sipidi momokani dainai, kona ia giroa bena aksiden ia vara, do ita gwau unai be motuka ia karaia tauna ena kerere, a? Lasi! Unai hegeregerena Iehova be ita ia karaia neganai ita dekenai ura kwalimu ia henia. To, danu ia ese ita ia hadibaia abia hidi maorodia ita karaia totona. Unai dainai, bema hekwakwanai ta be ita sibona ese ita havaraia, namo lasi iseda Havaraia Tauna dekenai kerere ita atoa.

²¹ Momokani, idia vara hekwakwanai haida be iseda kerere lasi. Badina hekwakwanai haida be idia “vara kava.” (Had. 9:11) Danu, namona be ita laloatao, kara dika ena badina badana be Satani Diabolo. (1 Ioa. 5:19; Apok. 12:9) Ia be iseda inai tauna, to Iehova lasi!—1 Pet. 5:8.

EMU HETURA KARANA IEHOVA IDA OI LALOA BADA

22, 23. Bema oi be hekwakwanai haida dainai oi lalomanoka, dahaka gaudia oi laloa be namo?

²² Metau bona hekwakwanai idauidau oi davaria neganai, Iosua bona Kaleba oi lalodia be namo. Unai abidadama taudia rua be spai taudia ten bamona lasi, badina idia ruaosi be ripoti namona idia gwauraia. (Num. 14:6-9) Ena be Iehova idia abidadama henia, to madi, idia danu be lagani 40 lalonai Israela taudia ma haida ida tano gagaena ai idia loaloa. Oi laloa Iosua bona Kaleba be idia badu bona idia maumau badina idia laloa unai be maoro lasi, a? Lasi, to idia ese Iehova idia abidadama henia noho. Iehova ese idia ia hanamoa, a? Oibe! Ena be Israela taudia haida be tano gagaena ai idia mase, to Iosua bona Kaleba be gwauhamata tanona ai idia vareai. (Num. 14:30) Unai hegeregerena, bema Iehova ena ura ita karaia bona ita “hesiku lasi,” ia ese ita do ia hanamoa—Gal. 6:9; Heb. 6:10.

²³ Bema oi be hekwakwanai haida, o ma haida edia kara dika, o oi sibona emu kara dika dainai oi lalomanoka, dahaka oi karaia be namo? Namona be Iehova ena kara namodia oi laloa. Emu lalona ena matana ai Iehova ese nega vaira ai do ia karaia gau namodia oi itaia. Sibona oi nanadaia, ‘Bema Iehova be lau ia durua lasi, hari egu mauri be edena bamona?’ Nega ibounai Iehova kahirakahira do oi noho, bona emu kudouna ai Iehova oi badu henia lasi!