Noho Hanaihanai King Do Umui Hanamoa!
“Lohiabada be do ia King ela bona hanaihanai.”—SALAMO 10:16.
HANAIHANAI—ena anina be dahaka oi dekenai? Oi laloa nega be momokani do ia hesiriu ela bona hanaihanai, a? Momokani, nega be mai ena matamana lasi. Unai dainai ia be mai ena dokona lasi, ani? Momokani, New World Translation Baibel ia gwau, Dirava idia hanamoa “gunaguna negana amo ema, ela bona hanaihanai.” (Salamo 41:13) Unai hereva ena anina be dahaka? Ita lalo-pararalaia totona, namona be ma gau ta ita laloa. Gauna be—guba.
2 Guba ena bada be edena bamona? Ia be mai ena hetoana, a? Gunaguna taunimanima idia laloa tanobada be guba ena bogaragina korikorina ai. Bena lagani 400 idia lao vadaeni, Galileo ese teleskoup ia karaia. Unai gau amo ia ese ma hisiu momo ia itaia diba, bona ia hahedinaraia diba tanobada bona planeti ma haida ese dina idia heaua hegege. Taunimanima ese idia davaria, guna idia itaia goevagoeva diba lasi gaudia be hisiu oreana ta ladana Milky Way, ia lalonai be hisiu bilioni momo. Ita ta be ena mauri negana ibounai lalonai unai hisiu ia duahidia diba lasi. Gabeai, edia teleskoup badadia amo hisiu oreadia bilioni bilioni idia davaria guba ai, idia be mai dokona lasi. Toana be guba be mai ena hetoana lasi. Vadaeni, nega hanaihanai danu be unai bamona—ia be mai ena hetoana lasi.
3 Toana be ita taunimanima eda darana idia hegeregere lasi, nega hanaihanai ena anina do ita lalo-pararalaia. To, ia lalo-pararalaia vaitani Tauna ta ia noho. Ia ese hisiu bilioni momo herea edia orea bilioni bilioni lalodiai ia duahia diba, bona edia ladana ia hatoa diba danu! Unai Tau ia gwau: “Emui matana do umui negea, guba do umui itaia. Daika ese hisiu ia karaia? Dirava ese edia orea be ta ta, dekena amo idia ia mailaia hedinarai, bona idia ta ta ibounai edia ladana ia atoa noho. Iena siahu be bada herea dainai, hisiu ta ia boio diba lasi. Umui diba lasi, a? Umui kamonai lasi, a? Lohiabada be noho hanaihanai Diravana. Ia be tanobada ena kahana ibounai ia karaia vadaeni Diravana. Ia be manoka o hesiku diba lasi. Iena diba be ta ese do ia davaria diba lasi.” (Isaia 40:26, 28) Ia be Dirava hereadaena! Momokani, namona be ita ura unai Dirava ita tomadiho henia!
“King ela Bona Hanaihanai”
4 Salamo 10:16 ai, Davida ese gau iboudiai ia karaia Diravana ia gwauraia, ia gwau: “Lohiabada be do ia King ela bona hanaihanai.” Bona Salamo 29:10 ai, ma ia gwau: “Lohiabada be iena terona dekenai ia helai noho, bona do ia King ela bona hanaihanai.” Oibe, Iehova be noho hanaihanai King! Inai danu, Davida ese ia hamomokania hari King hereadaena ese guba padana ai ita itaia gaudia iboudiai edia oromadia ia laloa davari bena ia karadia. Salamo 19:1 ai ia gwau: “Guba ese Dirava ena hairaina ia hedinaraia, bona guba dekenai noho gaudia ese, Dirava ia karaia gaudia idia hedinaraia noho.” Lagani 2,700 bamona murinai, saiens tauna mai ladana bada, Sir Isaac Newton, ese Davida ena hereva ia hamomokania, ia gwau: “Dina, planeti bona kometi edia orea hereadaena ia vara diba dalana tamona be, lalo-diari Diravana mai ena siahu bada ese ena palani hegeregerena bona ena lohia siahuna amo ia havaraia.”
5 Atai Herea Lohiabadana Iehova be noho hanaihanai Diravana, “guba, bona guba ena ataiai momokani be hegeregere lasi [iena] noho gabuna.” (1 King Taudia 8:27) Unai ita diba dainai namona be ita manau! Isaia 45:18 dekenai Baibel ia gwau, Iehova ese “guba ia karaia. . . . Ia ese tanobada ia karaia, bona tanobada ena toana, be Dirava ese ia henia.” Dirava be aonega ena badina; iena aonega ena bada be taunimanima ese idia lalo-pararalaia diba lasi. Korinto Ginigunana 1:19 ese ia hahedinaraia hegeregerena, Iehova ia gwau: “Lau ese aonega taudia edia aonega do lau haorea, bona diba bada taudia edia diba do lau negea.” Bena 1 Ko 1 siri 20 lalonai aposetolo Paulo ia gwau: “Aonega taudia be edeseni? Diba bada taudia edeseni idia noho? Inai tanobada ena dala idia herevalaia diba momo taudia be edeseni? Dirava ese ia hedinaraia inai tanobada ena aonega be kavakava sibona!” Oibe, 1 Ko karoa 3, siri 19 dekenai Paulo be ma ia hereva hegeregerena, “Inai tanobada ena aonega be kavakava, Dirava ena vairana dekenai.”
6 Guba gaudia bona ma gau haida be King Solomona ese ia gwauraia, ia gwau: “[Dirava] ese gau iboudiai ia hahairaia vadaeni, ta ta ena nega ena nega ai. Ia ese nega hanaihanai edia lalona ai ia atoa, taunimanima ese Dirava momokanina be matamana ela bona dokona ia karaia gaukarana do idia davaria diba lasi totona.” (Hadibaia Tauna 3:11, NW) Oibe, Dirava ese “nega hanaihanai” ena anina dibaia toho urana be taunimanima edia lalona ai ia atoa. To do idia dibaia diba, a?
Helaro Namo Hereana
7 Iesu Keriso ese Iehova ia guriguri henia, ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” (Ioane 17:3) Unai diba be edena bamona ita abia diba? Namona be Dirava ena Hereva, Buka Helaga, ita stadilaia. Unai amo ita ese Dirava ena palani badadia ita dibaia goevagoeva diba. Iena palani ta be, iena Natuna ena amo dala ia karaia, taunimanima ese mauri hanaihanai paradaiso tanobadana ai do idia abia. Unai mauri be 1 Timoteo 6:19 (NW) ese ia gwauraia “mauri korikori.” Ia be Efeso 3:11 ese ia gwauraia palanina hegeregerena; “Dirava ese gunaguna inai bamona palani ia laloa karaia, bona hari iseda Lohiabada Keriso Iesu ena gaukara dekena amo, inai palani ia karaia haorea vadaeni.”
8 Oibe, Dirava ena hahediba amo bona Iesu ena boubou gauna abidadama henia karana amo, ita goevadae lasi taudia ese mauri hanaihanai do ita abia diba. Dirava ese taunimanima do ia hadibaia ela bona edena negai? Ita ia karaia Diravana ese ena aonega be taunimanima do ia hadibalaidia ela bona hanaihanai. Iehova ena aonega be mai hetoana lasi. Aposetolo Paulo be unai ia diba dainai, ia gwau: “Dirava ena namo bona iena hariharibada be bada bona bada herea, ani? Iena aonega bona iena laloa dobu be edena bamona ita tahua diba? Iena dala be daika ese do ia davaria diba?” (Roma 11:33) Momokani, 1 Timoteo 1:17 ese Iehova be “Noho Hanaihanai King” ia gwauraia be maoro!
Iehova Ena Aonega
9 Noho hanaihanai King ese ita ia henia gauna namona mani oi laloa. Salamo 115:16 ia gwau: “Guba be Lohiabada sibona ese ia biagua noho, to tanobada be Lohiabada ese taunimanima dekenai ia henia.” Ita ia henia gauna be namo herea, ani? Oibe! Bona ita ia karaia Diravana ese tanobada be do ita noholaia totona ia hegaegaelaia guna dalana be ita laloa bada, ani!—Salamo 107:8.
10 Dirava ena gaukara ‘dinadia’ 6, Genese karoa 1 ese ia gwauraia dinadia, lalodiai, ia ese gau namodia momo ia karaia tanobada dekenai. Unai dina ta ta ena lata ena lata be lagani tausen haida. Dirava ese gau iboudiai ia karaia ore neganai, rei bona uda bona palauapalaua mai edia kala idauidau ese tanobada ena kopina idia koua. Davara ai gwarume bona ma gau idauidau momo herea idia noho, bona tanobada ai be roho manudia mai hairaidia bona boroma idauidau, ubua gaudia bona uda gaudia, idia “ta ta edia orea, edia orea hegeregerena” edia natudia idia havaraia. Tau bona hahine ia havaraia sivaraina murinai, Genese 1:31 ia gwau: “Dirava ese ia karaia vadaeni gaudia ibounai ia itaia, bona momokani idia be namo herea.” Unai taunimanima ginigunadia ruaosi edia noho gabuna be namo herea momokani! Unai ibounai lalonai Dirava ena aonega, ena diba, ena naria karana, bona ena lalokau ita itaia, ani?—Isaia 45:11, 12, 18.
11 Noho hanaihanai King ena aonega ia hoalaia tauna ta be Solomona. Gau iboudiai ia karaia Diravana ena aonega ia gwauraia loulou. (Aonega Herevadia 1:1, 2; 2:1, 6; 3:13-18) Solomona ese ita ia hamaoroa “tanobada be ia matamata lasi. Guna ia noho hegeregerena ia noho.” Ia ese Dirava ia karaia gaudia idauidau ia laloa bada. Unai gau ta be ori ese tanobada idia hanamoa lou karana. Unai dainai ia gwau: “Sinavai ibounai be davara dekenai idia heau lao noho, to davara be ia honu lasi. Sinavai idia heau hamatamaia gabudia dekenai edia ranu be ma idia heau hamatamaia lou noho.” (Hadibaia Tauna 1:4, 7) Unai hegeregerena, medu bona sinavai ese tanobada idia hanamoa lou murinai, edia ranu be davara amo ia daekau lou, ori ai ia lao. Bema ranu hagoevaia bona gaukaralaia loulou karana be lasi, inai tanobada ena toana be edena bamona, bona iseda noho be edena bamona?
12 Dirava ese ia karaia gaudia idia gaukara hebou karana ita laloa bada dainai, namona be iseda kara amo unai ita hahedinaraia, King Solomona be Hadibaia Tauna bukana ena dokona ai ia hereva hegeregerena; ia gwau: “Egu hereva ibounai oi kamonai vadaeni, to egu hadibaia hereva dokona, sisiba badana be inai: Dirava do oi gari henia, bona iena oda do oi badinaia, badina be taunimanima edia gaukara korikori be unai sibona. Dirava ese iseda kara ibounai do ia kota henia, kara namodia bona kara dikadia, hunia dekenai ita karaia gaudia danu.” (Hadibaia Tauna 12:13, 14) Namona be ita gari Dirava do ita habadua garina, bona ita kamonai henia mai eda hemataurai bada ida.
13 Momokani, noho hanaihanai King ese ia karaia gaudia namodia dainai, namona be ita ura ita hanamoa! Salamo 104:24 ia gwau: “Lohiabada e, oi ese gau ibounai oi karaia vadaeni. Mai oiemu aonega bada danu idia ibounai oi karaia. Inai oi ese oi karaia gaudia ibounai ese, inai tanobada idia hahonua momokani.” Namona be unai salamo Sal 104:35 ena siri ginigabena hegeregerena ita ta ta be mai eda moale ida do ita gwau: ‘Iehova do lau hanamoa bada,’ bona ma haida do ita hamaoroa, do ita gwau: ‘Iehova do umui hanamoa!’
Tanobada Gauna Hereadaena
14 Iehova ese ia karaia gaudia iboudiai be namo herea. To tanobada ai ia karaia gauna namo hereana be ita—taunimanima. Iena gaukara dinana namba 6 ena dokona ai, Adamu ia karaia guna, bena Heva ia karaia—idia ese gwarume, manu, bona boroma idia hereaia momokani! Unai animal momo be vaia idia aonega herea, to taunimanima be mai edia lalo-parara, mai edia lalona, maoro bona kerere edia toana do idia diba totona, bona idia be nega vaira totona palani idia karaia diba, bona idia ura momokani ta do idia tomadiho henia. Unai ibounai be edena bamona ia vara? Taunimanima be animal edia amo idia vara lasi, to Dirava ese sibona ena laulau hegeregerena ia karadia. Unai hegeregerena, taunimanima sibodia mo ese ita ia karaia Diravana ena kara idia tohotohoa diba. Ia be sibona inai bamona ia gwauraia: “Lau be Lohiabada. Lau Lohiabada be bogahisihisi bona hariharibada Diravana. Lau be badu dekenai lau haraga lasi, to bogahisihisi bona lalokau dekenai lau be haraga.”—Esodo 34:6.
15 Namona be Iehova ita tanikiu henia bona ita hanamoa, iseda tauanina edia oromana namo hereana dainai. Iseda rara, iseda mauri ia durua bada gauna, be miniti ta ta iboudiai iseda varovaro lalodiai ia heau loulou. Deuteronomi 12:23 ia hereva hegeregerena, “mauri be rara ena lalona dekenai ia noho”—ia be gau hereana Dirava ena matana ai. Tauanina lalonai be turia aukadia, idia marere diba masolodia, bona hemami varovarodia, bona kwara harana ese ia biagudia. Taunimanima edia kwara haradia ese animal edia idia hereaia momokani, bona ta ena kwara harana ena gaukara ena bada ese kompiuta bada hereana ta ena gaukara ia hereaia. Unai oi laloa neganai, oi manau, a? Oi manau be namo. (Aonega Herevadia 22:4) Bona inai danu mani oi laloa: Iseda baragina, eda gado baubauna, eda malana, eda isena, bona eda uduna idia gaukara hebou, unai dainai taunimanima be gado idauidau tausen tausen ai idia hereva diba. Davida ese ane amo Iehova ia hanamoa, ia gwau: “Oi lau tanikiu henia, badina mai hoa danu lau oi karaia. Oiemu kara ibounai be mai hoa bona gari danu. Lauegu kudouna dekenai, inai bamona lau diba momokani.” (Salamo 139:14) Namona be Davida ida Iehova ita hanamoa bona ita tanikiu henia, badina be ia be iseda oromana laloa davari Tauna bona iseda Dirava!
16 Lagani 200 bamona idia lao vadaeni, Joseph Haydn ese ia torea anena ta ai Iehova ia hanamoa, ia gwau: “Umui ia karaia gaudia namo hereadia e, Ia umui tanikiu henia! Iena dagi umui anelaia, Ena hairai umui anelaia, Ena Ladana umui hanamoa bona umui abia isi! Iehova do idia hanamoa ela bona hanaihanai, Amen, Amen!” Bona Salamo ai idia torea herevadia ese unai ane ena hereva idia hereaia. Salamo 107:8, 15, 21, 31 namba 107 lalonai ta ese nega hani inai bamona herevadia ia torea: “Idia ese Lohiabada do idia tanikiu henia be namo, iena lalokau badana dainai, badina be ia ese kara namodia momokani idia dekenai ia karaia.” Oi danu be unai hahenamo anena oi abia, a? Namona be oi abia, badina be hairai momokani gaudia iboudiai be Iehova, noho hanaihanai King, ena amo.
Unai Idia Hereaia Karadia
17 Idia hanai laganidia 6,000 lalodiai, noho hanaihanai King ese kara bada hereadia ia hamatamaia. Baibel ena buka ginigabena lalonai, Apokalupo 15:3, 4 ai, lauma dikadia idia hadarerea taudia guba lalonai edia kara sivaraina ita duahia: “Idia ese Dirava ena hesiai tauna Mose ena ane idia abia, bona Mamoe ena Natuna ena ane danu. Inai ane be inai bamona ia gwau, ‘Lohiabada Dirava e, Siahu Ibounai Dirava e, oiemu gaukara be bada herea momokani. Oiemu hoa karadia be idau momokani. Oi be bese ibounai edia King! Oiemu kara ibounai be maoromaoro bona momokani. Lohiabada e, daika ese oi dekenai do ia gari henia lasi? Daika ese oiemu ladana do ia hanamoa lasi? Badina be oi sibona be helaga. Bese ibounai oi dekenai do idia mai, oi dekenai do idia tomadiho henia, badina be oiemu kara maoromaoro be ibounai idia itaia vadaeni.’ ” Badina be dahaka unai ane be ‘Mose bona Mamoe ena Natuna edia ane’ ia gwauraia? Mani ita tahua.
18 Lagani 3,500 bamona idia lao vadaeni, Farao ena tuari oreana mai goadana be Davara Kakakakana ai idia mase neganai, ane amo Israela taudia ese Iehova idia tanikiu henia bona idia hanamoa. Esodo 15:1, 18 ia gwau: “Mose bona Israela taudia ese inai ane idia abia, Lohiabada ena, idia gwau: Lau be ane do lau abia, Lohiabada ena, badina be ia kwalimu herea vadaeni. Hosi bona idia guia taudia, be davara dekenai ia negea diho vadaeni. Lohiabada e, oi be do oi King ela bona hanaihanai.” Unai noho hanaihanai King ese iena lohia siahuna idia dadaraia taudia ia hahemaoro henia bona edia davana ia henia neganai, iena hahegani maorodia idia hedinarai.
19 Dahaka dainai unai ia vara be namo? Eden umana lalonai Gaigai ese koikoi amo iseda tubudia roboadia be kara dika lalonai ia hakaua vareai. Unai dainai kara dika be taunimanima iboudiai dekenai ia hanai. To noho hanaihanai King ena palani ginigunana hegeregerena, maoromaoro dala ia karaia matamaia, iena inai taudia iboudiai be tanobada amo do ia kokia bona paradaiso ena namo do ia havaraia lou totona. Unai do ia karaia dalana hahedinaraia totona, noho hanaihanai King ese Israela besena ia havaraia bona ena Taravatu ia henia.—Galatia 3:24.
20 To, gabeai, Israela besena ese Dirava ia kamonai henia lasi, bona ena dika ia bada ia lao ela bona dokona ai ena gunalaia taudia ese Dirava ena Natuna, ia sibona ia havaraia Natuna tamona, be Roma taudia idia henia, do idia hahisia bona do idia hamasea totona. (Kara 10:39; Filipi 2:8) To Iesu ia kara maoromaoro, ela bona “Dirava ena Mamoe Natuna,” boubou gauna, bamona ia mase; unai amo ia ese Dirava ena idaunegai Inai Tauna, Satani, ena hereva be dala badana ai ia hakoikoia. Satani ia gwau, hedibagani aukana lalonai taunimanima ta lasi ese Dirava do ia badinaia noho diba. (Ioane 1:29, 36; Iobu 1:9-12; 27:5) Ena be Adamu ena kara dika dainai taunimanima iboudiai idia goevadae lasi, to Dirava idia gari henia taudia milioni milioni be Iesu ena aena gabudia ai idia raka, bona Satani ese ia hadikadia negadiai idia kara maoromaoro noho.—1 Petero 1:18, 19; 2:19, 21.
21 Iehova ese unai kamonai taudia edia davana namona do ia henidia bona hereva momokani bona kara maoromaoro idia inai henia taudia iboudiai do ia hahemaoro henia negana be hari ia ginidae. (Kara 17:29-31) Unai be edena bamona do ia vara? Hereva gabena ese unai do ia hahedinaraia.
Riviu Mauana
◻ Dahaka dainai Iehova be “Noho Hanaihanai King” idia gwauraia be maoro?
◻ Iehova ese ia karaia gaudia lalodiai, ena aonega be edena bamona ia hedinarai?
◻ Edena dala idauidau ai taunimanima be Dirava ese ia karaia gauna hereadaena?
◻ Dahaka kara dainai ‘Mose bona Mamoe ena Natuna edia ane’ idia abia be namo?
[Study Questions]
1. Nega hanaihanai be edena bamona ita henanadailaia?
2, 3. (a) Dahaka dainai guba ita laloa be namo, nega hanaihanai ita laloa goevagoeva totona? (b) Dahaka dainai namona be ita ura noho hanaihanai King do ita tomadiho henia?
4. (a) Davida ese noho hanaihanai King be edena bamona ia hanamoa? (b) Saiens tauna badana ta ese guba bona tanobada idia vara dalana edena bamona ia laloa?
5. Isaia bona Paulo ese aonega henia Diravana be edena bamona idia gwauraia?
6. Hadibaia Tauna 3:11 ese “nega hanaihanai” be edena bamona ia gwauraia?
7, 8. (a) Taunimanima ese dahaka gau namo hereana do idia abia diba, bona edena dala amo? (b) Dirava ese do ia hadibadia ela bona hanaihanai—dahaka dainai unai ita moalelaia be namo?
9, 10. (a) Iehova ese tanobada ia hegaegaelaia taunimanima do ia henia totona neganai, dahaka gaukara badadia ia karaia? (b) Iehova ena aonega hereadaena be ia karaia gaudia lalodiai edena bamona ia hedinarai? (Maua itaia.)
11. Solomona ese Iehova ena aonega be edena bamona ia gwauraia?
12, 13. Edena bamona ita hahedinaraia diba Dirava ese ia karaia gaudia ita laloa bada?
14. Dirava ese taunimanima edena bamona ia karaia dainai animal idia hereadia momokani?
15. Dahaka dainai namona be Iehova ita hanamoa mai eda manau ida?
16. Miusiki tauna ta mai ladana bada ese Iehova be ane amo edena bamona ia hanamoa, bona dahaka hereva hegeregerena Iehova do ita hanamoa be namo?
17. ‘Mose bona Mamoe ena Natuna edia ane’ ese Iehova ena ladana be edena bamona ia abia isi?
18. Esodo karoa 15 ai, dahaka kara badana idia anelaia?
19, 20. (a) Dahaka dainai Iehova ese Israela besena ia havaraia? (b) Mamoe ena Natuna bona ma haida ese Satani ena hereva edena bamona idia hakoikoia?
21. Kara 17:29-31 hegeregerena, stadi gabena lalonai dahaka do ita herevalaia?
[Box on page 12]
Iehova Ena Aonega Hereadaena
Noho hanaihanai King ena aonega be dala idauidau momo amo ia hedinarai, tanobada ai ia karaia gaudia lalodiai. Aguru ena hereva mani oi laloa: “Dirava ena hereva ibounai be goeva momokani, bona Dirava ese ia dekenai idia heau mauri taudia, ia naria bona gimaia noho.” (Aonega Herevadia 30:5) Bena Aguru ese Dirava ia karaia mauri gaudia momo, badadia bona maragidia, ia gwauraia. Siri 24 ela bona 28 lalonai, ia ese gau hani ia herevalaia, “tanobada dekenai idia maragi momokani, to idia be aonega herea.” Gaudia be dimairi, mada, kwadi, bona vaboha.
“Aonega herea”—oibe, animal be unai bamona. Gau idia lalodia lasi taunimanima ese idia lalodia bamona, to Dirava ese ia henidia aonegana idia gaukaralaia. Nega ta unai oi hoalaia, a? Idia gaukara hebou namonamo diba! Dimairi be edia orea ta ta ai idia gaukara hebou, unai orea ta ta lalodiai be kwini ta, gaukara dimairidia, bona dimairi maruanedia danu. Edia bese haida ai, gaukara dimairidia ese magu idia haginidia bena manumanu ladana eifid be idia hakaudia vareai. Unuseniai edia rata idia abia, bona tuari dimairidia ese edia inai taudia idia lulua. Aonega Herevadia 6:6 ena sisiba be inai: “Lahedo taudia ese, dimairi edia kara bamona do idia karaia be namo.” Unai hereva dainai ita taunimanima ese ‘Lohiabada ena gaukara do ita karaia goadagoada’ be namo, ani?—1 Korinto 15:58.
Taunimanima ese peleini badadia idia karaia. To manu maragimaragina ta ladana haminibedi, ena metau be gram 30 henunai gauna, bona ma manu haida ese peleini idia hereaia! Boeing 747 peleinina ta be gadobada ia hanaia neganai, ia be mai ena bensini lita 180,000, bona idia hadibaia vadaeni taudia edia orea ese reidio bona kompiuta amo ena heau dalana idia badinaia. To, aniani sisina, gram tamona, amo haminibedi manuna maragimaragina ena goada be hegeregere, North America amo do ia roho lao, Gulf of Mexico do ia hanaia, bena do ia roho ela bona South America. Ena bensini metauna be lasi, ta ese ena roho dalana davaria dalana ia hadibalaia lasi, ia be mai ena mapu lasi bona mai ena kompiuta lasi! Ena diba be evolusen amo ia vara kava, a? Lasi vaitani! Unai manu maragimaragina ia karaia Diravana, Iehova Dirava, ese aonega ia henia dainai, ia be unai bamona ia aonega herea.
[Picture on page 10]
“Noho hanaihanai King” ia karaia gaudia idauidau ese ena hairai idia hahedinaraia
[Picture on page 15]
Mose bona Israela ibounai ese Iehova ena kwalimu Davara Kakakakana ai be idia moalelaia hegeregerena, Aramagedono murinai moale bada do ia vara