Nash Papyrus ena Namo

HEBERU Bible bukana gunana idia torea laganina be ta ese edena bamona ia davaria diba? Lagani 1948 ai, Doketa John C. Trever ese unai ia lalo-hekwarahilaia, Isaia Bukana, Dead Sea (Tadi Gohuna) ai idia davaria gauna ia itaia matamata neganai. Buka ena Heberu revarevadia edia toana ia laloa momo. Ia diba unai revareva amo buka ena lagani do ia davaria diba, to dahaka ida do ia hahegeregeredia diba? Gau korikorina ia davaria, Nash Papyrus unai. Nash Papyrus pepana be dahaka, bona edeseni amo ia mai?

Nash Papyrus be ia hedare pepana ena kahana maragidia hani mai edia laini 24 Heberu revarevadia ai; ena bada be 7.5 × 12.5 cm. Unai pepa ena ladana na Biblical Archaeology Oreana ena seketere, W. L. Nash ena ladana idia hatoa, badina lagani 1902 ai ia ese Egypt tauna ta ena amo ia hoia. Lagani 1903 ai S. A. Cooke ese unai orea ena buka ta ladana Proceedings lalonai Nash Papyrus revarevana ia halasia bena unai pepa be Cambridge University Library idia henia bona unuseniai ia do noho, England ai. Hari papyrus pepana ena namo be ena lagani. Diba taudia idia gwau lagani 100 bamona idia do noho ela bona Iesu be tanobada ai ia vara neganai ta ese ia torea; unai dainai ia be guna, idia davaria Heberu revarevadia oredia be gabeai.

Doketa Trever ese Nash Papyrus ena kala slaid piksa be ia abia bukana ida ia hahegeregerea neganai, leta ta ta edia toana ia itaia namonamo. Momokani, idia be hegeregere. Unai amo ia hamomokania Isaia Bukana, Dead Sea ai idia davaria gauna, be lagani 100 bamona idia do noho ela bona Iesu ia vara neganai idia torea gauna.

Nash Papyrus ena Anina

Nash Papyrus revarevana idia sekea neganai, idia davaria ena laini 24 ta ta iboudiai edia matamana bona edia dokona ai hereva ta eiava leta haida idia boio. Ena anina be Taravatu Ten, Esodo karoa 20 amo, bona Deuteronomi karoa 5 bona 6 edia siri haida. Ia be Bible bukana lasi, to ena anina ena toana be hadibaia herevadia idauidau, Iehova ese Iuda taudia ia henidia madunana hahelalolaidia herevadia. Deuteronomi 6:4 ai ia matamaia herevana ladana Shema be idia torea loulou; ia gwau: “Israel e, oi kamonai: Iehova iseda Dirava be Iehova tamona.”

Unai siri ai Heberu letadia YHWH, “Iehova” unai, be papyrus ena laini ginigabena ai nega rua idia hedinarai bona ma gabu idauidau ima ai danu. Ma nega ta ia hedinarai, mai ena leta ginigunana lasi.

Shema ena hereva ese ia hahedinaraia goevagoeva “Dirava be tamona mo.” Jewish Talmud (Berakoth 19a) ena hahegani hegeregerena, Shema ena hereva ginigabena, ʼE·chadhʹ (“Tamona”), idia duahia hedinarai neganai, “namona be ena kahana ta ta idia gwauraia goevagoeva.” (W. O. E. Oesterley bona G. H. Box) Unai amo idia hahedinaraia Dirava be idau vaitani.

Hari inai negai, buka momo, Nash Papyrus hegeregerena gaudia, be idia davaridia, Dead Sea konena ai, Qumran kahirakahira. Idia sekedia namonamo neganai, idia davaria idia momo be lagani 100 bamona idia do noho ela bona Iesu ia vara neganai idia toredia. Ena be unai Heberu bukadia haida ese Nash Papyrus idia gunalaia, to ia be do mai ena namo. Ta ese unai nega gunana ai ia torea bena Egypt ai idia davaria bukana tamona be unai.