Evanelia ese Oi Edena Bamona Ia Durua Diba?

TAUNIMANIMA momo​—Dirava ia noho idia abia dae lasi taudia danu​—be Bible idia laloa bada ena torea dalana dainai. To, idia momo lasi idia duahia badina idia ura ena hereva idia badinaia totona. Ma danu, ia gwauraia sivarai namona be lagani 2,000 bamona gunanai idia torea dainai, taunimanima momo herea idia laloa ena hereva haida do idia haidaua be namo. Ena be Evanelia be idau negai idia torea, to ita gwau ia be anina lasi hari, a? Lasi momokani.

Tatau bona hahine, memero kekeni bona buruka taudia milion momo idia diba Bible be heduru gauna hereadaena. Bible ta ladana Today’s English Version ena rau 3 dekenai, ia gwau: “Bible . . . be Sivarai Namona gabu idauidau taudia iboudiai totona​—taunimanima be ena sivarai idia lalo-pararalaia bona edia mauri lalonai idia badinaia gauna.”

Evanelia ena anina oi dekenai be dahaka? Emu mauri dinadia iboudiai lalonai ena hereva oi badinaia, a? Keristen ginigunadia edia negai bona hari inai negai sivarai namona ena hereva idia badinaia taudia idia davaria hahenamo do ita laloa.

Evanelia ese Ia Durudia Taudia

Iesu ena nega lalonai, gaukara momo taudia, hegeregere, haoda taudia bona ruma naria hahinedia be sivarai namona idia ura kamonai henia bona hereva momokani Dirava ena ura taunimanima dekenai idia diba. Sivarai namona ese edia mauri ia haidaua bada bona nega momo dika ta amo ia hanamodia. Hegeregere, Maria Magdala dekena amo demoni ia luludia. Sakaio, guna ia be takisi gogoa tauna badana ta, ese ena mata-ganigani dalana ia rakatania. (Luka 8:2; 19:​1-10) Matakepulu bona lepera taudia ese sivarai namona ia harorolaia tauna, Iesu, dekenai idia lao neganai ia durudia.​—Luka 17:​11-19; Ioane 9:​1-7; Mataio 11:5.

To, idia namo lou ia hereaia gauna be inai: Sivarai namona ese unai dika idia davaria taudia momo edia mauri dalana ia haidaua. Kudou-maoro taudia be dina vairai ena helaro idia abia. Dirava ena Basileia idia abidadama henia. (Mataio 4:23) Ena be Iesu ia mase to unai helaro idia dekenai ia do noho. Ia mase murinai idia vara sivaraidia ia kikilaia neganai, Kara 5:42 ese iena hahediba taudia edia kara be inai bamona ia gwauraidia: “Dina ibounai, Dubu Helaga lalonai bona ruma lalonai, taunimanima idia hadibaia bona Iesu Keriso ese Sivarai Namona idia gwauraia, inai gaukara idia hadokoa lasi.” Keristen ginigunadia edia nega lalonai, tano idauidau momo taudia be lauma dalanai heduru idia abia badina unai haroro herevana idia abia dae dainai.

Unai nega lalonai, sivarai iboudiai amo Basileia be sivarai namona momokanina. Harihari, Basileia be sivarai namona, a?

Hari Inai Negai Sivarai Namona Ena Anina be Dahaka?

Bema oi ura dikadika maino bona noho-namo tanobadana dekenai oi noho, vadaeni oi dekenai Basileia ena sivarai be sivarai namona momokani. Oibe, inai tanobada lalonai taunimanima milion momo edia aniani be hegeregere lasi bona idia hitolo mase, taunimanima momo be gorere dikadia idia abia diba, raskol karadia idia bada daekau, bona politikol orea idauidau idia moru, unai dainai, Basileia sibona be noho hanaihanai sivarai namona, ia sibona be taunimanima ia durudia momokani diba.

Unai dainai Iesu ese hari inai negai totona inai bamona ia peroveta, ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.” (Mataio 24:14) Unai hereva be dala namonai ia guguru Iehova ena Witness taudia ese sivarai namona be tano idauidau 200 bona ma haida lalodiai idia harorolaia dainai. Katolik magasin ta ladana Nova Evangelização 2000 be Witness taudia edia gaukara dainai ia hanamodia, ia gwau: “Iehova ena Witness taudia be edeseniai do ita davaria diba? Ruma edia iduara vairana dekenai. Ta ese Iehova ena Witness tauna ta ai do ia lao totona, ena be ia be Iehova ena orea tauna, to haroro gaukara danu ia karaia be gau badana. Unai dainai, oi itadia idia gaukara, idia haroro, idia davaria gauna idia hahedinaraia totona.”

To, sivarai namona ese taunimanima ia durudia kava diba lasi. Unai sivarai idia abia dae bona idia badinaia taudia sibona ia durudia. Unai ia hamomokania totona, Iesu ese uhe hadoa tauna ia parabolelaia. Uhe be tano idauidau dekenai ia moru ese sivarai namona idia kamonai taudia edia kudouna idia idauidau ia laulaulaia.​—Mataio 13:​18-23.

Keristen ginigunadia edia negai hegeregerena, taunimanima momo be idia hekwarahi bada lasi sivarai namona ena anina idia lalo-pararalaia totona. Ena anina idia diba lasi, bona unai dainai hahenamo idia davaria lasi. Ma haida ese sivarai namona idia moalelaia bona edia kara idia haidaua Dirava ena ura idia badinaia totona. Unai dala amo hahenamo idia davaria. Unai orea rua amo oi be edena orea lalonai oi noho?

Evanelia Ena Siahu Hari Inai Negai

Idia vara gaudia ese idia hahedinaraia goevagoeva bema sivarai namona ena anina ita abia neganai, unai sivarai ese ‘helaro lasi bona Dirava lasi taudia’ ia durudia. (Efeso 2:12; 4:​22-24) Roberto be Rio de Janeiro amo bona heduru ia abia be gau badana. Ia mero negana amo, lebulebu mai kara bodaga maurina ia manadalaia, drag ia inua, ia sihari kava, bona ia henaohenao. Gabeai idia atoa dibura rumanai. Unuseniai ia noho neganai, Roberto be ia vadivadi Witness tauna ida ia stadi. Lauma dalanai ia goada ia lao haraga dainai ena nega dibura rumana dekenai idia hamaragia.

Dibura rumana ia rakatania murinai, Roberto be guna ia dadidadi tauna neganai ia kwadia bona ena kohu ia henaoa bona ipidi amo ia hagaria kekenina ta ia davaria. Ia danu be Iehova ena Witness taudia ida Bible ia stadilaia. Dahaka ia vara? Revareva ena hereva ta ese unai sivarai ia gwauraia, ia gwau: “Unai dika ia vara murinai idia hedavari lou lasi ela bona Kingdom Hall dekenai idia vaira heheni. Mai hebogahisi danu idia hedavari heheni. Idia ruaosi be mai moale danu idia tai bona tadikaka bona taihu bamona idia herosi heheni. Guna ia henaohenao tauna bona guna unai henaohenao tauna ese ia kwadia kekenina be harihari Iehova ena ladana idia hanamoa.”

Ma ta be Isabel, ia danu heduru ia abia be gau badana, badina taunimanima momo idia diba ia be badu momo kekenina. Ia be lauma dikadia hereva henidia bona babalau karadia ia karaia momo bona demoni ese ia idia dagedage henia. Iehova ena Witness taudia ida Bible ia stadilaia neganai, ia davaria sivarai namona ese ia durua bada. Nega sisina bada ia hanai murinai, demoni edia siahu ia dekena amo ia negea bona ena kara bona lalohadai toana ia haidaua​—ena badu karana ia koua diba danu. Hari, ia be abidadama Keristen kekenina, bona taunimanima idia diba ia be hebogahisi karana amo taunimanima ia kara henidia.

Oibe, sivarai namona be hereva kava sibona lasi. Ia be mai ena siahu taunimanima edia mauri ia haidaua totona. (1 Korinto 6:​9-11) To, unai mo sibona ia karaia lasi. Ia ese dina gabedia dekenai do idia vara hahenamo ia gwauraia hedinarai danu.

Do Idia Vara Hahenamodia

Dirava ena Hereva ia gwau dina gabedia dekenai hahenamo momo do idia vara. Iesu ia guriguri Dirava ena Basileia do ia mai bona Iena ura tanobada dekenai do ia vara guba dekenai ia vara bamona, bona unai hereva ia guguru do ita itaia. (Mataio 6:10) Daudau lasi murinai, hari inai nega dikana mai ena kara bodaga bona dagedage karadia do idia ore, bona Dirava ena guba gavamanina, iena Basileia unai, ese kudou-maoro taudia, sivarai namona idia badinaia taudia do ia lohiadia.​—Daniel 2:44.

Mai edia abidadama taudia be hahegani do idia abia inai tanobada be paradaiso gabunai do idia halaoa, bona manau taudia do idia noholaia ela bona hanaihanai totona. Unai neganai namo bada do ia vara. (Salamo 37:​11, 29) Momokani, dagedage, gorere, doe, tanobada hamiroa karadia, bona tuari do idia ore vaitani be sivarai namona! Namona be oi laloa, oi bona emu ruma bese taudia be maino bona tauanina goada dekenai unai tanobada matamatana lalonai do umui noho diba, bona gorere eiava mase garina do umui gari lasi.​—Apokalupo 21:4.

Momokani, taunimanima momo idia laloa unai sivarai namona be hereva badana lasi eiava idia laloa do ia vara diba lasi. To idia lalohadai kerere. Gau momo ese sivarai namona idia hamomokania, bona taunimanima milion momo edia mauri ia haidaua vadaeni. Unai dainai, taunimanima ma haida ese unai hereva idia abia dae lasi neganai oi lalo-hekwarahilaia lasi.

Inai oi laloa: Bema tau ta be ruma momo lasi gabuna dekenai tano sisina ia hoia, badina ia ura gabeai unai tano ia hoia neganai moni sisina bada do ia abia totona, taunimanima do idia gwauhenia unai dala amo ena moni ia negea dainai, a? Lasi. Reana, taunimanima do idia gwau unai be aonega karana. Vadaeni, namona be Basileia oi laloa namonamo bona sivarai namona oi hoia bamona, ani? Sivarai namona abia dae karana ese hahemauri do ia havaraia, ma gau ta ena namo ese unai namo ia hanaia diba lasi.​—Roma 1:16.

Sivarai namona amo edena bamona namo do oi davaria diba? Gau ginigunana be, oi ura Dirava ese oi ia hadibaia. Bena oi diba gaudia oi badinaia. Heberu peroveta tauna ia gwauraia taravatudia oi badinaia, ia gwau: “Taunimanima e, ia ese oi ia hamaoroa vadaeni, kara namona be dahaka. Iehova ese oi dahaka ia noia? Gauna inai: Oi hahemaoro goevagoeva, hebogahisi oi ura henia, bona emu Dirava oi ura henia bona emu Dirava ida oi noho hebou mai emu manau ida.” (Mika 6:8) Nega ita atoa bona ita hekwarahi noho karana amo Dirava ida ita noho hebou dalana ita diba. To, Iehova ena Witness taudia, Roberto bona Isabel idia durua taudia unai, be mai moale danu oi idia ura durua danu​—lagani momo lalodiai taunimanima milion momo idia durudia bamona.

Dirava ena gwauhamata herevadia edia guguru negana oi naria noho lalonai, namona be emu mauri lalonai sivarai namona ena hereva oi badinaia, bona emu tura karana Dirava dekenai oi habadaia. Oi tahua gauna do ia boio lasi. To dokonai, oi dekenai namo bada do ia havaraia. Unai be dahaka? Aposetolo Ioane ia torea, ia gwau: “Tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.”​—1 Ioane 2:17.

[Picture on page 7]

Sivarai namona uhedia be tano idauidau dekenai idia moru

[Credit Line]

Garo Nalbandian