Evanelia be Dahaka?

KERISIMASI negana lalonai, tano idauidau lalodiai taunimanima ese Evanelia herevana idia kamonai bona idia kikilaia. Evanelia be oi bona emu lalokau taudia dekenai namo do ia havaraia diba, a?

“Evanelia” ena anina be “sivarai namona,” bona momokani, Kerisimasi neganai sibona lasi sivarai namona ita ura kamonai, to nega ibounai ita ura kamonai. To Evanelia herevana be unai negai sivarai namona ta bamona lasi. Ia be sivarai namona bona hereana ta gabu ta amo ia mai bona ia be sivarai badana ta ia kikilaia. Oibe, unai hereva be Dirava amo ia mai bona ia ura taunimanima iboudiai dekenai idia harorolaia.

Eugênio Salles, Rio de Janeiro, Brazil, ena archbishop ese unai sivarai namona ia gwauraia inai hagoadaia hereva amo, ia gwau: “Namona be iseda kara lalonai Evanelia ena hereva do ita badinaia, namo lasi iseda kara lalonai taunimanima edia lalohadai ita badinaia.” Unai archbishop ena hereva be maoro. To, iseda kara lalonai Evanelia ena hereva ita badinaia totona, gau badana be Evanelia ena hereva ita diba guna. Edena bamona unai hereva do ita diba? Bona iseda kara lalonai Evanelia ena hereva ita badinaia ese ita edena bamona do ia durua?

Evanelia be Dahaka?

Nega momo Evanelia ena anina momokanina taunimanima ese idia diba lasi. Lagani 1918 ai, America dekenai, Federal Council of the Churches of Christ oreana ia gwau hari ia ore vadaeni League of Nations oreana be politikol dalanai ia be Dirava ena Basileia tanobada dekenai, bona idia gwau “ia gini Evanelia latanai.” To, League of Nations oreana ena gaukara bona Evanelia ena gaukara be idau momokani.

Idia ore vadaeni lagani haida lalodiai, tuari lalohadai idia gwauraia momo taudia ese edia lalohadai politikol karana bona taunimanima idia gaukara hebou karana hanamoa dalana idia kikilaia neganai, idia ese Evanelia herevana idia kikilaia danu. Unai bamona idia karaia neganai idia be Evanelia ena hereva momokanina idia dadaraia. Brazil ena magasin Veja lalonai, ia gwau: “Katolik Dubu be taunimanima tura henia karana bona tauani durua karana ia habadaia, to lauma dalanai ena abidadama taudia ia durudia namonamo lasi.”

Mauri dala ia namo ia lao eiava politikol orea ta ia idau be reana sivarai namona taunimanima haida dekenai. To, unai be sivarai namona momokanina lasi, ia be Evanelia momokanina lasi. Bisop ta ia gwau iena dubu be Evanelia ena hereva momokanina ia harorolaia lasi, ia gwau: “Lagani 1960 ia lao 1969 ai, lauma dalanai ai be abidadama taudia ai hadibaia namonamo lasi, badina kohu tahua momo karana ese aiemai hahediba herevadia ia hadikaia.”

Ripoti ta America ena Time magasin lalonai ia gwau Protestan dubu danu be Evanelia ena hereva idia harorolaia namonamo lasi. Unai magasin ena hereva ia gwau: “Dubu badadia be sivarai namona idia harorolaia namonamo lasi, to unai sibona lasi, badina dahaka sivarai do idia harorolaia idia daradaralaia danu.” Namona be idia harorolaia sivaraina be dahaka? Evanelia be dahaka?

Evanelia Ita Diba Dalana

Webster’s Ninth New Collegiate Dictionary bukana ia gwau “Evanelia” be “Keriso, Dirava ena basileia, bona hahemauri dalana edia sivarai.” Idia gwau unai hereva “evanelia” ena anina haida be “edia lalohadai Keristen ena sivarai (ogogami taudia durua karana) dekenai” bona “tomadiho hadibaia tauna ia gwauraia sivaraina eiava iena hahediba herevadia.” Unai hereva iboudiai be maoro, a? Lasi, Evanelia momokanina ena sivarai dekenai unai be maoro lasi. Evanelia momokanina be Bible dekena amo; unai dainai unai hereva toi amo hereva ginigunana sibona be ia maoro. Iharuana bona ihatoina be hari inai negai taunimanima edia lalohadai “evanelia” dekenai idia hahedinaraia.

Evanelia herevana ese “sivarai namona Dirava ena Basileia dekenai bona hahemauri dalana Keriso dekena amo ia hahedinaraia, bona abidadama amo idia abia, Iena mase dainai.” Unai ita lalo-pararalaia be gau badana badina diba maoromaoro sivarai namona momokanina dekenai ita abia neganai, ita ia durua harihari ita noho-namo bona dina gabediai do ita moale totona.

Ia be Sivarai Badana

Ai kikilaia vadaeni buka haida edia hereva idia hahedinaraia, Evanelia hereva be Iesu Keriso ia sivarailaia momo​—unai dainai Bible lalonai unai sivarai idia kikilaia bukadia idia gwauraidia Evanelia haniosi. Tanobada dekenai ia noho hamatamaia ena nega amo Iesu idia sivarailaia be sivarai namona.​—Luka 2:​10, 11.

Ia vara matamata merona, Iesu, ia tubu daekau neganai ia be Keriso ai ia lao, idia gwauhamatalaia Mesia tauna unai. Unai neganai ia ese Dirava ia gwauraia hahemauri dalana ia hahedinaraia, ena mauri goevadaena ia henia taunimanima ia hamauridia totona, mase amo ia toreisi lou, bena ia be Dirava ena Basileia ena Pavapava ai ia lao. Unai be Sivarai Namona momokanina! Unai dainai ia idia sivarailaia herevadia idia gwauraidia Evanelia.

Tanobada dekenai nega daudau lasi ia haroro lalonai, Iesu ese sivarai namona ia harorolaia goadagoada. Mataio Evanelia bukana lalonai ita duahia, ia gwau: “Iesu be hanua badadia bona hanua maragidia dekenai ia loaloa, edia dubu lalonai ia hadibaia karaia, Basileia ena Sivarai Namona ia harorolaia.” (Mataio 9:35) Ia haroro taunimanima edia lalona ia hamoaledia sibona totona lasi. Mareko ese Iesu ena hereva ia gwauraia, ia gwau: “Harihari be Dirava ena nega, bona Dirava ena Basileia be kahirakahira ia ginidae. Umui emui lalona umui giroa, Sivarai Namona umui abidadama henia.” (Mareko 1:15) Oibe, unai hereva idia abia dae bona idia badinaia taudia idia davaria edia mauri ia haidaua.

Iesu ia mase murinai, iena hahediba taudia ese Evanelia herevana idia harorolaia noho. Idia gwauraia gauna be, Iesu ia toreisi lou bona guba dekenai ia be Dirava ena idibana kahana dekenai ia noho, bona taunimanima dainai ia henia mauri goevadaena ena davana ia henia Tamana dekenai. Dirava ese ia abia hidi dainai ia be Dirava ena Basileia ena Pavapava bona tanobada ibounai do ia lohiaia, ia be Dirava ena Gaukara Tauna dainai ia ese Dirava idia inai henia taudia iboudiai do ia hamasedia bona tanobada dekenai paradaiso do ia havaraia lou.​—Kara 2:​32-36; 2 Tesalonika 1:​6-10; Heberu 9:​24-28; Apokalupo 22:​1-5.

Hari inai negai, unai sivarai namona ena kahana ma ta ia noho danu. Ia hedinarai goevagoeva peroveta herevadia idia guguru, harihari Iesu be Pavapava ai ia lao vadaeni bona ita be nega dokona lalonai ita noho. (2 Timoteo 3:​1-5; Apokalupo 12:​7-12) Daudau lasi Basileia ese kara ta do ia karaia Dirava ena inai taudia ia haoredia totona. Unai be sivarai namona momokani, ani?

Murina sivarai dekenai do ita itaia Evanelia ena siahu be bada herea momokani. Ia ese lauma dikadia ida ia herevahereva hahinena ta ia durua unai siahu amo ia ruhaia totona. Ia ese dibura dekenai ia noho henaohenao tauna ia durua moale ia davaria totona. Bona oi ia durua bada diba danu​—bema sivarai namona ena hereva oi abia dae bona oi badinaia.