Basileia Haroro Ripoti

Colombia ai Lauma Dalanai Idia Ruhadia

LAGANI 400 bamona gunanai Spain taudia be South America dekenai idia lao negana amo ema bona hari, unai tano taudia momo be Katolik. Colombia ena tomadiho badana be Katolik. Idia hanaia laganidia 105 ai, Vatican bona Colombia gavamanina be mai edia gwauhamata; unai gwauhamata ese Katolik tomadiho oreana ia naria bona gwaumaoro ia henidia ediukeisini do idia henia bona headava do idia karaia.

Lagani 1991 ai, Colombia gavamanina ese konstitiusen (taravatu) matamatana idia karaia. Unai konstitiusen matamatana dainai tomadiho iboudiai edia siahu be hegeregere, bona gavamani ena sikuli ai memero kekeni idia doridia diba lasi tomadiho hadibaia kalasidia dekediai do idia lao. Edia gwauhamata, Vatican dekenai idia gwauhamatalaia gauna, do idia laloa lou, badina be konstitiusen matamatana idia karaia.

Tomadiho iboudiai edia siahu be hegeregere dainai, Katolik Dubu oreana ena siahu do ia maragi ia lao, unai dainai lalo-maoromaoro taudia ese Baibel do idia dibaia bona lauma dalanai ura-kwalimu do idia abia dalana do ia auka lasi, guna ia auka bamona.

Unai dainai Colombia ai, Iehova ena Witness taudia 51,000 ese dala idia lailaia, lauma dalanai idia ruhadia taudia do idia durudia totona. Branch rumana matamatana be kahirakahira do idia haorea; ia lalonai be printa masini badana, kala hani ia karaia gauna, do idia atoa. Special pioneer taudia haida idia siaidia lao hanua maragidia lalodiai Iehova ena mamoe, idia boio gaudia, tahudia totona, bona Baibel hadibalaidia gaukarana namona idia karaia vadaeni. Hanua 63 ai, idia ta ta ai noho taudia be 10,000 10,000 bamona, be kongregesen 47 bona grup matamatadia idia haginidia vadaeni.

Iehova ena lauma ese lalo-maoromaoro taudia ia veridia noho lalonai, memero kekeni momo ese iena hereva idia abia dae. Buka ladana Memero Kekeni edia Henanadai​—Haere Maorodia ese memero kekeni bona edia tamadia sinadia ia durudia bada. Witness tauna ta be ruma ta ruma ta dekediai ia lao neganai, tau ta ia davaria, ia ese hari buka ena hereva haida ia duahia vadaeni; ena dekena tauna ese ia henia. Ena hereva ia moalelaia, badina aonega dalana ai ruma bese edia hekwakwanai ia herevalaidia. Ia laloa bada herevana be Karoa 4, “Dahaka Dainai Tamagu bona Sinagu Idia Parara?”, badina be ia bona ena adavana idia parara gwauraia. Ia gwau hari buka ese ena headava ia hanamoa. Hari, ia mai ena ruma bese ida be Iehova ena Witness taudia ida Baibel idia stadilaia bona kongregesen heboudia iboudiai dekediai idia lao. Iehova be Baibel amo bona ena orea amo ia henidia aonegana be idia moalelaia bada.

Hari sivarai ese ia hahedinaraia, Colombia ai taunimanima be lauma dalanai idia ruhadia. Iehova ena Witness taudia ese lauma dalanai idia hitolo taudia idia durudia, Iehova ena palani namodia bona ena tanobada matamatana, kahirakahira do ia vara gauna, do idia dibaia totona.​—2 Petero 3:13.