Ita Ia Karaia Diravana Badana bona Iena Gaukara

HEREADAE! Sinavai ranudia idia moru gabudia Iguaçú bona Niagara ai, koupa dobudia Arizona bona Hawaii ai, ororo padadiai davara ia aru vareai gabudia Norway bona New Zealand ai—unai idia itadia taudia ese idia hoalaidia! Unai gau idia vara kava lasi, to Dirava, iseda Tamana mai ena lalokau, guba ai ia noho, ese ia karadia. King Solomon ese Dirava inai bamona ia gwauraia: “Ia ese gau iboudiai ia hahairaidia vadaeni, ta ta ena nega ena nega ai. Ia ese nega hanaihanai na taunimanima edia lalodia ai ia atoa, idia ese Dirava momokanina ena gaukara, matamana ela bona dokona, do idia davaria diba lasi totona.” (Kohelete 3:11) Momokani, Dirava ese ia karadia gaudia mai hairaidia ibouboudiai, guba ai bona tanobada ai, be taunimanima ese do idia davaridia totona do idia hekwarahi ela bona hanaihanai.

Ita moale bada badina be ita ia karaia Diravana mai ena siahu ibounai ese “inai dina dokodia neganai . . . iena Natuna dekena amo ita ia hereva henia. Iena natuna dekena amo Dirava ese tanobada ibounai ia karaia.” (Heberu 1:2) Ena Natuna, Iesu Keriso, ese ena Tamana ia karadia gaudia mai hairaidia ia lalodia bada. Nega momo ia parabolelaidia, ena Tamana ena palani ia gwauraidia negadiai, bona lalona hagoadaia herevadia ia gwauraidia negadiai danu. (Mataio 6:​28-30; Ioane 4:​35, 36) ‘Abidadama dainai’ momo idia diba “Dirava ena hereva ese tanobada bona guba ia karaia.” (Heberu 11:3) Namona be iseda noho daladia ese unai abidadama idia hahedinaraia.​—Iakobo 2:​14, 26.

Iseda Dirava ese ia karadia gaudia be hereadae. Idia ese ena aonega, ena siahu, ena kara maoromaoro, bona ena lalokau idia hahedinaraidia. Ia ese tanobada ia ha-egea bona ia karaia dina do ia heaua hegege totona, unai amo taunimanima ese lahara bona laurabada negadia do idia moalelaidia diba. Dirava ia gwau: “Tanobada ia noho neganai, hadoa nega bona geia nega do ia noho. Keru nega bona siahu nega, kaukau nega, medu nega, dina bona hanuaboi, inai be do idia doko lasi.” (Genese 8:22) Dava bada gaudia, hegeregere, auri, kapa, bona unai bamona gaudia momo be tano lalonai ia atodia. Ranu bada danu ia atoa, mauri gaudia bona tubutubu gaudia edia mauri badina unai.

‘Gaukara dinadia sikis,’ idia ta ta edia lata be lagani tausen tausen, lalodiai “Dirava ena Lauma” ese tanobada ia hegaegaelaia, taunimanima ese do idia noholaia totona. Diari, hodahoda, tano kaukauna, au bona ava, dina bona hanuaboi, gwarume, manu, bona animal​—idia iboudiai be edia nega korikori ai Dirava ese ia karadia, taunimanima durudia totona bona hamoaledia totona. (Genese 1:​2-25) Salamo tauna ia hereva hegeregerena ita danu ita hereva diba; ia gwau: “Iehova e, oi karadia gaudia be momo herea! Iboudiai be mai emu aonega ida oi karadia. Oi karadia gaudia ese tanobada idia hahonua.”​—Salamo 104:24.

Dirava ese Ia Karaia Gauna Hereadaena

Gaukara ‘dinana’ namba sikis ena dokona kahanai, Dirava ese tau ia karaia bena hahine danu. Iena gaukara hereadaena unai! Salamo 115:16 ia gwau: “Guba be Iehova ena gabu, to tanobada be ia ese taunimanima edia natudia ia henidia.” Unai hegeregerena, Iehova ese taunimanima ia karadia, tanobada ai ia karadia guna gaudia do idia gaukaralaidia bona do idia moalelaidia totona. Namona be Dirava ita tanikiu henia, badina be iseda matadia​—kamera namo hereana idia hereaia momokani gaudia​—ese kala idauidau idia itaia diba! Iseda taiadia​—taunimanima ese idia karaia saun masinina idia hereaia gaudia​—dainai taunimanima edia hereva, miusik, bona manu edia tai ita moalelaidia diba. Iseda maladia dainai ita hereva diba. Iseda maladia ese mamina idauidau idia mamidia diba bona iseda udu baubaudia ese bonana idauidau idia bonaia diba dainai, aniani idauidau ita moalelaidia. Iseda lalokau tauna ta ese ita ia daua toho neganai unai mamina ita moalelaia danu! Namona be ita ia karaia Diravana ita tanikiu henia, salamo torea tauna ia kara hegeregerena; ia gwau: “Oi do lau hanamoa, badina be gari bona hoa havaraia dalanai lau oi karaia. Oiemu gaukara be namo herea; unai lau diba momokani.”​—Salamo 139:14.

Dirava ena Hebogahisi

Salamo torea tauna ia gwau: “Iehova umui hanamoa, badina be ia be namo . . . Sibona hoa bada karadia ia karaia Diravana umui hanamoa, badina be ena hebogahisi be ia hesiriu hanaihanai.” (Salamo 136:​1-4) Hari inai negai, unai hebogahisi dainai ia ese hoa karadia hereadaedia ia karaia noho. Ena be tanobada bona ena anina karaia gaukarana amo ia laga-ani, to lauma dalanai gau matamatadia ia karadia, samani herevana koikoina ta do ia hakoikoia totona.

Dirava ese tau bona hahine ginigunadia be paradaiso gabuna, Eden ai ia hanohodia. To, gwau-edeede aneruna ta, Satana, ese edia lalodia ia anidia dainai, Iehova idia gwau-edeede henia. Dirava ese ia hahemaoro henidia, ia gwau do idia mase. Edia kara dainai edia bese, taunimanima iboudiai unai, be kara dika ai idia vara bona idia mase. (Salamo 51:5) Iobu ena sivarai Baibel lalonai ese ia hahedinaraia Satana ese Dirava ia samania, ia gwau hedibagani lalonai ta ese Dirava do ia badinaia noho lasi. To Iobu bona Dirava ena hesiai taudia momo mai edia kamonai ese edia kara amo idia hamomokania Satana be koikoi tauna badana. (Iobu 1:​7-12; 2:​2-5, 9, 10; 27:5) Tau goevadaena, Iesu, ese Dirava badinaia goevagoeva dalana ia hahedinaraia.​—1 Petero 2:​21 -23.

Iesu ia gwau: “Tanobada ena lohia [Satana] . . . be lau dekenai mai ena siahu lasi.” (Ioane 14:30) To, “Satani ese tanobada taudia ibounai ia gunalaia noho” ema bona hari. (1 Ioane 5:19) Satana ese Iehova ena lohia siahuna ia hepapahuahulaia, unai dainai Dirava ese lagani 6,000 bamona ia henia, sibona ena lohia dalana ena namo do ia hamomokania toho totona. To, tanobada ai dika ia bada ia lao ese ia hamomokania ia kwalimu lasi! Nega daudau lasi, iseda Dirava Iehova ese inai tanobada oromana dikana do ia kokia, bena ia ese tanobada do ia lohiaia. Unai ese maino bona lohia dalana maorona idia ura henia taudia do ia hanamodia!​—Salamo 37:​9-11; 83:​17, 18.

Unai sibona lasi! Dirava ese ena hebogahisi do ia hahedinaraia, Iesu ena hereva Ioane 3:16 ai dainai; ia gwau: “Dirava ese inai tanobada [taudia] ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” Dirava ese mauri hanaihanai tanobada ai taunimanima do ia henidia lou totona, namona be gau matamatadia ia karadia. Idia be dahaka? Idia ese idia ganagana taudia edena bamona do idia durudia? Hereva gabena ese unai ia gwauraia.